Мүгәддәс Китабы шәхсән вә аиләви өјрәнмәк һәјати ваҹибдир!

1. Бизим ҝүнләрдә Рәһбәрлик Шурасы хүсуси олараг гајғымыза неҹә галыр вә нә үчүн?

¹ Биринҹи әсрдә олдуғу кими, инди дә Рәһбәрлик Шурасы Јеһованын халгынын рифаһы үчүн һәр шеји едир (Һәв. иш. 15:6, 28). Бөјүк мәшәггәтин гара булудлары башымызын үстүнү алдыгҹа, Падшаһлығын һәр бир тәблиғчисинин Јеһова илә сарсылмаз мүнасибәтләринин олмасы сон дәрәҹә ваҹибдир. Әввәлләр јығынҹағын китабөјрәнмәсинә ајрылан вахты нәјә сәрф едәҹәксиниз? Һамыны бу вахты аиләви ибадәтә сәрф етмәјә тәшвиг едирик. Бу вахтдан мүдрик истифадә етмәк бизә Аллаһын илһамланмыш Кәламына даһа дәриндән баш вурмаға вә онун һәјат верән суларындан чәкмәјә көмәк едәҹәк (Мәз. 1:1-3; Ром. 11:33, 34).

2. Аиләви өјрәнмәни неҹә тәшкил етмәк олар?

² Аиләви ибадәт. Аилә башчылары тәшвиг олунурлар ки, Јеһованын гаршысында дашыдыглары мәсулијјәти јеринә јетирсинләр — долғун, мүнтәзәм аиләви өјрәнмә кечирсинләр (Ганун. т. 6:6, 7). Үзәрләриндә аилә мәсулијјәти олмајан субај гардашлар вә баҹылар бу вахты Мүгәддәс Китабын шәхсән өјрәнилмәсинә вә тәдгиг едилмәсинә сәрф едә биләҹәкләр. Бу ‘шәр ҝүнләрдә’ һәр кәсин руһани ҝүҹү горумаг үчүн ‘һәр фүрсәтдән истифадә едәрәк’ өјрәнмәси вә дүшүнмәси һәјати ваҹибдир (Ефес. 5:15, 16).

3, 4. Һансы материаллардан истифадә едә биләрик вә нәји нәзәрә алмалыјыг?

³ Нәји арашдырмаг олар? «Ҝөзәтчи Гүлләси нәшрләринин индекси» вә «ҸД-РОМ-да Ҝөзәтчи Гүлләсинин китабханасы» васитәсилә лазыми мәлуматлары тапыб Мүгәддәс Китабын өјрәнилмәсини мараглы едә биләрсиниз. Аиләләр «Ҝөзәтчи Гүлләси»ндән «Аилә хошбәхтлијинин ачарлары», «Ушагларынызы өјрәдин» вә «Ҝәнҹ охуҹуларымыз үчүн» кими мүнтәзәм рубрикалары нәзәрдән кечирә биләрләр.

⁴ Мүгәддәс Китабы тәләсмәдән охумаг Аллаһа мәгбул принсипләри вә ибрәт дәрсләрини аиләнин һәр бир үзвүнүн ағлына вә үрәјинә һәкк едәҹәк (Ибр. 4:12). Диҝәр һалларда тәшкилатын бурахдығы филмләрдән биринә бахыб, мүзакирә етмәк олар. Тәхәјјүлүнүзү вә јарадыҹылыг габилијјәтинизи ишә салмаг үчүн гаршынызда чохлу имканлар вар. Нә үчүн аилә үзвләриниздән өјрәнмәјә даир фикирләрини сорушмајасыныз?

5. Мүгәддәс Китабы шәхсән вә аиләви өјрәнмәк нә үчүн инди бу гәдәр ваҹибдир?

⁵ Нә үчүн инди ваҹибдир? Руһанилијимизи мөһкәмләндирмәк бизи ‘дуруб, Јеһованын неҹә хилас едәҹәјинә бахмаға’ (ЈД) һазырлајаҹаг (Чых. 14:13). Ушагларыны ‘әјри вә позғун нәсил арасында’ тәрбијә етдикләри үчүн валидејнләрин Аллаһын рәһбәрлијинә еһтијаҹы вар (Филип. 2:15). Ушаглара мәктәбләрдәки ҝетдикҹә позғунлашан аб-һаваја ујмамаға көмәк етмәк лазымдыр (Сүл. мәс. 22:3, 6). Әр-арвадлар Јеһова илә олан ‘үчгат ипләрини’ мөһкәмләндирмәлидирләр (Ваиз 4:12). Белә исә, ҝәлин өзүмүзү ‘сон дәрәҹә мүгәддәс олан иманымызын’ тәмәли үзәриндә инкишаф етдирмәк үчүн јердә галан вахтдан мүдрик истифадә едәк! (Јәһуда 20).