Хүсуси бирҝүнлүк конгресин јени програмы
Әҝәр биз хәбәрдарлығы ешитмиш, лакин һеч бир тәдбир ҝөрмәмишиксә, бунун нәтиҹәси чох фәлакәтли ола биләр. Бундан даһа ваҹиби исә Јеһованын руһани нәсиһәтләринә диггәт јетирмәкдир. Нөвбәти хидмәт илиндә кечириләҹәк хүсуси бирҝүнлүк конгресин програмында мәһз буна диггәт јетириләҹәк. Конгресин мөвзусу “Неҹә динләдијинизә диггәт верин” (Лука 8:18).
Биринҹи мә’рузәдә дә’вәт олунмуш мә’рузәчи һәвари Павелин Аллаһдан илһам алараг ибраниләрә јаздығы мәктубундакы нәсиһәтин бу ҝүн неҹә тәтбиг едилә биләҹәјини нәзәрдән кечирәҹәк. “Аллаһын нәсиһәтинә даима диггәт јетирин” адлы јекун мә’рузәдә исә, о, бизим һамымыза көмәк едәҹәк ки, Јеһованы, Онун Оғлуну вә “садиг вә ағыллы гул”у һәгигәтән дә динләјиб-динләмәдијимизи јохлајаг (Мат. 24:45).
Програмын бә’зи һиссәләри хүсусилә аиләләр үчүн фајдалы олаҹаг. “Аллаһын Кәламыны јајынмадан динләјән аиләләр” адлы мә’рузә бизә көмәк едәҹәк ки, дүнјәви шејләрин руһанилијимизи зәифләтмәсинә јол вермәјәк. Бу мә’рузә заманы руһани шејләри өн плана гојмаг үчүн һәјатларында дәјишикликләр едәнләрдән мүсаһибә ҝөтүрүләҹәк. “Ҝәнҹләр, Аллаһын Кәламыны диггәтлә динләјин — бу сизи мөһкәмләндирәҹәк” адлы мә’рузәјә мәктәбдә, һәмјашыдлары гаршысында вә ја хидмәтдә һәгигәт тәрәфдары олан ҝәнҹләрлә мүсаһибә дахилдир. “Аллаһы динләјән вә өјрәнән ушаглар” адлы мә’рузә, ҝәнҹләрин өјрәнмәк габилијјәтини лазымынҹа гијмәтләндирмәјимизә көмәк едәҹәк. Ҝәнҹләрлә вә онларын валидејнләрилә олан мүсаһибәләр исә, Јеһованын јолларыны ушаглыгдан өјрәтмәјин фајдалы олдуғуну ҝөрмәјимизә көмәк едәҹәк.
Шејтан “бүтүн дүнјаны” алдатса да, Јеһова Өз садиг хидмәтчиләринә онларын һансы јолла ҝетмәли олдугларыны ҝөстәрир (Вәһј 12:9: Иш. 30:21). Аллаһын нәсиһәтинә диггәт јетирмәклә вә итаәткарлыгла һәјатымызда тәтбиг етмәклә, бизи хошбәхтлијә вә әбәди һәјата апаран мүдриклији әлдә едирик (Сүл. мәс. 8:32-35).