Мөһкәм дур вә Шејтанын тәләләриндән гач

«Иблисин һијләләринә синә [ҝәрин]» (ЕФЕС. 6:11).

НЕҸӘ ҸАВАБ ВЕРӘРДИН?

Јеһованын хидмәтчиси мадди һәрислик тәләсинә дүшмәмәк үчүн нә етмәлидир?

Евли мәсиһчијә хәјанәт чухуруна дүшмәмәјә нә көмәк едәҹәк?

Нәјә ҝөрә сән әминсән ки, мадди һәрислијә вә ҹинси әхлагсызлыға гаршы дурмағын фајдасы вар?

1, 2. а) Нәјә ҝөрә Шејтанын нә мәсһ олунмушлара, нә дә ки башга гојунлара рәһми ҝәлмир? б) Бу мәгаләдә Шејтанын һансы тәләләриндән сөһбәт ҝедәҹәк?

ШЕЈТАН ИБЛИС һеч кәсә, хүсусилә дә Јеһоваја хидмәт едән инсанлара рәһм етмир. О, һәлә јер үзүндә јашајан мәсһ олунмушлара гаршы мүһарибә апарыр (Вәһј 12:17). Бу мәтанәтли мәсиһчиләр мүасир дөврдә Падшаһлыг һаггында хош хәбәри тәблиғ етмәк ишинә рәһбәрлик едирләр вә бу дүнјанын һакиминин Шејтан олдуғуну бәјан едәрәк ону ифша едирләр. Үстәлик, Иблис мәсһ олунмушлары дәстәкләјән вә өзүнүн итирдији әбәди һәјат үмидинә малик олан башга гојунлара да нифрәт едир (Јәһ. 10:16). Онун бу гәдәр гәзәбли олмасы һеч дә тәәҹҹүблү дејил! Ҝөјдә вә ја јердә јашамаг үмидимизин олмасындан асылы олмајараг, бизим рифаһымыз Шејтаны гәтијјән марагландырмыр. Онун мәгсәди бизи өз гурбанына чевирмәкдир (1 Пет. 5:8).

² Мәгсәдинә наил олмаг үчүн Шејтан мүхтәлиф тәләләр вә ја торлар гурашдырыр. О, имансызларын дүшүнҹәләрини кор едиб, буна ҝөрә дә онлар хош хәбәри гәбул етмирләр вә һәмин тәләләри ҝөрмүрләр. Лакин Иблис Падшаһлыг һагда хош хәбәри гәбул едән бәзи инсанлары да өз тәләсинә салмаға мүвәффәг олур (2 Кор. 4:3, 4). Әввәлки мәгаләдә биз Шејтанын үч тәләсиндән — 1) дүшүнмәдән данышмаг, 2) горху вә тәзјиг, еләҹә дә 3) һәддән артыг өзүнү ҝүнаһландырмаг тәләсиндән неҹә гача биләҹәјимиздән данышдыг. Инди исә ҝәлин онун даһа ики тәләсинә — мадди һәрислијә вә хәјанәтә гаршы неҹә мөһкәм дура биләҹәјимизи нәзәрдән кечирәк.

БОҒАН ТӘЛӘ — МАДДИ ҺӘРИСЛИК

3, 4. Бу дөврүн гајғылары инсанда мадди һәрислији неҹә ојада биләр?

³ Иса чәкдији бир мәсәлдә тиканлыға дүшмүш тохум һагда данышды. О гејд етди ки, инсан сөзү ешидә биләр, «лакин бу дөврүн гајғылары вә вар-дөвләтин алдадыҹы гүввәси сөзү боғур вә о бар вермир» (Мат. 13:22). Бәли, мадди һәрислик дүшмәнимиз олан Шејтанын истифадә етдији тәләләрдән биридир.

⁴ Ики амил бирҝә фәалијјәт ҝөстәрдикдә сөзү боға биләр. «Бу дөврүн гајғылары» һәмин амилләрдән биридир. Јашадығымыз бу «сон дәрәҹә ағыр бир зәманә»дә нараһатчылыг кечирмәјимизә чох шеј сәбәб ола биләр (2 Тим. 3:1). Ола билсин, баһачылыг вә ишсизлијин артмасы уҹбатындан сәнә доланмаг чәтиндир. Ҝәләҹәк дә сәни нараһат едә биләр вә сән: «Тәгаүдә чыханда кифајәт гәдәр ҝәлирим олаҹагмы?» — дејә фикирләшә биләрсән. Бу кими нараһатчылыглар бәзиләрини вар-дөвләтә ҹан атмаға тәшвиг едиб. Онлар дүшүнүрләр ки, пул тәһлүкәсиз ҝәләҹәјә бир зәманәтдир.

5. «Вар-дөвләтин... гүввәси» неҹә алдадыҹы ола биләр?

⁵ Исанын гејд етдији икинҹи амил «вар-дөвләтин алдадыҹы гүввәси»дир. Бу амил бу дөврүн гајғылары илә бирҝә сөзү боға биләр. Мүгәддәс Јазылар пулун инсанын сипәри олдуғуну тәсдиг едир (Ваиз 7:12). Бунунла белә, вар-дөвләт далынҹа гачмаг һеч дә ағыллы һәрәкәт дејил. Чохлары фикир вермишләр ки, вар-дөвләтин далынҹа даһа чох дүшдүкҹә мадди һәрислик тәләси онлары өзүндә даһа мөһкәм сахлајыр. Бәзиләри һәтта вар-дөвләтин гулуна чеврилмишләр (Мат. 6:24).

6, 7. а) Ишдә јаранан һансы вәзијјәт мәсиһчидә мадди һәрислик ојада биләр? б) Мәсиһчијә ишдән сонра галыб ишләмәк тәклиф олунурса, о, нәји нәзәрә алмалыдыр?

⁶ Варланмаг истәји ади бир шејдән јарана биләр. Нүмунә үчүн нөвбәти вәзијјәтә нәзәр салаг. Мүдирин сәнә јахынлашыб дејир: «Шад хәбәрим вар! Бизим ширкәт мүһүм бир сазиш имзалајыб. Бу исә о демәкдир ки, нөвбәти бир нечә ај әрзиндә ишдән сонра да галыб ишләмәк лазым олаҹаг. Анҹаг инан ки, бу, алаҹағын пула дәјәр». Белә вәзијјәтдә неҹә давранаҹагсан? Дүздүр, аиләни мадди ҹәһәтдән тәмин етмәк Мүгәддәс Китабын аилә башчыларынын үзәринә гојдуғу чох ҹидди мәсулијјәтдир, анҹаг бу, јеҝанә мәсулијјәт дејил (1 Тим. 5:8). Нәзәрә алынасы диҝәр амилләр дә вар. Ишдән сонра нә гәдәр галыб ишләмәк лазым олаҹаг? Сәнин ишин, јығынҹаг ҝөрүшләри вә аиләви ибадәт ахшамлары да дахил олмагла, руһани мәшғулијјәтләринә манечилик төрәтмәјәҹәк ки?

⁷ Тәклифи ҝөтүр-гој едәркән сән даһа чох нәјә өнәм верәҹәксән: әлавә ишин сәнин ҹибинә, јохса руһанилијинә ҝөстәрәҹәји тәсирә? Даһа чох пул газанмаг истәји Падшаһлыг ишинин һәјатында икинҹи плана кечмәсинә сәбәб олмајаҹаг ки? Әҝәр сән өзүнүн вә аиләнин руһани сағламлығына етинасыз јанашсан, баша дүшүрсән, мадди һәрислик сәнә неҹә тәсир едәҹәк? Әҝәр сәнин руһанилијин тәһлүкәдәдирсә, мөһкәм дурмаг вә мадди һәрислијин сәни «боғмамасы» үчүн нә едә биләрсән? (1 Тимотејә 6:9, 10 ајәләрини оху.)

8. Мүгәддәс Јазылардакы һансы нүмунәләр бизә һәјат тәрзимизи нәзәрдән кечирмәјә көмәк едәҹәк?

⁸ Мадди һәрислијин бизи боғмамасы үчүн вахташыры олараг өз һәјат тәрзимизи нәзәрдән кечирмәлијик. Биз һеч вахт өз әмәлләри илә руһани шејләри гијмәтләндирмәдијини ҝөстәрән Есав кими олмаг истәмәздик! (Јар. 25:34; Ибр. 12:16). Ејни заманда мал-мүлкүнү сатыб, пулу касыблара пајлајыб Исанын ардынҹа ҝәлмәк тәклифини алан варлы киши кими дә олмамалыјыг. Бу дәвәти гәбул етмәк әвәзинә, о «кәдәрләнди, чүнки чох дөвләтли иди вә чыхыб ҝетди» (Мат. 19:21, 22). Вар-дөвләт тәләсинә дүшән бу шәхс бөјүк бир үстүнлүкдән — јер үзүндә јашајан ән бөјүк инсанын давамчысы олмаг шәрәфиндән мәһрум олду! Еһтијатлы ол ки, сән дә Иса Мәсиһин шаҝирди олмаг үстүнлүјүнү итирмәјәсән.

9, 10. Аллаһын Кәламында дејиләнләри нәзәрә алсаг, мадди әшјалара мүнасибәтимиз неҹә олмалыдыр?

⁹ Мадди шејләрә ҝөрә һәддән артыг нараһат олмамаг үчүн биз Исанын нөвбәти мәсләһәтинә әмәл етмәлијик: «“Нә јејәҹәјик?”, “нә ичәҹәјик?” вә ја “нә ҝејәҹәјик?”, — дејә һеч вахт нараһат олмајын. Чүнки бүтүн бунларын далынҹа башга милләтләр гачыр. Сизин сәмави Атаныз исә бүтүн бунлара еһтијаҹ дујдуғунузу билир» (Мат. 6:31, 32; Лука 21:34, 35).

¹⁰ Вар-дөвләтин алдадыҹы гүввәсинин гурбаны олмаг әвәзинә, Мүгәддәс Китабын јазычыларындан бири олан Агур кими дүшүнмәлијик. О демишди: «Мәни нә јохсул, нә дә зәнҝин ет, анҹаг мәнә ҝүндәлик чөрәјими вер» (Сүл. мәс. 30:8). Агур пулун сипәр олдуғуну, ејни заманда вар-дөвләтин алдадыҹы гүввәјә малик олдуғуну баша дүшүрдү. Биз дәрк етмәлијик ки, бу дөврүн гајғылары, еләҹә дә вар-дөвләтин алдадыҹы гүввәси бизим руһанилијимизин ахырына чыха биләр. Әҝәр биз әшјалара ҝөрә һәддән артыг нараһат олуругса, бу, бизим вахтымызы ала, тагәтдән сала вә Падшаһлығын иши илә мәшғул олмаг истәјимизи гисмән вә ја там өлдүрә биләр. Буна ҝөрә дә Шејтанын мадди һәрислик тәләсинә дүшмәмәјә гәти гәрарлы ол! (Ибраниләрә 13:5 ајәсини оху.)

ҜИЗЛИ ЧУХУР — ХӘЈАНӘТ

11, 12. Иш јериндә јаранан һансы вәзијјәтләр мәсиһчинин һәјат јолдашына хәјанәт етмәсинә ҝәтириб чыхара биләр?

¹¹ Ҝүҹлү һејван овламаг истәјән овчу шикарынын тез-тез кечдији јердә чухур газа биләр. Адәтән, чухурун үстүнү назик будагларла вә торпагла өртүрләр ки, о нәзәрә чарпмасын. Шејтанын ән уғурлу тәләләриндән бири белә чухура бәнзәјир. Сөһбәт ҝүнаһ сајылан әхлагсызлыгдан ҝедир (Сүл. мәс. 22:14; 23:27). Бир чох мәсиһчиләр өзләрини елә вәзијјәтә чатдырыблар ки, онлар үчүн бу тәләјә дүшмәк чох асан олуб. Бәзи евли мәсиһчиләрин һәјат јолдашларына хәјанәт етмәләринә сәбәб дүзҝүн олмајан романтик мүнасибәтләр инкишаф етдирмәләри олуб.

¹² Дүзҝүн олмајан романтик мүнасибәтләр иш јериндә јарана биләр. Кечирилән бир сорғу нәтиҹәсиндә мәлум олуб ки, әрләринә хәјанәт едән гадынларын јарысындан чоху вә арвадларына хәјанәт едән кишиләрин тәхминән јетмиш беш фаизи иш јолдашлары илә гејри-гануни әлагәдә олублар. Сәнин ишин әкс ҹинсин нүмајәндәләри илә үнсијјәтдә олмағы тәләб едирми? Әҝәр еләдирсә, онларла мүнасибәтләрини неҹә характеризә едәрдин? Мүнасибәтләринин ишҝүзар галмасына хидмәт едән сәрһәдләр гојмусанмы, јохса даһа артығына јол верирсән? Мәсәлән, киши иш јолдашы илә тез-тез ади сөһбәтләр едән баҹы сонрадан онунла сирдаш олуб һәтта аилә проблемләрини дә бөлүшә биләр. Диҝәр бир вәзијјәтдә исә мәсиһчи гардаш гадын һәмкары илә мүлајим сөһбәтдән сонра белә гәнаәтә ҝәлә биләр: «О, мәним фикирләримә дәјәр верир вә онунла сөһбәт едәндә, һәгигәтән дә, гулаг асыр. Мән онун үчүн гијмәтлијәм. Каш ки, евдә дә өзүмә гаршы бу ҹүр мүнасибәт ҝөрәјдим!» Фикир вердин, белә вәзијјәтләрдә мәсиһчи өз һәјат јолдашына асанлыгла неҹә хәјанәт едә биләр?

13. Дүзҝүн олмајан романтик мүнасибәтләр јығынҹагда неҹә јарана биләр?

¹³ Дүзҝүн олмајан романтик мүнасибәтләр јығынҹагда да јарана биләр. Ҝәлин олмуш бир һадисәјә нәзәр салаг. Даниел вә онун јолдашы Сараa даими пионер идиләр. Даниел, өзү дедији кими, һеч вахт «јох» демәјән ағсаггаллардан иди. О, јығынҹагда верилән бүтүн тапшырыглары ҹанла-башла гәбул едирди. Бундан әлавә, Даниел беш ҝәнҹлә Мүгәддәс Китабы өјрәнирди. Онлардан үчү сонрадан вәфтиз олду. Бу јени вәфтиз олан гардашларын бөјүк көмәјә еһтијаҹы варды. Даниелин башы јығынҹаг ишләринә гарышанда онлара тез-тез Сара көмәк едирди. Тезликлә белә бир вәзијјәт јаранды: Даниелин әввәлләр Мүгәддәс Китабы өјрәтдији ҝәнҹләр емосионал дәстәјә еһтијаҹ дујурдулар вә ону Сарадан алырдылар. Саранын исә диггәтә еһтијаҹы варды вә о, бу диггәти онлардан алырды. Бунунла өлүмҹүл тәлә гурулду. «Арвадымын ајларла онлара дәстәк олмасы ону руһани вә емосионал ҹәһәтдән әлдән салды, — дејә Даниел гејд едир. — Бу, еләҹә дә мәним она мараг ҝөстәрмәмәјим фәлакәтә сәбәб олду. О, һәмин кәсләрдән бири илә мәнә хәјанәт етди. Сара дүз мәним ҝөзүмүн өнүндә руһән зәифләди вә мән о гәдәр мәшғул идим ки, бу, мәним диггәтимдән јајынды». Сәнин дә башына белә фәлакәт ҝәлмәсин дејә нә едә биләрсән?

14, 15. Евли мәсиһчиләр хәјанәт чухуруна дүшмәмәк үчүн нә етмәлидирләр?

¹⁴ Хәјанәт чухуруна дүшмәмәк үчүн никаһын нә олдуғу һагда дүшүн. Иса демишди: «Аллаһын бир бојундуругда бирләшдирдијини гој һеч кәс ајырмасын» (Мат. 19:6). Һеч вахт фикирләшмә ки, сәнин теократик мәсулијјәтләрин һәјат јолдашындан даһа ваҹибдир. Үстәлик, унутма, аз әһәмијјәтли ишләрә ҝөрә тез-тез һәјат јолдашындан ајры вахт кечирмәјин никаһында зәифлик олдуғуна ишарә едә, еләҹә дә ширникдириҹи вәзијјәтин јаранмасына вә һәтта ҹидди ҝүнаһа ҝәтириб чыхарда биләр.

¹⁵ Бәс әҝәр сән ағсаггалсанса, онда сүрүнүн иши неҹә олсун? Һәвари Петер јазмышды: «Аллаһын сизә әманәт етдији сүрүнү отарын вә буну зорла јох, көнүл хошлуғу илә, һагсыз газанҹа севҝидән јох, ҹанла-башла един» (1 Пет. 5:2). Әлбәттә, сәнә һәвалә олунмуш јығынҹаг үзвләринә етинасызлыг ҝөстәрмәк дүзҝүн олмазды. Анҹаг сән ағсаггаллыг вәзифәни иҹра етмәк үчүн үзәринә бир әр кими дүшән вәзифәни гурбан вермәли дејилсән. Һәјат јолдашын евдә «аҹындан өлдүјү» бир һалда, бүтүн диггәтини јығынҹағы руһән гидаландырмаға јөнәлтмәјин мәнасыз, һәтта тәһлүкәли оларды. Даниел дејир: «Мәсиһчи һеч вахт јығынҹаг ишләрини аиләсинин рифаһы баһасына ҝөрмәмәлидир».

16, 17. а) Мәсиһчи иш јериндә һансы тәдбирләри ҝөрә биләр ки, романтик мүнасибәтләрә ҝиришмәк фикри олмадығы ајдын ҝөрүнсүн? б) Мәсиһчијә хәјанәтдән гачынмаға көмәк едән мәгаләләрдән нүмунә чәк?

¹⁶ «Ҝөзәтчи гүлләси» вә «Ојанын!» журналларында мәсиһчиләрә хәјанәт чухурундан јан ҝәзмәјә көмәк едән бир чох мәгаләләр дәрҹ олунуб. Мәсәлән, «Ҝөзәтчи гүлләси»нин 2006-ҹы ил 1 октјабр сајында нөвбәти мәсләһәтләр јер алыб: «Иш јериндә јахын мүнасибәтләр үчүн шәраит јарадан вәзијјәтләрдән узаглаш. Мәсәлән, әкс ҹинсдән олан әмәкдашынла иш вахтындан сонра бир јердә ишләмәк тәһлүкәли ола биләр. Мәсиһчи киши вә гадын данышығы, давранышы илә ҝөстәрмәлидир ки, белә мүнасибәтләрә баш гошмаг фикриндә дејил. Аллаһ јолунда јеријән гадын ҝејими вә макијажы илә өзүнә диггәти ҹәлб етмәјәҹәк... Ејни шеј кишиләрә дә аиддир... Һәјат јолдашы вә ушагларынын шәкилләрини ҝөз габағында гојсан, аиләнин сәнин үчүн һәр шејдән үстүн олдуғуну һәм башгалары биләр, һәм дә өзүн унутмазсан. Киминсә сәнә сөз атмасына, сәнинлә ешгбазлыг етмәсинә гәтијјән јол вермә».

¹⁷ «Ојанын!» журналынын 2009-ҹу ил апрел сајында (рус.) чыхан «Никаһда сәдагәт әслиндә нә демәкдир?» адлы мәгалә аиләли инсанлары һәјат јолдашы олмајан кәс барәдә сексуал хәјаллара далмагдан чәкиндирирди. Мәгаләдә гејд олунурду ки, сексуал хәјаллар хәјанәт етмәк еһтималыны даһа да артырыр (Јаг. 1:14, 15). Әҝәр сән евлисәнсә, јахшы оларды ки, һәјат јолдашынла бирҝә вахташыры олараг бу кими мәлуматлары нәзәрдән кечирәсән. Никаһ Јеһованын тәсис етдији гурулушдур вә о мүгәддәсдир. Һәјат јолдашынла никаһыныз барәдә сөһбәт етмәк үчүн вахт ајырмағын ҝөстәрәҹәк ки, сән, һәгигәтән дә, мүгәддәс шејләрә дәјәр верирсән (Јар. 2:21—24).

18, 19. а) Хәјанәт нәјә ҝәтириб чыхарыр? б) Һәјат јолдашларына садиг оланлар һансы хејир-дуалары бичирләр?

¹⁸ Әҝәр үрәјиндән киминләсә романтик мүнасибәтләр гурмаг кечирсә, хәјанәт вә әхлагсызлығын пис нәтиҹәләрини ҝөзүнүн өнүнә ҝәтир (Сүл. мәс. 7:22, 23; Галат. 6:7). Әхлагсызлыға јол верәнләр Јеһованы мәјус едир вә өзләринә, еләҹә дә һәјат јолдашларына зәрбә вурурлар. (Малаки 2:13, 14 ајәләрини оху.) Бундан әлавә, намусларыны горујан кәсләрин алдығы хејир-дуалар һагда да дүшүн. Бу хејир-дуа јалныз ҝәләҹәк әбәди һәјат дејил, тәмиз виҹдан да дахил олмагла, инди ән јахшы һәјат јашамаг имканыдыр. (Сүлејманын мәсәлләри 3:1, 2 ајәләрини оху.)

¹⁹ Мәзмурчу охујурду: «[Аллаһын] ганунуну севәнләр бөјүк әмин-аманлыг тапырлар, онлар һеч нә илә бүдрәмәзләр» (Мәз. 119:165). Беләликлә, һәгигәти сев вә Мүгәддәс Китабын нөвбәти мәсләһәтинә әмәл ет: «Диггәтли олун, [бу пис зәманәдә] дүшүнҹәсизләр кими јох, мүдрикләр кими һәрәкәт един» (Ефес. 5:15, 16). Бизим ҝетдијимиз јол Шејтанын Аллаһын һәгиги хидмәтчиләри үчүн гурдуғу тәләләрлә долудур. Лакин биз онлара дүшмәмәк үчүн лазым олан һәр шејлә тәҹһиз олунмушуг. Јеһова бизә Шәририн һијләләринә синә ҝәрмәк вә онун «бүтүн аловлу охларыны» сөндүрмәк үчүн лазым олан һәр шеји вериб! (Ефес. 6:11, 16).

[Һашијә]

[26–ҹы сәһифәдәки шәкил]

Мадди һәрислик инсанын руһанилијини боға биләр. Јол вермә ки, бу, сәнинлә дә баш версин

[29–ҹу сәһифәдәки шәкил]

Ешгбазлыға башламаг вә ја һим-ҹимләрә һај вермәк инсаны хәјанәт чухуруна сала биләр