Манеәләри дәф ет: өзүнү јарарсыз һисс едәндә
1. Нәјә ҝөрә бәзиләри инсанлара Мүгәддәс Китабы өјрәнмәји тәклиф етмәкдән чәкинирләр?
1 Мүгәддәс Китабы еффектив шәкилдә өјрәдә билмәјәҹәјиндән горхараг кимәсә Аллаһын Кәламыны өјрәнмәји тәклиф етмәкдән чәкинирсәнми? Кечмишдә Аллаһын Муса вә Јеремја кими садиг хидмәтчиләри дә өзләрини алдыглары тәјината јарарсыз һесаб едирдиләр (Чых. 3:10, 11; 4:10; Јер. 1:4—6). Онларын нүмунәси ҝөстәрир ки, белә һиссләр кечирмәк тәбиидир. Бәс бу һиссин өһдәсиндән неҹә ҝәлмәк олар?
2. Нәјә ҝөрә јалныз евдән-евә тәблиғ етмәклә кифајәтләнәрәк Мүгәддәс Китаб өјрәнмәси кечирмәји бојнумуздан атмамалыјыг?
2 Ҝәлин унутмајаг ки, Јеһова биздән һеч вахт баҹардығымыздан артығыны тәләб етмир (Мәз. 103:14). Демәли, биз шаҝирд һазырламаг вә онлары өјрәтмәк тапшырығыны јеринә јетирә биләрик (Мат. 28:19, 20). Јеһова бу үстүнлүјү тәкҹә ән тәҹрүбәли вә ја ән габилијјәтли оланлара вермир (1 Кор. 1:26, 27). Буна ҝөрә дә јалныз евдән-евә тәблиғ етмәклә кифајәтләнәрәк Мүгәддәс Китаб өјрәнмәси кечирмәји бојнумуздан атмамалыјыг.
3. Мүгәддәс Китабы өјрәтмәк габилијјәтини Јеһова бизә һансы үсулларла верир?
3 Габилијјәтимиз Јеһовадандыр. Шаҝирд һазырламаг габилијјәтимиз Јеһовадандыр (2 Кор. 3:5). О, тәшкилаты васитәсилә бизә һәтта бу дүнјанын бир чох тәһсилли адамларынын билмәдији Мүгәддәс Китаб һәгигәтләрини өјрәдиб (1 Кор. 2:7, 8). О, бизим Бөјүк Мүәллим Исанын тәлим вермәк үсулларындан өјрәнә билмәјимиз үчүн онларын гәләмә алынмасынын вә горунуб сахланылмасынын гејдинә галыб. Һәмчинин О, бизә јығынҹаг васитәсилә даима тәлим вермәјә давам едир. Үстәлик, Јеһова Мүгәддәс Китабы өјрәтмәк үчүн бизә лазыми материаллар тәгдим едир. О, бизә «Мүгәддәс Китаб өјрәдир» китабы кими аләтләр вериб ки, һәгигәти мәнтигли вә асан баша дүшүлән тәрздә өјрәдәк. Әслиндә, Мүгәддәс Китабы өјрәтмәк дүшүндүјүмүздән дә асан ола биләр.
4. Јеһованын бизә көмәк едәҹәјинә нә үчүн әмин ола биләрик?
4 Муса вә Јеремја өз тапшырыгларыны Јеһованын көмәји сајәсиндә јеринә јетирирдиләр (Чых. 4:11, 12; Јер. 1:7, 8). Ејнилә, биз дә Јеһовадан көмәк диләјә биләрик. Бундан әлавә, кимәсә Мүгәддәс Китабдан Јеһова һаггында һәгигәтләри өјрәдәндә Онун ҝөзүндә хош оланы етмиш олуруг (1 Јәһ. 3:22). Буна ҝөрә дә ән севиндириҹи вә мүкафатландырыҹы ишдә — Мүгәддәс Китабы өјрәтмәк ишиндә иштирак етмәји гаршына мәгсәд гој.