Овчунун тәләсиндән гуртулуш

«[Јеһова] сәни овчунун тәләсиндән... гуртарар» (МӘЗМУР 91:3).

1. ‘Овчу’ кимдир вә о нә үчүн тәһлүкәлидир?

БҮТҮН һәгиги мәсиһчиләр фөвгәлбәшәр шүура малик һијләҝәр бир јыртыҹынын һүҹумларына мә’руз галырлар. О, Мәзмур 91:3 ајәсиндә ‘овчу’ адланыр. Бу дүшмән кимдир? 1883-ҹү ил 1 ијун сајындан башлајараг «Ҝөзәтчи Гүлләси» онун Шејтан Иблис олдуғуну ачыглајыр. Овчу гушу тәләјә салмаға чалышдығы кими, бу горхунҹ дүшмән дә һијлә илә Јеһованын халгыны алдадыб тора салмаг истәјир.

2. Шејтан нә үчүн овчуја бәнзәдилир?

² Гәдим заманларда гушлары ҝөзәл охудугларына, рәнҝбәрәнҝ ләләкләринә ҝөрә, о ҹүмләдән, гида кими истифадә етмәк вә гурбан ҝәтирмәк үчүн овлајырдылар. Анҹаг гушлар тәбиәтән чох еһтијатлы вә үркәк олдуғундан, онлары тутмаг чәтин олур. Буна ҝөрә дә, о дөврдә овчу әввәлҹә тәләјә салмаг истәдији гушу һәртәрәфли өјрәнирди. Сонра ону тутмаг үчүн фәнд гурурду. Шејтаны овчуја бәнзәтмәклә Мүгәддәс Китаб бизә онун үсулларыны баша салыр. Шејтан бизим һәр биримизи ајры-ајрылыгда өјрәнир. О бизим вәрдишләримизи вә хасијјәтимизи мүшаһидә едир, сонра исә бизи әсир етмәк үчүн ҝизли тәләләр гурур (2 Тимотејә 2:26). Шејтанын тәләсинә дүшмәк руһани ҹәһәтдән мәһв олмаг демәкдир, бу исә бизи әбәди өлүмә апарыб чыхарар. Буна ҝөрә дә, өзүмүзү горумаг үчүн «овчунун» мүхтәлиф фәндләрини билмәк лазымдыр.

3, 4. Шејтан һансы мә’нада аслан вә кобра кими давраныр?

³ Мәзмурчу да ҹанлы бәдии тәсвирдән истифадә едәрәк Шејтанын фәндләрини ‘ҝәнҹ асланын’ вә ‘кобранын’ (ЈД) фәндләринә бәнзәдирди (Мәзмур 91:13). Һәрдән Шејтан тә’гибләр вә дөвләт тәрәфиндән гојулан гадағалар васитәсилә Јеһованын халгына гаршы аслан кими, өндән ачыг һүҹума кечир (Мәзмур 94:20). Белә һүҹумлар бә’зиләрини бүдрәдә биләр. Анҹаг чох вахт белә ачыг һүҹумлар әкс тә’сир ҝөстәрәрәк Аллаһын халгыны даһа да бирләшдирир. Бәс Шејтанын ҝүҹлә сезилән, кобраја бәнзәр һүҹумлары һансылардыр?

⁴ Шејтан өзүнүн фөвгәлбәшәр шүурундан истифадә едәрәк, зәһәрли илан кими, хәлвәти олараг мәкрли вә өлдүрүҹү һүҹумлар едир. Бу үсулла о, Аллаһын бә’зи хидмәтчиләрини Јеһованын дејил, өз ирадәсини јеринә јетирмәјә ширникләндирәрәк, онларын әглини зәһәрләмәјә мүвәффәг олмушдур, бу исә фаҹиә илә нәтиҹәләнмишдир. Хошбәхтликдән, биз Шејтанын фитнәләриндән хәбәрсиз дејилик (2 Коринфлиләрә 2:11). Ҝәлин инди бу «овчунун» истифадә етдији тәләләрдән дөрдүнү нәзәрдән кечирәк.

Инсан горхусу

5. Нә үчүн ‘инсан горхусу’ еффектли тәләдир?

⁵ ‘Овчу’ баша дүшүр ки, һәр бир инсан башгалары тәрәфиндән гәбул едилмәк вә бәјәнилмәк истәјир. Мәсиһчиләр дә әтрафдакыларын фикир вә һиссләринә лагејд дејилләр. Буну билән Шејтан бундан суи-истифадә едә биләр. Мәсәлән, о, ‘инсан горхусу’ илә Аллаһын бә’зи хидмәтчиләрини тәләјә салыр (Сүлејманын мәсәлләри 29:25). Әҝәр Аллаһын хидмәтчиси инсан горхусундан ирәли ҝәләрәк башгаларына гошулуб Јеһованын гадаған етдији ишләри ҝөрүр вә ја Аллаһын Кәламында әмр едилән шеји етмирсә, «овчунун» тәләсинә дүшмүш олур (Језекел 33:8; Јагуб 4:17).

6. Һансы нүмунә ҝөстәрир ки, ҝәнҹ мәсиһчи «овчунун» тәләсинә дүшә биләр?

⁶ Мәсәлән, ҝәнҹ мәсиһчи мәктәб јолдашларынын тә’сири алтына дүшүб, сигарет чәкә биләр. Бәлкә дә, о, һәмин ҝүнү мәктәбә ҝедәндә сигарет чәкмәк һеч ағлындан белә кечмирди. Анҹаг тезликлә о һәм сағламлығына зијан вуран, һәм дә Аллаһы наразы салан бир иш тутур (2 Коринфлиләрә 7:1). Ахы ону јолдан чыхаран нә олду? О пис ушаглара гошулду вә горхду ки, бирдән онлары разы салмаз. Ҝәнҹләр, јол вермәјин ки, ‘овчу’ сизи ширникләндириб, тәләјә салсын! Онун әсарәтинә дүшмәмәк үчүн һәтта ән хырда шејдә белә ҝүзәштә ҝетмәјин. Мүгәддәс Китабын хәбәрдарлығына гулаг асараг, пис достлугдан гачын (1 Коринфлиләрә 15:33).

7. Шејтан бә’зи валидејнләри руһани таразлыгдан неҹә чыхара биләр?

⁷ Мүгәддәс Јазылар мәсиһчи валидејнләрин үзәринә аиләни мадди ҹәһәтдән тә’мин етмәк мәс’улијјәтини гојур. Мәс’улијјәтли валидејнләр бу тапшырыға ҹидди јанашырлар (1 Тимотејә 5:8). Анҹаг Шејтанын мәгсәди одур ки, мәсиһчиләр бу саһәдә таразлығы итирсинләр. Мүдирләри артыг ишләмәји тәләб етдикдә, бә’зи мәсиһчиләр ҝүзәштә ҝедиб мүнтәзәм олараг ҝөрүшләри бурахырлар. Ола билсин, онлар өз гардашлары илә бирликдә Јеһоваја ибадәт етмәк үчүн вилајәт конгресинин бүтүн һиссәләриндә олмаға ҝөрә ишдән иҹазә алмаға горхурлар. ‘Рәббә ҝүвәнмәк’ исә бизи бу тәләдән мүдафиә едәҹәкдир (Сүлејманын мәсәлләри 3:5, 6). Бундан башга, јадда сахласаг ки, һамымыз Јеһованын аилә үзвләријик вә О бизим гајғымыза галмағы Өз үзәринә ҝөтүрүб, онда таразлығы горумаг асан олаҹаг. Валидејнләр, иман едирсинизми ки, Јеһованын ирадәсини јеринә јетирсәниз, О мүтләг сизин вә аиләнизин гајғысына галаҹаг? Јохса Шејтан сизи инсан горхусу илә әсир едиб, өз истәдијини етдирәҹәк? Биз сизи бу суалларын үзәриндә дуа едәрәк дүшүнмәјә тәшвиг едирик.

Вар-дөвләт тәләси

8. Шејтан мәсиһчиләри вар-дөвләтә неҹә ширникләндирир?

⁸ Шејтан бизи өз тәләсинә салмаг үчүн һәм дә вар-дөвләтлә ширникләндирир. Бу дүнјанын игтисади системи чох вахт дәрһал варланмағы тәклиф едир ки, бу да һәтта Аллаһын халгындан да бә’зиләрини алдада биләр. Һәрдән кимәсә дејә биләрләр: «Бир аз чох ишлә. Имканын јахшылашанда, раһат јашајыб һәјатдан зөвг аларсан. Истәсән лап пионер хидмәтинә дә башлаја биләрсән». Белә сөзләри мәсиһчи јығынҹағында баҹы-гардашлардан өз мадди мәнфәәтләри үчүн истифадә едәнләрдән ешитмәк олар. Бу сөзләри һансы нијјәтлә дедикләри һагда дүшүнүн. Бу, Исанын мәсәлиндәки «ағылсыз» варлы адамын дүшүнҹә тәрзини әкс етдирмирми? (Лука 12:16-21).

9. Нә үчүн бә’зи мәсиһчиләр әшја арзуламаг тәләсинә дүшмүшләр?

⁹ Шејтан өз пис дүнјасыны елә идарә едир ки, инсанлара мүхтәлиф шејләр әлдә етмәк арзусу ашыланыр. Бу арзу мәсиһчинин һәјатына дахил олуб, кәламы боғараг «сәмәрәсиз» едә биләр (Марк 4:19). Мүгәддәс Китаб бизи тәшвиг едир ки, јемәјимиз, палтарымыз вә јашамаға јеримиз варса, онларла кифајәтләнәк (1 Тимотејә 6:8). Анҹаг чохлары бу мәсләһәтә әмәл етмәдикләри үчүн «овчунун» тәләсинә дүшмүшләр. Ола биләрми ки, онлар гүрур һиссиндән ирәли ҝәләрәк мүәјјән һәјат сәвијјәсини горумалы олдугларыны дүшүнсүнләр? Шәхсән бизим һаггымызда нә демәк олар? Даһа чох шеј әлдә етмәк үчүн һәгиги ибадәти икинҹи јерә гојуругму? (Һаггај 1:2-8). Тәәссүф ки, чәтин игтисади вәзијјәт оланда бә’зиләри өјрәшдикләри јахшы шәраитләрини горумаг үчүн руһаниликләрини гурбан вермишләр. Мадди шејләрә бу ҹүр мүнасибәт «овчунун» үрәјинҹәдир!

Зәрәрли әјләнҹәләр

10. Һәр мәсиһчи өзүнү нәдә јохламалыдыр?

¹⁰ «Овчунун» диҝәр фәнди инсанларын нәјин јахшы, нәјин пис олдуғуна даир тәсәввүрләрини позмагдыр. Бу ҝүн әјләнҹә нөвләринин чохунда Содом вә Һоморрада һөкм сүрән дүшүнҹә тәрзи әкс олунур. Һәтта телевизорда вә журналларда хәбәрләр дә зоракылығы вурғулајыр вә сексә чиркин марағы дәстәкләјир. Күтләви информасија васитәләриндә әјләнҹә кими гәләмә верилән шејләрин чоху инсанларын «хејирлә шәри ајырд етмәк» баҹарығыны күтләшдирир (Ибраниләрә 5:14). Анҹаг Јеһованын Јешаја пејғәмбәр васитәсилә дедији сөзләри хатырлајын: «Вај һалына писә јахшы, јахшыја пис сөјләјәнләрин» (Јешаја 5:20). ‘Овчу’ белә әјләнҹәдән истифадә едәрәк сизин дә дүшүнҹә тәрзинизә ҝизлинҹә тә’сир ҝөстәрмәјиб ки? Өзүнүзү јохламаг ваҹибдир (2 Коринфлиләрә 13:5).

11. «Ҝөзәтчи Гүлләси»ндә сериаллар һаггында һансы хәбәрдарлыг верилмишди?

¹¹ Тәхминән 25 ил әввәл «Ҝөзәтчи Гүлләси» гајғыкешликлә Аллаһын һәгиги хидмәтчиләринә сериаллар һаггында хәбәрдарлыг етмишдиa. Популјар сериалларын ҝөстәрдији ҝизли тә’сир һаггында дејилирди: «Мәһәббәт ахтарышы истәнилән һәрәкәтә бәраәт газандырыр. Мәсәлән, бир субај һамилә гыз өз рәфигәсинә дејир: “Ахы мән Виктору севирәм. Мәним үчүн фәрги јохдур... Онун ушағыны дашымаг мәним үчүн һәр шејә дәјәр!”» Һәзин мусигинин сәдалары алтында онун сүрдүјү һәјат тәрзинин дүзҝүн олмадығы һагда һеч фикирләшмирсән дә. Виктор сәнин дә хошуна ҝәлмәјә башлајыр. Гыза јазығын ҝәлир. Сән ону «баша дүшүрсән». Сонралар санки ајылан бир тамашачы демишди: «Адамын өзүнә һагг газандырмасы һејрәтамиздир. Билирик ки, әхлагсызлыг писдир... Анҹаг бир дә ҝөрүрсән ки, үрәјиндә әхлагсыз инсанлара јазығын ҝәлир».

12. Бә’зи телевизија програмлары илә бағлы хәбәрдарлығын мүнасиб олдуғуну һансы амилләр ҝөстәрир?

¹² Һәмин мәгаләләрин дәрҹ олундуғу вахтдан бәри әхлагы позан програмларын сајы даһа да артыб. Бир чох јерләрдә белә програмлар ҝүнүн 24 сааты верилир. Кишиләр, гадынлар вә јенијетмәләрин чоху өз ағылларыны вә үрәкләрини белә әјләнҹәләрлә гидаландырырлар. Анҹаг биз јалан дүшүнҹәләрлә өзүмүзү алдатмамалыјыг. Белә әдәбсиз сәһнәләрин дүнјада ҝөрдүјүмүздән зәрәрли олмадығыны дүшүнмәк сәһв оларды. Мәсиһчи евинә дә’вәт етмәји һеч вахт ағлындан белә кечирмәдији адамларла әјләнмәјә бәраәт газандыра биләрми?

13, 14. Бә’зиләринә телевизија һаггында хәбәрдарлыглар һансы фајданы ҝәтирмишдир?

¹³ ‘Садиг вә ағыллы гулун’ хәбәрдарлығына ҹидди јанашмағын бир чохларына фајдасы дәјмишдир (Матта 24:45-47). Мүгәддәс Китаба әсасланан ачыг мәсләһәтләри охујандан сонра бә’зи мәсиһчиләр мәгаләләрин шәхсән онлара неҹә тә’сир етдијини бу журнала јазмышларb. Бир баҹы е’тираф етмишди: «13 ил әрзиндә сериаллара алудә олмушам. Елә дүшүнүрдүм ки, садәҹә мәсиһчи ҝөрүшләринә ҝәлсәм вә һәрдәнбир хидмәтдә иштирак етсәм руһанилијимә һеч бир зәрәр дәјмәјәҹәк. Анҹаг мән бу сериалларын әһвал-руһијјәсини мәнимсәдим: әҝәр әр арвады илә пис рәфтар едирсә вә ја гадын севилмәдијини һисс едирсә, бу заман әхлагсызлыг үзүрлүдүр — әр өзү бунун сәбәбкарыдыр. Өзүмә һагг газандыранда мән дә бу аддымы атдым, Јеһоваја вә һәјат јолдашыма гаршы ҝүнаһ ишләтдим». Һәмин гадын јығынҹагдан кәнар едилди. Ахырда о өзүнә ҝәлди, төвбә етди вә јығынҹагда бәрпа олунду. Сериаллар һаггында мәгаләләрдә верилән хәбәрдарлыглар она ҝүҹ верди ки, Јеһованын нифрәт етдији әјләнҹәләрдән имтина етсин (Амос 5:14, 15).

¹⁴ Башга бир охуҹу јазмышдыр: «Мәгаләләри охујанда ҝөз јашларымы сахлаја билмәдим. Чүнки мән баша дүшүрдүм ки, үрәјим артыг Јеһоваја там бағлы дејил. Аллаһа сөз вердим ки, бир даһа сериалларын гулу олмајаҹағам». Бир мәсиһчи гадын мәгаләјә ҝөрә миннәтдарлығыны билдирәндән сонра өзүнүн сериаллара алудә олдуғуну е’тираф едиб јазырды: «Мән нараһат идим ки... ҝөрәсән бунун мәним Јеһова илә мүнасибәтимә тә’сири вармы? Мән ејни заманда һәм бу гәһрәманларла, һәм дә Јеһова илә неҹә дост ола биләрәм?» Әҝәр белә програмлар 25 ил бундан әввәл әхлагы позурдуса, ҝөрүн онларын тә’сири бу ҝүн неҹә ҝүҹлүдүр? (2 Тимотејә 3:13). Биз Шејтанын әдәбсиз әјләнҹә тәләләриндән, онун истәнилән формасындан — истәр сериаллардан, истәр зоракылыгла долу видеоојунлардан, истәрсә дә әхлагсыз мусиги клипләриндән өзүмүзү ҝөзләмәлијик.

Фикир ајрылыглары

15. Шејтан бә’зиләрини неҹә әсир алмышдыр?

¹⁵ Шејтан Јеһованын халгы арасында ихтилаф салмаг үчүн фикир ајрылыгларындан истифадә едир. Јығынҹагда һансы мәс’улијјәти дашымағымыздан асылы олмајараг бу тәләјә биз дә дүшә биләрик. Бә’зиләри шәхси мүбаһисәләрин Јеһованын јаратдығы ҝөзәл руһани сүлһү вә бирлији позмасына јол верәрәк, Шејтана әсир дүшмүшләр (Мәзмур 133:1-3).

16. Шејтан бирлијимизи неҹә позмаға чалышыр?

¹⁶ Биринҹи Дүнја мүһарибәси заманы Шејтан өндән һүҹума кечәрәк Јеһованын тәшкилатынын јерүзү һиссәсини мәһв етмәк истәсә дә, уғурсузлуға уғрамышды (Вәһј 11:7-13). Һәмин вахтдан бәри о, һијләјә әл атараг бирлијимизи парчаламаға чалышыр. Шәхси мүбаһисәләримизлә бирлији позанда ‘овчунун’ өз истәдијини јеринә јетирмәсинә имкан јаратмыш олуруг. Бунунла да, мүгәддәс руһун өзүмүзә, о ҹүмләдән јығынҹаға верилмәсинә әнҝәл төрәдәрик. Шејтан буна чох севинәр, чүнки јығынҹагда сүлһ вә бирлијин ҹүз’и позулмасы белә тәблиғ ишинә мане олур (Ефеслиләрә 4:27, 30-32).

17. Бир-бирләри илә дил тапмајан мәсиһчиләр нә етмәлидирләр?

¹⁷ Әҝәр һансыса мәсиһчи илә дил тапа билмирсинизсә, нә едә биләрсиниз? Дүздүр, вәзијјәтләр мүхтәлиф олур. Анҹаг проблемләрин јаранмасы үчүн чохлу сәбәбләр олса да, шәхси мүбаһисәләрин һәлл олунмамыш галмасына сәбәб јохдур (Матта 5:23, 24; 18:15-17). Мүгәддәс Јазылар Аллаһдан илһам алдығы үчүн камилдир. Мүгәддәс Китабын принсипләринә әмәл етсәк, һәмишә хејир тапарыг. Онлар һәмишә јахшы бәһрә верир!

18. Јеһованы тәглид етмәк фикир ајрылыгларыны һәлл етмәкдә бизә неҹә көмәк едәҹәк?

¹⁸ Јеһова «бағышлајан» Аллаһдыр (Мәзмур 86:5; 130:4). Јеһованы тәглид етмәклә, Онун севимли өвладлары олдуғумузу ҝөстәририк (Ефеслиләрә 5:1). Биз һамымыз ҝүнаһлыјыг вә Јеһованын әфвинә мөһтаҹыг. Буна ҝөрә дә, кимисә бағышламаг истәмәјәндә, еһтијатлы олмалыјыг ки, Исанын мәсәлиндәки гула охшамајаг. О өз гулунун борҹуну бағышламаг истәмәмишди, бахмајараг ки, һәмин борҹ ағасынын она јениҹә бағышладығы борҹун јалныз ҹүз’и бир һиссәси иди. Ағасына хәбәр чатанда, о, рәһмсиз гулу зиндана атдырды. Иса мәсәлинә белә јекун вурду: «Һәр бириниз гардашларынызын тәгсирләрини үрәкдән бағышламасаныз, Сәмави Атам да сизә елә едәр» (Матта 18:21-35). Һәмин мәсәлин вә Јеһованын бизи нечә дәфә асанлыгла бағышладығынын үзәриндә дүшүнмәк гардашымызла мүбаһисәләри һәлл едән заман мүтләг көмәк едәҹәк! (Мәзмур 19:14).

«Һагг-Тааланын пәнаһында» тәһлүкәсизлик

19, 20. Индики чәтин зәманәдә Јеһованын ‘пәнаһына вә көлҝәсинә’ неҹә бахмалыјыг?

¹⁹ Биз тәһлүкәли зәманәдә јашајырыг. Јеһова бизи мәһәббәтлә мүдафиә етмәсәјди, Шејтан һамымызы мәһв едәрди. Буна ҝөрә дә «овчунун» тәләсинә дүшмәмәк үчүн символик мә’нада сығынаҹаг јери олан «Һагг-Тааланын пәнаһында» галмалы, ‘Күлли-Ихтијарын көлҝәсиндә отурмалыјыг’ (Мәзмур 91:1).

²⁰ Ҝәлин Јеһованын хатырлатмаларына вә мәсләһәтләринә азадлығымызы әлимиздән алан дејил, бизи горујан бир шеј кими бахаг. Һәр биримиз фөвгәлбәшәр шүура малик олан јыртыҹынын һүҹумларына мә’руз галырыг. Јеһованын мәһәббәт долу көмәји олмаса, һеч ким тәләдән гуртула билмәз (Мәзмур 124:7, 8). Буна ҝөрә дә ҝәлин дуа едәк ки, Јеһова бизи «овчунун» тәләсиндән гуртарсын! (Матта 6:13).

[Һашијәләр]

Хатырлајырсынызмы?

• ‘Инсан горхусу’ нә үчүн өлүмҹүл тәләдир?

• Шејтан вар-дөвләтдән истифадә едәрәк инсаны тәләјә неҹә салыр?

• Шејтан бә’зиләрини налајиг әјләнҹәләрлә неҹә тәләјә салыб?

• Шејтан бирлијимизи позмаг үчүн һансы тәләдән истифадә едир?

[31-ҹи сәһифәдәки шәкил]

Әҝәр һәмиманлынызла дил тапа билмирсинизсә, нә етмәк олар?