Вәфтиз олунмаг истәјәнләрлә јекун мүзакирә

Адәтән, Јеһованын Шаһидләри вәфтизи бөјүк топлантыларында кечирирләр. Вәфтиз мәрузәсинин сонунда натиг вәфтиз олмаға һазырлашан кәсләрдән ајаға галхыб ашағыдакы ики суала һүндүрдән вә ајдын ҹаваб вермәји хаһиш едәҹәк:

1. Ҝүнаһларындан төвбә едиб, өзүнү Јеһоваја һәср етмисән вә Онун Иса Мәсиһ васитәсилә бәхш етдији хилас јолуну гәбул етмисән?

2. Вәфтиз олунмагла Јеһованын Шаһиди олдуғуну, бунунла да Јеһованын тәшкилатына гошулдуғуну ҝөстәрирсән. Буну дәрк едирсән?

Вәфтиз олаҹаг тәблиғчиләр бу суаллары мүсбәт ҹавабландырмагла фидјә гурбанлығына иман етдикләрини һамынын гаршысында бәјан едир вә өзләрини Јеһоваја гејд-шәртсиз һәср етдикләрини ҝөстәрирләр (Ром. 10:9, 10). Буна ҝөрә дә онлар дуа едиб бу суалларын үзәриндән габагҹадан дүшүнмәлидирләр ки, өз әгидәләринә әсасән ҹаваб верә билсинләр.

Һәср дуасы етмисән? Јеһоваја јалныз Она ибадәт едәҹәјинә вә Онун ирадәсинин һәјатында ән ваҹиб јери тутаҹағына сөз вермисән?

Инди вәфтизә һазыр олдуғуна там әминсән?

Вәфтиз үчүн һансы ҝејим мүнасибдир? (1 Тим. 2:9, 10; Јәһ. 15:19; Филип. 1:10).

Биз «абыр-һәја илә, ағыл-камалла» ҝејинмәклә мөмин олдуғумузу ҝөстәрмәлијик. Бу о демәкдир ки, вәфтиз олунанлар ачыг-сачыг чимәрлик ҝејимләри, јахуд үзәриндә дејимләр, шүарлар вә ја шәкилләр олан палтарлар ҝејинмәјәҹәкләр. Онлар сәлигәли, тәмиз, зөвглү вә мәрасимә мүнасиб ҝејинмәлидирләр.

Вәфтиз заманы давранышымыз неҹә олмалыдыр? (Лука 3:21, 22).

Исанын вәфтизи мәсиһиләр үчүн бир нүмунәдир. Вәфтизин ҹидди бир аддым олдуғуну баша дүшдүјү Исанын давранышындан бәлли иди. Демәли, вәфтиз кечирилән јердә јерсиз зарафат етмәклә, ојнамагла, үзмәклә вә ја һәр һансы башга бир һәрәкәтлә мәрасими дәјәрдән салмамалыјыг. Һәмчинин вәфтиз олунан инсан өзүнү елә апармамалыдыр ки, елә бил бөјүк бир гәләбәјә имза атыб. Дүздүр, вәфтиз севиндириҹи һадисәдир, амма ҝәрәк севинҹимизи лајигли тәрздә ҝөстәрәк.

Ибадәт ҝөрүшләринә мүнтәзәм ҝетмәк вә јығынҹагла сых әмәкдашлыг етмәк сәнә һәср олунмағына ујғун јашамаға неҹә көмәк едәҹәк?

Нәјә ҝөрә вәфтиздән сонра да сәмәрәли мүталиә етмәк вә тәблиғ ишиндә мүнтәзәм иштирак етмәк ваҹибдир?

АҒСАГГАЛЛАР ҮЧҮН ҜӨСТӘРИШ

Тәблиғчи вәфтиз олмаг истәдијини билдирәндә она бу китабын 185—207 сәһифәләриндә јерләшән «Вәфтиз олунмаг истәјәнләр үчүн суаллар» әлавәсини диггәтлә арашдырмағы тапшырмаг лазымдыр. Онун диггәтини 182-ҹи сәһифәдәки «Вәфтиз олунмамыш тәблиғчијә исмарыҹ» әлавәсинә јөнәлдин. Бу әлавәдә тәблиғчинин ағсаггалларла мүзакирәјә неҹә һазырлаша биләҹәји изаһ олунур. Орада ҝөстәрилдији кими, вәфтиз олунмаг истәјән тәблиғчи мүзакирә заманы шәхси гејдләринә баха вә китабыны ачыг сахлаја биләр. Амма ағсаггалларла мүзакирәдән әввәл киминсә онунла бу суаллары мүзакирә етмәсинә еһтијаҹ јохдур.

Тәблиғчи вәфтиз олунмаг истәјини ағсаггаллар шурасынын координаторуна билдирмәлидир. Тәблиғчи «Вәфтиз олунмаг истәјәнләр үчүн суаллар» әлавәсини охудугдан сонра ағсаггаллар шурасынын координатору ондан Јеһоваја Онун ирадәсини јеринә јетирмәк үчүн һәср дуасы едиб-етмәдијини сорушаҹаг. Әҝәр о, һәср дуасы едибсә, ағсаггаллар шурасынын координатору «Вәфтиз олунмаг истәјәнләр үчүн суаллар» әлавәсини онунла мүзакирә етмәк үчүн ики ағсаггал тәјин едәҹәк. Һәр һиссәни ајры-ајры ағсаггал кечирмәлидир. Мүзакирәни апармаг үчүн бөјүк топлантынын вахтынын елан олунмасыны ҝөзләмәјә еһтијаҹ јохдур.

Ики һиссәдән ибарәт олан материалын һәр биринин мүзакирәси, адәтән, бир саат чәкир, лазым ҝәлдикдә бир саатдан да артыг кечирмәк олар. Һәр һиссәнин әввәлиндә вә сонунда дуа етмәк лазымдыр. Мүзакирә тәләм-тәләсик кечирилмәмәлидир. Бу мүзакирәләр ағсаггалларын ҹәдвәлиндә әсас јери тутмалыдыр.

Суал-ҹавабы груп шәклиндә јох, һәр тәблиғчи илә фәрди шәкилдә кечирмәк даһа мүнасиб оларды. Тәблиғчинин һәр суала вердији ҹавабдан ағсаггаллар онун һәгигәти нә дәрәҹәдә дәриндән баша дүшдүјүнү вә вәфтизә һазыр олуб-олмадығыны ајдын ҝөрәҹәкләр. Бундан әлавә, мүзакирәнин фәрди шәкилдә кечирилмәси тәблиғчијә фикирләрини сәрбәст шәкилдә ифадә етмәјә көмәк едәҹәк. Әр-арвадлар суал-ҹавабы бирҝә кечә биләрләр.

Вәфтиз олунмаг истәјән баҹыдырса, мүзакирәни тәкликдә јох, башгаларынын ҝөрә биләҹәји јердә кечирмәк лазымдыр. Амма елә етмәк лазымдыр ки, һеч ким онларын данышдыгларыны ешитмәсин. Әҝәр мүзакирәни апармаг үчүн башга адам чағырмаг лазым ҝәләрсә, нөвбәти абзасда гејд олундуғу кими, мүзакирә олунан һиссәдән асылы олараг, һәмин адам ја ағсаггал, ја да јығынҹаг хидмәтчиси олмалыдыр.

Ағсаггалларын чох аз олдуғу јығынҹагларда бәсирәтли вә һикмәтли јығынҹаг хидмәтчиси «Мәсиһи етигадлары» адлы I һиссәни суал-ҹаваб едә биләр. «Мәсиһи һәјаты» адлы II һиссәни исә јалныз ағсаггал суал-ҹаваб етмәлидир. Әҝәр јығынҹагда кифајәт гәдәр јарарлы гардаш јохдурса, рајон нәзарәтчиси илә әлагә сахлајыб хаһиш етмәк олар ки, башга јығынҹагдакы гардашлар онлара көмәк етсин.

Вәфтиз олунмаг истәјән азјашлыдырса, иманда олан валидејнләри дә мүзакирәдә иштирак етмәлидир. Әҝәр валидејн(ләр) иштирак едә билмирсә, онда һәр мүзакирәни ики ағсаггал (вә ја һиссәдән асылы олараг бир ағсаггал вә бир јығынҹаг хидмәтчиси) кечирмәлидир.

Ағсаггаллар вәфтиз олмаг истәјән инсанын Мүгәддәс Китабын әсас тәлимләрини кифајәт гәдәр јахшы баша дүшдүјүнә әмин олмалыдырлар. Һәмчинин онлар әмин олмалыдырлар ки, о, һәгигәти, доғрудан да, гијмәтләндирир вә Јеһованын тәшкилатына һөрмәт едир. Әҝәр инсан Мүгәддәс Китабын әсас тәлимләрини баша дүшмүрсә, ағсаггаллар тәдбир ҝөрәҹәкләр ки, башга вахт вәфтиз ола билмәси үчүн она көмәк ҝөстәрилсин. Башгаларына исә тәблиғ хидмәтини гијмәтләндирдијини, јахуд тәшкилати гајдалара табе олдуғуну ҝөстәрмәк үчүн вахт вермәк лазым ҝәлә биләр. Тәхминән бир саат әрзиндә инсанын вәфтизә һазыр олуб-олмадығыны мүәјјән етмәк үчүн ағсаггаллардан мүдриклик тәләб олунур. Суалларын бәзисинә аз, бәзисинә чох вахт ајырмаг лазым ҝәлсә дә, һамысыны нәзәрдән кечирмәк мүтләгдир.

Вәфтиз үчүн суаллары мүзакирә едән ағсаггаллар икинҹи һиссәни мүзакирә етдикдән сонра бир јерә топлашыб һәмин адамын вәфтизә һазыр олуб-олмадығыны мүәјјән едирләр. Бу заман онлар инсанын кечмишини, габилијјәтини вә диҝәр амилләри нәзәрә алырлар. Ағсаггаллар инсанын Јеһова илә мүнасибәтләринин нә јердә олдуғуну вә Мүгәддәс Китабын әсас тәлимләрини баша дүшүб-дүшмәдијини билмәк истәјир. Вәфтиз олунмаг истәјән тәблиғчиләр сизин гајғыныз вә көмәјиниз сајәсиндә хош хәбәрин тәблиғи кими ваҹиб бир иши лајигли тәрздә һәјата кечирмәјә һазыр олаҹаглар.

Сонра мүзакирәни апаран бир вә ја ики ағсаггал вәфтиз олунмаг истәјән тәблиғчи илә ҝөрүшүб онун вәфтизә јарарлы олуб-олмадығыны билдирәҹәкләр. Әҝәр о, вәфтизә јарарлыдырса, ағсаггаллар онунла 206—207 сәһифәләрдәки «Вәфтиз олунмаг истәјәнләрлә јекун мүзакирә» адлы әлавәни мүзакирә едәҹәкләр. Әҝәр вәфтиз олунмаг истәјән кәс «Әбәди хошбәхт һәјат!» китабыны кечиб гуртармајыбса, ағсаггаллар ону тәшвиг етмәлидирләр ки, вәфтиздән сонра да китабы кечсин. Ағсаггаллар вәфтиз олунаҹаг инсана билдирмәлидирләр ки, вәфтиз олундуғу тарих онун адына ачылмыш «Тәблиғчинин һесабат карточкасы»нда гејд олунаҹаг. Она хатырладын ки, ағсаггалларын тәблиғчидән шәхси мәлуматларыны алмасы сајәсиндә тәшкилат бундан сонра да бүтүн дүнјадакы Јеһованын Шаһидләринин дини фәалијјәтинә нәзарәт едә биләҹәк. Үстәлик, тәблиғчинин руһани ишләрдә иштирак етмәк вә руһани көмәк алмаг имканы олур. Бундан әлавә, ағсаггаллар јени тәблиғчиләрә билдирә биләрләр ки, шәхси мәлуматлардан jw.org

сајтында јер алан Јеһованын Шаһидләринин мәлуматын горунма сијасәтинә мүвафиг истифадә олунур. Адәтән, бу мүзакирә он дәгигә вә ја аз чәкир.

Вәфтиздән бир ил сонра ики ағсаггал тәблиғчи илә ҝөрүшүб ону руһландырмалы вә фајдалы мәсләһәтләр вермәлидир. Онлардан бири тәблиғчинин груп нәзарәтчиси олмалыдыр. Әҝәр јени вәфтиз олунмуш тәблиғчи азјашлыдырса, бу ҝөрүшдә онун иманда олан валидејнләри дә иштирак етмәлидир. Ҝөрүш хош вә руһландырыҹы аб-һавада кечмәлидир. Ағсаггаллар онун руһани инкишафы илә марагланаҹаг, еләҹә дә шәхси мүталиә, Мүгәддәс Китабы һәр ҝүн охумаг, һәфтәлик аиләви ибадәт кечирмәк, мүнтәзәм ибадәт ҝөрүшләриндә иштирак етмәк вә һәр һәфтә тәблиғ хидмәтинә чыхмагла бағлы практики мәсләһәтләр верәҹәк (Ефес. 5:15, 16). Әҝәр о, «Әбәди хошбәхт һәјат!» китабыны кечиб гуртармајыбса, ағсаггаллар тәдбир ҝөрәҹәк ки, кимсә она бу китабы ахыра кими кечиб гуртармаға көмәк етсин. Ағсаггаллар ону үрәкдән тәрифләмәлидирләр. Адәтән, бир-ики мәгама даир мәсләһәт вә тәклиф кифајәт едир.