Бир-биринизә мәһәббәтинизи мөһкәмләндирин

1, 2. а) Нәјә ҝөрә һәвари Булус мәһәббәтин «үстүн» хүсусијјәт олдуғуну демишди? б) Һансы суаллары нәзәрдән кечирәҹәјик?

ҺӘВАРИ БУЛУС иман, үмид вә мәһәббәт барәдә данышаркән сөзләринә бу ҹүр јекун вурур: «Мәһәббәт бунларын һамысындан үстүндүр» (1 Кор. 13:13). О нәјә ҝөрә белә демишди? Она ҝөрә ки, ҝәләҹәкдә Јеһованын јени дүнја илә бағлы вәдләринә иман етмәјимизә еһтијаҹ галмајаҹаг. Бу вәдләрин нә вахтса ҝерчәкләшәҹәјинә дә үмид етмәјәҹәјик. Чүнки онлар артыг јеринә јетмиш олаҹаг. Амма Јеһоваја вә инсанлара мәһәббәт ҝөстәрмәк һәмишә лазым олаҹаг. Бәли, бизим онлара мәһәббәтимиз әбәдијјән артмаға давам едәҹәк.

² Мәһәббәтә һәмишә еһтијаҹ дујаҹағымыз үчүн ҝәлин үч суала нәзәр салаг. Биринҹиси, нәјә ҝөрә бир-биримизи севмәлијик? Икинҹиси, һансы јолларла бир-биримизә мәһәббәт ҝөстәрә биләрик? Үчүнҹүсү, диндашларымыза мәһәббәтимизи неҹә мөһкәм сахлаја биләрик?

НӘЈӘ ҜӨРӘ БИР-БИРИМИЗИ СЕВМӘЛИЈИК?

3. Һансы сәбәбләрә ҝөрә бир-биримизи севмәлијик?

³ Бир-биримизи севмәк нәјә ҝөрә ваҹибдир? Сәбәбләрдән бири одур ки, мәһәббәт бизим әсл мәсиһи олдуғумузун ҝөстәриҹисидир. Иса Мәсиһ һәвариләринә демишди: «Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:35). Бундан әлавә, мәһәббәт арамыздакы бирлији горујур, неҹә ки Булус да демишди: «Мәһәббәт инсанлар арасында камил бирлик јарадыр» (Кол. 3:14). Бир-биримизә мәһәббәт ҝөстәрмәјин башга ваҹиб сәбәби дә вар. Һәвари Јәһја диндашларына белә јазмышды: «Аллаһы севән гардашыны да севмәлидир» (1 Јәһ. 4:21). Демәли, диндашларымыза олан мәһәббәтимиз Јеһованы севдијимизин сүбутудур.

4, 5. Јеһоваја вә диндашларымыза бәсләдијимиз мәһәббәт бир-бири илә неҹә бағлыдыр? Нүмунә чәкин.

⁴ Јеһоваја вә диндашларымыза бәсләдијимиз мәһәббәт бир-бири илә неҹә сых бағлыдыр? Бир нүмунәјә бахаг: Үрәјимизлә диҝәр органларымыз арасында әлагә вар. Мәсәлән, һәким биләјимиздәки нәбзин зәиф вә ја сүрәтли дөјүндүјүнү јохлајанда о, үрәјимизин сағлам олуб-олмадығыны мүәјјән едә билир. Бу нүмунәни мәһәббәт мөвзусуна неҹә аид едә биләрик?

⁵ Неҹә ки һәким нәбзимизи јохлајыб үрәјимизин сағламлығы илә бағлы мәлумат әлдә едир, ејнилә биз дә диндашларымыза олан севҝимизи јохлајыб Јеһоваја мәһәббәтимизин ҝүҹлү олуб-олмадығыны ҝөрә биләрик. Әҝәр ҝөрсәк ки, баҹы-гардашларымыза мәһәббәтимиз зәифләјиб, әввәлки кими дејил, демәли, Јеһоваја да мәһәббәтимиз зәифләмәјә башлајыб. Лакин диндашларымыза мүтәмади мәһәббәт ҝөстәририксә, бу, Јеһоваја мәһәббәтимизин ҝүҹлү олдуғундан хәбәр верир.

6. Диндашларымыза мәһәббәтимиз зәифләјирсә, бу нәјә ҝөрә ҹидди проблемдир? (1 Јәһја 4:7—9, 11).

⁶ Баҹы-гардашлара мәһәббәтимизин зәифләдијини ҝөрәндә һәјәҹан тәбили чалмалыјыг. Нәјә ҝөрә? Чүнки бу, Јеһова илә мүнасибәтимизин тәһлүкәдә олдуғундан хәбәр верир. Һәвари Јәһја бу фикирлә бағлы демишди: «Ҝөрдүјү гардашыны севмәјән адам ҝөрмәдији Аллаһы севә билмәз» (1 Јәһ. 4:20). Бурадан ваҹиб бир шеј өјрәнирик: јалныз «бир-биримизи» севдијимиз һалда Јеһова биздән разы галыр. (1 Јәһја 4:7—9, 11 ајәләрини охујун.)

ҺАНСЫ ЈОЛЛАРЛА БИР-БИРИМИЗӘ МӘҺӘББӘТ ҜӨСТӘРӘ БИЛӘРИК?

7, 8. Һансы јолларла бир-биримизә мәһәббәт ҝөстәрә биләрик?

⁷ «Бир-биринизи... севин». Аллаһын Кәламында бу әмр дөнә-дөнә вурғуланыр (Јәһ. 15:12, 17; Ром. 13:8; 1 Салон. 4:9; 1 Бут. 1:22; 1 Јәһ. 4:11). Бир шеји нәзәрә алмаг лазымдыр ки, мәһәббәт үрәкдә гәрар тутмуш, инсанын дахилиндә олан бир хүсусијјәтдир вә һеч бир инсан үрәјимиздәкиләри ҝөрә билмәз. Бәс баҹы-гардашларымыз онлара дујдуғумуз севҝини ҝөрсүн дејә нә едә биләрик? Бу, сөзләримиздән вә әмәлләримиздән ҝөрүнәҹәк.

⁸ Баҹы-гардашлара мәһәббәт ҝөстәрмәјин јоллары чохдур. Мәсәлән: «Бир-биринизә һәгигәти сөјләјин» (Зәк. 8:16). «Бир-биринизлә меһрибан олун» (Марк 9:50). «Һөрмәт ҝөстәрмәкдә бир-биринизи габаглајын» (Ром. 12:10). «Бир-биринизи гәбул един» (Ром. 15:7). «Бир-биринизи үрәкдән бағышлајын» (Кол. 3:13). «Бир-биринизин јүкүнү дашыјын» (Гал. 6:2). «Даима бир-биринизә тәсәлли верин» (1 Салон. 4:18). «Бир-биринизи мөһкәмләндирин» (1 Салон. 5:11). «Бир-бириниздән өтрү дуа един» (Јаг. 5:16).

9. Башгаларына тәсәлли вермәк нәјә ҝөрә мәһәббәтимизи ифадә етмәјин ваҹиб бир јөнүдүр? (Һәмчинин шәклә бахын.)

⁹ Ҝәлин јухарыда садаланан үсуллардан биринә нәзәр салаг. Булус демишди: «Даима бир-биринизә тәсәлли верин». Нәјә ҝөрә тәсәлли вермәк диндашларымыза мәһәббәт ҝөстәрмәјин ваҹиб бир јөнүдүр? Мүгәддәс Китаб үзрә бир елми мәнбәјә әсасән Булусун истифадә етдији «тәсәлли» сөзү «ҹидди проблемләри олан инсанын јанында дајаныб она үрәк-дирәк вермәк» мәнасыны дашыјыр. Бизим тәсәллимиз сајәсиндә дәрди олан диндашымыз јенидән ајаға галхыб әбәди һәјата апаран јолда јеримәјә давам едә биләр. Һәр дәфә кәдәрли анларында диндашларымыза тәскинлик верәндә онлары севдијимизи ҝөстәририк (2 Кор. 7:6, 7, 13).

10. Шәфгәт һисси илә тәсәлли вермәк бир-бири илә неҹә бағлыдыр?

¹⁰ Шәфгәт һисси вә тәсәлли вермәк бир-бири илә бағлыдыр. Һансы мәнада? Шәфгәтли инсан башгаларына тәсәлли вермәјә сөвг олунур. Онларын ағры-аҹысыны диндирмәјә чалышыр. Демәли, биздә биринҹи шәфгәт һисси јараныр, бу исә бизи башгаларына тәсәлли вермәјә тәшвиг едир. Фикир верин, Булус Јеһованын шәфгәти илә инсанларын тәсәлли вермәси арасында һансы әлагәни јарадыр. О, Јеһованын «мәрһәмәтли Ата вә һәр ҹүр тәсәлли Аллаһы» олдуғуну дејир (2 Кор. 1:3). Булусун истифадә етдији «мәрһәмәт» сөзү башгаларына шәфгәт дујмаг мәнасыны дашыјыр. Демәли, Јеһова инсанлара ҝүҹлү шәфгәт һисси дујдуғу үчүн мәрһәмәтли Ата адланыр. «Ата» адланмасы Онун мәрһәмәтин Мәнбәји олдуғуну ҝөстәрир. Шәфгәт, мәрһәмәт һисси Јеһованы «һәр дәрдимиздә» бизә тәсәлли вермәјә тәшвиг едир (2 Кор. 1:4). Неҹә ки булагдан ахан сәрин су сусајан инсана тәравәт ҝәтирир, јанғысыны сөндүрүр, Јеһова да сынагларла үзләшәнләрә мәһз бу ҹүр тәравәт, тәсәлли верир. Бәс биз Јеһовадан өрнәк ҝөтүрүб неҹә шәфгәтли ола биләрик вә башгаларына неҹә тәсәлли верә биләрик? Бунун бир јолу өзүмүздә башгаларына тәсәлли вермәјә көмәк едәҹәк хүсусијјәтләр јетишдирмәкдир. Мәсәлән, һансы хүсусијјәтләр?

11. Колослулара 3:12 вә 1 Бутрус 3:8 ајәләринә әсасән башгаларыны севиб тәсәлли вермәк үчүн даһа һансы хүсусијјәтләри јетишдирмәлијик?

¹¹ Диндашларыныза һәр ҝүн мәһәббәт ҝөстәрмәјә вә «даима бир-биринизә тәсәлли» вермәјә сизә нә көмәк едәҹәк? Бунун үчүн бир-биринизин дәрдинә шәрик, гардашсевән вә хејирхаһ олмалысыныз. (Колослулара 3:12; 1 Бутрус 3:8 ајәләрини охујун.) Нәјә ҝөрә бу кејфијјәтләрә јијәләнмәк лазымдыр? Шәфгәт хүсусијјәти вә бунунла бағлы диҝәр хүсусијјәтләр сизин шәхсијјәтинизин бир һиссәсинә чевриләндә әзаб чәкән инсана тәсәлли вермәк дахилиниздән ҝәләҹәк. Исанын да дедији кими «инсан үрәјиндә ашыб-дашан фикирләри дилә ҝәтирир. Јахшы адам өзүнүн јахшы хәзинәсиндән јахшы шејләр чыхарыр» (Мәт. 12:34, 35). Бәли, дарда олан баҹы-гардашларымыза тәсәлли вермәк онлара севҝимизи ифадә етмәјин мүһүм јолларындан биридир.

ДИНДАШЛАРЫМЫЗА МӘҺӘББӘТИМИЗИ НЕҸӘ МӨҺКӘМ САХЛАЈА БИЛӘРИК?

12. а) Нәјә ҝөрә еһтијаты әлдән вермәмәлијик? б) Һансы суалы арашдыраҹағыг?

¹² Һамымыз истәјирик ки, һәмишә «бир-биримизи севәк» (1 Јәһ. 4:7). Амма Иса Мәсиһин бу ваҹиб хәбәрдарлығыны да унутмамалыјыг: «Әксәр инсанларда мәһәббәт сојујаҹаг» (Мәт. 24:12). Иса демирди ки, бу онун шаҝирдләринин чоху илә баш верәҹәк. Амма јенә дә биз еһтијатлы олмалыјыг. Мәһәббәтдән касад инсанларын бизи өзләринә охшатмағына имкан вермәмәлијик. Ортаја белә суал чыхыр: «Диндашларымыза севҝимизин ҝүҹлү олуб-олмадығыны неҹә јохламаг олар?»

13. Мәһәббәтимизин ҝүҹлү олдуғуну неҹә јохлаја биләрик?

¹³ Бунун үчүн мүәјјән вәзијјәтләрдә неҹә даврандығымыза фикир верә биләрик (2 Кор. 8:8). Бу вәзијјәтләрдән бирини Бутрусун сөзләриндән ҝөрмәк олар: «Һәр шејдән зијадә бир-биринизи һәрарәтлә севин, чүнки мәһәббәт чохлу ҝүнаһын үстүнү өртүр» (1 Бут. 4:8). Демәли, диндашымыз сәһв едәндә, јахуд да хәтримизә дәјәндә мәһәббәтимизин нә дәрәҹәдә ҝүҹлү олдуғуну јохламаг үчүн фүрсәт јараныр.

14. 1 Бутрус 4:8 ајәсинә әсасән мәһәббәтимиз неҹә олмалыдыр? Нүмунә чәкин.

¹⁴ Ҝәлин Бутрусун сөзләрини хырдалајаг. 8-ҹи ајәнин биринҹи һиссәсиндә дејилир ки, биз диндашларымызы һәрарәтлә севмәлијик. Бутрусун истифадә етдији «һәрарәт» сөзү һәрфән «дартмаг» мәнасыны дашыјыр. Ајәнин икинҹи һиссәсиндә исә һәрарәтли севҝинин бизи нәјә тәшвиг етдији вурғуланыр. Бу ҹүр севҝи баҹы-гардашларымызын ҝүнаһынын үстүнү өртүр. Ҝәлин белә бир нүмунәјә бахаг: Тәсәввүр един, бир парча ҝөтүрүб, үстүндә ләкәләр, чапыглар олан масаны өртмәјә чалышырсыныз. Бу заман гүсурлар там өртүләнә гәдәр парчаны кәнарларындан тутуб дартырсыныз. Беләҹә, бүтүн гүсурлары өртмүш олурсунуз. Ејнилә диндашларымызы һәрарәтлә севириксә, онларын бир-ики ҝүнаһынын јох, чохлу ҝүнаһынын үстүнү өртәҹәјик, башга сөзлә, онлары бағышлајаҹағыг.

15. Диндашларымыза бәсләдијимиз мөһкәм мәһәббәт бизә һансы саһәдә көмәк едәҹәк? (Колослулара 3:13).

¹⁵ Диндашларымыза севҝимиз о гәдәр ҝүҹлү олмалыдыр ки, һәтта бәзән чәтин олса да, онларын сәһвләрини бағышлаја биләк. (Колослулара 3:13 ајәсини охујун.) Биз бағышлајанда мәһәббәтимизин мөһкәм олдуғуну вә Јеһованы разы салмаг истәдијимизи ҝөстәририк. Бәс баҹы-гардашларымызын сәһвләринин үстүндән кечмәјә, бизи гыҹыгландыран ҹәһәтләринә ҝөз јуммаға даһа нә көмәк едә биләр?

16, 17. Баҹы-гардашларын хырда сәһвләринин үстүндән кечмәјә бизә даһа нә көмәк едә биләр? Нүмунә чәкин. (Һәмчинин шәклә бахын.)

¹⁶ Баҹы-гардашларын пис јох, јахшы ҹәһәтләрини ҝөрмәјә чалышын. Белә бир нүмунәјә бахаг: Тәсәввүр един ки, бир нечә баҹы-гардашла бирҝә гонаглыгдасыныз. Ҝөзәл ҝүнүн сонунда јығышыб шәкил чәкдирирсиниз. Ишдир, бирдән биринҹиси јахшы чыхмаз дејә һәр еһтимала ики дәнә дә шәкил чәкдирирсиниз. Сонра ҝөрүрсүнүз ки, шәклин бириндә бир гардаш гашгабаглы дүшүб. Јәгин, һәмин шәкли силәрсиниз, чүнки диҝәр ики шәкилдә гардаш да дахил олмагла һәр кәс ҝүлүмсәјир.

¹⁷ Бу шәкилләри хатирәләримизә бәнзәтмәк олар. Һәр биримизин баҹы-гардашларла хош хатирәләри вар. Амма ола билсин, һансыса бир вәзијјәтдә киминсә сөзү вә ја һәрәкәти бизә хош олмајыб. Бәлкә, бу вәзијјәти хатирә кими јаддашымызда сахламајыб һәмин шәкил кими силәк? (Мәс. 19:11; Ефес. 4:32). Диндашларымызын хырда сәһвләрини ағлымыздан тәрәддүд етмәдән силә биләрик, чүнки онларла бағлы јетәринҹә хош хатирәләримиз вар. Һамымыз мәһз бу ҹүр хатирәләри горујуб сахламаг истәјәрик.

СЕВҜИЈӘ ИНДИ ДАҺА ЧОХ ЕҺТИЈАҸ ВАР

18. Мәгаләдә мәһәббәтлә бағлы һансы әсас фикирләри арашдырдыг?

¹⁸ Демәли, нәјә ҝөрә бир-биримизи севмәлијик? Чүнки арашдырдығымыз кими диндашларымыза мәһәббәтимиз Јеһованы нә гәдәр севдијимизи ҝөстәрир. Һансы јолларла онлара мәһәббәтимизи ҝөстәрә биләрик? Бунун бир јолу онлара тәсәлли вермәкдир. Үрәјимиздә шәфгәт һисси олса, даима бир-биримизә тәсәлли верә биләҹәјик. Бәс диндашларымыза мәһәббәтимизи неҹә мөһкәм сахлаја биләрик? Чәтин олса да, онларын сәһвләрини бағышламагла.

19. Диндашларымыза мәһәббәт ҝөстәрмәк нәјә ҝөрә инди даһа ваҹибдир?

¹⁹ Нәјә ҝөрә диндашларымыза мәһәббәт ҝөстәрмәк инди даһа чох ваҹибдир? Ҝөрүн Бутрус нә дејиб: «Һәр шејин сону јахындыр. Буна ҝөрә дә... бир-биринизи һәрарәтлә севин» (1 Бут. 4:7, 8). Бу шәр дүнјанын сонуна даһа да јахынлашдыгҹа нәләр баш верәҹәк? Иса давамчылары барәдә пејғәмбәрлик етмишди: «Мәним адыма ҝөрә бүтүн халглар сизә нифрәт едәҹәк» (Мәт. 24:9). Бу ҹүр мүнасибәт гаршысында мөһкәм дајанмаг үчүн арамызда бирлик олмалыдыр, онда Шејтан нә гәдәр чалышса да, арамызда парчаланма јаратмаға мүвәффәг ола билмәјәҹәк. Чүнки мәһәббәт «камил бирлик јарадыр» (Кол. 3:14; Филип. 2:1, 2).