«Мәним ардымҹа ҝәл»
«Ким ардымҹа ҝәлмәк истәјирсә, гој өзүнү инкар етсин вә чармыхыны [«ишҝәнҹә дирәјини», ЈД] ҝөтүрүб Мәни изләсин» (ЛУКА 9:23).
1, 2. а) Иса инсанлары нәјә дәвәт етмишдир? б) Сән бу дәвәтә неҹә һај вермисән?
ХИДМӘТИНИН сонуна јахын Иса Перејада, Иордан чајынын о бири тајында, Јәһудејанын шимал-шәргиндә тәблиғ едирди. Бир ҹаван оғлан она јахынлашыб әбәди һәјаты алмаг үчүн нә етмәли олдуғуну сорушду. Иса онун Мусанын Ганунуна дәгиг әмәл етдијини ҝөрүб деди: «Ҝет нәјин варса сат, јохсуллара пајла. Ҝөјдә хәзинән олаҹагдыр. Сонра ҝәл... Мәним ардымҹа ҝет» (Марк 10:21). Бир тәсәввүр ет: Һагг-Тааланын ваһид Оғлунун — Исанын ардынҹа ҝетмәк дәвәтини алмаг нә демәкдир?!
2 Ҹаван оғлан бу дәвәтдән имтина етди, анҹаг ону гәбул едәнләр дә олду. Бир гәдәр әввәл Иса Филипә демишди: «Ардымҹа ҝәл» (Јәһ. 1:43). Филип дәвәти гәбул едиб, сонра да онун һәвариси олду. Иса Маттаны да ардынҹа ҝетмәјә дәвәт едәндә о да бу дәвәтә һај верди (Мат. 9:9; 10:2-4). Әслиндә Иса: «Ким ардымҹа ҝәлмәк истәјирсә, гој өзүнү инкар етсин вә чармыхыны [«ишҝәнҹә дирәјини», ЈД] ҝөтүрүб Мәни изләсин» дејәндә һәмин дәвәти салеһлији севәнләрин һамысына үнванламышды (Лука 9:23). Демәли, истәји олан һәр кәс Исанын давамчысы ола биләр. Бәс сәндә дә белә бир арзу вармы? Артыг әксәријјәтимиз Исанын бу сәмими дәвәтини гәбул етмишик вә тәблиғ заманы башгаларыны да онун ардынҹа ҝетмәјә дәвәт едирик.
3. Ахын бизи Исанын ардынҹа ҝетмәкдән ајырмасын дејә нә етмәлијик?
3 Әфсуслар олсун ки, һәгигәтә мараг ҝөстәрәнләрин бәзиләри Мүгәддәс Китабы өјрәнмәји дајандырырлар. Онлар һәгигәтә гаршы сојујур вә нәтиҹәдә ‘ахын’ онлары Исанын ардынҹа ҝетмәкдән ајырыр (Ибр. 2:1). Биз бу тәләдән неҹә гача биләрик? Нөвбәти суалларын үзәриндә дүшүнмәк фајдалы оларды: «Мән нә үчүн Исанын ардынҹа ҝетмәји гәрара алмышам? Онун ардынҹа ҝетмәк нә демәкдир?» Бу ики суала вердијимиз ҹавабы јадда сахласаг, сечдијимиз бу ҝөзәл јолда галмаг гәтијјәтимиз мөһкәмләнәҹәк. Бу, һәмчинин бизә көмәк едәҹәк ки, башгаларыны да Исанын ардынҹа ҝетмәјә тәшвиг едәк.
Нәјә ҝөрә Исанын ардынҹа ҝетмәлијик?
4, 5. Нәјә ҝөрә Иса Рәһбәр олмаға лајигдир?
4 Јеремја пејғәмбәр демишдир: «Ја Рәбб, билирәм ки, инсанын өмрү өз әлиндә дејил. Аддымларыны дүзәлтмәк ҝедән адамын иши дејил» (Јер. 10:23). Бәшәр тарихи Јеремјанын сөзләринин һәгигәт олдуғуну дөнә-дөнә тәсдиг етмишдир. Ҝетдикҹә ајдын олмушдур ки, гејри-камил инсанлар өз үзәрләриндә мүвәффәгијјәтлә рәһбәрлик едә билмирләр. Биз Исанын ардынҹа ҝетмәк дәвәтини гәбул етмишик, чүнки ондан башга һеч кимин Рәһбәримиз олмаға лајиг олмадығыны өјрәнмишик. Ҝәлин нәјә ҝөрә Исанын буна лајиг олдуғуну нәзәрдән кечирәк.
5 Биринҹиси, Исаны Мәсиһ вә Рәһбәр кими Јеһова Аллаһын Өзү сечиб. Мәҝәр бизим неҹә Рәһбәрә еһтијаҹымыз олдуғуну Јараданымыздан јахшы билән вармы? Икинҹиси, Иса валеһедиҹи вә тәглид едилмәјә лајиг кејфијјәтләрә маликдир. (Јешаја 11:2, 3 ајәләрини оху.) О, мүкәммәл нүмунәдир (1 Пет. 2:21). Үчүнҹүсү, Иса онун ардынҹа ҝәләнләрин нәвазишлә гајғысына галыр; о буну давамчылары уғрунда өз һәјатындан кечмәклә сүбут етди. (Јәһја 10:14, 15 ајәләрини оху.) Һәмчинин о бизи һал-һазырда хошбәхтлик ҝәтирән, ҝәләҹәкдә исә ишыглы әбәдијјәтә говушдуран һәјата апармагла гајғыкеш чобан олдуғуну ҝөстәрир (Јәһ. 10:10, 11; Вәһј 7:16, 17). Бу вә диҝәр сәбәбләри нәзәрә алсаг, Исанын ардынҹа ҝетмәк дәвәтини гәбул етмәјимиз мүдрик гәрардыр. Исанын ардынҹа ҝетмәк өзүнә нәји дахил едир?
6. Исанын ардынҹа ҝетмәк өзүнә нәји дахил едир?
6 Мәсиһин давамчысы олмаг садәҹә инсанын өзүнү мәсиһчи адландырмасындан даһа чох мәна кәсб едир. Дүнјада тәхминән ики милјард инсан өзүнү Мәсиһин давамчысы адландырыр, лакин онларын әмәлләри «һагсызлыг едәнләр» олдугларыны ашкара чыхарыр. (Матта 7:21-23 ајәләрини оху.) Инсанлар Исанын ардынҹа ҝетмәк дәвәтинә мараг ҝөстәрәндә биз онлара изаһ едирик ки, һәгиги мәсиһчиләр һәјат тәрзләрини бүтүнлүклә онун тәлимләринә вә нүмунәсинә ујғунлашдырырлар — онлар буну һәр ҝүн едирләр. Ҝәлин Иса һаггында билдијимиз бәзи шејләрин әсасында бунун әјани олараг нә демәк олдуғуна бахаг.
Исанын мүдриклијини тәглид ет
7, 8. а) Мүдриклик нәдир вә нәјә ҝөрә Иса чох мүдрик иди? б) Иса мүдриклији неҹә тәзаһүр етдирди вә биз ону неҹә тәглид едә биләрик?
7 Иса бир чох ҝөзәл кејфијјәтләр тәзаһүр етдирмишдир, лакин биз диггәтимизи онлардан дөрдүнә — онун мүдриклијинә, һәлимлијинә, сәјинә вә мәһәббәтинә ҹәмләшдирәҹәјик. Илк нөвбәдә, ҝәлин онун мүдриклијинә, јәни билик вә анлајышы тәтбиг етмәк баҹарығына нәзәр салаг. Һәвари Павел јазмышды: «Һикмәтин вә ирфанын [билијин] бүтүн хәзинәләри Мәсиһдә ҝизләдилмишдир» (Колос. 2:3). Исада белә мүдриклик һарадан иди? О өзү демишди: «Бунлары Атанын Мәнә өјрәтдији кими сөјләјирәм» (Јәһ. 8:28). Бу мүдриклији она Јеһова вермишди, буна ҝөрә дә Исанын сағлам дүшүнҹәли олмасы бизи тәәҹҹүбләндирмир.
8 Мәсәлән, Иса һәјат јолунун сечиминә мүдрикликлә јанашмышды. О, садә һәјат сүрмәји сечди, диггәтини бир мәгсәдә — Аллаһын ирадәсини јеринә јетирмәјә јөнәлтди. Мүдрик давранараг вахтыны вә ҝүҹүнү Падшаһлыг ишинин ирәлиләмәсинә һәср етди. Биз Исанын нүмунәсини ҝөзүмүзү «сағлам», јәни садә сахламаға чалышмагла изләјирик вә буна ҝөрә дә, чох ҝүҹ вә диггәт тәләб едән лазымсыз шејләрлә өзүмүзү јүкләмирик (Мат. 6:22). Бир чох мәсиһчиләр һәјатларыны садәләшдирмишләр, бунун сајәсиндә онларын инди даһа чох хидмәт етмәк имканлары вар. Бәзиләри пионер хидмәтинә башламаға мүвәффәг олмушлар. Әҝәр сән дә белә етмисәнсә, бу, чох тәрифәлајигдир. ‘Әввәлҹә Аллаһын Сәлтәнәтини ахтармаг’ бөјүк хошбәхтлик вә мәмнунлуг ҝәтирир (Мат. 6:33).
Иса кими һәлим ол
9, 10. Иса һәлим олдуғуну неҹә тәзаһүр етдирди?
9 Ҝәлин инди Исанын шәхсијјәтинин икинҹи ҹәһәтини — онун һәлимлијини нәзәрдән кечирәк. Гејри-камил инсанларын әлинә һакимијјәт кечәндә чох вахт өзләрини «бөјүк адам» санырлар. Иса неҹә дә фәргләнирди! Јеһованын нијјәтинин јеринә јетирилмәсиндә әсас ролу ојнаса да, онда зәррә гәдәр дә тәкәббүр јох иди. Биз онун һәлимлијини тәглид етмәјә тәшвиг олунуруг. Һәвари Павел јазыр: «Мәсиһ Исада олан фикир сизин аранызда да олсун. Аллаһ сурәтиндә олдуғу һалда О, Аллаһла бәрабәрлији, имтинасы мүмкүн олмајан бир һагг сајмады. Лакин Өзүнү һеч едәрәк Өзүнү гул сурәтинә салыб, инсанлара охшар олду» (Филип. 2:5-7). Бу нә демәк иди?
10 Иса ҝөјдә Атасынын јанында јашамаг шәрәфинә малик иди, лакин о, көнүллү олараг ‘Өзүнү һеч етди’. Исанын һәјаты бакирә јәһуди гызынын бәтнинә көчүрүлдү, доггуз ајдан сонра көмәксиз көрпә кими касыб дүлҝәр Јусифин аиләсиндә дүнјаја ҝәлди. О, тәдриҹән јеримәји, данышмағы өјрәнди, бөјүјүб јенијетмә оғлан олду. Ҝүнаһсыз олса да, бүтүн ҝәнҹлији боју гејри-камил валидејнләринин итаәтиндә галды (Лука 2:51, 52). Бәли, Исанын һәлимлији һәгигәтән дә һејрәтамиздир!
11. Биз Исанын һәлимлијини неҹә тәглид едә биләрик?
11 Биз шәрәфли ҝөрүнмәјән тапшырыглары һәвәслә јеринә јетирәндә Исанын һәлимлијини тәглид етмиш олуруг. Мисал үчүн хош хәбәри тәблиғ етмәк тапшырығыны ҝөтүрәк. Бу иш шәрәфли ҝөрүнмәјә биләр, хүсусилә дә тәблиғдә лагејдлик, ришхәнд вә ја әдавәтлә үзләшәндә. Анҹаг бунлара бахмајараг тәблиғ етмәјә давам едәндә инсанлара Исанын ардынҹа ҝетмәк дәвәтинә һај вермәјә көмәк едирик. Беләликлә дә, инсанлара һәјатларыны хилас етмәјә көмәк едирик. (2 Тимотејә 4:1-5 ајәләрини оху.) Һәлимлик ҝөстәрмәли олдуғумуз диҝәр саһә Падшаһлыг Залымызы тәмиз сахламагдыр. Бу өзүнә һәтта чиркли ҝөрүнән ишләри, мәсәлән, зибил габларыны бошалтмаг, дөшәмәни силмәк, туалетләри јығышдырмаг вә башга тапшырыглары јеринә јетирмәји дахил едә биләр. Биз анлајырыг ки, өз Падшаһлыг Залымызы — һәгиги ибадәт мәркәзини тәмиз сахламаг мүгәддәс хидмәтимизин бир һиссәсидир. Бу кими тапшырыглары ҹанла-башла јеринә јетирмәклә биз һәлимлик ҝөстәририк, бунунла да Мәсиһин изләри илә ҝедирик.
Иса кими сәј ҝөстәр
12, 13. а) Иса хидмәтдә неҹә сәј ҝөстәрирди вә ону буна нә тәшвиг едирди? б) Бизи хидмәтдә сәјли олмаға нә тәшвиг етмәлидир?
12 Ҝәлин ҝөрәк, Иса хидмәтдә неҹә сәј ҝөстәрирди. Јер үзүндә оланда о, чох ишләр ҝөрмүшдү. О, јенијетмәлик дөврүндә аталығы олан Јусифлә бирҝә ишләјәрәк дүлҝәрлик сәнәтинә јијәләнмишди. Хидмәти заманы Иса хәстәләрә шәфа верир, өлүләри һәјата гајтарыр вә башга мөҹүзәләр ҝөстәрирди. Анҹаг онун әсас иши хош хәбәри тәблиғ етмәк вә гулаг асмаг истәјән инсанлары өјрәтмәк иди (Мат. 4:23). Онун давамчылары олан бизләр дә һәмин иши етмәлијик. Бәс бу саһәдә Мәсиһин нүмунәсини неҹә изләјә биләрик? Исанын хидмәтә олан мүнасибәтини өзүмүздә инкишаф етдирмәклә.
13 Һәр шејдән әввәл, Исаны тәблиғ етмәјә вә өјрәтмәјә Аллаһа олан мәһәббәти тәшвиг едирди. Иса һәм дә өјрәтдији һәгигәтләри севирди. Өјрәтдији һәгигәтләр онун үчүн дәјәрли хәзинә иди вә о, бөјүк севинҹлә онлары инсанларла бөлүшүрдү. Аллаһын Кәламынын мүәллими олан бизләр дә һәгигәтә онун кими јанашырыг. Аллаһын Кәламындан өјрәндијин бәзи дәјәрли һәгигәтләр үзәриндә бир анлыға дүшүн! Биз али һөкмранлыға даир мүбаһисәли мәсәләсини вә онун неҹә һәлл олунаҹағыны билирик. Биз һәм дә өләнләрин вәзијјәти вә Аллаһын јени дүнјасында Падшаһлығын инсанларын үзәринә јағдыраҹағы хејир-дуалар һаггында ајдын тәсәввүрә маликик. Бунлары јениҹә, јахуд чохдан өјрәнмәјимиздән асылы олмајараг, онлар һеч вахт дәјәрдән дүшмүр. Көһнә вә ја јени олмасына бахмајараг, бу һәгигәтләр чох гијмәтли хәзинәдир. (Матта 13:52 ајәсини оху.) Шөвглә тәблиғ етмәклә Јеһованын бизә өјрәтдији һәгигәтә олан мәһәббәти башгаларына да ашылајырыг.
14. Исанын өјрәтмәк тәрзини неҹә тәглид едә биләрик?
14 Исанын неҹә өјрәтдијини нәзәрдән кечирәк. Иса динләјиҹиләринин диггәтини һәр заман Мүгәддәс Јазылара јөнәлдирди. О, чох вахт ваҹиб фикри вурғуламаздан әввәл «јазылмышдыр» дејирди (Мат. 4:4; 21:13). О, билаваситә вә ја долајысы илә Ибраниҹә Мүгәддәс Јазыларын јарысындан чохуна истинад етмишдир. Иса кими, биз дә һәмишә Мүгәддәс Китаб әсасында өјрәдирик вә хидмәтдә ондан мүмкүн гәдәр тез-тез истифадә етмәјә чалышырыг. Биз белә едәндә тәмизгәлбли инсанлар ҝөрүрләр ки, онлара өзүмүзүн дејил, Аллаһын фикирләрини сөјләјирик. Кимсә Мүгәддәс Китабдан ајәләр охумаға вә Аллаһын Кәламынын дәјәри вә мәнасы барәдә сөһбәт етмәјә разы оланда биз чох шад олуруг. Белә инсанлар Исанын ардынҹа ҝетмәк дәвәтини гәбул едәндә севинҹимизин һәдди-һүдуду олмур.
Исанын ардынҹа ҝетмәк башгаларыны севмәк демәкдир
15. Исанын ән ҝөзәл хүсусијјәти һансыдыр вә онун үзәриндә дүшүнмәк бизә неҹә тәсир едир?
15 Инди исә ҝәлин Исанын шәхсијјәтинин ән ҝөзәл ҹәһәтинә — инсанлара олан мәһәббәтинә нәзәр салаг. Һәвари Павел јазыр: «Мәсиһин мәһәббәти бизи мәҹбур едир» (2 Кор. 5:14). Исанын бүтүн бәшәријјәтә вә һәр биримизә бәсләдији мәһәббәти үзәриндә дүшүнәндә үрәјимиз риггәтә ҝәлир вә бизи онун нүмунәсини изләмәјә тәшвиг едир.
16, 17. Иса башгаларына олан мәһәббәтини неҹә тәзаһүр етдирирди?
16 Иса инсанлара мәһәббәтини неҹә ҝөстәрирди? Онун бәшәријјәт уғрунда ҹаныны вермәјә һазыр олмасы мәһәббәтинин ән јүксәк ифадәсидир (Јәһ. 15:13). Лакин хидмәти заманы Иса мәһәббәтини башга ҹүр дә ҝөстәрирди. Мәсәлән, Иса әзаб чәкәнләрин дәрдинә шәрик олурду. Лазара ҝөрә јас тутан Мәрјәмин вә ҹамаатын ҝөз јашларыны ҝөрәндә Иса чох кәдәрләнди. Бу она елә тәсир етди ки, Лазары дирилдәҹәјинә бахмајараг, ҝөз јашларыны сахлаја билмәјиб «ағлады» (Јәһ. 11:32-35).
17 Хидмәтинин әввәлиндә ҹүзама тутулмуш бир нәфәр онун јанына ҝәлиб деди: «Әҝәр истәсән, мәни саф едә биләрсән». Иса она неҹә ҹаваб верди? Нөвбәти ајәдә дејилир ки, Исанын «рәһми ҝәлди». Сонра о, гејри-ади бир шеј етди: «Әлини узадыб она тохунду вә деди: “Истәјирәм, саф ол!” Бу сөздән сонра ҹүзам дәрһал ону тәрк етди вә о, саф олду». Мусанын Ганунуна ҝөрә, ҹүзамлылар мурдар сајылырдылар вә әлбәттә, Иса ҹүзамлыја тохунмадан да ону сағалда биләрди. Лакин о, ҹүзамлыја тохунараг ону сағалтды. Ола билсин, илләр әрзиндә илк дәфә иди ки, она инсан әлинин дәјдијини һисс етди. Иса неҹә дә ҹаныјананлыг ҝөстәрди! (Марк 1:40-42).
18. «Башгаларынын дәрдләринә» неҹә шәрик ола биләрик?
18 Мәсиһин давамчылары олан бизләрдән дә «башгаларынын дәрдләринә шәрик» олмагла мәһәббәт тәзаһүр етдирмәк тәләб олунур (1 Пет. 3:8). Хроники хәстәликдән вә ја депрессијадан әзијјәт чәкән һәмиманлымызын һиссләрини баша дүшмәк асан олмаја биләр, хүсусилә дә әҝәр өзүмүз һеч вахт о ағрылары чәкмәмишиксә. Иса өзү һеч вахт хәстәләнмәсә дә, хәстәләрин һалына аҹыјырды. Бәс биз неҹә онун кими шәфгәтли ола биләрик? Ағрыјан инсан бизә үрәјини бошалданда, һиссләрини бизимлә бөлүшәндә она диггәтлә гулаг асмагла. Өзүндән соруш: «Онун јериндә олсајдым, өзүмү неҹә һисс едәрдим?» Башгаларынын һиссләринә гаршы диггәтли олсаг, «кәдәрли оланлары» даһа чох руһландыра биләрик (1 Сал. 5:14, ЈД). Белә етмәклә һәм дә Исанын изләри илә ҝетмиш олаҹағыг.
19. Исанын нүмунәси бизә неҹә тәсир едир?
19 Иса Мәсиһин сөзләриндән вә әмәлләриндән нә гәдәр мараглы шеј өјрәнирик! Онун һаггында нә гәдәр чох өјрәнириксә, бир о гәдәр дә һәм өзүмүз она охшамаг, һәм дә башгаларына бу саһәдә көмәк етмәк истәјирик (1 Пет. 2:21). Белә исә ҝәлин бөјүк севинҹлә инди вә әбәдијјән Падшаһымыз Мәсиһин ардынҹа ҝедәк!
Изаһ едә биләрсинизми?
• Иса кими биз дә мүдриклији неҹә тәзаһүр етдирә биләрик?
• Һәлимлији неҹә тәзаһүр етдирә биләрик?
• Хидмәтдә сәјимизи неҹә артыра биләрик?
• Инсанлара мәһәббәт ҝөстәрмәкдә Исаны неҹә тәглид едә биләрик?
[4-ҹү сәһифәдәки шәкил]
Иса јер үзүнә ҝәлмәјә вә көрпә кими доғулмаға разы олду. Бунун үчүн һансы кејфијјәт тәләб олунурду?
[6-ҹы сәһифәдәки шәкил]
Хидмәтдә сәјли олмаға бизи нә тәшвиг едир?
[5-ҹи сәһифәдәки чәрчивә]
Исаны тәглид етмәјә көмәк едән нәшр
2007-ҹи илин вилајәт конгресиндә «Мәним ардымҹа ҝәл» (рус.) адлы 192 сәһифәли китабын бурахылышы һаггында елан олунду. Бу нәшр мәсиһчиләрә диггәтләрини Исаја, хүсусилә дә онун кејфијјәтләринә вә фәалијјәтинә ҹәмләмәјә көмәк етмәк үчүн нәзәрдә тутулуб. Ики ҝириш фәсилдән сонра ҝәлән биринҹи һиссә Исанын ҝөзәл кејфијјәтләриндән — онун һәлимлији, ҹәсарәти, мүдриклији, итаәткарлығы вә тәһәммүлүндән бәһс едир.
Нөвбәти һиссәләрдә Исанын мүәллим вә хош хәбәрин тәблиғчиси кими фәалијјәти вә онун неҹә бөјүк мәһәббәт ҝөстәрмәси арашдырылыр. Китаб елә тәртиб едилиб ки, мәсиһчиләрә Исаны тәглид етмәјә көмәк етсин.
Әминик ки, бу нәшр өзүмүзү тәһлил етмәјә вә нөвбәти суалларын үзәриндә дүшүнмәјә тәшвиг едәҹәк: «Мән һәгигәтән дә Исанын ардынҹа ҝедирәмми? Ону даһа јахшы тәглид етмәк үчүн нә едә биләрәм?» Бу, һәмчинин ‘әбәди һәјата мејлли оланлара’ бизимлә бирҝә Исанын ардынҹа ҝетмәјә көмәк едәҹәк (Һәв. иш. 13:48, ЈД).