Мүгәддәс Китаб өјрәнмәси башламағы гаршына мәгсәд гој

¹ «Ҝөзләринизи галдырын, бичилмәк үчүн ағармыш тарлалара бахын» (Јәһ. 4:35). Иса Мәсиһин дедији бу сөзләр Падшаһлығын хидмәтчиләринин инди гаршылашдығы вәзијјәтә ујғундур.

² Јеһованын јолларыны өјрәнмәк истәјән сәмими инсанлар һәлә дә тапылыр. Бу, һәр ил вәфтиз олунан јени шаҝирдләрин сајындан ҝөрүнүр. Мүгәддәс Китаб өјрәнмәси кечирмәји сәмими гәлбдән истәјирсәнсә, нә едә биләрсән?

³ Гаршына мәгсәд гој. Илк нөвбәдә, Мүгәддәс Китаб өјрәнмәсинә башламағы вә ону мүнтәзәм олараг кечирмәји гаршына мәгсәд гој. Тәблиғ хидмәтиндә иштирак едән заман мәгсәдини һәмишә јадында сахла. Бизә верилән тапшырыг тәблиғ етмәклә јанашы, өјрәтмәји дә өзүнә дахил едир. Буна ҝөрә дә, һамымыз шаҝирд һазырламаг ишиндә даһа чох иштирак етмәк үчүн имканлар ахтармалыјыг (Мат. 24:14; 28:19, 20).

⁴ Даһа нәји јадда сахламаг лазымдыр? Падшаһлығын тәблиғчиләринин үрәкдән дуа етмәләри олдугҹа ваҹибдир. Бә’зән хидмәтдә раст ҝәлдијимиз инсанлар Аллаһы танымаг үчүн дуалар етмишләр. Белә инсанлары тапмагда вә онлары өјрәтмәкдә Јеһованын биздән истифадә етмәси әсл хејир-дуадыр! (Һаг. 2:7; Һәв. иш. 10:1, 2).

⁵ Бир баҹы дуа етмишдир ки, Мүгәддәс Китаб өјрәнмәси олсун. Сонра о, иш јолдашларына «Мүгәддәс Китаб һаггында даһа чох билмәк истәјәрдинизми?» трактатыны пајлады. Бир гадын трактаты охудугдан сонра купону долдураркән баҹы она јахынлашыб сөһбәт ачды вә өјрәнмәјә башламаға мүвәффәг олду.

⁶ Мүгәддәс Китаб өјрәнмәләринә башламагда вә апармагда уғур газанан диҝәр тәблиғчиләр мәгсәдинә чатмаға көмәк едә биләрләр. Һәгигәтлә марагланан бир кимсәни тапмаг үчүн Аллаһа дуа ет вә мәгсәдинә чатмагда көмәк едән һәр шејдән истифадә ет. Ола билсин, сән тезликлә өјрәнмә кечирмәјин севинҹини јашајаҹагсан.