Көнүллү ианә етмәк шәрәфи сәнә севинҹ ҝәтирирми?
ФИЛИПИДӘ јашајан еркән мәсиһчиләр һәгиги ибадәт уғрунда ҝөстәрдикләри сәхавәтлиликләри илә танынырдылар. Һәвари Павел Аллаһдан илһам алараг онлара үнванладығы мәктубда јазмышды: «Һәр дәфә сизи хатырлајанда Аллаһыма шүкүр едирәм вә һамыныз үчүн јалварыб севинҹлә дуа едирәм. Ахы сиз илк ҝүндән башлајараг хош хәбәри дәстәкләјирсиниз» (Филип. 1:3—5). Павел Лидијанын гонагпәрвәрлијини чох ҝөзәл хатырлајырды. Бу гадын евиндәкиләри илә бирҝә вәфтиз олунанда исрарла ондан вә әмәкдашларындан евиндә гонаг галмағы хаһиш етмишди (Һәв. иш. 16:14, 15).
Бу һадисәдән чох кечмәмиш Филипидә јени јаранмыш јығынҹаг тәхминән 160 километр аралыда јерләшән Салоники шәһәриндә бир нечә һәфтәлик һәмиманлыларына баш чәкән Павелә ики дәфә јардым ҝөндәрмишди (Филип. 4:15, 16). Бир нечә илдән сонра Филипидә вә Македонијада јашајан гардашлар чәтинлик чәкмәләринә вә «јохсул олмаларына» бахмајараг, Јерусәлимдәки һәмиманлыларынын тәгиб олундугларыны ешидән кими онлара көмәк әлләрини узатдылар. Павел гејд етди ки, онлар «артыгламасы илә сәхавәт ҝөстәрдиләр». Һәмчинин о јазмышды: «Онлар биздән бәхшишләрини гәбул етмәји... дөнә-дөнә хаһиш едирдиләр» (2 Кор. 8:1—4; Ром. 15:26).
Филипилиләрин мәсиһчилији гәбул етмәләриндән тәхминән он ил кечсә дә, онлар әввәлки кими әлиачыг идиләр. Павелин Ромада һәбсдә олдуғундан хәбәр тутан кими јанына Епафродити ҝөндәрдиләр. Епафродит гуру вә дәниздән кечәрәк 1287 километр гәт едиб бу мәсиһчиләрин она ҝөндәрдији јардымы чатдырды. Сөзсүз ки, филипилиләр Павелин еһтијаҹларынын гејдинә галырдылар ки, о, һәбсдә олмасына бахмајараг, гардашлары мөһкәмләндирмәкдән вә тәблиғ етмәкдән галмасын (Филип. 1:12—14; 2:25—30; 4:18).
Бу ҝүн һәгиги мәсиһчиләр тәблиғ вә шаҝирд һазырламаг ишини дәстәкләмәји имтијаз һесаб едирләр (Мат. 28:19, 20). Онлар Падшаһлыг ишинин ирәлиләмәси үчүн вахт, ҝүҹ вә вәсаитләрини әсирҝәмирләр. Ашағыдакы чәрчивәдә бизим ҝүнләрдә тәблиғ ишини дәстәкләмәјин бәзи үсуллары ҝөстәрилир.
[22–ҹи сәһифәдәки чәрчивә]
БӘЗИЛӘРИ НЕҸӘ ИАНӘ ЕДИРЛӘР?
ҮМУМДҮНЈА ИШИ ҮЧҮН ПУЛ ИАНӘЛӘРИ
Чохлары өз бүдҹәләриндән мүәјјән мигдарда пул ајырыр вә үзәриндә «Үмумдүнја иши үчүн ианәләр (Матта 24:14)» јазылан гутуја атырлар.
Јығынҹаглар бу көнүллү ианәләри һәр ај јерли филиала ҝөндәрир. Көнүллү едилән пул ианәләрини өлкәнизә бахан филиала ҝөндәрмәк олар. Зәһмәт олмаса, ианә илә бирликдә онун һәдијјә олдуғуну билдирән гыса мәктуб да ҝөндәрин.
ИАНӘНИН ДИҜӘР НӨВЛӘРИ
Бәзи өлкәләрдә үмумдүнја тәблиғ ишини дәстәкләмәк үчүн пул ианә етмәкдән савајы, башга үсуллар да вар. Онлардан бәзиләри бунлардыр:
Дашынмаз әмлак. Сатыша јарарлы олан дашынмаз әмлакы һәдијјә кими ја бирбаша филиала ианә етмәк олар, ја да һәдијјә едәнин өләнәдәк орада јашајыб әмлакына саһиблик һүгугуна малик олмаг шәртилә ианә етмәк олар. Өз әмлакынызы һәдијјә олараг филиала вермәк үчүн сәнәдләри һазырламаздан өнҹә, зәһмәт олмаса, филиалла әлагә сахлајын.
Вәсијјәтнамә. Әмлакы вә ја пулу ганунла мүәјјән олунмуш формада тәртиб едилән вәсијјәтнамә әсасында филиала вермәк олар. Белә олан һалда, зәһмәт олмаса, вәсијјәтнамәнин сурәтини филиала ҝөндәрин.