Иса өзү һаггында нә өјрәдирди?
«Иса өзүнүн ким олдуғуну, һарадан ҝәлдијини, нә үчүн дүнјаја дахил олдуғуну вә ҝәләҹәкдә ону нә ҝөзләдијини јахшы билирди» (ЈАЗЫЧЫ ҺЕРБЕРТ ЛОКЈЕР).
ИСАНЫН өјрәтдији шејләри гәбул едиб онлара иман етмәк үчүн әввәлҹә онун һаггында билик алмалыјыг. Иса ким иди? О, һарадан ҝәлмишди? Һәјатда мәгсәди нә иди? Маттанын, Маркын, Луканын вә Јәһјанын јаздығы Мүждәјә мүраҹиәт етсәк, бу суалларын ҹавабыны санки Исанын өз ағзындан ешитмиш оларыг.
О, бөјүк пејғәмбәр иди. Бир дәфә Иса Мәсиһ шаҝирдләринә: «Әҝәр сиз Мусаја иман етмиш олсајдыныз, Мәнә дә иман едәрдиниз; она ҝөрә ки, о, Мәним һаггымда јазмышдыр» демәклә Мусанын онун һаггында јаздығыны ачыг-ајдын сөјләмишди (Јәһја 5:46). Јеһова Иса һаггында Мусанын васитәсилә, һәмчинин бу сөзләри дә демишди: «Онлар үчүн сојдашлары арасындан сәнин кими бир пејғәмбәр јетирәҹәјәм вә сөзләрими онун дилиндән ешидәҹәксиниз. О, әмр етдијим һәр шеји сизә сөјләјәҹәк» (Ганунун тәкрары 18:18, 19). Бу пејғәмбәрлик сөзләри Исаја гулаг асмалы олдуғумузу ајдын ҝөстәрир. Бунунла белә, о, садәҹә пејғәмбәр дејилди.
Јер үзүнә ҝәлмәздән әввәл мөвҹуд иди. Бир дәфә Иса демишди: «Ибраһим олмаздан әввәл Мән варам» (Јәһја 8:58). Ибраһим Исанын доғулмасындан тәхминән 2 000 ил габаг јашамышды. Бунунла белә, Иса һәтта бу садиг инсандан да әввәл мөвҹуд иди. Бәс о, һарада јашајырды? Иса өзүнүн ҝөјдән ендијини сөјләмишди (Јәһја 6:38).
Аллаһа хүсусилә јахын олан шәхс. Иса өзүнү ‘Аллаһын ваһид Оғлу’ адландырмышды (Јәһја 3:18). Нәјә ҝөрә? Мүгәддәс Китабда Адәм дә Аллаһын оғлу адланыр, чүнки о, һәјаты инсан валидејнләриндән дејил, бирбаша Аллаһдан алмышды (Лука 3:38). Буна бәнзәр тәрздә, Јеһованын билаваситә јаратдығы јеҝанә варлыг олдуғу үчүн Иса Мәсиһ Аллаһын Оғлу адланыр.
«Инсан Оғлу». Иса бу ифадәни өзүнә аид етдији диҝәр ифадәләрдән чох ишләтмишди (Матта 8:20). Бунунла о, инсан ҹилдинә ҝирмиш мәләк вә ја Аллаһ олмадығыны ҝөстәрмишди. О, инсан иди. Мүгәддәс руһу васитәсилә Аллаһ Оғлунун һәјатыны јер үзүнә, бакирә Мәрјәмин бәтнинә көчүрдү. Нәтиҹәдә, Иса камил, ҝүнаһсыз инсан кими доғулдуa (Матта 1:18; Лука 1:35; Јәһја 8:46).
Вәд едилмиш Мәсиһ. «Билирәм ки, Христос адланан Мәсиһ ҝәләҹәкдир»,— дејә самаријалы гадын Исаја сөјләмишди. О, гадына белә ҹаваб вермишди: «Сәнинлә данышан Мән, Ојам» (Јәһја 4:25, 26). «Мәсиһ» вә «Христос» сөзләри «Мәсһ олунмуш» мәнасыны верир. Иса Аллаһын вәдини јеринә јетирмәкдә әсас ролу ојнамаг үчүн мәсһ едилиб вә ја бу ишә тәјин олунуб.
Јер үзүнә ҝәлмәкдә әсас мәгсәди. Бир дәфә Иса демишди: «Аллаһ Сәлтәнәтинин мүждәсини... јајмалыјам; чүнки Мән бунун үчүн ҝөндәрилмишәм» (Лука 4:43). О, еһтијаҹы олан инсанлар үчүн јахшы ишләр ҝөрсә дә, һәјатда әсас амалы Аллаһын Падшаһлығыны тәблиғ етмәк иди. Онун Падшаһлыг һаггында нә өјрәтдијини бир гәдәр сонра арашдыраҹағыг.
Ајдындыр ки, Иса ади адам дејилдиb. Ҝөрәҹәјимиз кими, ҝөјдә јашамасы онун јер үзүндә сөјләдији сөзләри даһа мәналы едирди. Беләликлә, онун тәблиғ етдији хәбәрин јер үзүндә јашајан милјонларла инсана тәсир етмәси бизи тәәҹҹүбләндирмәлидирми?
[Һашијәләр]
a Әлавә мәлумат алмаг үчүн «Аллаһын рәһбәрлији Ҹәннәтә апаран јолу ҝөстәрир» брошүрасынын 20-ҹи сәһифәсиндәки чәрчивәјә бахын.
b Иса вә онун Аллаһын нијјәтиндә ојнадығы рол һагда даһа чох мәлуматы Јеһованын Шаһидләри тәрәфиндән дәрҹ едилмиш «Мүгәддәс Китаб әслиндә нә өјрәдир?» китабынын «Иса Мәсиһ һаггында һәгигәт» адлы 4-ҹү фәслиндән тапа биләрсиниз.