Мүгәддәс Китабы анламаға сизә нә көмәк едә биләр?
‘СӘН бу шејләри мүдрикләрдән вә ағыллылардан ҝизләдиб көрпәләрә ачдын’ (Лука 10:21). Исанын, сәмави Атасына үнванладығы бу сөзләрдән ҝөрүнүр ки, Мүгәддәс Китабы анламаг үчүн Аллаһын Кәламына дүзҝүн мүнасибәт бәсләмәк лазымдыр. Јалныз һәлим, өјрәнмәјә һазыр олан инсанларын анлаја биләҹәји китабы бәшәријјәтә вермәси Јеһованын мүдриклијиндән хәбәр верир.
Е’тираф етмәк лазымдыр ки, һәлим олмаг асан дејил. Гүрур бизә улу валидејнләримиздән галан мирасдыр. Үстәлик, «ахыр ҝүнләрдә», «худбин...еһтијатсыз [«инадҹыл», КМ], мәғрур» адамларын арасында јашајырыг (2 Тимотејә 3:1-4). Бунлар, Аллаһын Кәламыны дәрк етмәкдә бизә мане олан бә’зи факторлардыр. Һамымыз мүәјјән мә’нада әтрафымыздакы адамларын тә’сири алтына дүшмәјә мејллијик. Онда Мүгәддәс Китабы анламаг үчүн дүзҝүн мүнасибәтә неҹә јијәләнмәк олар?
Үрәји вә дүшүнҹәни һазырламаг
Бир вахтлар Аллаһын халгына рәһбәрлик етмиш Езра, ‘Рәббин Ганунуну тәдгиг етмәк үчүн’ «үрәјини һазырламышды» (Езра 7:10, КМ). Бәс биз үрәјимизи неҹә һазырлаја биләрик? Илк өнҹә Мүгәддәс Јазылара дүзҝүн мүнасибәт бәсләмәлијик. Һәвари Павел мәсиһчи гардашларына јазмышды: «Сиз Аллаһын биздән ешитдијиниз кәламыны гәбул етдикдә, ону бәшәри сөз олараг дејил, әслиндә олдуғу кими, Аллаһын кәламы олараг гәбул етдиниз» (1 Салониклиләрә 2:13). Мүгәддәс Китабы ади инсанлар јазса да, онларын јаздыглары Јеһовадан иди. Әҝәр бу ваҹиб фикри дәрк едириксә, онда охудугларымызы үрәкдән гәбул едәҹәјик (2 Тимотејә 3:16).
Үрәјимизи дуа васитәсилә дә һазырлаја биләрик. Мүгәддәс Китаб Аллаһын руһунун тә’сири алтында јазылдығындан, јалныз бу руһун көмәјилә мүгәддәс мәтни анлаја биләрик. Бу көмәк һагда Аллаһа дуа етмәлијик. Мәзмурчунун да Аллаһа бу ҹүр хаһишлә мүраҹиәт етдијини сөзләриндән ҝөрмәк олар: «Мәнә ағыл вер, ганунуна ҝөрә јашајым, бүтүн гәлбимлә она бағланым» (Мәзмур 119:34). Биз анҹаг әгли ҹәһәтдән дәрк етмәјимизә ҝөрә дејил, һәмчинин охудугларымызы үрәкдән гәбул етмәк үчүн зәрури олан дүзҝүн мүнасибәтә ҝөрә дә дуа етмәлијик. Мүгәддәс Китабы анламаг үчүн үрәјимизи һәгиги олан шејләри гәбул етмәјә һазырламалыјыг.
Дүшүнҹәнизи дүзҝүн истигамәтә јөнәлтдикҹә, Мүгәддәс Китабы өјрәнмәјин сизә ҝәтирәҹәји фајда үзәриндә дүшүнүн. Аллаһын Кәламына мүраҹиәт етмәјә тутарлы сәбәбләримиз чохдур, онлардан ән башлыҹасы исә одур ки, бу китаб Аллаһа јахынлашмағымыза көмәк едир (Јагуб 4:8). Јеһованын мүхтәлиф һадисәләрә ҝөстәрдији реаксија, Она садиг галанлары нә гәдәр јүксәк гијмәтләндирмәси, Ондан үз дөндәрәнләрлә неҹә давранмасы һаггында охујаркән, Аллаһын неҹә шәхсијјәт олмасыны ҝөрүрүк. Мүгәддәс Китабы охумагда мәгсәдимиз, илк нөвбәдә Аллаһла јахындан таныш олмаг вә Онунла мүнасибәтләримизи мөһкәмләндирмәк олмалыдыр.
Дүзҝүн мүнасибәтә јијәләнмәјә мане олан нәдир?
Аллаһын Кәламыны анламагда бизә нә мане ола биләр? Манеәләрдән бири ҝөзүнүздә нүфуз газанмыш инсанларын фикир вә инанҹларына олан садигликдир. Бәс бу адамлар Аллаһын Кәламында олан һәгигәти гијмәтләндирмир, һәгигәт тәрәфдары дејилләрсә, онда неҹә? Бу ҹүр вәзијјәтдә Мүгәддәс Китабын нә өјрәтдијини баша дүшмәк даһа чәтиндир. Буна ҝөрә дә Мүгәддәс Китаб бизи тәшвиг едир ки, һәјатда өјрәндијимиз һәр шеји диггәтлә тәдгиг едәк (1 Салониклиләрә 5:21).
Исанын анасы Мәрјәм дә белә чәтинликлә гаршылашмышды. О, јәһуди ән’әнәләри руһунда тәрбијә алмышды. Мәрјәм Мусанын Ганунуна садигликлә риајәт едир вә шүбһәсиз, синагога ҝедирди. Бир гәдәр сонра о баша дүшдү ки, валидејнләриндән өјрәндији ибадәт артыг Аллаһы гане етмир. Нәтиҹәдә, Мәрјәм Исанын тә’лимләрини гәбул етди вә мәсиһчи јығынҹағынын илк үзвләриндән бири олду (Һәвариләрин ишләри 1:13, 14). Мәрјәм бунунла валидејнләринә вә ја ән’әнәләринә һөрмәтсизлик ҝөстәрмәди, әксинә, онун бу һәрәкәти Аллаһа олан севҝисинин ифадәси иди. Мүгәддәс Китабдан фајда әлдә етмәк истәјириксә, Мәрјәм кими, Аллаһа садиглији инсанлара садигликдән үстүн тутмалыјыг.
Әфсуслар олсун ки, бу ҝүн чох аз сајда инсан Мүгәддәс Китаб һәгигәтләринә гијмәт верир. Бә’зиләри јалан тә’лимләрә әсасланан дини ән’әнәләрә садиг галмагла кифајәтләнирләр. Башгалары данышыглары вә ја һәјат тәрзләри илә һәгигәтә сајғысызлыг ҝөстәрирләр. Бу сәбәбдән дә Мүгәддәс Китаб һәгигәтләрини гәбул етмәк сиздән мүәјјән гурбанлар тәләб едә биләр: сизинлә достларыныз, гоншуларыныз, иш јолдашларыныз вә һәтта аиләниз арасында фикир ајрылығы јарана биләр (Јәһја 17:14). Бунунла белә, мүдрик Сүлејман јазмышды: «Һәгигәт ал, ону сатма» (Сүлејманын мәсәлләри 23:23). Әҝәр сән һәгигәти јүксәк гијмәтләндирирсәнсә, Јеһова Мүгәддәс Китабы баша дүшмәкдә сәнә көмәк едәҹәк.
Мүгәддәс Китабы баша дүшмәјә мане олан диҝәр фактор инсанларын орада јазыланлары һәјатда тәтбиг етмәк истәмәмәсидир. Иса шаҝирдләринә демишди: «Сәмави Сәлтәнәтин [Падшаһлығын] сирләрини анлама габилијјәти сизә верилмишдир, лакин онлара верилмәмишдир; чүнки бу халгын үрәји кобудлашыб, гулаглары илә ағыр ешидирләр» (Матта 13:11, 15). Исанын тәблиғ етдији инсанларын әксәријјәти хош хәбәрә һај вермир, шәхсијјәтләриндә лазыми дәјишикликләри етмәк истәмирдиләр. Онлар Исанын мәсәлиндәки таҹирдән неҹә дә фәргләнирдиләр! О, дәјәрли бир мирвари тапдыгда, она саһиб олмаг үчүн бүтүн вар-дөвләтини сатды. Мүгәддәс Китаб һәгигәтләри дә бизим үчүн ејни дәрәҹәдә дәјәрли олмалыдыр (Матта 13:45, 46).
Һәлимлијин ролу
Мүгәддәс Китабы дәрк етмәјә мане олан башлыҹа фактор инсанларын хош хәбәри ҝәтирәнләрә олан мүнасибәтидир. Мәсәлән, өзүндән ашағы сәвијјәли бирисинин кимисә өјрәтмәси онун мәнлијинә тохуна биләр. Лакин Исанын һәвариләри дә «охумамыш, авам [«садә», ЈД] адамлар» идиләр (Һәвариләрин ишләри 4:13). Бунун сәбәбини изаһ едән Павел јазырды: «Гардашлар, бахын, сиз дә’вәт олунмушлар кимсиниз: аранызда ҹисмани нөгтеји-нәзәрдән мүдрик, нүфузлу вә әсилзадә чох дејил. Лакин Аллаһ, мүдрикләри утандырмаг үчүн дүнјанын ағылсыз сајдыгларыны сечди» (1 Коринфлиләрә 1:26, 27). Әҝәр сиздән ашағы сәвијјәли инсанын сизә Мүгәддәс Китаб һәгигәтләрини өјрәтмәсини өзүнүзә лајиг билмирсинизсә, онда унутмајын ки, о инсан сизи өјрәтмәк үчүн Аллаһын истифадә етдији бир васитәдир. ‘Даһи Нәсиһәтчимиз’ олан Јеһова Аллаһ тәрәфиндән өјрәдилмәкдән даһа бөјүк шәрәф ола биләрми? (Јешаја 30:20, ЈД; 54:13).
Суријалы сәркәрдә Наамана да өзүндән ашағы сәвијјәдә олан бирисиндән ҝөстәриш алмаг чәтин иди. Ҹүзам хәстәлијиндән шәфа тапмаг мәгсәдилә, Нааман Јеһованын пејғәмбәри Елишанын јанына ҝетди. Елиша Аллаһын ҝөстәришини өз хидмәтчиси васитәсилә Наамана чатдырды. Елишанын сөзләри вә онлары һансы јолла Наамана чатдырмасы онун мәнлијинә тохундуғундан о, әввәлҹә Аллаһын пејғәмбәринин сөзүнә риајәт етмәк истәмәди. Лакин сонра фикрини дәјишди вә шәфа тапды (2 Падшаһлар 5:9-14). Биз дә Мүгәддәс Китаба мүраҹиәт едәндә демәк олар ки, охшар бир чәтинликлә растлашырыг. Мәсәлән, биз өјрәндик ки, руһани вә әхлаги ҹәһәтдән тәмизләнмәк үчүн јени һәјат јолуна гәдәм басмалыјыг. Бәс бу ишдә киминсә бизә јол ҝөстәрмәсинә имкан вермәк үчүн һәлимлијимиз чатаҹагмы? Јалныз өјрәнмәјә ҹан атанлар Мүгәддәс Китабы дәрк едә вә бундан севинҹ дуја биләрләр.
Бу ҹәһәтдән ҝөзәл бир нүмунәни һәбәшлиләрин мәләкәсинин сарајында хидмәт едән мә’мур гојуб. Бир ҝүн о, Африкаја гајыданда шаҝирд Филип онун арабасынын јанынҹа гачараг она мүраҹиәт етди. Мә’мур бу вахт Јешаја пејғәмбәрин китабыны охујурду. Филип мә’мурун охудугларыны баша дүшүб-дүшмәмәси илә марагланды. Мә’мур һәлимликлә ҹаваб верди: «Мәнә јол ҝөстәрән олмаса неҹә анлаја биләрәм?» Аллаһын Кәламыны даһа дәриндән баша дүшдүкдән сонра бу адам вәфтиз олунду вә «севинәрәк өз јолуна давам етди» (Һәвариләрин ишләри 8:27-39).
Јеһованын Шаһидләри садә инсанлардыр. Онлар һәр һәфтә алты милјондан чох инсанла Мүгәддәс Китаб өјрәнмәси кечирирләр. Мүгәддәс Китаб һәјатда јеҝанә дүзҝүн јолу вә бәшәријјәтин јеҝанә үмидини ҝөстәрдији, һабелә Аллаһла даһа јахындан таныш олмағымыза көмәк етдији үчүн милјонларла инсан ону өјрәниб анламагдан һәдсиз севинҹ дујур, мәмнунлуг алырлар. Сиз дә бу һиссләри дуја биләрсиниз.
[7-ҹи сәһифәдәки шәкил]
Наамана ади хидмәтчидән ҝөстәриш алмаг чәтин иди.
[7-ҹи сәһифәдәки шәкил]
Мүгәддәс Китабы анламаг үрәјимизи исидир.