Ҝөрүнмәјәни ҝөрүрмүш кими мөһкәм дајанын!
“[Муса] ҝөрүнмәјәни ҝөрүрмүш кими, мөһкәм дајанды” (ИБРАНИЛӘРӘ 11:27).
1. Иса Дағүстү тәблиғиндә Аллаһ һаггында диггәтә лајиг олан һансы сөзләри деди?
ЈЕГОВА ҝөрүнмәз Аллаһдыр. Муса Јеговадан иззәтини ҝөстәрмәји хаһиш едәндә, О ҹаваб верди: “Үзүмү ҝөрә билмәзсән; чүнки инсан мәни ҝөрүб дә јашаја билмәз” (Чыхыш 33:20). Һәвари Јәһја исә јазмышды: “Аллаһы һеч бир заман кимсә ҝөрмәмишдир” (Јәһја 1:18). Һәтта Иса Мәсиһ јер үзүндә оларкән белә Аллаһы ҝөрмүрдү. Буна бахмајараг, Исанын Дағүстү тәблиғиндә белә сөзләр вар: “Үрәји тәмиз оланлар нә бәхтијардырлар! Чүнки онлар Аллаһы ҝөрәҹәкләр” (Матта 5:8). Иса бунунла нә демәк истәјирди?
2. Биз нә үчүн Аллаһы һәгиги мә’нада ҝөрә билмирик?
2 Мүгәддәс Китаба әсасән Јегова ҝөрүнмәз Руһдур (Јәһја 4:24; Колослулара 1:15; 1 Тимотејә 1:17). Демәли, Иса демәк истәмирди ки, инсанлар Јегованы һәгиги мә’нада ҝөрә биләрләр. Дүздүр, мәсһ едилмиш мәсиһчиләр, руһани варлыглар кими дирилдиләндән сонра ҝөјләрдә Јегова Аллаһы ҝөрәҹәкләр. Анҹаг “үрәји тәмиз олан” вә јер үзүндә әбәдијјән јашамаға үмид бәсләјән инсанлар да Аллаһы “ҝөрә биләрләр”. Бәс бу неҹә мүмкүндүр?
3. Аллаһын бә’зи хүсусијјәтләрини инсанлар неҹә дәрк едә биләрләр?
3 Јаратдыгларыны диггәтлә мүшаһидә етмәклә, Јегова һаггында бә’зи шејләри өјрәнирик. Онун гүдрәти бизә тә’сир бағышлајыр вә Ону Јарадан Аллаһ кими гәбул едирик (Ибраниләрә 11:3; Вәһј 4:11). Һәвари Павел бунунла әлагәдар јазмышды: “Дүнја јаранандан бәри Онун ҝөзлә ҝөрүлмәз хүсусијјәтләри, јә’ни әбәди гүдрәти вә илаһилији Онун јаратдыглары илә анлашылараг, ачыгҹа ҝөрүнүр” (Ромалылара 1:20). Демәли, Аллаһы ҝөрмәјин мүмкүнлүјү барәдә Исанын дедији сөзләрдә нәзәрдә тутулан одур ки, биз Јегованын бә’зи хүсусијјәтләрини дәрк едә биләрик. Бу ҹүр “ҝөрмә габилијјәти” дәгиг биликләрә әсасланыр вә руһани мә’нада “үрәјин ҝөзләри” илә ҝөрмәјә јол верир (Ефеслиләрә 1:18). Исанын сөзләри вә әмәлләри дә Аллаһ һаггында чох шеји ашкар едир. Буна ҝөрә Иса деди: “Мәни ҝөрән, Атаны ҝөрмүш олур” (Јәһја 14:9). Иса Јегованын шәхсијјәтини мүкәммәл сурәтдә әкс едирди. Буна ҝөрә дә, Исанын һәјаты вә тә’лимләри һаггында әлдә етдијимиз билик, Аллаһын бә’зи хүсусијјәтләрини ҝөрмәкдә вә ја дәрк етмәкдә бизә көмәк едәр.
Руһән јеткин олмаг олдугҹа ваҹибдир
4. Бу ҝүн чохлары руһани ҹәһәтдән зәиф олдугларыны неҹә ҝөстәрирләр?
4 Бу ҝүн имана вә әсл руһани јеткинлијә аз тәсадүф едилир. Павел демишди: “Һамы иман етмир” (2 Салониклиләрә 3:2). Инсанларын бир чоху өзләрини тамамилә шәхси мәнафеләринә һәср едир вә үмумијјәтлә Аллаһа инанмырлар. Гүсурлу давранышлары вә руһани ҹәһәтдән зәифликләри, онлара анлајышын ҝөзү илә ҝөрмәјә имкан вермир, чүнки, Јәһјанын јаздығы кими, “пислик едән... Аллаһы ҝөрмәмишдир” (3 Јәһја 11). Бу инсанлар Аллаһы һәгиги мә’нада ҝөрмәдикләри үчүн өзләрини елә апарырлар ки, ҝуја Аллаһ онларын әмәлләрини ҝөрмүр (Һезекиел 9:9). Онлар руһани ишләрә хор бахдыгларына ҝөрә “Аллаһ билијини” әлдә етмәк игтидарында дејилләр (Сүлејманын мәсәлләри 2:5). Павел там һаглы олараг јазырды: “Нәфсани адам, Аллаһын Руһуна даир һәгигәтләри гәбул етмир, чүнки о бунлары ағылсызлыг һесаб едир вә анлаја билмир. Чүнки бунлар руһән дәрк едилир” (1 Коринфлиләрә 2:14).
5. Руһани дүшүнҹәјә малик олан инсанлар нәји дәрк едирләр?
5 Әҝәр руһани дүшүнҹәјә маликиксә, һәмишә дәрк едәҹәјик ки, Јегова биздә нөгсанлар ахтармаса да, биз пис фикирләрә вә мејлләрә һәвәс ҝөстәрәндә О буну билир. Бәли, “инсанын јоллары Рәббин ҝөзү өнүндәдир вә онун бүтүн јолларыны өлчүр” (Сүлејманын мәсәлләри 5:21). Әҝәр ҝүнаһ бизә һаким оларса, Јегованы севдијимиз вә Ону кәдәрләндирмәк истәмәдијимиз үчүн, төвбә етмәјә вә Јеговадан әфв диләмәјә тәшвиг һисси дујуруг (Мәзмур 78:41; 130:3).
Бизи мөһкәмләндирән нәдир?
6. Мөһкәм олмаг нә демәкдир?
6 Јегованы ҝөрмәсәк дә, ҝәлин һәмишә јадда сахлајаг ки, О бизи ҝөрүр. Аллаһын мөвҹудлуғуну унутмуругса вә Ону чағыранларын һамысына јахын олдуғуна әминиксә, бу, мөһкәм олмағымыза, јә’ни Јеговаја садиглијимиздә сарсылмаз галмағымыза көмәк едәҹәкдир (Мәзмур 145:18). Биз Муса кими ола биләрик. Павел онун һаггында јазмышды: “Һөкмдарын гәзәбиндән горхмајыб, иман васитәсилә Мисири тәрк етди; чүнки о, Ҝөрүнмәјәни ҝөрүрмүш кими, мөһкәм дајанды” (Ибраниләрә 11:27).
7, 8. Фир’онун јанына ҝетмәк үчүн Мусаја ҹәсарәт верән нә иди?
7 Исраиллиләри Мисир әсарәтиндән чыхартмаг үчүн Аллаһын вердији тапшырығы јеринә јетирәркән, Муса дәфәләрлә гәддар Фир’онун гаршысында дурурду. Онун сарајында исә чохлу ҝөркәмли дини вә һәрби ә’јанлар варды. Чох еһтимал ки, диварлар боју һәр јердә бүтләрин сурәти варды. Амма Јегова ҝөрүнмәз олса да, Муса үчүн, Мисирин ҹансыз илаһиләрини тәмсил едән бүтләрин һамысындан фәргли олараг, реал иди. Мусанын Фир’ондан горхмамасы тәәҹҹүблү дејил!
8 Дәфәләрлә Фир’онун јанына ҝетмәк үчүн Мусаја ҹәсарәт верән нә иди? Мүгәддәс Јазыларда дејилир ки, “Муса киши јер үзүндәки бүтүн адамлардан зијадә һәлим иди” (Сајлар 12:3). Ҝөрүнүр, руһән мөһкәм олмасы вә Аллаһын онунла олдуғуна әминлији, Мисирин гәддар падшаһынын гаршысында “Ҝөрүнмәјәнин” елчиси кими хидмәт етмәкдә Мусаја гүввәт верирди. Бәс ҝөрүнмәз Аллаһы “ҝөрәнләр” Она иман етдикләрини бу ҝүн неҹә ҝөстәрирләр?
9. Даими мөһкәмлији неҹә ҝөстәрмәк олар?
9 Иман етмәјин вә Ҝөрүнмәјәни ҝөрүрмүш кими, даим мөһкәм олмағын бир үсулу, тә’гибләрә бахмајараг ҹәсарәтлә тәблиғ етмәкдир. Иса өз шаҝирдләрини хәбәрдар етди: “Мәним адыма ҝөрә һамы сизә нифрәт едәҹәк” (Лука 21:17). О, һәмчинин онлара деди: “Гул ағасындан үстүн дејилдир. Әҝәр Мәни тә’гиб етдиләрсә, сизи дә тә’гиб едәҹәкләр” (Јәһја 15:20). Исанын дедији кими дә олду: онун өлүмүндән тез сонра давамчылары тә’гибләрә мә’руз галдылар, онлары һәдәләјир, һәбс едир вә көтәкләјирдиләр (Һәвариләрин ишләри 4:1—3, 18—21; 5:17, 18, 40). Арасы кәсилмәјән тә’гибләрә бахмајараг, Исанын һәвариләри вә диҝәр шаҝирдләри хош хәбәри ҹәсарәтлә тәблиғ етмәјә давам едирдиләр (Һәвариләрин ишләри 4:29—31).
10. Јегованын мүдафиәсинә олан әминлијимиз хидмәтдә бизә неҹә көмәк едир?
10 Исанын илк давамчылары да, Муса кими, ҝөзләри гаршысында олан чохсајлы дүшмәнләриндән горхмадылар. Исанын шаҝирдләри Аллаһа иман етдикләри үчүн, мә’руз галдыглары шиддәтли тә’гибләрә таб ҝәтирирдиләр. Бәли онлар, Ҝөрүнмәјәни ҝөрүрмүш кими, мөһкәм дајанырдылар. Әҝәр Јегованын мүдафиәсини һәмишә хатырлајарыгса, Падшаһлыг һаггындакы тәблиғ ишини ҹәсарәтлә вә горхмадан јеринә јетирә биләҹәјик. Аллаһын Кәламы дејир ки, “инсандан горхан өзүнү тәләјә салар, амма Рәббә ҝүвәнән архајын јашар” (Сүлејманын мәсәлләри 29:25, МКШ). Буна ҝөрә дә, тә’гибләр гаршысында сарсылмаз галыр вә хидмәтимиздән хәҹаләт чәкмирик. Иманымыз бизи, гоншуларымыза, иш вә синиф јолдашларымыза, һәмчинин башга адамлара ҹәсарәтлә шәһадәтлик етмәјә тәшвиг едир (Ромалылара 1:14—16).
“Ҝөрүнмәјән” өз халгына јол ҝөстәрир
11. Петерин вә Јәһуданын сөзләринә әсасән, мәсиһчи јығынҹағынын бә’зи үзвләри руһән зәиф олдугларыны неҹә ҝөстәрирдиләр?
11 Иман, Јегованын јер үзүндәки өз тәшкилатына јол ҝөстәрдијини ҝөрмәкдә бизә көмәк едир. Буну анлајараг, јығынҹагда мәс’улијјәти олан гардашлара тәнгиди јанашмагдан чәкинирик. Һәм Петер, һәм дә Исанын анабир гардашы Јәһуда бә’зи адамларын тә’сири барәдә хәбәрдарлыг едирдиләр. Һагларында бәһс едилән бу адамлар руһани ҹәһәтдән о дәрәҹәдә зәиф идиләр ки, мәсиһчиләр арасында рәһбәрлији үзәринә ҝөтүрәнләрин гејбәтини едирдиләр (2 Петер 2:9—12; Јәһуда 8). Әҝәр бу тәнгидчиләр Јегованы һәгиги мә’нада ҝөрсәјдиләр һәмин сөзләри Онун гаршысында да дејәрдиләрми? Әлбәттә ки, јох! Аллаһ ҝөрүнмәз олдуғу үчүн, руһән зәиф олан бу адамлар, Она һесабат верәҹәкләрини дүшүнмүрдүләр.
12. Јығынҹагда рәһбәрлији үзәринә ҝөтүрәнләрә неҹә мүнасибәт ҝөстәрмәлијик?
12 Дүздүр, мәсиһчи јығынҹағы гејри-камил инсанлардан тәшкил олунубдур. Ағсаггаллар, бә’зән шәхсән бизә тә’сир едән сәһвләрә јол верирләр. Буна бахмајараг, Јегова һәмин адамлары өз сүрүсүнүн чобанлары кими истифадә едир (1 Петер 5:1, 2). Руһани дүшүнҹәјә малик олан инсанлар, Јегованын өз халгына ағсаггаллар васитәсилә дә рәһбәрлик ҝөстәрдијини дәрк едирләр. Буна ҝөрә дә биз, бир мәсиһчи кими, тәнгидчи вә дејинҝәнлик руһу дејил, Аллаһын теократик гурулушуна гаршы һөрмәт ҝөстәрмәјә чалышырыг. Өз рәисләримизә итаәтли олмагла ҝөстәририк ки, “Ҝөрүнмәјәни” ҝөрүрүк (Ибраниләрә 13:17).
Аллаһын симасында Даһи Тә’лиматчымызы ҝөрмәк
13, 14. Јегованын симасында Даһи Тә’лиматчыны ҝөрмәк шәхсән сизин үчүн нә демәкдир?
13 Руһани ҝөзләр даһа бир мәгсәд үчүн лазымдыр. Ишаја пејғәмбәрлик етмишди: “Ҝөзләрин мүәллимләрини [“Даһи Тә’лиматчыны”, ЈД] ҝөрәҹәк” (Ишаја 30:20). Јер үзүндәки тәшкилаты васитәсилә бизә Јегованын өзүнүн тә’лим вердијини анламаг үчүн иман лазымдыр (Матта 24:45—47). Аллаһын симасында Даһи Тә’лиматчымызы ҝөрмәк, Мүгәддәс Китабы мүнтәзәм вә дүшүнәрәк өјрәнмәкдән, мәсиһчи ҝөрүшләринә һәмишә ҝетмәкдән даһа артыг мә’на дашыјыр. Бу, Аллаһын руһани бәхшишләриндән ән бөјүк фајданы әлдә етмәк демәкдир. Мәсәлән, руһани мә’нада зәифләмәмәк үчүн, Јегованын Иса васитәсилә һәјата кечирдији рәһбәрлијинә хүсусилә диггәтли олмалыјыг (Ибраниләрә 2:1).
14 Бә’зән, руһани гидадан там сурәтдә фајда алмаг үчүн хүсуси гүввә сәрф етмәк лазым ҝәлир. Мәсәлән, Мүгәддәс Китабын чәтин анладығымыз һиссәсини тәләсик вә диггәтсиз охумаг вәрдишимиз јарана биләр. “Ҝөзәтчи Гүлләси” вә “Ојанын!” журналларыны охујаркән, бизи марагландырмајан мөвзулары, бәлкә дә охумуруг. Јахуд, олсун ки, мәсиһчи ҝөрүшләриндә хәјала гапылырыг. Лакин мүзакирә олунан мөвзулар үзәриндә дәриндән дүшүнәриксә, диггәтимиз јајынмаз. Руһани нәсиһәтләринә ҝөрә дәрин миннәтдарлығымыз, Јегованы Даһи Тә’лиматчымыз кими гәбул етдијимизи ҝөстәрир.
Һесабат верәҹәјик
15. Бә’зиләри, Јегованын онлары ҝөрмәдијини зәнн едәрәк неҹә давранмышлар?
15 “Сонун вахтында” писликләр мисилсиз дәрәҹәдә јајылдығына ҝөрә, “Ҝөрүнмәјәнә” иман ҝәтирмәк хүсусилә ваҹибдир (Даниел 12:4). Шәрәфсизлик вә ҹинси әхлагсызлыг ади һала чеврилиб. Инсанлар бизи ҝөрмәјәндә белә, давранышларымызын Јегова тәрәфиндән мүшаһидә едилдијини јадда сахламаг, шүбһәсиз ки, мүдрикликдир. Бә’зиләри буну унудурлар. Онлары ҝөрән олмајанда, Мүгәддәс Китаба зидд олан ишләрлә мәшғул ола биләрләр. Мисал үчүн, ким исә Интернетдә, телевизорда вә ја башга мүасир техниканын васитәсилә зәрәр ҝәтирән әјләнҹәли мә’лумата вә парнографијаја бахмаг һәвәсинә мәғлуб олмушдур. Бүтүн белә ишләрлә хәлвәтдә мәшғул олмаг мүмкүн олдуғу үчүн, бә’зиләри өзләрини елә апармышлар ки, ҝуја Јегова онлары ҝөрмүр.
16. Јегованын јүксәк нормаларына риајәт етмәјимизә нә көмәк едәр?
16 Һәвари Павелин сөзләрини јадда сахламаг фајдалы олар: “Һәр биримиз өзү үчүн Аллаһа һесабат верәҹәкдир” (Ромалылара 14:12). Дәрк етмәлијик ки, биз һәр дәфә ҝүнаһ ишләдәндә Јеговаја гаршы ҝүнаһ ишләдирик. Буну билмәк, Онун јүксәк нормаларына риајәт етмәјә вә натәмиз давранышдан гачынмаға көмәк едәр. Мүгәддәс Китаб бизә хатырладыр: “Онун гаршысында ҝизли галан мәхлуг јохдур, әксинә Онун ҝөзләри өнүндә һәр шеј чылпаг вә ачыгдыр. Она һесабат верәҹәјик” (Ибраниләрә 4:13). Бәли, биз Јеговаја һесабат верәҹәјик. Анҹаг Јегованын ирадәсини јеринә јетирмәјә вә салеһлик нормаларына табе олмаға бизи илк нөвбәдә Она олан дәрин мәһәббәтимиз тәшвиг едир. Ҝәлин әјләнҹәләр сечәндә вә әкс ҹинсли шәхслә давранышымызда һикмәтли олаг.
17. Јегова һансы мә’нада бизә нәзарәт едир?
17 Јегова бизә диггәтлә нәзарәт едир. Лакин бу о демәк дејил ки, О буну, едәҹәјимиз сәһвләрә ҝөрә бизи ҹәзаландырмаг үчүн едир. Әксинә, итаәткар ушагларыны мүкафатландырмаг истәјән ата кими, рифаһымыз наминә бизә нәзарәт едир. Иманымызын сәмави Атамызы севиндирдијини вә “Ону ахтаранлара мүкафат” вердијини билмәк неҹә дә тәсәлли верир! (Ибраниләрә 11:6). Ҝәлин Јеговаја һәдсиз иман ҝөстәрәк вә Она “бүтүн үрәклә хидмәт едәк” (1 Тарихләр 28:9).
18. Јегованын бизә нәзәр салмасы вә сәдагәтимизә диггәт јетирмәси илә әлагәдар Мүгәддәс Китаб бизи нәјә әмин едир?
18 Сүлејманын мәсәлләри 15:3 (МКШ) ајәсиндә дејилир: “Рәббин ҝөзү һәр јерә бахар, писләрә, јахшылара нәзәр салар”. Бәли, Јегова пис инсанлара нәзәр салыр вә онларла етдикләри әмәлләрә мүвафиг сурәтдә давраныр. Әҝәр “јахшылар” сырасына дахиликсә, әмин ола биләрик ки, Јегова, сәдагәтимизә шәһадәтлик едән әмәлләримизә диггәт јетирир. “Рәббин јолунда чәкдијимиз әмәјин әбәс” олмадығыны вә “Ҝөрүнмәјәнин”, “Онун ады наминә ҝөстәрдијимиз мәһәббәти” унутмадығыны билмәк иманымызы неҹә дә мөһкәмләндирир! (1 Коринфлиләрә 15:58; Ибраниләрә 6:10).
Гој Јегова бизи сынасын
19. Јеговаја ҝүҹлү иман ҝөстәрмәк һансы фајданы ҝәтирир?
19 Јеговаја сәдагәтлә хидмәт етдијимизә ҝөрә Онун үчүн чох гијмәтлијик (Матта 10:29—31). Ҝөрүнмәз олдуғуна бахмајараг, О, бизим үчүн реал шәхсијјәт ола биләр, биз дә Онунла олан дәјәрли мүнасибәтимизи гијмәтләндиририк. Сәмави Атамыза белә мүнасибәт ҝөстәрмәклә бөјүк фајда әлдә едирик. Ҝүҹлү иман, пак үрәјә малик олмағымыза вә Јегованын гаршысында тәмиз виҹданы горумағымыза көмәк едир. Бундан әлавә, ријасыз иман бизә икили һәјат сүрмәјә јол вермәјәҹәк (1 Тимотејә 1:5, 18, 19). Аллаһа гаршы сарсылмаз иманымыз әтрафымыздакылара јахшы нүмунә олаҹаг вә онлара мүсбәт тә’сир ҝөстәрәҹәк (1 Тимотејә 4:12). Бундан савајы, белә иман, Јегованын үрәјини севиндирәҹәк давраныша сәбәб олур (Сүлејманын мәсәлләри 27:11).
20, 21. а) Јегованын бизә диггәтлә нәзарәт етмәси нәјә ҝөрә фајда ҝәтирир? б) Мәзмур 139:23, 24 ајәләриндәки принсипи неҹә тәтбиг етмәк олар?
20 Әҝәр һикмәтә маликиксә, Јегованын бизә нәзарәт етмәсинә севинәҹәјик. Онун јалныз бизи ҝөрмәсини јох, һәмчинин дүшүнҹә вә әмәлләримизи дә дәриндән тәдгиг етмәсини истәјирик. Јеговадан, бизи “сынамасыны” вә һәр һансы пис мејлләримизи ашкар етмәсини дуамызда диләмәк дүзҝүн оларды. Проблемләримизин өһдәсиндән ҝәлмәкдә вә лазыми дәјишикликләри етмәкдә бизә көмәк едәҹәјинә шүбһә јохдур. Мәзмурчу Давуд охујурду: “Еј Аллаһ, мәни сына вә үрәјими бил; мәни имтаһан ет вә дүшүнҹәләрими бил; вә әҝәр мәндә пислик јолу варса бах вә әбәди јолда мәнә рәһбәр ол” (Мәзмур 139:23, 24).
21 Давуд Јеговаја јалварырды ки, ону “сынасын” вә “пислик јолунда” олуб олмадығына диггәт јетирсин. Мәҝәр биз дә, мәзмурчу кими, Јегованын үрәјимизи сынамасынын вә пис мејлләримизин олуб олмадығына бахмасынын һәсрәтини чәкмирикми? Ҝәлин Јеговадан бизи “имтаһан етмәсини” иманла хаһиш едәк. Бәс етдијимиз сәһвләр бизә раһатлыг вермирсә вә ја өзүмүздә пис хүсусијјәтләр ашкар едириксә, онда неҹә? Белә олан һалда, ҝәлин севән Аллаһымыз Јеговаја дурмадан вә сәмими гәлбдән дуа едәк. Онун мүгәддәс руһунун рәһбәрлијинә вә Кәламындакы нәсиһәтинә тәвазөкарлыгла табе олаг. Онун бизә дәстәк олаҹағына вә әбәди һәјата апаран јолда јеримәјимизә көмәк едәҹәјинә әмин ола биләрик (Мәзмур 40:11—13).
22. “Ҝөрүнмәјәнә” гаршы мүнасибәтимиздә һансы әһвал-руһијјәдә олмалыјыг?
22 Бәли, әҝәр Јегованын тәләбләрини јеринә јетиририксә О, бизи әбәди һәјатла хејир-дуаландыраҹагдыр. Әлбәттә ки, һәвари Павел кими, Онун гүдрәт вә сәлаһијјәтини биз дә гәбул етмәлијик. Павел јазырды: “Әсрләрин Падшаһына, өлмәз, ҝөрүнмәз вә бир олан Аллаһа әбәди олараг һөрмәт вә иззәт олсун! Амин” (1 Тимотејә 1:17, И—93). Ҝәлин Јеговаја һәмишә белә еһтирамлы һиссләр бәсләјәк. Вә нә олурса-олсун, “Ҝөрүнмәјәни” ҝөрүрмүш кими, мөһкәм дајанмаға давам едәк.
Сиз неҹә ҹаваб верәрдиниз?
• Инсанлар Аллаһы неҹә “ҝөрә биләрләр”?
• Јегова бизим үчүн реалдырса, тә’гибләр заманы неҹә давранаҹағыг?
• Јегованын симасында Даһи Тә’лиматчымызы ҝөрмәк нә демәкдир?
• Јегованын бизи сынамасыны нә үчүн арзуламалыјыг?
[12-ҹи сәһифәдәки шәкил]
Муса, Фир’ондан горхмадан, ҝөрүнмәз Аллаһ олан Јегованы ҝөрүрмүш кими давранды.
[15-ҹи сәһифәдәки шәкил]
Ҝәлин елә давранмајаг ки, санки Јегова бизи ҝөрмүр.
[17-ҹи сәһифәдәки шәкил]
Аллаһын симасында Даһи Тә’лиматчымызы ҝөрдүјүмүз үчүн, Онун һаггындакы билији ҹидди-ҹәһдлә ахтарырыг.