Ушагларыныза Јеһоваја һәмд етмәји өјрәдин
1. Ушаглар Јеһоваја һәмд едә биләрләрми?
1 Мәзмур 148:12, 13 ајәләри оғлан вә гызлары Јеһованын ‘исминә һәмд етмәјәʼ тәшвиг едир. Мүгәддәс Јазыларда Јеһоваја һәмд едән ҝәнҹләрин чохсајлы нүмунәси вар. Мәсәлән, «кичик Шамуел... Рәббин өнүндә хидмәт едирди» (1 Шам. 2:18). «Кичик бир гыз» Јеһованын Исраилдәки пејғәмбәринин Нааманы ҹүзам хәстәлијиндән сағалда биләҹәјини онун арвадына хәбәр вермишди (2 Пад. 5:1-3). Иса мә’бәдә ҝириб мөһтәшәм ишләр едәндә, ушаглар уҹа сәслә «Давуд Оғлуна һосанна!» демишдиләр (Мат. 21:15). Валидејнләр ушагларына Јеһоваја һәмд етмәји неҹә өјрәдә биләрләр?
2. Валидејнләрин өз ушагларына јахшы нүмунә вермәләри нәјә ҝөрә ваҹибдир?
2 Валидејнләрин нүмунәси. Һәгигәти ушагларынын үрәјинә јеритмәздән өнҹә, исраилли аталар илк нөвбәдә өзләри Јеһованы севмәјә вә Онун әмрләрини өз үрәкләриндә тутмаға ҝөстәриш алмышдылар (Ганун. т. 6:5-9). Әҝәр сиз хидмәт барәдә руһландырыҹы тәрздә данышыр вә хидмәти һәфтәлик графикинизин бир һиссәси едирсинизсә, ушагларыныз хидмәтә ваҹиб вә мәмнунедиҹи бир иш кими јанашаҹаглар.
3. Бир баҹымыз валидејнләринин нүмунәсиндән неҹә фајдаланмышдыр?
3 Бир баҹымыз миннәтдарлыг һисси илә хатырлајыр: «Мән балаҹа оланда, аиләмиз һәр һәфтәнин истираһәт ҝүнләри тәблиғ хидмәтиндә иштирак едирди. Мән валидејнләримин тәблиғдән әсл севинҹ дујдугларыны ҝөрүрдүм. Биз хидмәтә мәмнунлуг ҝәтирән бир иш кими бахараг бөјүмүшүк». Бу баҹы једди јашында вәфтиз олунмамыш тәблиғчи олмуш вә артыг 33 илдир ки, таммүддәтли хидмәтдә иштирак едир.
4. Ушаглара мүнтәзәм тә’лим вермәјә нәләр дахилдир?
4 Мүнтәзәм тә’лим. Ушагларынызы тәблиғ хидмәтиндә иштирак етмәјә һәвәсләндирин. Еһтимал ки, онлар гапынын зәнҝини баса, ев саһибинә трактат верә вә ја Мүгәддәс Китабдан ајә охуја биләрләр. Бу онларын севинҹини артыраҹаг вә көмәк едәҹәк ки, Падшаһлыг мүждәсини тәблиғ етмәји баҹардыгларына әмин олсунлар. Бөјүдүкҹә хидмәтдә даһа чох иштирак етмәлидирләр. Буна ҝөрә дә онларын инкишаф етмәсинә көмәк един вә хидмәтләринин јахшылашмасы үчүн гаршыларына руһани мәгсәдләр гојмаға тәшвиг един.
5. Ушағын вәфтиз олунмамыш тәблиғчи олмасы үчүн нә тәләб олунур?
5 Ушагларынызын вәфтиз олунмамыш тәблиғчи олмаг тәләбләринә ҹаваб вердијини вә онларын белә бир истәји тәзаһүр етдирдијини ҝөрән кими ағсаггалларла данышын. Тәблиғчи олмагла, онлар өзләри Јеһоваја һәмд етмәк мәс’улијјәтини һисс едәҹәкләр. Јадда сахлајын ки, бунун үчүн ушагларын вәфтиз олунмуш адам гәдәр билмәләри тәләб олунмур. Ушағыныз Мүгәддәс Китабын әсас тә’лимләрини баша дүшүрмү? Мүгәддәс Китабын әхлаг нормаларына риајәт едирми? Онун хидмәтдә иштирак етмәк вә Јеһованын Шаһиди кими танынмаг истәји вармы? Әҝәр беләдирсә, онда ағсаггаллар онун вәфтиз олунмамыш тәблиғчи үчүн олан тәләбләрә ҹаваб вериб-вермәдијини мүәјјән едә биләрләр. (Бах: «Јеһованын ирадәсини јеринә јетирмәк үчүн тәшкил олунмушуг» китабы (рус.), сәһ. 79-82.)
6. Валидејнләрин ушагларына тә’лим вермәсинин нәтиҹәси нә ола биләр?
6 Ушаға Јеһоваја үрәкдән һәмд етмәји өјрәтмәк сә’ј тәләб едир. Лакин ушагларынын руһани наилијјәтләр етмәсини ҝөрмәк гәдәр валидејнләрә бөјүк севинҹ ҝәтирән шејләр аздыр. Ән әсасы исә, ушагларын Јеһованын мөһтәшәм ишләри барәсиндә данышмасы Јеһованы мәмнун едир.