Јорулуруг, лакин зәиф дүшмүрүк
“Аллаһ, Рәбб, дүнјанын уҹларыны јарадан... зәиф олана гүввәт верир; вә тагәтсизин гүдрәтини артырыр” (ИШАЈА 40:28, 29).
1, 2. а) Һәгиги Аллаһа хидмәт етмәк истәјәнләрин һамысына һансы сәмими дә’вәт верилир? б) Бизим руһани вәзијјәтимизә ҹидди тәһлүкә јарадан нә ола биләр?
ИСАНЫН шаҝирдләри олан бизләрә онун сәмими дә’вәти јахшы танышдыр: “Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм.[...] Чүнки бојундуруғум асан вә јүкүм јүнҝүлдүр” (Матта 11:28-30). Һәмчинин мәсиһчиләрә Јеһованын Өзү “динҹәлиш вахтлары” верир (Һәвариләрин ишләри 3:20). Бизләрдән һансымыз Мүгәддәс Китаб һәгигәтләрини биләндә, ҝәләҹәјә ишыглы үмид әлдә едәндә вә Јеһованын принсипләрини өз һәјатымызда тәтбиг едәндә, раһатлыг һисс етмәмишик ки!
2 Бунунла белә, Јеһованын бә’зи хидмәтчиләри јорулур вә руһдан дүшүрләр. Бә’зән бу кими һал тез кечиб ҝедир, бә’зән исә узун мүддәт чәкир. Вахт өтдүкҹә ким исә һисс етмәјә башлајыр ки, мәсиһчи мәс’улијјәтләри Исанын вә’д етдији кими артыг раһатлыг ҝәтирмир, амма јүкә чеврилир. Бу ҹүр мәнфи һиссләр нәтиҹәдә мәсиһчинин Јеһова илә олан гаршылыглы мүнасибәтләрини поза биләр.
3. Иса Јәһја 14:1 ајәсиндә јазылмыш нәсиһәти нәјә ҝөрә вермишдир?
3 Һәбс вә е’дам едилмәздән бир гәдәр әввәл Иса өз шаҝирдләринә деди: “Үрәјиниз нараһат олмасын; Аллаһа иман един, Мәнә дә иман един” (Јәһја 14:1). Иса, һәвариләри фаҹиәли һадисәләр ҝөзләдији үчүн бу сөзләри сөјләди. Бу һадисәләрдән сонра, онлары чохлу тә’гибләр ҝөзләјирди. Иса билирди ки, ҝүҹлү мә’јуслуг уҹбатындан онун һәвариләри бүдрәјә биләрдиләр (Јәһја 16:1). Әҝәр онлар кәдәрә гәрг олсајдылар, бу вәзијјәт онларын руһани вәзијјәтләрини вә Јеһоваја олан е’тибарларыны зәифләдә биләрди. Бу, бизим ҝүнләрин мәсиһчиләринә дә аиддир. Узунсүрән мә’јуслуг үрәјимизи үзәрәк бизә чох изтираб ҝәтирмәјә гадирдир (Јеремја 8:18). Бизим дахили варлығымыз зәифләјә биләр. Бу ҹүр стресс вәзијјәтиндә биз мә’нәви ҝүҹүмүзү вә һәтта Јеһоваја хидмәт етмәк арзумузу итирә биләрик.
4. Символик үрәјимизи јорғунлугдан горумагда бизә нә көмәк едәр?
4 Биз Мүгәддәс Китабда вахтында олан бу ҹүр мәсләһәт тапырыг: “Һәр шејдән әввәл өз үрәјини гору, чүнки һәјат чешмәси одур” (Сүлејманын мәсәлләри 4:23). Мүгәддәс Китаб символик үрәјимизи мә’јуслугдан вә руһани јорғунлугдан горумаға көмәк едән практики мәсләһәтләр верир. Әввәлҹә өзүмүзү нәјә ҝөрә јорғун һисс етдијимизи мүәјјән етмәк лазымдыр.
Мәсиһчилик јүк дејил
5. Исанын мәсиһчилик јолу һаггындакы сөзләриндә һансы заһири зиддијјәт вар?
5 Доғрудур, мәсиһчи олмаг чох сә’ј ҝөстәрмәји тәләб едир (Лука 13:24). Иса һәтта демишдир: “Ким өз чармыхыны дашыјыб, Мәним ардымҹа ҝәлмирсә, Мәним шаҝирдим ола билмәз” (Лука 14:27, И–93). Илк бахышдан бу сөзләр санки Исанын јүнҝүл вә раһат бојундуруғу һаггындакы вә’динә зидд ҝедир, лакин бу әсла белә дејил.
6, 7. Нәјә ҝөрә демәк олар ки, хидмәтимиз јоруҹу дејил?
6 Ким вар гүввәсилә дәјәрли иш үчүн чох чалышырса, физики ҹәһәтдән јорулса да, адәтән мәмнунлуг вә раһатлыг тапыр (Ваиз 3:13, 22). Мәҝәр јахынларымызла Мүгәддәс Китабын ҝөзәл һәгигәтләрини бөлүшмәкдән даһа дәјәрли иш вармы? Бундан әлавә, Аллаһын јүксәк әхлаг нормалары әсасында јашамаға чалышараг дүшдүјүмүз һәр бир чәтинликләр, нәтиҹәдә әлдә етдијимиз фајдалар илә мүгајисәдә һеч нәдир (Сүлејманын мәсәлләри 2:10-20). Һәтта тә’гиб олундуғумуз заман белә, биз Аллаһын Падшаһлығы наминә әзијјәт чәкмәји шәрәф сајырыг (1 Петер 4:14).
7 Исанын һаггында данышдығы бојундуруг, һәгигәтән дә раһатлыг ҝәтирир, хүсусилә дә ону јалан динин руһани гаранлығында олан инсанларын дашыдығы јүклә мүгајисә етсәк. Аллаһ бизи шәфгәтлә севир вә гаршымыза јеринә јетирилмәси мүмкүн олмајан тәләбләр гојмур. “Онун әмрләри... ағыр дејилдир” (1 Јәһја 5:3). Мүгәддәс Јазылардан ҝөрүндүјү кими Исанын һәгиги давамчысы олмаг истисмаредиҹи дејил. Ајдындыр ки, бизим Аллаһа хидмәтимиз јорғунлуг вә мә’јуслуға сәбәб дејил.
Бизә јүк олан һәр шеји кәнара гојаг
8. Руһани јорғунлуг чох вахт нәјин нәтиҹәси олур?
8 Әҝәр биз руһән јорулмушугса, бу чох вахт бизә бу әхлагсыз системин јүк олмасынын нәтиҹәсидир. “Бүтүн дүнја... шәририн һакимијјәти алтында” олдуғундан, бизи ҝүҹдән салан вә мәсиһчи таразлығындан чыхармаға гадир олан дүшмән гүввәләр әһатә едир (1 Јәһја 5:19). Икинҹи дәрәҹәли ишләр бизим һәјатымызы мүрәккәбләшдирә вә мәсиһчи фәалијјәтинә даир графикимизи поза биләр. Бу әлавә бојундуруглар јүк олар, һәтта бизим руһумузу әзә биләр. Мүгәддәс Китабда әбәс јерә өјүд верилмир ки, “бизә јүк олан һәр шеји... кәнара гојаг” (Ибраниләрә 12:1-3, ЈД).
9. Мадди зәнҝинлик ардынҹа дүшмәк бизә неҹә јүк ола биләр?
9 Мисал үчүн, бизим нөгтеји-нәзәримизә бу дүнјадакы инсанларын әһвал-руһијјәси тә’сир едә биләр, чүнки онлар үчүн ҹәмијјәтдәки мөвге, пул, әјләнҹәләр, сәјаһәт вә буна бәнзәр шејләр башлыҹа јер тутур (1 Јәһја 2:15-17). Ы әсрдә бә’зи мәсиһчиләр варланмаға ҹан атараг, өз һәјатларыны чох мүрәккәбләшдирмишдиләр. Һәвари Павел бу һагда дејирди: “Варланмаг истәјәнләр исә јолдан чыхыр вә тора дүшүрләр вә инсанлары фәлакәтә вә һәлака апаран бир чох мә’насыз вә зијанвериҹи еһтираслара гапылырлар. Чүнки һәр ҹүр пислијин көкү пулпәрәстликдир. Буна гапылан бә’зиләри иман јолундан узаглашыб, өзләринә бир чох әзаблар чәкдирдиләр” (1 Тимотејә 6:9, 10).
10. Исанын әкинчи һаггындакы мәсәлиндән вар-дөвләт һаггында нә өјрәнирик?
10 Аллаһа хидмәтдә јорғунлуг вә мә’јуслуг һисси кечиририкми? Бәлкә ҝүҹүмүзү мадди шејләрә сәрф едирик? Исанын әкинчи һаггындакы мәсәлиндән ҝөрүндүјү кими, бу ҹүр һаллар һәр биримизлә баш верә биләр. Иса ‘дүнјанын гајғыларыны, зәнҝинлијин алдадыҹылығыны вә башга шејләрә һәвәси’ “араја ҝириб” үрәјимиздә Аллаһын Кәламынын тохумларыны боған тиканларла мүгајисә етди (Марк 4:18, 19). Буна ҝөрә дә Мүгәддәс Китаб бизә мәсләһәт едир: “Һәјатыныз пулпәрәстликдән азад олсун, өзүнүздә олан шејләрлә кифајәтләнин; чүнки О Өзү демишдир: “Сәни һеч бурахмајаҹағам вә әсла тәрк етмәјәҹәјәм” (Ибраниләрә 13:5).
11. Бизә јүк олан шејләрдән неҹә азад ола биләрик?
11 Бә’зән бизә даһа чох шеј әлдә етмәк ҹәһди јох, малик олдуғумуз шејләрин гајғысына галмаг зәрурәти јүк олур. Ким исә сағламлығы илә бағлы проблемләрин, јахынларынын өлүмү вә башга јоруҹу шәраитләрин уҹбатындан руһдан дүшә биләр. О заман нәтиҹәјә ҝәлирик ки, вахт өтдүкҹә һәјатда дәјишиклик етмәк лазымдыр. Бир әр-арвад бә’зи әјләнҹәләриндән вә әһәмијјәтсиз шәхси мәшғулијјәтләриндән имтина етмәк гәрарына ҝәлди. Онлар бу мәшғулијјәтлә әлагәли олан һәр шеји габлашдырыб, јығышдырдылар. Биз дә јорулмајаг вә гәлбән зәифләмәјәк дејә, вахташыры олараг өз вәрдишләримизи јохламаг вә бизә әбәс јерә јүк олан һәр шејдән кәнар олмаг һамымыз үчүн фајдалыдыр.
Мүдрик вә мүлајим олмаг ваҹибдир
12. Сәһвләримизә даир биз нәји јадда сахламалыјыг?
12 Бизим ән хырда мәсәләләрдә белә сәһвә јол вермәјимиз, һәјатымызы мүрәккәбләшдирә биләр. Давудун сөзләри неҹә дә доғрудур: “Фәсадларым башымдан ашды; ағыр јүк кими мәнә чох ағыр олдулар” (Мәзмур 38:4). Чох вахт бә’зи дәјишикликләр етдикдән сонра ағыр јүкдән азад олмаг олур.
13. Мүдриклик бизә хидмәтимизә таразлы нөгтеји-нәзәрлә јанашмагда неҹә көмәк едир?
13 Мүгәддәс Китаб бизи ‘сағлам шүур вә дәрракә’ инкишаф етдирмәјә тәшвиг едир (Сүлејманын мәсәлләри 3:21, 22, МКШ). О һәм дә гејд едир ки, “јухарыдан назил олан һикмәт... мүлајимдир [“мүдрикдир”, ЈД]” (Јагуб 3:17). Бә’зиләри мәсиһчи хидмәтиндә башгалары гәдәр етмәји өзләринә борҹ санырлар. Лакин Мүгәддәс Китаб мәсләһәт ҝөрүр: “Гој һәр кәс өз ишини сынасын вә о заман башгасы илә дејил, өзү илә ифтихара сәбәб олсун. Чүнки һәр кәс өз мәс’улијјәтинин јүкүнү дашыјаҹагдыр” (Галатијалылара 6:4, 5). Доғрудур, һәмиманлыларын јахшы нүмунәләри бизи Јеһоваја үрәкдән хидмәт етмәјә тәшвиг едир, лакин сағлам шүур вә дәрракә бизә, гаршымыза шәраитләримизә мүвафиг ҝәлән, әлчатан мәгсәдләр гојмаға көмәк едәҹәк.
14, 15. Физики вә емосионал еһтијаҹларымыза гајғы ҝөстәрәркән сағлам шүур бизә неҹә көмәк едәр?
14 Һәтта чох ваҹиб ҝөрүнмәјән мәсәләләрдә белә мүдрик давранмагла, аз јорулаҹағыг. Мәсәлән, сағламлыг үчүн фајдалы олан графикә риајәт етмәјә чалышырыгмы? Јеһованын Шаһидләринин филиалларындан бириндә хидмәт едән бир әр-арвадын нүмунәсинә диггәт јетирәк. Онлар әмин олдулар ки, сағлам шүур јорғунлуғун гаршысыны алмагда көмәк едир. Гадын дејир: “Нә гәдәр ишимиз олса да, биз һәмишә тәхминән ејни вахтда јатмаға чалышырыг. Биз һәм дә мүнтәзәм олараг бәдән тәрбијәси илә мәшғул олуруг. Бу бизә чох көмәк едир. Биз өз имканларымызын мәһдудлуғуну дәрк етмишик вә буна мүвафиг олараг һәјат сүрүрүк. Биз өзүмүзү, санки түкәнмәз енержи еһтијатына малик олан кәсләрлә мүгајисә етмәмәјә чалышырыг”. Дүзҝүн гидаланыр вә кифајәт гәдәр истираһәт едирикми? Сағламлығымыза шүурлу тәрздә нәзарәт едәрәк биз, еһтимал ки, руһани вә мә’нәви гүввәмизин түкәнмәсиндән гачынарыг.
15 Бизләрдән бә’зиләримизин хүсуси тәләбатлары вар. Чохлу чәтинликләри олан, таммүддәтли хидмәтчи кими хидмәт едән бир мәсиһчи баҹынын нүмунәсини нәзәрдән кечирәк. Онун сәһһәти илә әлагәдар, өзүнә хәрчәнҝ хәстәлијини дахил едән чох проблемләри вар. Бу ҹүр чәтинликләрин өһдәсиндән ҝәлмәкдә она нә көмәк едир? Баҹы дејир: “Мүәјјән вахты тәнһалыгда галмаг мәним үчүн чох ваҹибдир. Нә гәдәр чох ҝәрҝинлик вә јорғунлуг кечирирәмсә, бир о гәдәр чох тәнһалыгда раһат охумаға вә истираһәт етмәјә еһтијаҹ дујдуғуму һисс едирәм”. Сағлам шүур вә дәрракә фәрди еһтијаҹларымызы ајырд етмәјә вә онлары тә’мин етмәјә, бунунла да руһани јорғунлугдан гачынмаға көмәк едир.
Јеһова Аллаһ бизә гүввә верир
16, 17. а) Нәјә ҝөрә илк өнҹә руһани сағламлығымызын гајғысына галмаг ваҹибдир? б) Бизим ҝүндәлик графикимизә нәләр дахил олмалыдыр?
16 Илк өнҹә, еһтимал ки, руһани сағламлығын гајғысына галмаг лазымдыр. Әҝәр Јеһова Аллаһла јахын мүнасибәтләримиз оларса, физики ҹәһәтдән јорулсаг да, Она хидмәт етмәкдән һеч заман јорулмајаҹағыг. Јеһова “зәиф олана гүввәт верир; вә тагәтсизин гүдрәтини артырыр” (Ишаја 40:28, 29). Бу сөзләрин доғру олдуғуна өз шәхси тәҹрүбәсиндә әмин олан һәвари Павел јазмышдыр: “Биз руһдан дүшмүрүк; лакин әҝәр заһири варлығымыз позулурса да, дахили варлығымыз ҝүндән-ҝүнә тәзәләнир” (2 Коринфлиләрә 4:16).
17 “Ҝүндән-ҝүнә” ифадәсинә диггәт јетирәк. Бу ону нәзәрдә тутур ки, Јеһованын тәгдим етдији јардымдан һәр ҝүн истифадә етмәк лазымдыр. Јеһоваја 43 ил сәдагәтлә хидмәт едән миссионер баҹымызын һәјатында елә анлар олмушдур ки, о мөһкәм јорғунлуг вә мә’јуслуг һиссләри кечирмишдир. Лакин о зәиф дүшмәмишдир. Баҹы дејир: “Мән, ишләримә башламаздан әввәл Јеһоваја дуа етмәк вә Онун Кәламыны охумаг үчүн, өзүм үчүн сәһәр тездән дурмағы вәрдиш етмишәм. Бу ҹүр ҝүндәлик график сајәсиндә бу ҝүнә гәдәр таб ҝәтирә билмишәм”. Шүбһә етмәјә биләрик ки, әҝәр биз дә мүнтәзәм олараг, “ҝүндән-ҝүнә” Јеһоваја дуа едир вә Онун јүксәк хүсусијјәтләри вә вә’дләри барәдә дүшүнүрүксә, О бизә Өз гүввәси илә дајаг олаҹагдыр.
18. Мүгәддәс Китаб аһыл јашда вә ја хәстә оланлара неҹә тәсәлли верир?
18 Бу хүсусилә дә, аһыл јашда олдуғуна вә ја пис сағламлығына ҝөрә руһдан дүшән кәсләр үчүн фајдалыдыр. Аллаһын бу ҹүр хидмәтчиләри бә’зән руһдан дүшүрләр, чүнки өзләрини мүгајисә едирләр, лакин башгалары илә дејил, өзләринин әввәлки вахтлары илә. Јеһованын јашлылары гијмәтләндирдијини билмәк неҹә дә тәсәлливериҹидир! Мүгәддәс Китаб дејир: “Ағармыш сачлар ҝөзәллик таҹыдыр; салеһлик јолунда тапылар” (Сүлејманын мәсәлләри 16:31). Јеһова имканларымызын мәһдуд олдуғуну билир вә зәифликләримизә бахмајараг Она үрәкдән хидмәт етмәјимизи јүксәк гијмәтләндирир. Ҝөрдүјүмүз јахшы ишләр исә Аллаһын јаддашында әбәди галаҹагдыр. Мүгәддәс Јазылар бизи әмин едир: “Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун” (Ибраниләрә 6:10). Арамызда Јеһоваја онилликләр әрзиндә сәдагәтлә хидмәт едән кәсләрин олмасына неҹә дә шадыг!
Јахшылыг етмәји тәрҝитмәјин
19. Фәал сурәтдә јахшылыг етмәк нә гәдәр фајдалыдыр?
19 Бир чохлары инанырлар ки, мүнтәзәм олараг идманла мәшғул олмаг јорғунлуғу азалдыр. Буна бәнзәр тәрздә, биз өзүмүзү емосионал вә ја руһани ҹәһәтдән јорғун һисс едәндә, мүнтәзәм руһани фәалијјәт бизә көмәк едир. Мүгәддәс Китабда дејилир: “Јахшылыг едәркән руһдан дүшмәјәк; чүнки әҝәр зәиф дүшмәсәк, вахтында бичәрик. Демәли, нә гәдәр фүрсәтимиз варса, һамыја, хүсусән иманлылар аиләсинә јахшылыг едәк” (Галатијалылара 6:9, 10). Ики дәфә раст олунан “јахшылыг едәк” сөзүнә диггәт јетирәк. Бу, фәалијјәт ҝөстәрмәјин зәрури олдуғуну вурғулајыр. Биз башгаларына јахшылыг едәриксә, чәтин ки, зәиф дүшәк вә ја Јеһоваја хидмәтдә јорулаг.
20. Мә’јуслуг һалына ҝүҹ ҝәлмәк үчүн кимләрлә јахын үнсијјәтдә олмамалыјыг?
20 Лакин Аллаһын ганунларына һөрмәт етмәјән инсанларла үнсијјәт вә бирҝә ҝөрүлән ишләр ағыр јүкә чеврилә биләр. Мүгәддәс Китаб бизи хәбәрдар едир: “Дашын, гумун чәкиси ағырдыр, сәфеһин әсиб-ҹошмасы бунларын икисиндән дә ағырдыр” (Сүлејманын мәсәлләри 27:3, МКШ). Мә’јуслуг вә јорғунлугла мүбаризәни јүнҝүлләшдирмәк үчүн, бәдбин әһвал-руһијјә тәзаһүр етдирән, башгаларыны тәнгид едән вә ја онларын чатышмазлыгларыны ахтаран кәсләрлә јахын үнсијјәтдән гачынмаг лазымдыр.
21. Мәсиһчи ҝөрүшләри заманы биз башгалары үчүн неҹә руһландырма мәнбәји ола биләрик?
21 Мәсиһчи ҝөрүшләри Јеһовадан олан ән’амдыр. Онлар бизә руһани гүввә вермәк вә бир-биримизи раһатлыг ҝәтирән нәсиһәтләрлә вә үнсијјәтлә руһландырмаг имканы верир (Ибраниләрә 10:25). Шәрһләр верәркән вә ја програмын бәндләриндә иштирак едәркән, бизим һамымыз инкишафетдириҹи олмалыјыг. Үзәринә мүәллимләр кими рәһбәрлик ҝөтүрәнләр хүсусилә руһландырма мәнбәји олмаға чалышмалыдырлар (Ишаја 32:1, 2). Һәтта нәсиһәт вә ја төһмәт вермәк лазым ҝәләндә белә, буну раһатлыг ҝәтирәҹәк тәрздә етмәк лазымдыр (Галатијалылара 6:1, 2). Башгаларына мәһәббәт, сүбһәсиз ки, бизә Јеһоваја зәиф дүшмәдән хидмәт етмәјә көмәк едәҹәкдир (Мәзмур 133:1; Јәһја 13:35).
22. Гејри-камил инсани тәбиәтә малик олдуғумуза бахмајараг, нәјә ҝөрә ҹәсарәтли ола биләрик?
22 Бу ахыр ҝүнләрдә Јеһоваја хидмәт етмәк сә’ј тәләб едир. Бундан әлавә, мәсиһчиләр јорулмадан, гәлб ағрыларындан вә стресс вәзијјәтләриндән мүдафиә олунмајыблар. Бизим гејри-камил инсани тәбиәтимиз, ҝил габлар кими көврәкдир. Буна бахмајараг, Мүгәддәс Китаб дејир: “Бу сәрвәти сахсы габларда сахлајырыг ки, ән үстүн гүдрәт бизә јох, Аллаһа аид олсун” (2 Коринфлиләрә 4:7). Әлбәт ки, биз јорулаҹағыг, лакин ҝәлин һеч заман зәиф дүшмәјәк вә јахшылыг етмәји тәрҝитмәјәк. Бунун әвәзинә, ҝәлин ‘ҹәсатәрлә дејәк’: “Рәбб мәнә јардымчыдыр” (Ибраниләрә 13:6).
Гыса тәкрар
• Биз үзәримиздән һансы ағыр бојундуруглары кәнара гоја биләрик?
• Биз һәмиманлыларымыза неҹә ‘јахшылыг едә’ биләрик?
• Биз јорғунлуг вә ја мә’јуслуг һисс едәндә, Јеһова бизә неҹә јардым едир?
[19-ҹу сәһифәдәки шәкил]
Иса билирди ки, онун һәвариләри узун сүрән мә’јуслугдан әзијјәт чәкә биләрләр.