Аилә графики: аиләви өјрәнмә
1 Ушагларыныз үчүн едә биләҹәјиниз ән гијмәтли шеј — онлара Јеһоваја гаршы мәһәббәт ашыламагдыр. Буну «евиндә отуранда» һәр һәфтә аиләви өјрәнмә кечирәндә етмәк чох ваҹибдир (Ганун. 6:5-7). Һәјат јолдашынын сәнинлә бир иманда олмадығындан, дини ҹәһәтдән ајрылмыш аиләдә јашамағындан вә ја ушагларыны тәк бөјүтмәјиндән асылы олмајараг, аиләви өјрәнмә сајәсиндә сән өз ушагларына дост ола биләр вә Јеһоваја јахынлашмагда онлара көмәк едә биләрсән.
2 Нәдән башламалы. Биринҹи аддым — мүнтәзәм олараг аиләви өјрәнмә кечирмәк вәрдиши инкишаф етдирмәкдир. Әҝәр сән өјрәнмәни һансы вахтда кечирәҹәјини мүәјјән едә билмирсәнсә, нәјә ҝөрә буну бүтүн аилә илә мүзакирә етмәјәсән? (Сүл. мәс. 15:22). Әҝәр ушагларын чох балаҹадырса, һәфтә әрзиндә бир нечә гыса өјрәнмә кечирмәк даһа мүнасиб ола биләр. Аиләниз үчүн нәјин даһа јахшы олаҹағыны мүәјјән ет. Аиләви өјрәнмә үчүн мүәјјән вахты тә’јин един вә бүтүн гүввәнизлә буна риајәт етмәјә чалышын.
3 Аиләви өјрәнмә заманы нә өјрәнмәк олар? Бә’зиләри һәмин һәфтә үчүн китабөјрәнмәјә вә ја «Ҝөзәтчи Гүлләси»нин өјрәнилмәсинә һазырлашырлар. Диҝәрләри ҝәнҹләрә аид олан мәгаләләри мүзакирә едирләр. Кичик јашлы оғлу вә гызы олан бир ата демишдир: «Онлар аиләви өјрәнмәни хүсуси сәбирсизликлә ҝөзләјирләр, чүнки өјрәнмә заманы биз “Мәним Мүгәддәс Китаб һекајәләри китабым”да тәсвир олунан һекајәләрә әсасән сәһнәҹикләр һазырлајырыг. Бу ҹүр сәһнәҹикләр ушагларын үрәјиндә дәрин из бурахыр вә онлар Мүгәддәс Китабы даһа јахшы баша дүшүрләр, бу исә өјрәнилән абзасларын сајындан ваҹибдир».
4 Өјрәнмәни һәр һәфтә кечирин. Аиләви өјрәнмә мүнтәзәм сурәтдә кечирилмәлидир. Чалышмаг лазымдыр ки, бу, бүтүн аилә үчүн севиндириҹи бир һадисә олсун. Тәләб олунарса, өјрәнмәнин ҝүнүнү вә саатыны дәјишмәк олар. Елә шәраит дә јарана биләр ки, башга материал өјрәнмәк тәләб олунсун. Лакин һәтта дәјишикликләр тәләб олунса белә, аиләви өјрәнмәдә узунмүддәтли фасиләләрә јол вермәк лазым дејил. Бир баҹы дејир: «Әҝәр аиләви өјрәнмәни башга бир вахта кечирмәк тәләб олунурдуса, атам јени вахты бир кағыз үзәриндә јазыб сојудуҹунун гапысына јапышдырырды, беләликлә, өјрәнмәнин нә вахт кечириләҹәјини биз һәмишә билирдик». Бу аиләнин аиләви өјрәнмәни мүнтәзәм олараг кечирмәјә чалышмасы неҹә дә ҝөзәлдир! Ушагларыны «Рәббин тәрбијә вә нәсиһәти илә» тәрбијә едәндә, сән һәм онлары, һәм дә сәмави Атамызы севдијини ҝөстәрирсән (Ефес. 6:4).