Сән гејри-рәсми шаһидлик едә биләрсән!
1. а) Гејри-рәсми шаһидлик дедикдә нә нәзәрдә тутулур? б) Буҝүнкү ҝөрүшүмүздә иштирак едәнләрдән нечә нәфәр гејри-рәсми тәблиғ сајәсиндә һәгигәтлә таныш олмушдур?
1 Јығынҹағынызда һәгигәтлә гејри-рәсми тәблиғин сајәсиндә таныш олан нә гәдәр баҹы-гардаш таныјырсыныз? Ола билсин, ҹаваб сизи тәәҹҹүбләндирсин. Гејри-рәсми шаһидлик етмәк сәјаһәт едәндә, гоһум вә ја гоншулара гонаг ҝедәндә, мағазада, мәктәбдә, бир сөзлә, инсанларла гаршылашдығымыз һәр јердә хош хәбәри бөлүшмәк демәкдир. 200 нәфәрдән чох вәфтиз олунмуш баҹы-гардашдан ибарәт олан бир групун 40 фаизи һәгигәтлә гејри-рәсми шаһидлик заманы таныш олмушлар! Буна ҝөрә дә бу тәблиғ үсулу чох еффективдир.
2. Мүгәддәс Китабда гејри-рәсми тәблиғин һансы нүмунәләри вар?
2 Биринҹи әсрдәки тәблиғчиләр, адәтән, гејри-рәсми шаһидлик едирдиләр. Мәсәлән, Иса Самаријадан кечәркән Јагубун гујусундан су чәкмәјә ҝәлән гадына шаһидлик етди (Јәһ. 4:6—26). Филип Јешаја пејғәмбәрин китабыны охујан һәбәшистанлы хәдимлә сөһбәтинә белә бир суалла башлады: «Охудуғуну һеч анлајырсанмы?» (Һәв. иш. 8:26—38). Филипидә һәбсдә оларкән һәвари Павел һәбсхана рәисинә шаһидлик етмишди (Һәв. иш. 16:23—34). Сонра ев һәбсиндә оланда Павел «јанына ҝәләнләрин һамысыны гәбул едирди. Аллаһын Сәлтәнәтини тәблиғ едиб Рәбб Иса Мәсиһ барәсиндәки һәгигәти бөјүк ҹәсарәтлә вә кимсәдән манечилик ҝөрмәдән өјрәдирди» (Һәв. иш. 28:30, 31). Утанҹаг олмағына бахмајараг, сән дә гејри-рәсми шаһидлик едә биләрсән. Буну неҹә етмәк олар?
3. Утанҹаглығын өһдәсиндән ҝәлмәкдә бизә нә көмәк едә биләр?
3 Нәдән башламаг олар? Чохлары үчүн танымадыглары инсанларла сөһбәтә башламаг чәтиндир. Һәтта таныдығымыз инсанлара белә һәгигәти чатдырмаға чәкинә биләрик. Лакин Јеһованын хејирхаһлығы, хидмәтчиләринә вердији руһани әнамлар вә бу дүнјадакы инсанларын аҹынаҹаглы вәзијјәти барәдә дүшүнсәк, бу, бизи сөһбәтә башламаға тәшвиг едәҹәк (Јун. 4:11; Мәз. 40:5; Мат. 13:52). Бундан әлавә, ҹәсарәтләнмәк үчүн Јеһовадан көмәк диләјә биләрик (1 Салон. 2:2). Ҝилеад Мәктәбини кечән бир гардаш дејир: «Инсанларла сөһбәт етмәк чәтин оланда дуа етмәк һәмишә мәнә көмәк едир». Әҝәр данышмаға чәкинирсәнсә, үрәјиндә гысаҹа дуа ет (Неһ. 2:4).
4. Башланғыҹ үчүн гаршымыза һансы мәгсәди гојмалыјыг вә нәјә ҝөрә?
4 Адындан да ҝөрүндүјү кими, гејри-рәсми тәблиғ заманы сөһбәтә тәгдимәдән вә ја Мүгәддәс Китаб ајәсиндән башламаг мүтләг дејил. Мәгсәдимиз дәрһал тәблиғ етмәк јох, садәҹә сөһбәтә башламаг олса, буну етмәк бизим үчүн асан олаҹаг. Бир чох тәблиғчиләр гејд едирләр ки, бунун сајәсиндә хош хәбәри тәблиғ етмәк үчүн онларда әминлик јараныр. Әҝәр инсан бизимлә данышмаг истәмирсә, ону мәҹбур етмәк лазым дејил. Садәҹә сөһбәти нәзакәтлә битириб орадан узаглашмаг олар.
5. Бир баҹыја гејри-рәсми тәблиғ етмәјә нә көмәк едир?
5 Инсанларла сөһбәтә башламаға чәкинән бир баҹы базарлыг едән заман инсанын үзүнә бахыр вә меһрибанлыгла ҝүлүмсәјир. Әҝәр гаршысындакы адам да она ҝүлүмсәјирсә, о, гысаҹа олараг нә исә дејир. Һәмин адам мүсбәт һај верәндә сөһбәтә давам етмәк үчүн баҹыда әминлик јараныр. О диггәтлә гулаг асыр вә инсан үчүн нәјин мараглы олдуғуну вә хош хәбәри она неҹә чатдыра биләҹәјини баша дүшмәјә чалышыр. Бу үсулдан истифадә едәрәк о, чохлу әдәбијјат пајламыш, һәтта инсанларла Мүгәддәс Китабы өјрәнмәјә башламышдыр.
6. Гејри-рәсми сурәтдә тәблиғ етмәк үчүн сөһбәтә неҹә башламаг олар?
6 Сөһбәтә башла. Сөһбәтә нәдән башламаг олар? Иса су гујусунун јанында самаријалы гадынла сөһбәтинә садәҹә ондан су истәмәклә башлады (Јәһ. 4:7). Ејнилә биз дә сөһбәтә инсаны сәмими саламламагла вә ја суал вермәклә башлаја биләрик. Сөһбәт әснасында Мүгәддәс Китабдан фикирләр сөјләмәк вә һәгигәт тохумуну сәпмәк имканы јарана биләр (Ваиз 11:6). Бәзиләри инсанда мараг ојадаҹаг вә суаллар доғураҹаг фикирләр сөјләјирләр. Мәсәлән, хәстәханада нөвбәмизи ҝөзләјәркән сөһбәтә башламаг үчүн дејә биләрик: «Каш һеч вахт хәстәлик олмајајды!»
7. Диггәтли олмаг гејри-рәсми шаһидлик етмәјә неҹә көмәк едир?
7 Диггәтли олмағын сајәсиндә дә мараглы сөһбәтә башламаг мүмкүндүр. Мәсәлән, һансыса валидејнин ушағынын тәрбијәли олдуғуну ҝөрәндә валидејни тәрифләјиб сорушмаг олар: «Ушағыныза јахшы тәрбијә вермәкдә сизә нә көмәк едир?» Бир баҹы иш јолдашларынын нә һагда сөһбәт етдикләринә диггәт јетирир, сонра онлары марагландыран мөвзуја даир конкрет мәлумат тапыр вә онларла бөлүшүр. Иш јолдашларындан бир гадынын әрә ҝетмәјә һазырлашдығыны биләндә баҹы она тоју неҹә планлашдырмағын мүзакирә олундуғу «Ојанын!» журналыны верди. Бунун сајәсиндә онларын сонра да Мүгәддәс Китаб әсасында сөһбәтләри алынды.
8. Сөһбәтә башламаг үчүн әдәбијјатларымыздан неҹә истифадә едә биләрик?
8 Сөһбәтә башламағын диҝәр үсулу исә башгаларынын ҝөзү габағында әдәбијјат охумагдыр. Бир гардаш «Ҝөзәтчи Гүлләси» вә ја «Ојанын!» журналындан мараглы мәгаләләри ачыб үрәјиндә охујур. Јанында отуранлардан киминсә журнала бахдығыны ҝөрәндә о, суал верир, јахуд да мөвзуја даир гысаҹа фикрини билдирир. Бу, сөһбәт етмәјә вә шаһидлик вермәјә имкан јарадыр. Нәшрләримиздән бирини ҝөрүнән јердә сахламаг да иш вә ја синиф јолдашларымызда мараг ојада биләр.
9, 10. а) Гејри-рәсми шаһидлик етмәк үчүн һансы имканлары ахтарыб тапа биләрик? б) Сәндә бу, алыныбмы?
9 Тәблиғ етмәк үчүн имканлар ахтар. Тәблиғ ишинин тәҹили олдуғуну нәзәрә алараг биз гејри-рәсми шаһидлик етмәји тәсадүфүн өһдәсинә бурахмамалыјыг. Әксинә, ҝүндәлик һәјатымызда шаһидлик етмәк үчүн имканлар ахтармалыјыг. Гаршылашаҹағын инсанлар вә онларла сәмими сөһбәтә неҹә башлајаҹағын һагда габагҹадан дүшүн. Гој Мүгәддәс Китаб вә мараг ҝөстәрәнләрә вермәк истәдијин әдәбијјатлар һәмишә јанында олсун (1 Пет. 3:15).
10 Бир чох тәблиғчиләр гејри-рәсми шаһидлик етмәк үчүн имканлар ахтарыб тапырлар. Хүсуси мүһафизә олунан бинада јашајан бир баҹы евин истираһәт ҝушәсиндә отуруб кичик һиссәләри бирләшдирәрәк ҝөзәл тәбиәт мәнзәрәләри јығыр. Инсанлар ајаг сахлајыб шәкилдәки ҝөзәл мәнзәрә барәдә данышанда о, фүрсәтдән истифадә едәрәк сөһбәтә башлајыр вә Мүгәддәс Китабын «јени бир сәма вә јени бир јер» вәд етдијини дејир (Вәһј 21:1—4). Сән дә гејри-рәсми тәблиғ етмәк үчүн башга үсуллар ахтарыб тапа биләрсәнми?
11. Гејри-рәсми шаһидлик заманы мараг ҝөстәрән инсанын марағыны неҹә артыра биләрик?
11 Инсанын марағыны артыр. Әҝәр кимсә сәнә гулаг асырса, онун марағыны артырмаға чалыш. Мүвафиг олараг, һәмин адама дејә биләрсән: «Сизинлә сөһбәт етмәк мәнә хош олду. Сөһбәтимизә давам етмәк үчүн сизинлә һарада ҝөрүшә биләрик?» Бәзи тәблиғчиләр тәблиғ етдикләри адамлара өз үнванларыны вә телефон нөмрәләрини вериб дејирләр: «Сизинлә сөһбәт етмәк чох хошума ҝәлди. Әҝәр данышдығымыз мөвзу һаггында даһа чох мәлумат алмаг истәсәниз, мәнимлә әлагә сахлаја биләрсиниз». Әҝәр сән өзүн она баш чәкә билмәјәҹәксәнсә, мүвафиг јығынҹагдан киминсә она баш чәкмәси үчүн «Зәһмәт олмаса, бу адама баш чәк» (С-43) бланкыны долдур вә өз јығынҹағынын катибинә вер.
12. а) Нәјә ҝөрә гејри-рәсми тәблиғә сәрф етдијимиз вахты һесабата дахил етмәлијик? б) Гејри-рәсми тәблиғин нәтиҹәсиндә нәләрә наил олунур? («Гејри-рәсми тәблиғ јахшы нәтиҹәләр ҝәтирир» адлы чәрчивәјә бах.)
12 Гејри-рәсми тәблиғә сәрф етдијимиз вахты һесабата дахил етмәлијик. Буна ҝөрә дә, ҝүндә беш дәгигә дә олса, тәблиғ етдијимиз вахтын һамысыны гејд етмәјә чалышмалыјыг. Унутмајаг ки, әҝәр һәр бир тәблиғчи ҝүндә беш дәгигә гејри-рәсми тәблиғ етсә, ајда 17 милјондан чох саат алынаҹаг.
13. Гејри-рәсми шаһидлик етмәјә бизи нә тәшвиг етмәлидир?
13 Аллаһы вә јахынларымызы севмәјимиз бизә гејри-рәсми шаһидлик етмәк үчүн әсаслы сәбәб верир (Мат. 22:37—39). Јеһованын хүсусијјәтләринә вә нијјәтинә ҝөрә миннәтдарлыгла долу үрәјимиз бизи Онун ‘Падшаһлығынын иззәти вә әзәмәти’ һагда данышмаға тәшвиг едир (Мәз. 145:7, 10—12). Јахынларымыза дујдуғумуз сәмими мәһәббәт бизи, һәлә ки вахт вар, һәр бир имкандан истифадә едәрәк онлара хош хәбәри чатдырмаға тәшвиг едәҹәк (Ром. 10:13, 14). Габагҹадан бир аз дүшүнүб һазырлашмағын сајәсиндә һамымыз гејри-рәсми тәблиғ едә биләрик, һәтта, ола билсин, сәмими-гәлбли инсанлардан кимәсә һәгигәти чатдырмагдан севинҹ әлдә едә биләрик.
[4-ҹү сәһифәдәки јазы]
Гаршына инсанларла садәҹә сөһбәтә башламаг мәгсәдини гојсан, буну етмәк сәнин үчүн асан олаҹаг
[5-ҹи сәһифәдәки јазы]
Бир чох тәблиғчиләр гејри-рәсми шаһидлик етмәк үчүн имканлар ахтарыб тапырлар
[5-ҹи сәһифәдәки чәрчивә]
Сөһбәтә неҹә башламаг олар?
◼ Көмәк үчүн дуа ет
◼ Ҝүләрүз вә тәләсмәјән инсанлара јахынлаш
◼ Инсанларын үзүнә бах, ҝүлүмсә вә үмуми бир шеј һаггында даныш
◼ Јахшы динләмәји баҹар
[6-ҹы сәһифәдәки чәрчивә]
Гејри-рәсми тәблиғ јахшы нәтиҹәләр ҝәтирир
• Бир дәфә бир гардаш машынынын тәмир едилмәсини ҝөзләјәркән јанындакы инсанлара шаһидлик едиб онлара ачыг мәрузәјә дәвәтнамәләр верди. Бир ил сонра конгресдә танымадығы бир гардаш ону үрәкдән саламлајыр. Бу, онун бир ил бундан габаг гаражда дәвәтнамә вердији киши иди. Сән демә, һәмин адам конгресдә мәрузәјә гулаг асмаға ҝедиб вә Мүгәддәс Китабы өјрәнмәјә башлајыб, сонра да һәјат јолдашы илә бирликдә вәфтиз олунуб.
• Гејри-рәсми шаһидлик нәтиҹәсиндә һәгигәти ешидән бир баҹы өзү үчүн хүсуси бир әрази мүәјјән едиб. Адәтән, о, үч өвлады васитәсилә гаршылашдығы инсанлара шаһидлик едир. Бура онун гоншулары, мәктәбдә вә валидејнләр иҹласында гаршылашдығы инсанлар дахилдир. Танышлыгдан сонра о, садә тәрздә вә сәмими-гәлбдән гејд едир ки, ушагларынын тәрбијәсиндә Мүгәддәс Китаб ваҹиб рол ојнајыр, сонра исә башга мөвзуја кечир. Инсанларла хош мүнасибәт гурдугдан сонра нөвбәти дәфә Мүгәддәс Китаб әсасында сөһбәт етмәк артыг онун үчүн асан олур. Бу үсулла о, 12 нәфәрә вәфтиз олунмаға көмәк едиб.
• Бир дәфә сығорта аҝенти бир баҹынын евинә ҝәләндә о, фүрсәтдән истифадә едәрәк шаһидлик верди. Баҹы ондан сорушду: «Сиз сағламлыға, хошбәхтлијә вә әбәди һәјата даир зәманәтинизин олмасыны истәмәздинизми?» О, мүсбәт ҹаваб вериб онун һансы сығортадан бәһс етдијини сорушду. Баҹы она Мүгәддәс Китабын вәдини ҝөстәрди вә бир әдәбијјат верди. Киши әдәбијјаты елә һәмин ахшам охујуб гуртарды. О, Мүгәддәс Китабы өјрәнмәјә, јығынҹаг ҝөрүшләринә ҝәлмәјә башлады, сонра да вәфтиз олунду.
• Бир баҹы тәјјарәдә јанында отуран гадынла сөһбәтә башлады вә она тәблиғ етди. Ахыра јахын баҹы гадына өз үнваныны вә телефон нөмрәсини верди вә деди ки, ҝәлән дәфә Јеһованын Шаһидләри она баш чәкәндә онунла Мүгәддәс Китабы өјрәнмәләрини хаһиш етсин. Елә сәһәри ҝүн онун гапысыны ики Шаһид дөјдү. Гадын Мүгәддәс Китабы өјрәнмәјә башлады, гыса мүддәт әрзиндә руһән инкишаф етди, вәфтиз олунду вә тезликлә онун өзү үч нәфәрлә Мүгәддәс Китабы өјрәнмәјә башлады.
• Гоҹалар евиндә јашајан вә ҝөзләри ҝөрмәјән 100 јашлы гардаш, адәтән, белә дејир: «Бизим Падшаһлыға еһтијаҹымыз вар». Бу, орада ишләјәнләрдә вә гоҹаларда суал доғурур, гардаш да фүрсәтдән истифадә едиб Падшаһлығын нә олдуғуну изаһ едир. Орада ишләјән гадынлардан бири ондан ҹәннәтдә нә илә мәшғул олаҹағыны сорушанда о, белә ҹаваб верди: «Ҝөзләрим ачылаҹаг, ајагларым јеријәҹәк вә әлил арабамы јандыраҹағам». Гардашын ҝөзләри ҝөрмәдији үчүн һәмин гадындан она журналлары охумағы хаһиш едир. Гызы ону ҝөрмәјә ҝәләндә гадын ондан бу журналлары евә апармаг үчүн иҹазә алды вә она деди: «Инди бизим гоҹалар евиндә јени мөвзумуз вар: “Бизим Падшаһлыға еһтијаҹымыз вар”».
• Ресторанда нөвбә ҝөзләјән баҹы бир нечә јашлы кишинин сијаси мөвзуда сөһбәт етдикләрини ешитди. Онлардан бири һөкумәтин инсанларын проблемләрини һәлл едә билмәдијини деди. Баҹы: «Бу, мәним үчүн бир фүрсәтдир», — дејә фикирләшди. О, гысаҹа дуа едиб кишиләрә јахынлашды. Өзүнү тәгдим етдикдән сонра онлара бәшәријјәтин проблемләрини һәлл едәҹәк һөкумәтдән, Аллаһын Падшаһлығындан данышды вә брошүра тәклиф етди. Елә бу ан ресторанын менеҹери онлара јахынлашды. Баҹы елә билди ки, менеҹер ондан рестораны тәрк етмәји хаһиш едәҹәк. Әксинә, о, сөһбәти ешитдијини деди вә брошүра истәди. Онларын сөһбәтини ешидән диҝәр ресторан ишчиси дә ҝөз јашлары ичиндә онларын јанына ҝәлди. Гадын әввәлләр Мүгәддәс Китабы өјрәниб, инди јенидән өјрәнмәјә башламаг истәјирди.