“Һамыја јахшылыг едәк”
1 “Бизим Падшаһлыг Хидмәтимиз”ин 2002-ҹи ил феврал вә март ајлары үчүн әлавә вәрәгәдә “Аллаһын кәламыны... там бәјан” ет” вә “Јахшы ишләрлә варлы” олун” адлы мәгаләләр дәрҹ олунмушдур (Ҹол. 1:25; 1 Тим. 6:18). Бу мәгаләләрдә, мараглананларын Хатирә Ҝеҹәсинә ҝәлмәләри, гејри-фәал тәблиғчиләрин јенидән јығынҹағын бир һиссәси олмалары, ушагларымызын вә Мүгәддәс Китабы өјрәнәнләрин исә хош хәбәри тәблиғ етмәјә башламалары үчүн хүсуси гүввә сәрф етмәјә тәшвиг олунурдуг. Сөзсүз ки, сә’јләримиз јахшы сәмәрәләр ҝәтирди. Ҝәлин, “нә гәдәр фүрсәтимиз варса, [бундан сонра да] һамыја... јахшылыг едәк” (Галат. 6:10).
2 Онлары ҝөрүшә бир дә дә’вәт един. Азәрбајҹанда һәр ил Хатирә Ҝеҹәсинә ҝәләнләрдән јүзләрлә инсан хош хәбәрин тәблиғчиси дејил. Әҝәр онлар Ҝеҹәјә ҝәлирләрсә, демәк, һәгигәтлә марагланыр вә “әбәди һәјата мејлли”дирләр. Бәс онларын “иман” етмәләринә неҹә көмәк етмәк олар? (Һәв. иш. 13:48, ЈД). Тезликлә јенидән јығынҹаға ҝәлмәләри үчүн онлары тәшвиг етмәлијик.
3 Нәјә ҝөрә марагланан адамы јығынҹағын китабөјрәнмәсинә, “Инсан өләндә нә баш верир?” брошүрасынын мүзакирәсинә дә’вәт етмәјәк? Әҝәр марагланан адам сәнин гоһумун вә ја танышындырса вә сән јахын ҝүнләрдә Теократик Хидмәт Мәктәбиндә чыхыш едәҹәксәнсә, һәмин адамы чыхышыны динләмәјә дә’вәт ет. Марагланан адама, јахын вахтлар үчүн планлашдырылан ачыг мә’рузәләр һаггында даныш. (Ачыг мә’рузәләр һаггында јени мә’лумат е’ланлар лөвһәсиндә олмалыдыр.) Инсанда Јеһоваја хидмәт етмәк һәвәси ојатмаг үчүн, мүхтәлиф имканлардан истифадә ет. Әҝәр јығынҹагдан һеч ким онунла Мүгәддәс Китабы һәлә өјрәнмирсә, меһрибанлыгла она өјрәнмә тәклиф ет.
4 Гејри-фәаллары руһландырмаға давам един. Хатирә Ҝеҹәсинә, бир заманлар вәфтиз олунмуш, амма хош хәбәри мүәјјән мүддәт фәал сурәтдә тәблиғ етмәјән кәсләр дә ҝәлә биләр. Хатырладығымыз кими, Павел бизи “хүсусән иманлылар аиләсинә јахшылыг” етмәјә тәшвиг едирди (Галат. 6:10). Буна ҝөрә дә гејри-фәал тәблиғчиләрә көмәк етмәк бизи хүсусилә марагландырмалыдыр.
5 Еһтимал ки, онлардан бә’зиләри ағсаггалларын вә ја башга гардаш вә баҹыларын онлары руһландырмаг үчүн ҝөстәрдикләри сә’јә артыг һај вермиш вә хидмәтдә јенидән иштирак етмәјә башламышлар. Әҝәр ағсаггаллар сәнә, хидмәтини јенидән бәрпа етмиш тәблиғчи илә әмәкдашлыг етмәји тапшырыбларса, унутма ки, сәнин Јеһоваја вә тәблиғә олан мәһәббәтин онун әминлијини мөһкәмләдәҹәк. Чалыш ки, о, сәнинлә хидмәтин мүхтәлиф саһәләриндә иштирак етсин. Һәмин шәхс о заман севинҹ дујаҹаг, сә’јлә хидмәт етмәјә башлајаҹаг вә Јеһованын хејир-дуасыны әлдә едә биләҹәк.
6 Хидмәтә башламагда јени тәблиғчиләрә көмәк един. Мүгәддәс Китаб һәгигәти илә јениҹә марагланмаға башлајан бир гадын, Аллаһын һәгиги тәшкилатыны тапдығыны анлајанда, һәмин ан тәблиғ хидмәтинә башламаг истәди. Бунун үчүн ондан нә тәләб олундуғуну өјрәнәндә деди: “Јубанмадан башламаг истәјирәм”. Әҝәр Мүгәддәс Китабы өјрәндијин кәс тәблиғчи олмаг тәләбләринә ҹаваб верирсә, “јубанмадан башламағын” нәјә ҝөрә ваҹиб олдуғуну она изаһ етмәклә көмәклик ҝөстәр. Тәблиғ хидмәтинә һазырлашмаг вәрдишини инкишаф етдирмәсинә вә бу хидмәтдә мүнтәзәм, һәр һәфтә иштирак етмәсинә көмәк ет.
7 Әҝәр сәнин ушағын вәфтиз олунмамыш тәблиғчи олубса, онунла бирликдә тәблиғ ет ки, өз јашына вә габилијјәтинә ујғун мүвәффәгијјәтләрә наил олсун. Әҝәр она бир балаҹа көмәк етсән, онун инсанларла нә гәдәр мүвәффәгијјәтлә үнсијјәт јаратдығына, Мүгәддәс Китаб ајәләрини охудуғуна вә әдәбијјат тәклиф етдијинә, јәгин ки, тәәҹҹүб едәҹәксән. О, хидмәт заманы һәссас адам тапарса, тәкрар баш чәкмәкдә вә инсанларын марағыны артырмагда она көмәк ет.
8 Хидмәтинизи ҝенишләндирин. Јалныз јазда дејил, башга ајларда да хидмәтдә даһа артыг фәалијјәт ҝөстәрмәк үчүн шәраитин јол верирми? Һәр һәфтә, адәтән етдијиндән бир-ики саат артыг тәблиғ едә биләрсәнми? Јенидән көмәкчи пионер кими хидмәт етмәкдән өтрү, гаршыдакы ајлар үчүн тәгвиминә нәзәр салырсанмы? Бәлкә таммүддәтли хидмәтдә иштирак етмәк үчүн һәјатында дәјишикликләр етмәк имканын вар? Тәблиғдә ҝөстәрдијимиз сә’јләр сајәсиндә ким исә һәгигәти гәбул едә биләр (Һәв. иш. 8:26-39). Ҝәлин ҝәләҹәјә бахараг, “һәмишә бир-биримизә вә һамыја јахшылыг етмәјә чалышаг” (1 Салон. 5:15).
[3 сәһифәдәки чәрчивә]
Көмәк етмәјә давам един:
□✔ Хатирә Ҝеҹәсинә ҝәләнләрә
□✔ хидмәтини бәрпа едән тәблиғчиләрә
□✔ вәфтиз олунмамыш јени тәблиғчиләрә