«Неҹә динләдијинизә диггәт верин»

ДИНЛӘМӘК өјрәнмәк үчүн ваҹиб амилдир. Бу һәмчинин инсанын сағ галмасында да рол ојнаја биләр. Јеһова халгыны Мисир көләлијиндән хилас етмәјә һазырлашанда Мусаја ҝөстәришләр верди. Муса да илк оғулларынын һәјатыны өлүм мәләјинин әлиндән хилас етмәк үчүн исраиллиләрин нә етмәли олдугларыны халгын ағсаггалларына сөјләди (Чых. 12:21-23). Сонра ағсаггаллар бу хәбәри һәр евә чатдырдылар. Бүтүн бунлар шифаһи шәкилдә һәјата кечирилдијиндән, халг диггәтлә гулаг асмалы иди. Онлар буна неҹә һај вердиләр? Мүгәддәс Китабда дејилир: «Рәбб Мусаја вә Һаруна неҹә әмр етмишдисә, Исраил өвладлары да белә етдиләр» (Чых. 12:28, 50, 51). Бунун сајәсиндә, Исраил халгы мөһтәшәм бир гуртулушун шаһиди олду.

Бу ҝүн Јеһова бизи даһа бөјүк гуртулуша һазырлајыр. Онун вердији ҝөстәришләрә сон дәрәҹә диггәтли олмалыјыг. Һәмин ҝөстәришләр бизә јығынҹаг ҝөрүшләри васитәсилә верилир. Бу ҝөрүшләрдән там сурәтдә фајдаланырсанмы? Чох шеј неҹә гулаг асмағындан асылыдыр.

Ҝөрүшләрдә верилән тәлимин әсас фикирләри јадында галырмы? Бу тәлимләри һәр һәфтә һәјатында тәтбиг етмәјә, јахуд башгалары илә бөлүшмәјә фүрсәт ахтармаға вәрдиш етмисәнми?

Үрәјини һазырла

Јығынҹаг ҝөрүшләриндә верилән тәлимдән там фајдаланмаг үчүн бизә үрәјимизи һазырламаг лазымдыр. Јәһуда падшаһы Јеһошафатын һакимијјәти илләриндә баш верән һадисә бунун ваҹиблијини вурғулајыр. Јеһошафат ҹәсарәтлә һәгиги ибадәтин мүдафиәсинә галхмышды. О, «сәҹдәҝаһлары вә Ашера бүтләрини Јәһудадан ҝөтүрдү», рәисләрә, левилиләрә вә каһинләрә Јәһуданын бүтүн шәһәрләриндә халга Јеһованын Ганунуну өјрәтмәји тапшырды. Бунунла белә, «сәҹдәҝаһлар арадан галдырылмады» (2 Салн. 17:6-9; 20:33). Сәҹдәҝаһларда јалан аллаһлара вә дүзҝүн олмајан тәрздә Јеһоваја ибадәт етмәк о дәрәҹәдә дәрин көк салмышды ки, онлара сон гојмаг мүмкүн олмады.

Јеһошафатын тәшкил етдији тәлим програмынын тәсири нә үчүн узун чәкмәди? Һәмин мәлуматда дејилир: «Халг һәлә үрәјини аталарынын Аллаһына һазырламамышды» (КМ). Онлар ешидирдиләр, амма ешитдикләринә ујғун һәрәкәт етмирдиләр. Бәлкә дә, фикирләширдиләр ки, Јеһоваја гурбан ҝәтирмәк үчүн Јерусәлимдәки мәбәдә ҝетмәк чәтиндир. Һәр неҹә олса да, онларын үрәјиндә иман јох иди.

Шејтан дүнјасына гајытмамаг үчүн үрәјимизи Јеһованын бу ҝүн вердији тәлими алмаға һазырламалыјыг. Бу неҹә мүмкүндүр? Ваҹиб үсуллардан бири дуа етмәкдир. Руһани тәлими миннәтдарлыгла гәбул етмәк үчүн дуа етмәлијик (Мәз. 27:4; 95:2). Бу, бизә көмәк едәҹәк ки, гејри-камил олсалар да, Јеһованын Өз халгына тәлим вермәси үчүн өзләрини тәгдим едән гардашларын әмәјини гијмәтләндирәк. Бу, бизи тәкҹә јени өјрәндијимиз јох, һәмчинин чохдан өјрәндијимиз шејләри даһа чох гијмәтләндирмәк имканына ҝөрә Јеһоваја миннәтдар олмаға тәшвиг едәҹәк. Аллаһын ирадәсини там сурәтдә јеринә јетирмәји арзулајараг дуа едирик: «Ја Рәбб, мәнә јолуну ҝөстәр... Гәлбими сәмими ет, гој Сәнин исминдән горхум» (Мәз. 86:11).

Диггәтини ҹәмлә

Диггәтлә динләмәјимизә чох шеј мане олур. Нараһатлыглар дүшүнҹәләримизә һаким кәсилә биләр. Залда вә ја бајырда олан сәс-күј вә һәр һансы бир һәрәкәт диггәтимизи јајындыра биләр. Јахуд да насазлыг уҹбатындан диггәтимизи ҹәмләшдирмәк чәтин олар. Әлиушаглы валидејнләр дә ҝөрүрләр ки, тез-тез диггәтләри јајыныр. Програма диггәтлә гулаг асмаға нә көмәк едә биләр?

Диггәтин һара ҹәмләнмәсиндә ҝөзләр мүһүм рол ојнајыр. Она ҝөрә дә, диггәтинин натигдә олмасы үчүн она бах. О, Мүгәддәс Китабдан ајә охујанда, һәтта таныш ајә олса белә, өз китабында онун охудугларыны излә. Чалыш ки, һәр сәс ҝәлән, һәрәкәт олан тәрәфә чөнүб бахмајасан. Әҝәр фикрини јајындыран шејләрә бахсан, сәһнәдән тәгдим олунан мәлуматын чохуну тута билмәјәҹәксән.

Әҝәр һәр һансы ‘нараһатлыг’ диггәтини програма ҹәмләмәјә мане олурса, Јеһоваја дуа ет ки, диггәтлә гулаг асмағын үчүн үрәјини вә дүшүнҹәләрини сакитләшдирсин (Мәз. 94:19; Филип. 4:6, 7). Лазым ҝәләрсә, тәкрар-тәкрар дуа ет (Мат. 7:7, 8). Јығынҹаг ҝөрүшләрини Јеһова тәсис едиб. Буна ҝөрә дә әмин ола биләрсән ки, О, сәнин ҝөрүшләрдән фајдаланмағыны истәјир (1 Јәһ. 5:14, 15).

Мәрузә сөјләнәндә

Јәгин ешитдијин мәрузәләрдән мараглы фикирләри јадына сала биләрсән. Анҹаг мәрузәјә гулаг асмаг садәҹә мараглы фикирләри гејд етмәкдән даһа бөјүк мәна кәсб едир. Мәрузә сәјаһәтә бәнзәјир. Јол боју ҝөзәл јерләр ҝөрсәк дә, әсас мәсәлә ҝетдијимиз јерә, мәгсәдә чатмагдыр. Буна бәнзәр тәрздә, натиг дә динләјиҹиләри мүәјјән гәнаәтә ҝәлмәјә, јахуд онлары һансыса һәрәкәтә тәшвиг етмәјә чалышыр.

Ҝәл Јешуанын Јешуа 24:1-15 ајәләриндә јазылмыш, Исраил халгына сөјләдији нитгинә диггәт јетирәк. Онун мәгсәди халгы әтраф халгларын бүтпәрәстлијиндән тамамилә узаг дурараг, гәтијјәтлә һәгиги ибадәтин тәрәфини сахламаға тәшвиг етмәк иди. Бу нә үчүн белә ваҹиб иди? Јалан ибадәтин ҝениш јајылмасы халгын Јеһова илә мүнасибәтләри үчүн ҹидди тәһлүкә јарадырды. Халг Јешуанын чағырышына белә һај верди: «Рәбби тәрк едиб башга аллаһлара гуллуг етмәк гој биздән узаг олсун!.. Биз дә Рәббә гуллуг едәҹәјик». Онлар дедикләри кими дә етдиләр! (Јешуа 24:16, 18, 31).

Мәрузәјә гулаг асанда онун мәгсәдини баша дүшмәјә чалыш. Натигин ҝәтирдији фикирләрин һәмин мәгсәдә чатмаға неҹә көмәк етдијинә фикир вер. Ешитдикләринин сәни нәјә тәшвиг етдијини өзүндән соруш.

Мүзакирә вахты

«Ҝөзәтчи Гүлләси»нин арашдырылмасы, Хидмәти ҝөрүшүн бәзи бәндләри вә Јығынҹағын Мүгәддәс Китаб өјрәнмәси Мүгәддәс Китаб нәшрләринә әсасланан суал-ҹаваб шәклиндә кечирилир.

Мүзакирә заманы гулаг асмаг, мүәјјән мәнада, сөһбәтдә иштирак етмәјә бәнзәјир. Там фајда әлдә етмәк үчүн диггәтлә гулаг ас. Мүзакирәнин ҝедишатыны излә. Апарыҹынын мөвзуну вә әсас фикирләри неҹә вурғуладығына диггәт јетир. Үрәјиндә онун суалларына ҹаваб вермәјә чалыш. Башгаларынын материалы неҹә изаһ вә тәтбиг етдијинә гулаг ас. Һансыса мәлумата башгаларынын нөгтеји-нәзәриндән баханда таныш мөвзу сәнин үчүн башга јөндән ачыла биләр. Өз иманыны ифадә етмәклә фикир мүбадиләсиндә иштирак ет (Ром. 1:12).

Кечириләҹәк материалы габагҹадан өјрәнмәк мүзакирәјә гатылмағына вә башгаларынын шәрһләрини изләмәјинә көмәк едәҹәк. Әҝәр материалы дәриндән арашдырмаға шәраитин јол вермирсә, ҝөрүшдән габаг ону ҝөздән кечирмәк үчүн һеч олмаса, бир нечә дәгигә вахт ајыр. Бунун сајәсиндә мүзакирәдән даһа чох фајда әлдә едәҹәксән.

Конгресләрдә

Јығынҹаг ҝөрүшләринә нисбәтән конгресләрдә даһа чох шеј диггәти јајындырыр. Буна ҝөрә дә конгресләрдә динләмәк даһа чәтиндир. Бизә нә көмәк едә биләр?

Ҝеҹә кифајәт гәдәр јатмаг ваҹиб амилдир. Һәр ҝүн програм башламаздан әввәл мөвзуну бејнинә һәкк ет. Һәр нитгин адыны нәзәрдән кечир вә сөһбәтин нә һагда ҝедәҹәјини тәхмин етмәјә чалыш. Мүгәддәс Китабдан истифадә ет. Чохлары диггәт јетирмишләр ки, әсас фикирләри гысаҹа гејд едәндә диггәти програма ҹәмләмәк асан олур. Һәјатында вә хидмәтиндә тәтбиг етмәк истәдијин фикирләри гејд ет. Ешитдијин фикирләрдән бәзиләрини һәр ҝүн конгресә ҝедиб-ҝәләндә киминләсә мүзакирә ет. Бунун сајәсиндә алдығын мәлуматы јадда сахлаја биләҹәксән.

Ушаглара динләмәји өјрәдин

Мәсиһчи валидејнләр ушагларыны, һәтта лап көрпәләри дә, јығынҹаг ҝөрүшләринә, конгресләрә ҝәтирәрәк онлара «хилас ҝәтирән һикмәти» алмаға көмәк едә биләрләр (2 Тим. 3:15). Ушагларын хасијјәти вә диггәтләринин давамлылығы бир-бириндән фәргләндији үчүн онлара диггәтлә гулаг асмағы өјрәтмәк лазымдыр. Нөвбәти мәсләһәтләр сизин үчүн фајдалы ола биләр.

Евдә оланда ушагларын сакит отуруб, нәшрләримизи охумалары, јахуд орадакы шәкилләрә бахмалары үчүн мүәјјән вахт тәјин един. Ҝөрүшләрдә ушагларын башыны гарышдырмаг үчүн онлара ојунҹаг вермәјин. Гәдим Исраилдә олдуғу кими, бу ҝүн дә балаҹа ушаглар јығынҹаглара ‘ешидиб өјрәнмәк’ үчүн ҝәлирләр (Ганун. т. 31:12). Мүмкүн олан јерләрдә бәзи валидејнләр кечилән әдәбијјатын нүсхәсини лап балаҹа ушаглара да верирләр. Ушаглар бир аз бөјүјәндә програмын мүзакирә шәклиндә кечирилән һиссәләриндә иштирак етмәләри үчүн онлара һазырлашмаға көмәк един.

Мүгәддәс Јазылар Јеһоваја гулаг асмагла Она итаәт етмәк арасында сых бағлылыг олдуғуну ҝөстәрир. Буну Мусанын Исраил халгына дедији сөзләрдән ајдын ҝөрмәк олар: ‘Сәнин өнүнә һәјатла өлүмү, бәрәкәтлә ләнәти гојдум. Бунун үчүн һәјаты сеч, Аллаһын Рәбби сев, онун сөзүнү динлә вә она бағлан’ (Ганун. т. 30:19, 20, КМ). Бу ҝүн Јеһованын лүтфүнү газанмаг вә әбәди һәјаты әлдә етмәк үчүн Онун вердији тәлими динләмәк вә итаәткарлыгла һәјатымызда тәтбиг етмәк сон дәрәҹә мүһүмдүр. Белә олдуғу һалда Исанын нәсиһәтинә диггәт јетирмәк неҹә дә ваҹибдир: «Неҹә динләдијинизә диггәт верин!» (Лука 8:18).