Әзиз охуҹулар!

СИЗӘ билдирмәјә шадыг ки, бу сајдан етибарән «Ҝөзәтчи Гүлләси»нин тәртибатында бәзи дәјишикликләр олаҹаг. Дәјишикликләр барәдә данышмаздан әввәл, нәјин әввәлки кими галдығыны ҝөстәрмәк истәрдик.

Журналын ады — «Ҝөзәтчи Гүлләси Јеһованын Падшаһлығыны елан едир» — олдуғу кими галыр. «Ҝөзәтчи Гүлләси» Јеһованы һәгиги Аллаһ кими иззәтләндирмәјә вә охуҹуларына Аллаһын Падшаһлығы һаггында хош хәбәрлә тәсәлли вермәјә давам едәҹәк. Бу сајын 5-9-ҹу сәһифәләриндәки мәгаләләрдә һәмин Падшаһлығын нә олдуғу вә нә заман ҝәләҹәји арашдырылаҹаг. Бундан әлавә, «Ҝөзәтчи Гүлләси» бир чох онилликләр әрзиндә олдуғу кими, бундан сонра да инсанларын Иса Мәсиһә иманыны артырмаға, Мүгәддәс Китаб һәгигәтләрини дәстәкләмәјә вә дүнја һадисәләринин мәнасыны Мүгәддәс Китаб пејғәмбәрликләринин әсасында изаһ етмәјә давам едәҹәк.

Бәс дәјишикликләр нәдән ибарәт олаҹаг? Ҝәлин Азәрбајҹан дилиндә үч ајдан бир чыхаҹаг бу журналдакы мараглы јени рубрикалардан бәзиләринә нәзәр салагa.

Бу нәшрдә бир нечә дүшүндүрүҹү рубрика олаҹаг. «Билирсинизми?» адлы рубрикада Мүгәддәс Китабдан сечилмиш мөвзулары ишыгландыран әлавә мараглы мәлумат вериләҹәк. «Аллаһа јахынлашын» рубрикасы Мүгәддәс Китабын мүәјјән парчасындан Јеһова һаггында нә өјрәнә биләҹәјимизи ҝөстәрәҹәк. «Охуҹуларымыз сорушур» рубрикасында Мүгәддәс Китаба даир һамыны марагландыран суаллар мүзакирә едиләҹәк. Мәсәлән, чохларыны белә бир суал дүшүндүрүр: «Аллаһын Падшаһлығы инсанларын үрәјиндәдирми?» Бу суала 13-ҹү сәһифәдә ҹаваб тапаҹагсыныз.

Мүнтәзәм олараг чыхаҹаг бир чох рубрикалар аиләләр үчүн нәзәрдә тутулмушдур. «Аилә хошбәхтлијинин ачарлары» рубрикасында аилә проблемләри илә бағлы һәјатдан ҝөтүрүлмүш һадисәләр вә онларын һәлл олунмасында Мүгәддәс Китаб принсипләринин неҹә көмәк етдији ҝөстәриләҹәк. «Ушагларынызы өјрәдин» рубрикасы валидејнләрин өз өвладлары илә бирҝә охумасы үчүн нәзәрдә тутулмушдур. «Ҝәнҹ охуҹуларымыз үчүн» адлы рубрикада ҝәнҹләрин Мүгәддәс Китаб өјрәнмәси илә неҹә мәшғул ола биләҹәкләри тәсвир олунур.

Һәрдән бәзи әлавә рубрикалар да олаҹаг. «Онларын иманыны тәглид един» рубрикасы бизи Мүгәддәс Китаб персонажларынын нүмунәсини изләмәјә тәшвиг едәҹәк. Мәсәлән, бу сајын 18-21-ҹи сәһифәләриндә Илјас пејғәмбәр һаггында мараглы һекајәтдән онун иманыны неҹә тәглид едәҹәјинизи өјрәнәҹәксиниз. «Ҝәлән мәктуб» рубрикасында дүнјанын мүхтәлиф јерләриндән олан миссионерләр вә башгалары өзләри һаггында данышаҹаглар. «Исадан нә өјрәнирик?» рубрикасы әсас Мүгәддәс Китаб тәлимләрини садә тәрздә баша салаҹаг.

Биз инанырыг ки, «Ҝөзәтчи Гүлләси» Мүгәддәс Китаба һөрмәт едән вә онун әслиндә нә өјрәтдијини билмәк истәјән бүтүн охуҹулар үчүн мараглы олаҹаг. Үмидварыг ки, бу журнал Мүгәддәс Китаб һәгигәтләринә олан тәләбатынызы өдәјәҹәк.

НАШИРЛӘР

[Һашијә]