Мүгәддәс Китабы арашдырмаг үчүн вахт тәјин етмисинизми?
ӨТӘН ил Рәһбәрлик Шурасы јығынҹаг ҝөрүшләринин ҹәдвәлиндә дәјишикликләр етмишди ки, аиләләрин Мүгәддәс Китабы бирҝә өјрәнмәк вә мүзакирә етмәк үчүн даһа чох вахты олсун. Әҝәр сән аилә башчысысанса, һәјат јолдашын вә ушагларынла мүнтәзәм вә сәмәрәли аиләви өјрәнмә кечир. Ушаглары олмајан ҹүтлүкләр бу вахты Мүгәддәс Китабы бирликдә өјрәнмәјә сәрф едә биләрләр. Аилә мәсулијјәтләри олмајан субај баҹы-гардашлар исә бу вахты Мүгәддәс Китабы шәхсән өјрәнмәјә ајыра биләрләр.
Бир чохлары аиләви ибадәт ахшамы үчүн едилән дәјишикликләрә ҝөрә чох миннәтдардырлар. Мәсәлән, ағсаггал кими хидмәт едән Кевин јазыр: «Јығынҹағын һиссләрини ифадә етмәк үчүн һеч бир миннәтдарлыг сөзү бәс етмәз. Биз ағсаггаллар һәмин ахшамы Рәһбәрлик Шурасынын нәзәрдә тутдуғу кими аиләмизлә өјрәнмә кечирмәк үчүн неҹә истифадә едә биләҹәјимизи мүзакирә етдик».
Әри ағсаггал олан Ҹоди јазыр: «Бизим 15, 11 вә 2 јашларында олан үч гызымыз вар. Биз бу јахынларда жест дили јығынҹағына кечдик. Бүтүн ҝөрүшләрә һазырлашмаг үчүн чохлу вахт вә гүввә сәрф етмәли олуруг. Инди бу дәјишиклијин сајәсиндә диггәтимизи аиләви ибадәтә ҹәмләмәк үчүн әлавә вахтымыз вар».
Даими пионер кими хидмәт едән Ҹон вә Ҹоанн ҹүтлүјү јазыр: «Чох вахт аиләви өјрәнмәмиз тәсадүф нәтиҹәсиндә алынырды, чүнки чохлу јығынҹаг ишләримиз олдуғундан аиләви өјрәнмәјә ҝүҹ-бәла илә вахт тапырдыг. Бу дәјишиклик Јеһованын бизә олан әнамыдыр. Әҝәр ондан дүзҝүн истифадә етсәк, руһән тәравәтләнәҹәјик».
20 јашларында олан субај гардаш Тони шәхси өјрәнмә үчүн чәршәнбә ахшамыны ајырыб. Һәфтәнин диҝәр ҝүнләрини исә о, јығынҹаг ҝөрүшләринә һазырлашмаға сәрф едир. Тони дејир: «Чәршәнбә ахшамыны сәбирсизликлә ҝөзләјирәм. Чүнки бу ахшамы јалныз Јеһоваја ајырмышам. Тәхминән ики саат әрзиндә Јеһова илә мүнасибәтләрими мөһкәмләндирән мөвзулары арашдырырам. Өјрәнмә үчүн чохлу вахтым олдуғундан охудуғум ајәләр үзәриндә јахшы-јахшы дүшүнә билирәм». Бу, һансы бәһрәләри ҝәтириб? О давам едир: «Инди Јеһованын мәсләһәтләри үрәјимдә әввәлкиндән даһа дәрин көк салыб». Гардаш нүмунә ҝәтирир: «“Мүгәддәс Јазыларын дәрк едилмәси” енсиклопедијасындан Давуд вә Јонатан арасындакы достлуг һагда охумушам. Јонатанын фәдакарлығындан чох шеј өјрәнмишәм. Онун нүмунәси мәнә әсил достлуғун нә демәк олдуғуну даһа ајдын баша дүшмәјә көмәк едиб. Мән һәр чәршәнбә ахшамыны сәбирсизликлә ҝөзләјирәм ки, даһа чох ләл-ҹәваһират тапым!»
Шүбһә јохдур ки, Јеһованын бүтүн хидмәтчиләри аиләви ибадәтин вә Мүгәддәс Китаб өјрәнмәсинин сәмәрәли олмасы үчүн әлавә вахтдан дүзҝүн истифадә етмәклә бөјүк хејир-дуалар бичәҹәкләр.