Ҝөзләрини сағлам сахла
1. Сағлам ҝөзә малик олмаг нә демәкдир вә бу нә үчүн ваҹибдир?
1 Иса Дағүстү тәблиғиндә руһани вә ја мәҹази ҝөзүн бизим бүтүн һәјат тәрзимизә ҝөстәрә биләҹәји бөјүк тә’сирә диггәт јөнәлтмишдир. О демишдир: “Беләликлә, ҝөзүн сағлам олса, бүтүн бәдәнин ишыглы олаҹагдыр. Фәгәт ҝөзүн шикәст оларса, бүтүн бәдәнин гаранлыг олар” (Мат. 6:22, 23). Сағлам ҝөз јалныз бир мәгсәдә — Аллаһын ирадәсини јеринә јетирмәјә мәркәзләшдирилир вә о мадди әшјалар үчүн һәддиндән артыг нараһатчылыға јајынмыр (Мат. 6:19-21, 24-33). Ҝөзү сағлам сахламагда бизә нә көмәк ола биләр?
2. Мадди әшјалара даир Аллаһын Кәламы һансы таразлы нөгтеји-нәзәрә тәшвиг едир?
2 Кифајәтләнмәк габилијјәтини инкишаф етдир. Аилә үзвләринин мадди еһтијаҹларыны тә’мин етмәк Мүгәддәс Китабын үзәримизә гојдуғу мәс’улијјәтдир (1 Тим. 5:8). Амма бу о демәк дејил ки, биз даима ән јахшы вә ән јени шејлләрин далынҹа гачмалыјыг (Сүл. мәс. 27:20; 30:8, 9). Әксинә, Мүгәддәс Јазылар бизи тәшвиг едир ки, јемәк вә палтарла кифајәтләнәк (1 Тим. 6:8; Ибр. 13:5, 6). Бу мәсләһәтә диггәт јетирмәјимиз ҝөзүмүзүн дүзҝүн истигамәтдә олмасына көмәк едә биләр.
3. Өзүмүзү әбәс јерә јүкләмәкдән гачынмагда бизә нә көмәк едә биләр?
3 Өзүмүзү әбәс јерә борҹларла вә әмлакла јүкләмәли вә ја чох вахт вә ҝүҹ тәләб едән ишләрлә мәшғул олмалы дејилик (1 Тим. 6:9, 10). Бунда бизә нә көмәк едә биләр? Бир шеј етмәздән әввәл дуада һәр шеји ҝөтүр-гој ет вә: “Бу мәним руһани мәгсәдләрә наил олмағыма мане олаҹагмы?” суалына виҹданла ҹаваб вер. Руһани ишләри һәјатында биринҹи јерә гојмаға гәти гәрарлы ол (Филип. 1:10; 4:6, 7).
4. Һәјат тәрзимизи садәләшдирмәјин јолларыны ахтармаг нәјә ҝөрә лазымдыр?
4 Һәјат тәрзини садәләшдир. Әҝәр һәјат тәрзимизи садәләшдирсәк, вар-дөвләт һәрислијинә мүгавимәт ҝөстәрмәк асан олаҹагдыр. Аиләсинин аз мадди шејләрлә кифајәтләнә биләҹәјини ҝөрән бир гардаш белә демишди: “Инди јығынҹагда гардашларыма хидмәт етмәк үчүн даһа чох шеј едә билирәм. Мән әминәм ки, Јеһова һәгиги ибадәти шәхси марагларындан үстүн тутан бүтүн хидмәтчиләрини хејир-дуаландырыр”. Һәјат тәрзини садәләшдирмәклә сән даһа чох хејир-дуалар газана биләрсәнми?
5. Ҝөзләримизи сағлам сахламаг үчүн нәјә ҝөрә даима ҝүҹ сәрф етмәк лазымдыр?
5 Шејтанын тә’сиринә, онун вар-дөвләтә һәрислик мејли ојадан дүнјасына вә өз гејри-камиллијимизә мүгавимәт ҝөстәрмәк үчүн даима ҝүҹ сәрф етмәк лазымдыр. Ҝөзләримизин јајынмасына јол вермәк әвәзинә, ҝәлин онлары Аллаһын ирадәсини јеринә јетирмәјә вә гијмәтли әбәди һәјат үмидимизә ҹәмләшдирәк (Сүл. мәс. 4:25; 2 Кор. 4:18).