Сән јолуну уғурлу едә биләрсән. Неҹә?

МҮВӘФФӘГИЈЈӘТ әлдә етмәк һамынын арзусудур. Бәзиләри ишдә јаваш-јаваш јүксәк пилләләрә галхараг бөјүк вар-дөвләтә саһиб олмуш вә мәшһурлашмышлар. Уғур газанмаг арзусунда олан диҝәрләринин үмидләри исә пуча чыхмышды.

Мүвәффәгијјәт, әсас етибарилә, инсанын ҹан атдығы мәгсәддән асылыдыр. Инсанын вахтындан вә ҝүҹүндән неҹә истифадә етмәси, еләҹә дә тәшәббүскар олуб-олмамасы да ваҹиб олан диҝәр амилләрдир.

Бир чох мәсиһчиләр фикир вермишләр ки, хидмәтдә там шәкилдә иштирак етмәк онлара бөјүк хошбәхтлик ҝәтирир. Таммүддәтли хидмәти өзләринә һәјат јолу сечән Аллаһын ҝәнҹ вә јашлы хидмәтчиләри уғур газанмышлар. Лакин бәзиләринә хидмәт дарыхдырыҹы ҝәлир вә онлар ону арха плана кечириб диҝәр мәгсәдләрә ҹан атырлар. Бу, нәјә ҝөрә баш верә биләр? Сән нә едә биләрсән ки, диггәтин әсил дәјәрә малик олан шејләрдән јајынмасын? Бундан әлавә, јолуну неҹә уғурлу едә биләрсән? (Јешуа 1:8).

Мәктәбдәнкәнар мәшғулијјәтләр вә һоббиләр

Мәсиһчи ҝәнҹләр һәгиги Аллаһа хидмәтлә диҝәр мәшғулијјәтләр арасында таразлығы горумалыдырлар. Белә едәнләр һәјатда мүвәффәгијјәт газанмаға доғру ҝедирләр вә тәрифә лајигдирләр.

Лакин бәзи ҝәнҹ мәсиһчиләр мәктәбдәнкәнар мәшғулијјәтләрә вә һоббиләрә сөзүн әсил мәнасында алудә олурлар. Белә мәшғулијјәтләр өз-өзлүјүндә пис олмаја биләр. Бунунла белә, бу баҹы-гардашлар өзләриндән сорушмалыдырлар: «Һәмин мәшғулијјәтә нә гәдәр вахтым ҝедир? Бу заман мән һансы әһвал-руһијјәнин тәсиринә мәруз галырам? Кимләрлә үнсијјәтдә олурам? Онларла үнсијјәт етмәк мәгсәдләримә неҹә тәсир ҝөстәрир?» Јәгин, баша дүшүрсән ки, ҝәнҹ мәсиһчи мәктәбдәнкәнар мәшғулијјәтләрә вә һоббиләрә о гәдәр алудә ола биләр ки, Аллаһла мүнасибәтләрини мөһкәмләндирмәјә нә вахты галаҹаг, нә дә ки ҝүҹү. Диггәт јетирдинми, һәјатда ән ваҹиб олан шејләри ајырд етмәк нә дәрәҹәдә ваҹибдир? (Ефес. 5:15—17).

Викторунa нүмунәсинә нәзәр салаг. О дејир: «Он ики јашым оланда волејбол клубуна јазылдым. Бир мүддәтдән сонра чохлу мүкафатлар газандым. Гаршымда мәшһур волејболчу олмаг имканы ачылмышды». Амма идманын руһанилијинә ҝөстәрдији тәсир тезликлә Виктору нараһат етмәјә башлады. Һәтта бир дәфә Мүгәддәс Китабы охумаға чалышаркән о јухуја ҝетмишди. Һәмчинин Виктор ҝөрүрдү ки, тәблиғ хидмәти әввәлки кими она севинҹ ҝәтирмир. О сөзүнә давам едир: «Волејбол мәни тамамилә әлдән салырды, һәм дә һисс едирдим ки, хидмәтә әввәлки кими ҹан јандырмырам. Мән билирдим ки, хидмәтдә даһа чох шеј едә биләрдим».

Али тәһсил

Мүгәддәс Китаба әсасән, мәсиһчи аиләсинин гајғысына галмалыдыр вә онун вәзифәләриндән бири аиләсини мадди ҹәһәтдән тәмин етмәкдир (1 Тим. 5:8). Бәс бунун үчүн университет вә ја коллеҹ гуртармаг мүтләг лазымдыр?

Али тәһсил алмаға ҹан атан мәсиһчи бунун Јеһова илә мүнасибәтләринә неҹә тәсир едәҹәји барәдә ҹидди дүшүнмәлидир. Бир Мүгәддәс Китаб нүмунәсинә диггәт јетирәк.

Барук Јеремја пејғәмбәрин мирзәси иди. Бир дәфә арзулары Барукун ҝөзләрини о гәдәр тутмушду ки, Јеһоваја хидмәтдә малик олдуғу үстүнлүкләри унутду. Бу, Јеһованын нәзәриндән јајынмады вә О, Јеремјанын васитәсилә она хәбәрдарлыг етди: «Өзүн үчүн чох шеј истәјирсәнсә, истәмә» (Јер. 45:5).

Барукун истәдији «чох шеј» нә иди? Ола билсин, онун үрәјиндән Јәһудада ад-сан газанмаг вә ја варланмаг истәји кечирди. Һәр нә олурса-олсун, о, даһа ваҹиб шејләри — руһани дәјәрләри нәзәриндән гачырмышды (Филип. 1:10). Амма ҝөрүнүр, Барук Јеһованын Јеремја васитәсилә вердији мәсләһәтә гулаг асды вә Јерусәлим дағыланда хилас олду (Јер. 43:6).

Бу нүмунәдән нә өјрәнирик? Аллаһын Барука вердији мәсләһәт ҝөстәрир ки, о, сәһвә јол вермишди. О, өзү үчүн чох шеј истәјирди. Әҝәр сән артыг өзүнү тәмин едә билирсәнсә, фикирләш, өзүнүн, валидејнләринин вә ја гоһумларынын арзуларыны ҝерчәкләшдирмәк хатиринә вахтыны, вәсаитини вә ҝүҹүнү сәрф едәрәк әлавә тәһсил алмаға дәјәр?

Компүтер програмчысы ишләјән Гжегожун нүмунәсинә нәзәр салаг. Иш јолдашлары ону дилә тутмушдулар ки, тәҹрүбәсини артырмаг үчүн хүсуси курс кечсин. Тәлим графики ҝәрҝин олдуғу үчүн руһани ишләрә онун вахты галмырды. О, хатырлајыр: «Һәмишә өзүмү ҝәрҝин һисс едирдим. Виҹданым мәни нараһат едирди, чүнки вахтилә гаршыма гојдуғум руһани мәгсәдләрә наил ола билмирдим».

Ишә һәддән артыг чох диггәт јетирмәк

Аллаһын Кәламы һәгиги мәсиһчиләри зәһмәткеш олмаға, ади ишчи вә ја мүдир олмаларындан асылы олмајараг, өз мәсулијјәтләринә ҹидди јанашмаға тәшвиг едир. Һәвари Павел јазмышды: «Һәр нә едирсинизсә, ҹанла-башла един, санки инсанлар үчүн дејил, Јеһова үчүн едирсиниз» (Колос. 3:22, 23). Зәһмәткеш ишчи олмаг нә гәдәр тәрифәлајиг олса да, Јараданымызла јахшы мүнасибәтләр бундан даһа ваҹибдир (Ваиз 12:13). Әҝәр мәсиһчинин фикри-зикри ишиндәдирсә, тез бир заманда руһани мәшғулијјәтләр арха плана кечәҹәк.

Бундан әлавә, онун Јеһова илә мүнасибәтләрини гајдада сахламаг вә аиләсинә көмәк етмәк үчүн тагәти галмајаҹаг. Падшаһ Сүлејман фикир вермишди ки, «ики овуҹ долусунун» ҝәтирдији зәһмәт чох вахт «күләк далынҹа гачмагдан» башга бир шеј дејил. Мәсиһчинин башы карјера гурмаға гарышанда бу, онун үчүн узунмүддәтли ағыр стресслә нәтиҹәләнә биләр. Карјеранын гулуна чеврилән мәсиһчи һәтта тамамилә әлдән дүшә биләр. Бундан сонра ҝөрдүјү иш она нә дәрәҹәдә зөвг верәҹәк? (Ваиз 3:12, 13; 4:6). Ән ваҹиби исә, аиләдәки вәзифәсинә вә руһани ишләрә физики вә емосионал ҝүҹү галаҹагмы?

Шәрги Авропада јашајан вә шәхси бизнес гуран Јануш јалныз иши барәдә дүшүнүрдү. О хатырлајыр: «Инсанлар әл ишләримә һејран олурдулар, чүнки мәним һәмишә чохлу јени идејаларым олурду вә мән һәр бир ишин өһдәсиндән усталыгла ҝәлирдим. Лакин бу, руһанилијимә зәрәр вурду вә мән даһа хидмәтә чыхмырдым. Бир мүддәтдән сонра јығынҹаглара да ҝетмәдим. Мән чох гүрурландым. Вәзијјәт о јерә чатмышды ки, ағсаггалларын мәсләһәтләрини гулагардына вурмаға башладым вә јығынҹагдан узаглашдым».

Һәјатда уғур газанмаг сәнин әлиндәдир!

Бу мәгаләдә биз үч саһәни арашдырдыг вә ҝөрдүк ки, мәсиһчинин бунларла һәддән артыг мәшғул олмасы онун руһанилијинә зәрәр вура биләр. Бәс сәнин бу саһәләрин һәр һансы бирилә бағлы проблемин вармы? Әҝәр варса, нөвбәти суаллар, ајәләр вә ҝәтирилән нүмунәләр сәнә мүвәффәгијјәтә апаран јолла ҝедиб-ҝетмәдијини мүәјјән етмәјә көмәк едәҹәк.

Мәктәбдәнкәнар мәшғулијјәтләр вә һоббиләр. Башын бу мәшғулијјәтләрә нә дәрәҹәдә гарышыб? Һәмин мәшғулијјәтләр әввәлләр руһани ишләрә ајырдығын вахты алмыр ки? Һәмиманлыларынла үнсијјәт сәнә марагсыз ҝәлир? Әҝәр беләдирсә, падшаһ Давуддан нүмунә ҝөтүр. О, Јеһоваја јалварырды: «Ҝедәҹәјим јолу мәнә өјрәт» (Мәз. 143:8).

Јухарыда һаггында данышдығымыз Виктора бир сәјјар нәзарәтчинин бөјүк көмәји дәјди. О, Виктора демишди: «Сән волејбол карјерасы барәдә данышанда ҝөзләрин јаман ишылдајыр». Виктор дејир: «Онун сөзләри мәни ајылтды. Мән баша дүшдүм ки, артыг чох узаға ҝетмишәм. Клубдакы достларымла бүтүн әлагәләрими кәсиб јығынҹагда достлар тапдым». Бу ҝүн Виктор өз јығынҹағында Јеһоваја ҹанла-башла хидмәт едир. Инди о, башгаларына төвсијә едир: «Достларындан, валидејнләриндән, јахуд да јығынҹаг ағсаггалларындан соруш ҝөр, онларын фикринҹә, мәктәбдәнкәнар мәшғулијјәтләр сәни Јеһоваја јахынлашдырыр, јохса, әксинә, узаглашдырыр».

Нәјә ҝөрә јығынҹағындакы ағсаггаллара Јеһоваја хидмәтдә даһа чох мәсулијјәтләр алмаг истәдијини демәјәсән? Үнсијјәтә вә ја дәстәјә еһтијаҹ дујан јашлы баҹы-гардашлара алыш-вериш етмәкдә вә ја ев ишләриндә көмәк едә биләрсәнми? Јашындан асылы олмајараг, сән таммүддәтли хидмәтдә иштирак едәрәк сәнә севинҹ ҝәтирән Падшаһлыг һаггында хәбәри башгалары илә бөлүшә биләрсән.

Али тәһсил. Иса демишди ки, инсан өзүнә шөһрәт ахтармамалыдыр (Јәһ. 7:18). Бу дүнјада тәһсил алмагла бағлы гәрарын нә олурса-олсун, «даһа ваҹиб шејләри» ајырд етмисән? (Филип. 1:9, 10).

Компүтер програмчысы ишләјән Гжегож һәјатында бәзи дәјишикликләр етди. О дејир: «Мән ағсаггалларын вердији мәсләһәти гәбул едиб һәјатымы садәләшдирдим. Баша дүшдүм ки, әлавә тәһсил алмағыма һеч бир еһтијаҹ јохдур. Чүнки бу јалныз вә јалныз ҝүҹүмү вә вахтымы алаҹаг». Гжегож даһа чох јығынҹаг ишләри илә мәшғул олмаға башлады. Сонра о, Субај Гардашлар үчүн Мүгәддәс Китаб Мәктәби (әввәлләр Хидмәти Тәкмилләшдирмә Мәктәби адланырды) битирди. Бәли, о, вахтыны руһани тәһсилини артырмаға сәрф етди (Ефес. 5:16).

Иш. Ола биләрми, башын ишә о гәдәр гарышсын ки, руһани мәшғулијјәтләр икинҹи плана кечсин? Аиләнлә үнсијјәт етмәјә кифајәт гәдәр вахтын галырмы? Јығынҹагда етдијин чыхышларынын кејфијјәтини јахшылашдырырсан? Бәс башгалары илә үнсијјәтин барәдә нә демәк олар? «Аллаһдан горх, Онун әмрләрини јеринә јетир», онда О, сәнә бол-бол хејир-дуа верәҹәк вә ҝөрдүјүн ишдән зөвг алаҹагсан (Ваиз 2:24; 12:13).

Јухарыда ады чәкилән Јанушун бизнеси ифласа уғрады. Һеч бир ҝәлир әлдә етмәјән вә тамамилә борҹ ичиндә батан Јануш Јеһоваја үз тутду. О, ишләрини гајдасына салды вә һал-һазырда јығынҹагда ағсаггал вә даими пионер кими хидмәт едир. О дејир: «Инди мән әсас шејләрлә кифајәтләнирәм вә бүтүн ҝүҹүмү руһани ишләрә сәрф едирәм. Үрәјим чох раһатдыр вә нәјәсә ҝөрә нараһатчылыг кечирмирәм» (Филип. 4:6, 7).

Мәгсәдләрини вә нијјәтләрини виҹданла тәһлил ет. Нә гәдәр ки Јеһоваја хидмәт едирсән, даима уғур газанаҹагсан. Гој Јеһоваја хидмәт һәјатында әсас јери тутсун!

Ола билсин, «Аллаһын ирадәсинин фајдалы, хош вә камил олдуғуна» әмин олмаг үчүн сәнә һәјатында нәјисә дәјишмәк вә ја нәдәнсә имтина етмәк лазым ҝәләҹәк (Ром. 12:2). Лакин сән Јеһоваја бүтүн гәлбинлә хидмәт етмәклә өз јолуну уғурлу едә вә һәјатда мүвәффәгијјәт газана биләрсән.

[Һашијә]

[30 сәһифәдәки шәкил]

Јеһова Барука хәбәрдарлыг етди ки, өзү үчүн чох шеј истәмәсин

[31 сәһифәдәки шәкил]

Јолуну неҹә уғурлу едә биләрсән?

Индики зәманәдә диггәтимизи јајындыран шејләр чохдур. Бәс биз нә едә биләрик ки, диггәтимиз әсил дәјәрә малик олан шејләрдән јајынмасын?

МӘКТӘБДӘНКӘНАР МӘШҒУЛИЈЈӘТЛӘР ВӘ ҺОББИЛӘР

▪ Бу заман сән һансы әһвал-руһијјәнин тәсиринә мәруз галырсан?

▪ Бу мәшғулијјәтләр нә гәдәр вахт апарыр?

▪ Онлар һәјатынын әсас мәгсәдинә чеврилмир ки?

▪ Әввәлләр руһани ишләрә сәрф етдијин вахты алмыр ки?

▪ Әтрафындакы инсанлар барәдә нә демәк олар?

▪ Онларла үнсијјәт етмәк сәнә һәмиманлыларынла үнсијјәт етмәкдән даһа мараглы ҝәлмир ки?

АЛИ ТӘҺСИЛ

▪ Артыг өзүнү тәмин едә билирсәнсә, вахтыны, ҝүҹүнү вә вәсаитини сәрф едәрәк әлавә тәһсил алмаға дәјәрми?

▪ Өзүнү тәмин етмәк үчүн ҝәрәк мүтләг коллеҹ вә ја университет битирәсән?

▪ Бу, јығынҹаг ҝөрүшләриндә иштирак етмәјинә неҹә тәсир ҝөстәрәҹәк?

▪ «Даһа ваҹиб шејләри» ајырд етмисән?

▪ Јеһованын сәнин гајғына галаҹағына даир әминлијини мөһкәмләндирмәјә еһтијаҹ вар?

ИШ

▪ Јашамаға, һәјатдан зөвг алмаға вахтын галыр, јохса бүтүн ҝүнү анҹаг ишләјирсән?

▪ Аиләдәки вәзифәнә вә руһани ишләрә физики вә емосионал ҝүҹүн галыр?

▪ Аиләнлә кифајәт гәдәр үнсијјәт едә билирсән?

▪ Башын ишинә о гәдәр гарышыбмы ки, руһани мәшғулијјәтләр икинҹи плана кечиб?

▪ Ишин јығынҹагда сөјләдијин чыхышларын кејфијјәтинә тәсир едиб?