Үрәкдән вә севинҹлә вер
ҺӘВАРИ Павел сәхавәтли олмаға даир јазырды: «Һәр кәс үрәјиндә нијјәт етдији кими версин». Сонра исә о әлавә едәрәк деди: «Кәдәрлә, јахуд мәҹбури јох; чүнки Аллаһ ҝүләр үзлә верәни севир» (2 Кор. 9:7). Јеһова һеч кәси тәмиз ибадәти дәстәкләмәјә мәҹбур етмир. О имкан верир ки, Онун хидмәтчиләри мәһәббәтләрини көнүллү вә севинҹлә вермәклә ҝөстәрсинләр. Тарих боју Онун халгы бу чағырыша һәвәслә һај вермишдир. Ҝәлин үч нүмунәјә нәзәр салаг.
Јеһова Исраил халгыны Мисирдән азад едәндән сонра онлара Һүзур чадырыны гурмағы әмр етди. Бунун үчүн материаллар лазым олдуғундан халг ианә етмәјә чағырылырды. Буна ҹаваб олараг, «көнлү истәјән һәр адам» гызыл вә ҝүмүш, зинәт әшјалары вә диҝәр лазыми шејләри ҝәтирди. Халг о гәдәр әлиачыг иди ки, һәтта ианәни дајандырмаг барәдә елан сәсләнди (Чых. 35:5, 21; 36:6, 7).
Әсрләр сонра мәбәдин тикинтиси башланмаг үзрә оланда јенидән Аллаһын халгынын тәмиз ибадәти дәстәкләмәк имканы јаранды. Давуд падшаһын өзү дә бу лајиһәјә чохлу вәсаит ајырды вә башгаларыны да ианә етмәјә дәвәт етди. Онлар буну бөјүк һәвәслә етдиләр. Бир тәсәввүр един: тәкҹә гызыл вә ҝүмүшүн дәјәри мүасир өлчү илә 100 милјард АБШ долларына бәрабәр иди! Халг Јеһоваја көнүллү ианәләр етдијинә ҝөрә һәддиндән артыг севинирди (1 Салн. 29:3-9; 2 Салн. 5:1).
Иса Мәсиһин еркән давамчылары да севинҹлә вермәк руһу тәзаһүр етдирирдиләр. Б. е. 33-ҹү илинин Пентикост ҝүнүндә вәфтиз олунан 3 000-ә јахын адамын әксәријјәти Јерусәлим сакини дејилди. Имкансызларын мүвәггәти олараг шәһәрдә галыб јени иманлары һаггында билик әлдә едә билмәләри үчүн мәсиһчиләр вәсаит топламаг гәрарына ҝәлдиләр. Гардашлар өз әмлакларыны сатыб јығылан пуллары һәвариләрә вердиләр ки, еһтијаҹы оланлара көмәк етсинләр. Јеһова онларын иман вә мәһәббәтләринин бу ҹүр тәзаһүрүнү ҝөрәндә неҹә дә севинирди! (Һәв. иш. 2:41-47).
Бизим ҝүнләрдә дә мәсиһчиләр вахтларындан, гүввәләрдән вә вәсаитләриндән сәхавәтлә вә севинҹлә тәмиз ибадәти дәстәкләмәк үчүн истифадә едирләр. 18-ҹи сәһифәдәки чәрчивәдә буну етмәјин бәзи үсуллары ҝөстәрилир.
[18-ҹи сәһифәдәки чәрчивә]
БӘЗИЛӘРИ НЕҸӘ ИАНӘ ЕДИРЛӘР?
ҮМУМДҮНЈА ИШИ ҮЧҮН ПУЛ ИАНӘЛӘРИ
Чохлары өз бүдҹәләриндә мүәјјән мигдарда пул ајырыб, үзәриндә «Үмумдүнја иши үчүн ианәләр (Матта 24:14)» јазылан гутуја атырлар.
Јығынҹаглар бу көнүллү ианәләри һәр ај јерли филиала ҝөндәрирләр. Көнүллү едилән пул ианәләрини нәздиндә олдуғунуз филиала ҝөндәрмәк олар. Зәһмәт олмаса, ианә илә бирликдә онун һәдијјә олдуғуну билдирән гыса мәктуб да ҝөндәрин.
ИАНӘНИН ДИҜӘР НӨВЛӘРИ
Бәзи өлкәләрдә үмумдүнја тәблиғ ишини дәстәкләмәк үчүн пул ианә етмәкдән савајы, башга үсуллар да вар. Онлардан бәзиләри бунлардыр:
Дашынмаз әмлак. Сатыша јарарлы олан дашынмаз әмлакы һәдијјә кими ја бирбаша филиала ианә етмәк олар, ја да һәдијјә едәнин өмрүнүн ахырынадәк орада јашајыб әмлакына саһиблик һүгугуна малик олмаг шәртилә ианә етмәк олар. Өз әмлакынызы һәдијјә олараг филиала вермәк үчүн сәнәдләри һазырламаздан өнҹә, зәһмәт олмаса, филиал илә әлагә јарадын.
Вәсијјәтнамә. Әмлакы вә ја пулу ганунла мүәјјән олунмуш формада тәртиб едилән вәсијјәтнамә әсасында филиала вермәк олар. Белә олан һалда, зәһмәт олмаса, вәсијјәтнамәнин сурәтини филиала ҝөндәрин.