Хидмәтдә неҹә тәһәммүл ҝөстәрә биләрсән?

ЕЛӘ вахтлар олубму ки, ҝүҹүнүн түкәндијини һисс етдијиндән тәблиғ хидмәтини дајандырмаг истәмисән? Шиддәтли тәгибләр, нараһатчылыглар, сағламлығын зәиф олмасы, әтрафдакыларын тәзјиги вә ја инсанларын хош хәбәрә һај вермәмәси үзүндән тәһәммүл етмәк чәтин ола биләр. Амма Исанын нүмунәси үзәриндә дүшүн. О, «гаршысына гојулан севинҹ уғрунда» ән шиддәтли сынаға таб ҝәтирди (Ибр. 12:2). О билирди ки, Аллаһа гаршы ирәли сүрүлән иттиһамларын тамамилә әсассыз олдуғуну сүбут етмәклә Јеһованын үрәјини севиндирир (Сүл. мәс. 27:11).

Хидмәтдә тәһәммүл тәзаһүр етдирмәклә сән дә Јеһованын үрәјини севиндирә биләрсән. Бәс һансыса манеәләрин руһани ҝүҹүнү әлиндән алдығыны һисс едирсәнсә, онда нә етмәк олар? Аһыл јашлы вә зәиф сағламлығы олан Кристина баҹы етираф едир: «Өзүмү јорғун вә мәјус һисс етмәјим ади һалдыр. Сәһһәтимин зәифлији вә ҝүндәлик нараһатчылыглар кими јашла бағлы проблемләр мүвәггәти олараг сәјими зәифләдә биләр». Белә манеәләрә бахмајараг, хидмәтдә неҹә тәһәммүл ҝөстәрә биләрсән?

Пејғәмбәрләрдән нүмунә ҝөтүр

Падшаһлығын садиг тәблиғчиләри тәблиғ хидмәтиндә тәһәммүл ҝөстәрмәк үчүн гәдимдә јашамыш пејғәмбәрләрин малик олдуғу дүшүнҹә тәрзини мәнимсәјә биләрләр. Нүмунә үчүн Јеремјаја нәзәр салаг. Пејғәмбәр кими хидмәт етмәјә чағырыланда әввәлҹә о бу тапшырыгдан имтина етди. Бунунла белә, Јеремја 40 илдән чох бу чәтин тапшырығын өһдәсиндән тәһәммүллә ҝәлә билди, чүнки тамамилә Јеһоваја ҝүвәнмәји өјрәнмишди (Јер. 1:6; 20:7-11).

Јеремјанын нүмунәси Һенрик гардашымызы руһландырыр. О дејир: «70 илдән чохдур ки, хидмәт едирәм. Инсанларын әдавәтли вә лагејд мүнасибәти уҹбатындан руһдан дүшдүјүм анлар олуб. Белә анларда һәмишә Јеремјанын нүмунәсини јадыма салырам. Јеһоваја бәсләдији мәһәббәти вә Онунла сых мүнасибәти Јеремјаја пејғәмбәр кими хидмәтини давам етдирмәјә гүввә верирди» (Јер. 1:17). Јеремјанын нүмунәси Рафл гардашы да мөһкәмләндирир. О дејир: «Јеремја фикрини өзүнә вә өз һиссләринә ҹәмләмәк әвәзинә, Аллаһа ҝүвәнирди. Әксәр инсанлар она әдавәтли мүнасибәт ҝөстәрсә дә, о, ишини ҹәсарәтлә давам етдирирди. Мән буну һәмишә јадда сахламаға чалышырам».

Нүмунәси бир чох инсанлара хидмәтләрини тәһәммүллә давам етдирмәјә көмәк едән диҝәр пејғәмбәр Јешајадыр. Јеһова она сојдашларынын онун сөзләринә гулаг асмајаҹагларыны демишди. «Бу халгын үрәјини күтләшдир, гулагларыны кар елә»,— дејә Јеһова бәјан етмишди. Бәс Јешајанын хидмәти уғурсузлуғамы мәһкум едилмишди? Аллаһын нөгтеји-нәзәринҹә, бу һеч дә белә дејилди! Јеһова ону пејғәмбәр тәјин едәндә Јешаја демишди: «Мән бурадајам. Мәни ҝөндәр» (Јешаја 6:8-10). О өз тапшырығындан јајынмады. Тәблиғ етмәк тапшырығына сән дә Јешаја кими јанашырсанмы?

Лагејдлијә бахмајараг, Јешаја кими, хидмәти тәһәммүллә давам етдирмәк үчүн, ҝәрәк, фикримизи үзләшдијимиз мәнфи реаксијаја ҹәмләшдирмәјәк. Рафл мәјуслуғун өһдәсиндән неҹә ҝәлдијини бөлүшүр: «Мән инсанларын кобуд сөзләринә фикир вермәмәјә чалышырам. Саһәмдәки инсанларын хош хәбәрә истәдикләри мүнасибәти ҝөстәрмәјә һаггы вар». Анна әлавә едир: «Мән хошаҝәлмәз вә мәјуседиҹи фикирләри өзүмдән говмаға чалышырам. Бунун үчүн тәблиғә ҝетмәздән өнҹә дуа едир вә ҝүндәлик ајәни арашдырырам. Мәнфи фикирләрим о андаҹа јоха чыхыр».

Језекел Бабилдә сүрҝүндә олан инадкар јәһудиләр арасында пејғәмбәрлик едирди (Јез. 2:6). Әҝәр Аллаһын сөзләрини халга чатдырмасајды вә писләрдән бири Аллаһын хәбәрдарлыгларыны ешитмәдән өлсәјди, буна ҝөрә Језекел шәхсән мәсулијјәт дашыјаҹагды. Јеһова Језекелә демишди: «Онун ганы үчүн мәсулијјәти Мән сәнин үзәринә гојаҹағам» (Јез. 3:17, 18).

Һенрик Језекелин әһвал-руһијјәсини тәглид етмәјә чалышыр. О дејир: «Мән бүтүн инсанларын ганындан тәмиз олмаг истәјирәм. Инсанларын һәјатлары тәһлүкә алтындадыр» (Һәв. иш. 20:26, 27). Збигнев дә белә фикирләшир: «Инсанлар нә дүшүнүр-дүшүнсүн, Језекел хидмәтини давам етдирмәли иди. Бу мәнә тәблиғ ишинә Аллаһын ҝөзү илә бахмаға көмәк едир».

Сән тәк дејилсән

Тәблиғ едәндә сән тәк дејилсән. Биз дә һәвари Павел кими дејә биләрик: «Биз Аллаһын јанында әмәкдашларыг» (1 Кор. 3:9). Бәзән руһдан дүшдүјүнү етираф едән Кристина дејир: «Бу сәбәбдән мән һәмишә Јеһовадан ҝүҹ диләјирәм. О һеч вахт дуаларымы ҹавабсыз гојмур». Бәли, хидмәтдә Јеһованын руһунун көмәјинә еһтијаҹ дујуруг! (Зәк. 4:6).

Тәблиғ едәркән мүгәддәс руһун сајәсиндә биз һәмчинин «Руһун сәмәрәси»нә дахил олан хүсусијјәтләри тәзаһүр етдирә билирик (Галат. 5:22, 23). Бу исә, өз нөвбәсиндә, инсанларын реаксијасына бахмајараг, хидмәтимизи тәһәммүллә давам етдирмәјә көмәк едир. Һенрик дејир: «Тәблиғ хидмәти мәнә өз кејфијјәтләримин үзәриндә ишләмәјә көмәк едир. Мән сәбирли, нәзакәтли олмағы, һәмчинин асанлыгла тәслим олмамағы өјрәнирәм». Мүхтәлиф манеәләрә бахмајараг, хидмәтини тәһәммүллә давам етдирмәк сәнә руһун сәмәрәсини даһа чох инкишаф етдирмәјә көмәк едәҹәк.

Бу гејри-ади иши јеринә јетирмәк үчүн Јеһова мәләкләриндән истифадә едир (Вәһј 14:6). Мүгәддәс Китаб белә руһани мәхлугларын сајынын «минләрҹә минләр вә он минләрҹә он минләр» олдуғуну ачыглајыр (Вәһј 5:11). Исанын рәһбәрлији алтында мәләкләр Аллаһын јер үзүндә олан хидмәтчиләрини дәстәкләјирләр. Хидмәт заманы буну јадда сахлајырсанмы?

Анна дејир: «Мәләкләрин мәнимлә хидмәтдә олдуғунун үзәриндә дүшүнмәк мәни руһландырыр. Јеһованын вә Исанын нәзарәти алтында онларын ҝөстәрдикләри көмәји чох гијмәтләндирирәм». Садиг мәләкләрлә бирҝә чалышмаг неҹә дә бөјүк шәрәфдир!

Башга тәблиғчиләрлә әмәкдашлыг етмәк тәһәммүлүмүзү неҹә мөһкәмләндирә биләр? Бизим чохлу садиг Шаһидләрлә таныш олмаг фүрсәтимиз вар; бу, әсил хејир-дуадыр. Шүбһә јохдур ки, Мүгәддәс Китабын: «Дәмир дәмири итиләр, инсан инсанын ағлыны ити едәр» мәсәлинин доғрулуғуну өз үзәриндә һисс етмисән (Сүл. мәс. 27:17).

Башга тәблиғчиләрлә әмәкдашлыг едәркән, ола билсин, бизим үчүн тәзә олан тәблиғ методлары илә таныш олаг. Елжбета дејир: «Башга-башга тәблиғчиләрлә әмәкдашлыг едәндә әлимә һәм һәмиманлыларыма, һәм гаршылашдығымыз инсанлара мәһәббәт ҝөстәрмәк фүрсәти дүшүр». Мүхтәлиф тәблиғчиләрлә хидмәтә чыхмаға чалыш. Бу, хидмәтини мараглы едәҹәк.

Өзүнә јахшы бах

Хидмәтдә руһ јүксәклијини горумаг үчүн ишләримизи јахшы планлашдырмалы, јахшы шәхси өјрәнмә графикимиз олмалы вә кифајәт гәдәр истираһәт етмәлијик. Башга сөзләрлә десәк, һәм руһани, һәм дә физики сағламлығымызын гејдинә галмалыјыг.

Мүгәддәс Китабда јазылыб: «Чалышганын нијјәти хејир ҝәтирәр» (Сүл. мәс. 21:5). 88 јашлы Зигмунт дејир: «Јахшы тәртиб олунмуш график хидмәтимин даһа сәмәрәли олмасына көмәк едир. Вахтымы елә планлашдырырам ки, хидмәтдә кифајәт гәдәр иштирак едә билим».

Мүгәддәс Јазылары јахшы билмәјимиз бизи мөһкәмләндирир вә хидмәтдә көмәк едир. Јашамаг үчүн гидаланмағын зәрури олдуғу кими, тәблиғ хидмәтимизи давам етдирмәк үчүн дә мүнтәзәм олараг руһани гида гәбул етмәк ваҹибдир. Һәр ҝүн Аллаһын Кәламы илә гидаланмаг вә ‘вахтлы-вахтында верилән јемәји’ гәбул етмәк хидмәт етмәк үчүн бизә гүввә верә биләр (Мат. 24:45-47).

Елжбета хидмәтини јахшылашдырмаг үчүн һәјат тәрзиндә көклү дәјишикликләр етди. О данышыр: «Телевизора бахдығым вахты хејли азалтдым ки, хидмәтә һазырлашмаға даһа чох вахтым олсун. Һәр ахшам Мүгәддәс Китабы охујанда саһәмдә растлашдығым инсанлар һаггында дүшүнүрәм. Онлара көмәк едә биләҹәк ајәләр вә мәгаләләр ахтарырам».

Вахтлы-вахтында истираһәт етсән, ҝүмраһлығыны горујаҹаг, бунун сајәсиндә исә хидмәтдә там сурәтдә иштирак едә биләҹәксән. Диҝәр тәрәфдән, истираһәтә һәддиндән артыг чох вахт сәрф етсән, бу, хидмәтинин кејфијјәтинә мәнфи тәсир ҝөстәрәҹәк. Чалышган тәблиғчи олан Анҹеј гејд едир: «Инсан истираһәт етмәјәндә, бу, һәддән артыг јорғунлуға ҝәтириб чыхарыр, сонра да асанлыгла мәјуслуға гапылыр. Бунун баш вермәмәси үчүн мән әлимдән ҝәләни едирәм» (Ваиз 4:6).

Ҝөстәрдијимиз бүтүн сәјләрә бахмајараг, хош хәбәри чох аз инсан гәбул едир. Анҹаг Јеһова һеч вахт әмәјимизи унутмајаҹаг (Ибр. 6:10). Чохлары бизимлә сөһбәт етмәкдән имтина етсә дә, биз ҝедәндән сонра һаггымызда даныша биләрләр. Нәтиҹә Језекелин һадисәсиндә олдуғу кими ола биләр: инсанлар ‘биләҹәкләр ки, араларында бир пејғәмбәр’ олуб (Јез. 2:5). Бәли, иҹра етдијимиз хидмәт һеч дә асан дејил, лакин һәм өзүмүз, һәм дә бизә гулаг асан инсанлар ондан фајдаланырлар.

«Хидмәт бизә јени мәнлији ҝејинмәјә, һәмчинин Аллаһа вә јахынларымыза мәһәббәт ҝөстәрмәјә көмәк едир»,— дејә Зигмунт гејд едир. Анҹеј әлавә едир: «Бу хиласедиҹи ишдә иштирак етмәк бөјүк шәрәфдир. Тәблиғ иши һеч вахт белә мигјасда вә бу ҹүр шәраитдә бир даһа тәкрар олунмајаҹаг». Сән дә хидмәтини тәһәммүллә давам етдирсән, артыг индидән бол хејир-дуалар бичәҹәксән (2 Кор. 4:1, 2).

[31-ҹи сәһифәдәки шәкилләр]

Руһани вә физики сағламлығымызын гејдинә галмаг хидмәтимизи тәһәммүллә давам етдирмәјә көмәк едир