Күчәдә тәблиғ етмәк сәмәрәлидир
1. Биз Иса Мәсиһи нәдә тәглид едә биләрик?
1 Јер үзүндәки хидмәти заманы Иса Мәсиһ һәм јол ҝедәркән, һәм дә инсанларла гаршылашдығы һәр јердә тәблиғ етмәкдән чәкинмирди (Лука 9:57—61; Јәһ. 4:7). О, ваҹиб хәбәри мүмкүн гәдәр чох инсана чатдырмаг истәјирди. Бу ҝүн күчәдә тәблиғ етмәк инсанларын Аллаһын һикмәтини ешитмәсинә көмәк етмәк үчүн ән јахшы үсулдур (Сүл. мәс. 1:20). Әҝәр тәшәббүсү үзәримизә ҝөтүрсәк вә ајырд етмәји баҹарсаг, хидмәтимиз даһа уғурлу алынаҹаг.
2. Күчәдә тәблиғ едәркән тәшәббүс ҝөстәрмәк нәјә ҝөрә ваҹибдир?
2 Тәшәббүс ҝөстәр. Адәтән, бир јердә дурмаг вә ја отуруб инсанларын бизә јахынлашмасыны ҝөзләмәк әвәзинә, өзүмүз онлара јахынлашсаг, даһа јахшыдыр. Достҹасына ҝүлүмсә, ҝөзләрлә тәмас јарат вә мүлајим ол. Әҝәр јанында башга тәблиғчи варса, инсана тәкликдә јахынлашмаг даһа јахшы олар. Һәмчинин марагланан инсанла јенидән сөһбәт етмәк үчүн дә тәшәббүс ҝөстәрмәк лазымдыр. Мүнасиб оларса, сөһбәтин сонунда неҹә әлагә сахлаја биләҹәјинизи нәзакәтлә соруш. Бәзи тәблиғчиләр мүнтәзәм олараг ејни әразидә тәблиғ едирләр ки, шаһидлик етдикләри инсанларла тәкрар сөһбәт едә билсинләр вә онларын марағыны артырсынлар.
3. Күчәдә тәблиғ едәркән ајырд етмәк габилијјәтимиздән неҹә истифадә едә биләрик?
3 Ајырд етмәји баҹар. Һарада дурмағы вә кимә јахынлашмағы гәрарлашдыраркән ајырд етмәји баҹармаг лазымдыр. Һәр јолдан кечәнә шаһидлик вермәк мүтләг дејил. Диггәтҹил ол. Мәсәлән, әҝәр инсан тәләсирсә, јахшы олар ки, ону јолундан етмәјәк. Ишҝүзар әразидә тәблиғ едәркән мүдријјәтә нараһатчылыг төрәтмәмәклә мүдрик һәрәкәт етмиш оларыг. Адәтән, инсанлар ишә ҝәлән заман јох, ишдән чыхан заман шаһидлик етмәк даһа јахшыдыр. Инсанлара елә јахынлашмаг лазымдыр ки, онлары үркүдүб горхутмајаг. Әдәбијјат верәркән дә кимә нә вердијимизә диггәт јетирмәлијик. Әҝәр инсан аз мараг ҝөстәрибсә, она журнал әвәзинә, трактат вермәк јахшы оларды.
4. Нәјә ҝөрә күчәдә шаһидлик сәмәрә вә севинҹ ҝәтирир?
4 Күчәдә шаһидлик вермәјин сајәсиндә гыса вахт әрзиндә даһа чох һәгигәт тохуму сәпә биләрик (Ваиз 11:6). Күчәдә растлашдығымыз инсанлардан бәзиләри, ола билсин, евдән-евә тәблиғ едәркән тапа билмәдијимиз инсанлардыр. Нәјә ҝөрә гаршына күчәдә тәблиғ етмәк мәгсәдини гојмајасан? Бу, хидмәтин севинҹ ҝәтирән вә сәмәрәли бир нөвүдүр.