Садә тәрздә өјрәт
1. Ајдын, јахшы өјрәтмәјин ваҹиб ҹәһәтләриндән бири һансыдыр?
1 Инсанлары өјрәтмәкдә садәлик чох ваҹиб рол ојнајыр. Бөјүк Мүәллим Исанын неҹә өјрәтдијинә диггәт јетирмәк бизә ‘өјрәтмәк баҹарығыны’ јахшылашдырмаға көмәк едә биләр (2 Тим. 4:2 ЈД; Јәһ. 13:13).
2. Садә тәрздә өјрәтмәјә нә дахилдир вә бу ҹүр өјрәтмәјин һансы тәсири олур?
2 Садә тәрздә даныш. Дағүстү тәблиғә инсан тәрәфиндән индијәдәк сөјләнилмиш ән дәрин һәгигәтләр дахилдир вә бунларын һамысы садә тәрздә дејилмишди (Матта 5-7 фәсилләр). Исаны динләјән издиһам ‘Онун тәлиминә тәәҹҹүбләнмишди’. Исанын сөзләри ону тутмаг үчүн ҝөндәрилән мүһафизләрә елә тәсир бағышламышды ки, онлар: «Инсанлар арасында бу Адам кими данышан әсла олмамышдыр», — дејә сөјләмишдиләр (Мат. 7:28, 29; Јәһ. 7:46). Башгаларыны һәгигәтә там инандырмаг үчүн бизә тәмтәраглы сөзләрдән, гәлиз ифадәләрдән вә ја ҝениш тәфсилатлы мисаллардан истифадә етмәк лазым дејил. Һәгигәти таныш сөзләрдән истифадә едәрәк ајдын шәкилдә чатдырмаг лазымдыр.
3. Нә үчүн бәзиләри динләјиҹиләри һәддиндән артыг мәлуматла јүкләјирләр вә бундан неҹә гачынмаг олар?
3 Мәлуматын һәҹмини мүәјјән ет. Иса бир дәфәјә нә гәдәр мәлумат чатдыраҹағыны мүәјјәнләшдирәндә динләјиҹиләрини нәзәрә алырды (Јәһ. 16:12). Бизә дә, хүсусән гоһумлара, јени мараглананлара вә ја ушаглара тәблиғ едәндә диггәтли олмаг вә шәраитә ујғунлашмаг лазымдыр. Инсан бизә диггәтлә гулаг асса белә, еһтијатлы олмалыјыг ки, һәддиндән артыг мәлумат чатдырмагла ону јүкләмәјәк. Әҝәр инсан сәмимидирсә, һәгиги Аллаһ Јеһова һагда билик алмаға давам едәҹәк (Јәһ. 17:3; 1 Кор. 3:6).
4. Диггәти тәфсилатлара јох, әсас фикирләрә ҹәмләмәк нә үчүн фајдалыдыр?
4 Диггәтини әсас фикирләрә ҹәмлә. Иса һәддиндән артыг тәфсилатлар дахил етмәклә тәлимләрини гәлизләшдирмирди. О, «гәбирләрдә оланларын һамысы... чыхаҹаглар» дејәндә һәмин вахт ики ҹүр дирилмәјә даир чох мәлумат вермәјин вахты дејилди (Јәһ. 5:28). Мүгәддәс Китаб өјрәнмәси апаранда диггәтимизи әсас фикирләрә ҹәмләмәли вә мөвзудан кәнар әлавә мәлумат чатдырмаг мејлини боғмаға чалышмалыјыг.
5.Садә шәкилдә өјрәтмәклә һансы хејир-дуаны ала биләрик?
5 Билмәли олдуғумуз һәгигәтләри садә шәкилдә бизә өјрәтдији үчүн Јеһоваја неҹә дә миннәтдарыг! (Мат. 11:25). Ҝәлин садә шәкилдә өјрәтмәк вә сәмәрәли хидмәтдән севинҹ дујмаг үчүн әлимиздән ҝәләни едәк.