Аллаһ һансы ибадәти гәбул едир?

1. Аллаһа дүзҝүн тәрздә ибадәт етмәклә һансы хејир-дуалары алаҹағыг?

ЈЕҺОВА АЛЛАҺ бизи чох севир вә мәһәббәт долу рәһбәрлијиндән фајдаланмағымызы истәјир. Биз Аллаһа дүзҝүн тәрздә ибадәт етмәклә, хошбәхтлијә наил олаҹаг вә бир чох проблемләрдән гачаҹағыг. Ејни заманда Аллаһдан хејир-дуа вә көмәк дә алаҹағыг (Јешаја 48:17). Анҹаг Аллаһ һаггында һәгигәти өјрәтдијини иддиа едән јүзләрлә дин вар. Бу динләрин Аллаһ вә Онун нормалары һаггында тәсәввүрләри исә бир-бириндән олдугҹа фәргләнир.

2. Јеһованын һансы ибадәти дүзҝүн һесаб етдијини неҹә өјрәнмәк олар вә буну баша дүшмәјә һансы нүмунә көмәк едир?

² Јеһованын һансы ибадәти дүзҝүн һесаб етдијини неҹә өјрәнмәк олар? Бунун үчүн бүтүн динләрин тә’лимләрини тәдгиг едиб, онлары мүгајисә етмәк лазым дејил. Садәҹә, Мүгәддәс Китабын әслиндә нә өјрәтдијини вә орада һәгиги ибадәт һаггында нә дејилдијини өјрәнмәк кифајәтдир. Бир нүмунәни нәзәрдән кечирәк. Әксәр өлкәләрдә пулларын сахталашдырылмасы бөјүк проблемә чеврилиб. Әҝәр сизә сахта пуллары мүәјјән етмәк тапшырылсајды, сиз буну неҹә едәрдиниз? Бүтүн сахта пуллары тәдгиг етмәјә чалышардынызмы? Әлбәттә, јох. Әсл пулу өјрәнмәјә вахт ајырмаг даһа мүдрик һәрәкәт оларды. Әсл пулун неҹә олдуғуну билдикдә, сахтаны мүәјјән етмәк асан олаҹаг. Бунун кими, һансы динин һәгиги олдуғуну өјрәнмәклә, јалан динләри мүәјјән едә биләрик.

3. Исанын сөзләринә әсасән, Аллаһы разы салмаг истәјириксә нә етмәлијик?

³ Јеһоваја, Онун гәбул етдији тәрздә ибадәт етмәк чох ваҹибдир. Әксәр инсанлар бүтүн динләрин Аллаһы разы салдығыны дүшүнүрләр, лакин Мүгәддәс Китаб буну өјрәтмир. Инсанын өзүнү садәҹә мәсиһчи һесаб етмәси дә кифајәт дејил. Иса демишдир: «Мәнә: “Ја Рәбб, ја Рәбб”, — дејән һәр кәс Сәмави Сәлтәнәтә ҝирмәјәҹәкдир; анҹаг ҝөјләрдә олан Атамын ирадәсини јеринә јетирән ораја ҝирәҹәкдир». Аллаһы разы салмаг үчүн Онун тәләбләрини билмәли вә онлара мүвафиг јашамалыјыг. Иса Аллаһын ирадәсини јеринә јетирмәјәнләри «һагсызлыг едәнләр» адландырды (Матта 7:21-23). Сахта пул кими, јалан динин дә һеч бир дәјәри јохдур, үстәлик дә чох зәрәрлидир.

4. Иса һансы ики јолдан данышырды вә онлар һара апарыр?

⁴ Јеһова һәр бир инсана јерүзү Ҹәннәтдә әбәди јашамаг имканы верир. Бунун үчүн биз Аллаһа дүзҝүн тәрздә ибадәт етмәли вә Ону разы салмаға чалышмалыјыг. Тәәссүфләр олсун ки, чохлары белә давранмаг истәмир. Буна ҝөрә Иса демишдир: «Дар гапыдан ҝирин; чүнки һәлака апаран гапы ҝениш вә јол енлидир; вә ондан ҝирәнләр чохдур. Чүнки һәјата апаран гапы дар вә јол енсиздир вә ону тапанлар аздыр» (Матта 7:13, 14). Һәгиги дин әбәди һәјата, јалан дин исә мәһвә апарыр. Јеһова һеч кимин өлмәсини истәмир, буна ҝөрә дә бүтүн инсанларын Онун һаггында һәгигәти өјрәнмәләринә имкан јарадыр (2 Петер 3:9). Һәгигәтән дә, һәјатымыз Аллаһа неҹә ибадәт етмәјимиздән асылыдыр.

ҺӘГИГИ ДИНИ НЕҸӘ МҮӘЈЈӘН ЕТМӘК ОЛАР?

5. Һәгиги динә мәнсуб оланлары неҹә танымаг олар?

⁵ «Һәјата апаран гапы»ны неҹә тапмаг олар? Иса деди ки, һәгиги дини, она гуллуг едән инсанларын һәрәкәтләриндән мүәјјән етмәк олар. «Онлары бәһрәләриндән таныјаҹагсыныз» дејәрәк, Иса әлавә етди: «Һәр јахшы ағаҹ хејирли мејвә верәр» (Матта 7:16, 17). Башга сөзләрлә десәк, һәгиги динә мәнсуб оланлары е’тигад вә давранышларындан танымаг олар. Аллаһын һәгиги хидмәтчиләринин гејри-камил олмаларына вә сәһвә јол вермәләринә бахмајараг, онлар бир халг кими Онун ирадәсини јеринә јетирмәјә чалышырлар. Ҝәлин һәгиги динә мәнсуб оланлары танымаға көмәк едән алты ҹәһәтә бахаг.

6, 7. Аллаһын хидмәтчиләри Мүгәддәс Китаба неҹә мүнасибәт ҝөстәрирләр вә Иса бу саһәдә һансы нүмунәни гојуб?

⁶ Аллаһын хидмәтчиләринин тә’лимләри Мүгәддәс Китаба әсасланыр. Мүгәддәс Китабда дејилир: «Һәр Мүгәддәс Јазы Аллаһдан илһам алмыш вә тә’лим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин» (2 Тимотејә 3:16, 17). Һәвари Павел исә һәмиманлыларына бу сөзләри јазмышдыр: «Сиз Аллаһын биздән ешитдијиниз кәламыны гәбул етдикдә, ону бәшәри сөз олараг дејил, әслиндә олдуғу кими, Аллаһын кәламы олараг гәбул етдиниз» (1 Салоникилиләрә 2:13). Ҝөрүндүјү кими, һәгиги динин тә’лимләри инсан адәт-ән’әнәләринә вә дүшүнҹәләринә дејил, Аллаһын Кәламы олан Мүгәддәс Китаба әсасланыр.

⁷ Иса Мәсиһ өз тә’лимләрини һәмишә Аллаһын Кәламына әсасландырмагла, бизә ҝөзәл нүмунә гојуб. О, дуасында сәмави Атасына демишдир: «Сәнин сөзүн һәгигәтдир» (Јәһја 17:17). Иса Аллаһын Кәламына е’тибар едир вә һәмишә Мүгәддәс Јазылара мүвафиг өјрәдирди. О, чох вахт: «Јазылмышдыр» дејәрәк, Мүгәддәс Јазылардан ситат ҝәтирирди (Матта 4:4, 7, 10). Бунун кими, Аллаһын мүасир хидмәтчиләри дә өз нөгтеји-нәзәрләрини өјрәтмирләр. Онлар Мүгәддәс Китабын Аллаһын Кәламы олдуғуна әминдирләр вә буна ҝөрә дә бүтүн тә’лимләрини орада јазыланлара әсасландырырлар.

8. Јеһоваја ибадәт өзүнә нәји дахил едир?

⁸ Һәгиги динә мәнсуб оланлар јалныз Јеһоваја ибадәт едир вә Онун адыны бәјан едирләр. Иса демишдир: «Аллаһын олан Рәббә [«Јеһоваја», ЈД] сәҹдә гыл вә јалныз Она гуллуг ет» (Матта 4:10). Аллаһын һәгиги хидмәтчиләри јалныз Јеһоваја ибадәт едирләр. Онлар инсанлара Онун ады вә хүсусијјәтләри һаггында данышараг мүгәддәс хидмәти иҹра едирләр. Јешаја 42:8 ајәсиндә (КМ) дејилир: «Мән Јеһовајам, исмим одур; вә иззәтими бир башгасына вә һәмдими ојма бүтләрә вермәјәҹәјәм». Инсанларын Аллаһы танымаларына көмәк етмәклә, Иса бизә ҝөзәл нүмунә верди. О, дуасында Јеһоваја демишдир: «Дүнјадан Мәнә вердијин адамлара Сәнин адыны ачдым» (Јәһја 17:6). Бу ҝүн Аллаһын һәгиги хидмәтчиләри дә инсанлара Онун ады, нијјәтләри вә ҝөзәл хүсусијјәтләри барәдә өјрәдирләр.

9, 10. Һәгиги мәсиһчиләр бир-бирләринә неҹә мәһәббәт ҝөстәрирләр?

⁹ Аллаһын хидмәтчиләри бир-бирләринә гаршы әсл вә тәмәннасыз мәһәббәт тәзаһүр етдирирләр. Иса демишдир: «Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһја 13:35). Илк мәсиһчиләр бир-бирләринә гаршы белә мәһәббәт тәзаһүр етдирирдиләр. Һәгиги мәһәббәт сосиал, милли вә ирги манеәләри ашыр, инсанлары гырылмаз гардашлыг бағы илә бирләшдирир (Колослулара 3:14). Јалан динә мәнсуб оланларда гардашлыг мәһәббәти јохдур. Буну һарадан билирик? Онлар милли вә етник мүнагишәләрә ҝөрә өз һәмиманлыларыны өлдүрүрләр. Һәгиги мәсиһчиләр исә өз һәмиманлыларыны вә ја башга инсанлары өлдүрмәк үчүн әлләринә силаһ алмырлар. Мүгәддәс Китабда дејилир: «Кимин Аллаһын өвлады, кимин дә шејтанын өвлады олдуғу бундан бәлли олур: салеһ иш ҝөрмәјән, Аллаһдан дејилдир, өз гардашыны севмәјән дә һәмчинин... Биз бир-биримизи севәк, Шәрирдән олан, өз гардашыны өлдүрән Габил кими олмајаг» (1 Јәһја 3:10-12; 4:20, 21).

¹⁰ Әлбәттә, әсл мәһәббәтә өлдүрмәмәкдән даһа чох шеј дахилдир. Һәгиги мәсиһчиләр башгаларына көмәк етмәк вә һәмиманлыларыны руһландырмаг үчүн өз вахтларыны, гүввәләрини вә вәсаитләрини гурбан вермәјә һазырдырлар (Ибраниләрә 10:24, 25). Онлар чәтин анларда бир-бирләринә дәстәк олур, башгалары илә дүрүст давраныр вә Мүгәддәс Китабын «һамыја... јахшылыг едәк» мәсләһәтини тәтбиг едирләр (Галатијалылара 6:10).

11. Нәјә ҝөрә гәбул етмәлијик ки, Аллаһ хиласы јалныз Иса Мәсиһ васитәсилә верир?

¹¹ Һәгиги мәсиһчиләр гәбул едирләр ки, Аллаһ хиласы јалныз Иса Мәсиһ васитәсилә верир. Мүгәддәс Китабда дејилир: «Башга һеч кимдә хилас јохдур; чүнки сәма алтында инсанлара верилмиш башга бир ад јохдур ки, онунла хилас ола биләк» (Һәвариләрин ишләри 4:12). 5-ҹи фәсилдән өјрәндијимиз кими, Иса итаәткар инсанлар уғрунда өз һәјатыны фидијә олараг гурбан верди (Матта 20:28). Һәмчинин өјрәндик ки, Аллаһ ону бүтүн јер үзүнү идарә едәҹәк сәмави Падшаһлығын Падшаһы тә’јин етмишдир. Әбәди јашамаг истәјириксә, Аллаһын тәләб етдији кими, Исаја гулаг асмалы вә онун тә’лимләрини изләмәлијик. Буна ҝөрә дә, Мүгәддәс Китабда дејилир: «Оғула иман едәнин әбәди һәјаты вардыр; лакин Оғула итаәт етмәјән, һәјат ҝөрмәјәҹәкдир» (Јәһја 3:36).

12. Дүнјадан олмамаг нә демәкдир?

¹² Аллаһын һәгиги хидмәтчиләри дүнјадан дејилләр. Иса мәһкәмә гаршысында дуран заман Рома императору Пилата деди: «Мәним Сәлтәнәтим бу дүнјадан дејилдир» (Јәһја 18:36). Һансы өлкәдә јашамаларындан асылы олмајараг, Исанын һәгиги давамчылары өзләрини сәмави Падшаһлығын вәтәндашлары һесаб едир вә бу дүнјанын сијаси ишләринә гаршы гәти сурәтдә битәрәф мөвге тутурлар. Онлар тоггушмаларда вә гаршыдурмаларда иштирак етмирләр. Бунунла белә, Јеһованын хидмәтчиләри башгаларынын сијаси партијалара үзв олмаларына вә сечкиләрдә өз намизәдликләрини ирәли сүрмәләринә вә ја сәсвермәдә иштирак етмәләринә мане олмурлар. Һәгиги мәсиһчиләр сијаси ишләрдә өз битәрәфликләрини горусалар да, ганунлара табе олурлар. Нә үчүн? Чүнки Аллаһын Кәламы «һәр адам өз үзәриндә олан һакимләрә табе олсун» дејәрәк, бизи дөвләтә табе олмаға тәшвиг едир (Ромалылара 13:1). Анҹаг дөвләтин ганунлары Аллаһын ганунларына зидд ҝедәрсә, һәгиги мәсиһчиләр «инсанлардан артыг, Аллаһа итаәт етмәк ҝәрәкдир» дејән һәвариләрин нүмунәсини изләјирләр (Һәвариләрин ишләри 5:29; Марк 12:17).

13. Аллаһын Падшаһлығы Иса Мәсиһин һәгиги давамчылары үчүн нә мә’на дашыјыр вә онлар һансы ишлә мәшғулдурлар?

¹³ Исанын һәгиги давамчылары Аллаһын Падшаһлығынын бәшәријјәтин јеҝанә үмид јери олдуғуну бәјан едирләр. Иса габагҹадан демишдир: «Сәмави Сәлтәнәт [Падшаһлыг] һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Матта 24:14). Иса Мәсиһин һәгиги давамчылары инсанлары инсан һакимијјәтләринә јох, Аллаһын Падшаһлығына үмид бағламаға тәшвиг едирләр, чүнки бәшәријјәтин проблемләрини јалныз о һәлл едә биләр (Мәзмур 146:3). Иса нөвбәти сөзләри демәклә, бизә бу сәмави һөкумәт һаггында дуа етмәји өјрәтмишдир: «Сәлтәнәтин [Падшаһлығын] ҝәлсин. Ҝөјдә олдуғу кими, Јердә дә Сәнин ирадән олсун» (Матта 6:10). Аллаһын Кәламында дејилир ки, бу Падшаһлыг «[мөвҹуд олан] падшаһлыглары әзиб-дағыдаҹаг, өзү исә әбәди галаҹаг» (Даниел 2:44).

14. Сизҹә, кимләр һәгиги динин тәләбләринә ҹаваб верир?

¹⁴ Јухарыда дејиләнләри нәзәрә алараг өзүнүздән сорушун: «Һансы динин тә’лимләри тамамилә Мүгәддәс Китаба әсасланыр? Јеһованын адыны кимләр бәјан едир? Сөзүн әсл мә’насында кимләр бир-бирләрини севир вә Иса Мәсиһә иман ҝәтирир? Кимләр бу дүнјанын ишләриндә иштирак етмир вә Аллаһын Падшаһлығынын бәшәријјәт үчүн јеҝанә үмид јери олдуғуну бәјан едир? Бүтүн бу шәртләрә кимләр мүвафигдир?» Фактлар ачыг-ајдын сүбут едир ки, бунлар Јеһованын Шаһидләридир (Јешаја 43:10-12).

СИЗ НЕҸӘ ДАВРАНАҸАГСЫНЫЗ?

15. Аллаһа инанмагла јанашы даһа нә тәләб олунур?

¹⁵ Аллаһы разы салмаг үчүн, садәҹә Она инанмаг кифајәт дејил. Чүнки Мүгәддәс Китабда дејилир ки, Аллаһын мөвҹудлуғуна, һәтта ҹинләр дә инаныр (Јагуб 2:19). Лакин ајдындыр ки, онлар Аллаһын ирадәсини јеринә јетирмирләр вә Аллаһ онлардан наразыдыр. Аллаһа мәгбул олмаг үчүн исә, садәҹә Онун мөвҹудлуғуна инанмаг јох, һәмчинин Онун ирадәсини јеринә јетирмәк дә лазымдыр. Биз јалан диндән чыхмалы вә һәгиги ибадәтә гошулмалыјыг.

16. Јалан динлә һансыса әлагәмиз варса, нә етмәлијик?

¹⁶ Һәвари Павел ҝөстәрди ки, бизим јалан динлә һеч бир әлагәмиз олмамалыдыр. О јазмышдыр: «Рәбб дејир ки, “Имансызларын арасындан чыхын вә онлардан ајрылын; мурдар бир шејә тохунмајын, Мән дә сизи гәбул едәҹәјәм”» (2 Коринфлиләрә 6:17; Јешаја 52:11). Буна ҝөрә дә, һәгиги мәсиһчиләр јалан динлә бағлы олан һәр шејдән узаг дурурлар.

17, 18. «Бөјүк Бабил» нәдир вә нә үчүн ондан мүмкүн гәдәр тез чыхмаг лазымдыр?

¹⁷ Мүгәддәс Китаб ҝөстәрир ки, јалан динин һәр бир нөвү «Бөјүк Бабил»ин бир һиссәсидирa (Вәһј 17:5). Бу ад, Нуһун ҝүнләриндә баш верән дашгындан сонра јалан динин баш галдырдығы гәдим Бабил шәһәрини хатырладыр. Јалан диндә ҝениш јајылмыш тә’лим вә адәт-ән’әнәләрин чоху мәһз бу гәдим шәһәрдә јаранмышдыр. Мәсәлән, Бабилин сакинләри Үч үгнума, јә’ни үч аллаһлыға инанырдылар. Бу ҝүн исә, Үч үгнум бир чох динләрин әсас тә’лимидир. Анҹаг Мүгәддәс Китаб ајдын шәкилдә өјрәдир ки, Јеһова ваһид һәгиги Аллаһдыр, Иса Мәсиһ исә Онун Оғлудур (Јәһја 17:3). Бабиллиләр, һәмчинин инсанда бәдән өлдүкдән сонра јашамаға давам едән өлмәз ҹанын олдуғуна вә онун ишҝәнҹәләрә мә’руз галдығына инанырдылар. Бу ҝүн өлмәз ҹан вә ја руһ, о ҹүмләдән ҹәһәннәм әзабы тә’лимләри динләрин әксәријјәтиндә ҝениш јајылмышдыр.

¹⁸ Гәдим Бабилин тә’лимләри бүтүн јер үзүнә јајылдығы үчүн, мүасир Бөјүк Бабили јалан динин дүнја империјасы адландырмаг мәнтигә ујғундур. Аллаһ бу империјанын гәфләтән мәһвә уғрајаҹағыны әввәлҹәдән билдирмишди (Вәһј 18:8). Бөјүк Бабиллә бүтүн әлагәләри кәсмәјин нә үчүн ваҹиб олдуғуну анлајырсынызмы? Јеһова Аллаһ, һәлә вахт вар икән, јалан диндән мүмкүн гәдәр тез чыхмағымызы истәјир (Вәһј 18:4).

19. Јеһоваја хидмәт етмәклә нә газанаҹагсыныз?

¹⁹ Јалан динлә әлагәнизи кәсмәк истәдијинизи биләрәк, бә’зиләри сизинлә мүнасибәтләринә сон гојмаг истәјә биләр. Лакин сиз, Јеһоваја Онун халгы илә бирликдә хидмәт етмәклә, итирә биләҹәјиниздән даһа чох шеј газанаҹагсыныз. Һәр шејини атыб Исанын ардынҹа ҝедән илк шаҝирдләр кими, сизин дә чохлу руһани баҹы-гардашларыныз олаҹаг. Сиз, әсл мәһәббәт тәзаһүр етдирән милјонларла һәгиги мәсиһчиләрдән ибарәт үмумдүн­ја аиләнин бир һиссәси ола биләҹәксиниз. Бундан әлавә, «ҝәләҹәк дөврдә» әбәди јашамаг үмидиниз јаранаҹаг (Марк 10:28-30). Иманыныза ҝөрә сизинлә мүнасибәтләрини кәсән инсанлар, бәлкә дә мүәјјән вахтдан сонра Мүгәддәс Китаб тә’лимләри илә таныш олмаг истәјәҹәк вә онлар да Јеһованын хидмәтчиси олаҹаглар.

20. Һәгиги динә мәнсуб оланлары нә ҝөзләјир?

²⁰ Мүгәддәс Китаб өјрәдир ки, Аллаһ тезликлә бу пис системи мәһв едәҹәк вә Өз Падшаһлығынын рәһбәрлији алтында салеһлик өмүр сүрән јени дүнја јарадаҹаг (2 Петер 3:9, 13). О заман һәјат неҹә дә ҝөзәл олаҹаг! Јер үзүндә јалныз бир дин, бир һәгиги ибадәт олаҹаг. Мәҝәр индидән сә’ј ҝөстәрмәк вә Аллаһын һәгиги хидмәтчиләринә гошулмаг мүдрик давраныш олмаздымы?