Мүгәддәс Китабы аиләви олараг өјрәнирсинизми?
1 Ағсаггалла сөһбәт едәркән мәсиһчи әр шикајәтләнди: «Аиләви өјрәнмәни нә гәдәр мүнтәзәм олараг кечирмәјә чалышсам да, буну етмәк чәтин олур. Онун кечирилмәмәсинә бә’зән мән сәбәб олурам, һәрдән јолдашымын һәвәси олмур вә ја ушагларын иши олур. Һәфтәләр кечсә дә, аиләви өјрәнмәни мүнтәзәм кечирмәк үчүн һеч нә едә билмирәм. Мән баша дүшүрәм ки, аиләви өјрәнмәни мүтләг кечирмәк лазымдыр, она ҝөрә дә бу ишдә аиләмә көмәк үчүн верилән һәр һансы мәсләһәтә ҝөрә миннәтдар олардым». Бу сөзләр сәнә танышдырмы? Јәгин ки, танышдыр. Чүнки аиләви өјрәнмәнин мүнтәзәм кечирилмәсиндә бир чох аиләләр бу вә ја диҝәр чәтинликләрлә гаршылашырлар.
2 Јахшы олар ки, өзүнә бу суаллары верәсән: нә үчүн аиләви өјрәнмәни мүнтәзәм кечирмәк ваҹибдир вә онун мәгсәди нәдир? Өјрәнмәнин кечирилмәсиндә мәс’улијјәти үзәринә ким ҝөтүрмәлидир? Һансы әдәбијјатлардан истифадә етмәк олар? Хүсусилә дә ушаглар мүхтәлиф јашлы олдугда, онун ҹанлы вә мараглы кечмәси үчүн нә етмәк олар? Даимилик вә ҹәдвәлә сых бағлы галмаг аиләви өјрәнмәнин мүнтәзәм олараг кечирилмәсиндә нәјә ҝөрә ваҹибдир? Бүтүн бу суаллара Мүгәддәс Китабдан ҹаваб тапа биләрик. Һәмчинин мәсиһчи тәҹрүбәси дә көмәк едә биләр.
Валидејнләрин мәс’улијјәти
3 Ушагларын өјрәдилмәсиндә кимин мәс’улијјәт дашыдығыны Мүгәддәс Китаб ајдын шәкилдә ҝөстәрир. «Аталар... онлары Рәббин тәрбијә вә нәсиһәти илә бөјүдүн» (Ефес. 6:4). Бәли, аталар үзәрләринә дүшән мәс’улијјәти һәвәслә јеринә јетирмәли, ушагларына билик вә мәсләһәт вермәлидирләр. Лакин әҝәр ата мәсиһчи дејилсә, бу заман мәсиһчи ана ушагларыны өјрәтмәли вә аиләви өјрәнмәни кечирмәлидир (2 Тим. 1:5). Вә ја башга сәбәбләр үзүндән баҹы ушагларыны өјрәтмәкдә мәс’улијјәти там олараг өз үзәринә ҝөтүрә биләр (Сүл. мәс. 1:8). Диҝәр һалларда, ағсаггал вә ја һәр һансы јеткин мәсиһчи шәраитдән асылы олараг, өз көмәјини ҝөстәрә биләр. Лакин бүтүн бунлар валидејнләри, хүсусән аталары, ушаглары өјрәтмәк, тәрбијә етмәк вә онларын гајғысына галмаг мәс’улијјәтиндән азад етмәк мәгсәдилә едилмәмәлидир, чүнки бу мәс’улијјәти онларын үзәринә Аллаһ гојмушдур (Ганун. т. 6:6, 7; 1 Тим. 3:2, 4).
Шәраитә ујғун вә сәрбәст шәкилдә өјрәнмә
4 Аиләви өјрәнмәни шәраитә ујғунлашдырдыгда практики фајда әлдә едилир вә о, шөвгләндириҹи кечир. Бунун үчүн Мүгәддәс Китабын бә’зи һиссәләрини бирҝә охујуб мүзакирә етмәк вә ја садиг вә ағыллы гулун нәшр етдији журналлардан, јахуд диҝәр әдәбијјатлардан мүәјјән мөвзулары вә ја мәгаләләри нәзәрдән кечирмәк олар. Мүзакирә едиләҹәк материал аиләнин еһтијаҹларындан асылы олараг сечилмәлидир. Ҝәнҹләрин үзләшдији проблемләр, мәсәлән, мәктәбдә һәмјашыдларын тәзјиги, ҝөрүшә чыхмаг, мүхтәлиф мәктәб тәдбирләриндә иштирак етмәк, идман, мусиги сечими, әјләнҹәләр вә натәмиз һәрәкәтләрдән горунмағын јоллары һаггында даныша биләрсиниз. Хүсусилә ширникләндириҹи мејлләр вә тәһлүкә илә үзләшмәк еһтималы олдугда бу мәсәләләрә даир Мүгәддәс Китаб нөгтеји-нәзәринин вә принсипләрин тез-тез хатырланмасы чох ваҹибдир.
5 Аиләви өјрәнмә кечириләркән даһа нә нәзәрә алынмалыдыр? Өјрәнмә, јығынҹаг ҝөрүшләри кими рәсми олмаса да, тә’лимвериҹи олмалыдыр. Аиләви өјрәнмәни ушаглары мәзәммәт етмәк фүрсәти кими истифадә етмәк әвәзинә, чалышмаг лазымдыр ки, онлара севинҹ ҝәтирсин. Ушаглары өз сөзләри илә ҹаваб вермәјә тәшвиг един, чүнки бу, онлара материалы даһа тез гаврамаға көмәк едәҹәк. Һәтта онлар мүзакирә олунан һәр мәсәләни јахшы баша дүшә вә ја гијмәтләндирә билмәсәләр дә, өјрәнмәдә иштирак етмәли вә ҹаваблар вермәјә тәшвиг олунмалыдырлар. Мүдрик валидејнләр ајры-ајрылыгда һәр ушағын еһтијаҹына, онун дәркетмә габилијјәтинә, диггәтини нә дәрәҹәдә ҹәмләшдирә билдијинә вә фикирләрини ифадә етмәк баҹарығына диггәт јетирирләр. Мәһәббәтли сә’јләринин нәтиҹәсиндә аиләнин бирлијинә вә руһани ҹәһәтдән инкишаф етмәсинә наил олаҹагсыныз.
Тәслим олма!
6 Аиләви өјрәнмәнин кечирилмәсиндә нә үчүн гәтијјәтлилик ҝөстәрмәк лазымдыр? Чүнки аиләви өјрәнмә ҹәдвәлини позан бир чох сәбәбләр вардыр. Лакин онларын манеәјә чеврилмәсинә јол вермәјин.
7 Мүнтәзәм аиләви өјрәнмә ушаглары һәјатда үзләшәҹәкләри мүхтәлиф проблемләрин өһдәсиндән ҝәлмәјә һазырлајыр. Сиз валидејнләр, Аллаһын үзәринизә гојдуғу мәс’улијјәти јеринә јетирдикдә ушагларыныза ән јахшы көмәји ҝөстәрирсиниз. Әҝәр аиләви өјрәнмәнин мүнтәзәм кечирилмәси үчүн әлиниздән ҝәләни едирсинизсә, Јеһованын сизә хејир-дуа верәҹәјинә әмин ола биләрсиниз.