«Ҝөзәл нәзарәтчи вә јахшы дост»

ЈЕҺОВАНЫН Шаһидләринин Рәһбәрлик Шурасында хидмәт едән Ҹон Барр гардаш 2010-ҹу илин декабрын 4-ү шәнбә ҝүнү сәһәр јерүзү һәјатына јекун вурду. Онун 97 јашы вар иди. Барр гардашы «ҝөзәл нәзарәтчи вә јахшы дост» кими таныјырдылар.

О, Шотландијанын Абердин шәһәриндә дүнјаја ҝөз ачмышды вә аиләнин сонбешији иди. Онун бир гардашы вә бир баҹысы варды. Валидејнләринин һәр икиси дә мәсһ олунмуш мәсиһчи иди. Барр гардаш ушаглыг илләрини һәмишә хош хатирәләрлә јад едәрди. О, севимли валидејнләринин ҝөзәл нүмунәсини јүксәк гијмәтләндирирди.

Ҹон Барр јенијетмәлик илләринә тәзә-тәзә гәдәм гојанда танымадығы инсанларла сөһбәт етмәјә утанырды. Бу проблемин өһдәсиндән ҝәлмәк үчүн о, чох чалышды. Ҝүнләрин бир ҝүнү, 1927-ҹи илдә 14 јашы оланда Барр гардаш атасына јахынлашыб ону евдән-евә хидмәтдә мүшајиәт етмәјә артыг һазыр олдуғуну билдирди. Бу, һәр шејин башланғыҹы иди. О ҝүндән та өлүмүнә гәдәр Барр гардаш хош хәбәри јорулмадан вә сәјлә тәблиғ едирди.

Анасынын һәјатына аз гала сон гојан бир бәдбәхт һадисә ону һәјатын мәнасы барәдә ҹидди дүшүнмәјә вадар етмишди вә 1929-ҹу илдә о, өзүнү Јеһоваја һәср етди. 1934-ҹү илдә исә, имкан јаранан кими вәфтиз олду. 1939-ҹу илдә Барр гардаш Инҝилтәрәнин пајтахты Лондон шәһәриндә јерләшән Бет-Елдә хидмәт етмәјә дәвәт алды. Беләликлә о, 71 ил давам едән таммүддәтли хидмәтә башлады.

1960-ҹы илин октјабрын 29-да Барр гардаш, өзүнүн дедији кими, «хүсуси вә гијмәтли мүнасибәтләрә» башлады; о, узун илләр сәјлә пионер вә миссионер кими хидмәт едән Милдред Уиллетт адлы баҹы илә аилә гурду. Һамы онлары нүмунәви вә бир-биринә садиг олан әр-арвад кими таныјырды. Милдред баҹы 2004-ҹү илин октјабр ајында јерүзү һәјатыны баша вуранадәк онлар һәр ҝүн Мүгәддәс Китабы бирҝә охујурдулар.

Ҹон Барр гардашы таныјан һәр кәс ону Мүгәддәс Китаба әсасланан мүдрик вә сәмими мәсләһәтләр верән инсан кими хатырлајыр. О, чалышган ишчи, диггәтли вә гајғыкеш ағсаггал, һәмчинин садиг дост иди. Онун вердији шәрһләр, сөјләдији нитгләр вә дуалары һәгигәтин онун үчүн нә гәдәр гијмәтли вә Јеһова илә мүнасибәтләринин нә гәдәр сых олдуғуну ҝөстәрирди.

Әзиз Барр гардашымыз үчүн чох дарыхсаг да, һәсрәтиндә олдуғу вә һаггында тез-тез данышдығы өлмәзлик әнамыны алдығы үчүн онунла бирҝә севинирик (1 Кор. 15:53, 54)a.

[Һашијә]