Ахшамчағы тәблиғ едә биләрсәнми?
1. Бир Мүгәддәс Китаб алиминин сөзләринә ҝөрә, һәвари Павел евдән-евә тәблиғдә нә вахт иштирак едирди?
1 «Мүгәддәс Китабын јазылдығы дөврдә мәишәт» китабында гејд олунур ки, Павел, адәтән, «ҝүнорта саат 4-дән ҝеҹәјәдәк» евдән-евә тәблиғ едирди. Биз Павелин графикинин неҹә олдуғуну билмәсәк дә, онун «хош хәбәр уғрунда» әлиндән ҝәләни етдијинә әминик (1 Кор. 9:19—23). Буна ҝөрә о һәтта ишләрини елә дүзүб-гошурду ки, евдән-евә хидмәтдә даһа әлверишли вахтда иштирак етсин.
2. Хидмәтдә иштирак етмәк үчүн нәјә ҝөрә ахшамчағы әлверишли вахтдыр?
2 Адәтән, бир чох јерләрдә тәблиғчиләр евдән-евә сәһәрләр тәблиғ едирләр. Сәнҹә, бу, сизин әрази үчүн дә әлверишли вахтдыр? Бир пионер өз әразиси барәдә белә сөзләр демишди: «Чәтин ки, ҝүндүзләр кимисә евдә тапасан. Инсанларын чоху ахшамлар евдә олур». Инсанлары евдә тапмаг вә хош хәбәри чатдырмаг үчүн ахшамчағы тәблиғ етмәк әлверишлидир. Әксәр һалларда, ахшамлар инсанлар өзләрини даһа раһат һисс едир вә сөһбәт етмәјә мејилли олурлар. Ахшамлар тәблиғ етмәк әлверишли олан әразиләрдә ағсаггаллар тәблиғ үчүн ҝөрүшләрин ахшамчағы кечирилмәсинин гајғысына галмалыдырлар.
3. Ахшамчағы шаһидлик едириксә, неҹә еһтијатлы ола биләрик?
3 Узагҝөрән ол. Ахшамлар хидмәтә чыханда еһтијатлы олмаг ваҹибдир. Мәсәлән, әҝәр сән јемәк вахты ҝәлмисәнсә вә бу, ев саһиби үчүн мүнасиб дејилсә, онда башга вахт ҝәлмәји тәклиф едә биләрсән. Әҝәр гаранлыгдырса, ев саһибинин сәни ҝөрә биләҹәји јердә дур, өзүнү тәгдим ет вә мәгсәдини ачыгла. Һәмчинин ики-ики вә ја груп шәклиндә тәблиғ етмәк вә гаранлыг күчәләрдә тәк ҝәзмәмәк мүдриклик оларды. Саһәјә инсанларын јатмаға һазырлашдыглары бир вахтда ҝедиб онлары нараһат етмә (2 Кор. 6:3). Әҝәр тәблиғ етдијин әрази ахшамлар тәһлүкәлидирсә, онда чалыш, гаранлыға галмајасан (Сүл. мәс. 22:3).
4. Ахшамчағы шаһидлик етмәк һансы хејир-дуалар ҝәтирир?
4 Хејир-дуалар. Тәблиғ заманы шаһидлик етмәк имканымыз оланда хидмәтдән даһа чох севинҹ әлдә едирик. Нә гәдәр чох шаһидлик етмәк фүрсәтимиз олса, бир о гәдәр дә инсанлара «хилас олуб һәгигәт барәсиндә дәгиг билијә» јијәләнмәјә көмәк етмәк имканымыз олаҹаг (1 Тим. 2:3, 4). Ахшамчағы хидмәтдә иштирак етмәк үчүн графикиндә дәјишикликләр едә биләрсәнми?