Вәфтиз олунмаг нәјә ҝөрә лазымдыр?

“Беләликлә, ҝедин, бүтүн халглары шаҝирдим един, онлары... вәфтиз един” (МАТТА 28:19).

1, 2. а) Бә’зи адамлар һансы вәзијјәтләрдә вәфтиз олунурдулар? б) Вәфтизә даир һансы суаллар јараныр?

ФРАНК дөвләтинин падшаһы Бөјүк Карл, ерамызын 775-777-ҹи илләриндә, табечилијиндә олан саксонијалылары күтләви шәкилдә вәфтиз олмаға мәҹбур етди. Тарихчи Ҹон Лорд шәрһ едир: “О, саксонијалылары зор ҝүҹүнә номинал христианлыға чевирди”. Буна бәнзәр бир шеј, ерамызын 987-ҹи илиндә, кнјаз Ы Владимир Бизанс шаһзадәсинә евләндикдән сонра, вәтәндашларынын һамысынын “христиан” олаҹагларыны гәрара алдығы заман Кијев Рус дөвләтиндә дә баш верди. Онун әмри илә, инсанлар күтләви шәкилдә вәфтизә мә’руз галырдылар, онлар табе олмадыгда исә, буну зорла едирдиләр!

² Бу тәрздә вәфтиз етмәк дүзҝүндүрмү? Бу ҹүр вәфтизин һәгигәтән дә фајдасы вармы? Фәрг гојмадан һамыны вәфтиз етмәк лазымдырмы?

Вәфтиз неҹә олмалыдыр?

3, 4. Чиләмә вә ја башына су төкмә јолу илә едилән вәфтиз мәсиһчиләрә нәјә ҝөрә мүнасиб дејил?

³ Бөјүк Карл вә I Владимир кими һөкмдарлар инсанлары вәфтиз олунмаға мәҹбур едәркән, онлар Аллаһын Кәламынын ҝөстәришләринә риајәт етмирдиләр. Лакин гејд етмәк лазымдыр ки, Мүгәддәс Китаб һәгигәтләрини билмәјән адамлары истәр чиләмә, истәр су төкмәк, истәрсә дә суја батырмаг јолу илә вәфтиз етмәк һеч бир мә’на дашымыр.

⁴ Ерамызын 29-ҹу илиндә Назаретли Иса вәфтизчи Јәһјанын јанына ҝәләндә баш верән һадисәни нәзәрдән кечирәк. Јәһја адамлары Иордан чајында вәфтиз едирди. Вәфтиз олунмаг үчүн адамлар онун јанына өз хошлары илә ҝәлирдиләр. Онлар Иордан чајына садәҹә олараг Јәһјанын онларын башына су төкмәси вә ја чајын сујуну онларын үзәринә чиләмәси үчүнмү ҝирирдиләр? Јәһја Исаны вәфтиз едәндә нә баш верди? Матта јазыр ки, “Иса вәфтиз олунуб, о анда судан чыхды” (Матта 3:16). Иса Иордан чајына батырылмаг үчүн суја ҝирди. Һәбәшистанлы мө’мин хәдим дә ејни тәрздә вәфтиз олунду. Һовузларын олмасы ваҹиб иди, чүнки Иса вә шаҝирдләри суја бүтүнлүклә батырылмагла вәфтиз олунмушлар (Һәвариләрин ишләри 8:36).

5. Илк мәсиһчиләр неҹә вәфтиз олунурдулар?

⁵ “Вәфтиз етмәк”, “вәфтиз” вә буна бәнзәр формада тәрҹүмә олунмуш јунан сөзләри суја батырмаг мә’насыны дашыјыр. “Смитин Мүгәддәс Китаб лүғәти”ндә гејд едилир: “Маһијјәтҹә “вәфтиз” сөзүнүн һәрфи тәрҹүмәси “батырмаг” мә’насыны дашыјыр”. Мүгәддәс Китабын бә’зи тәрҹүмәләриндә Јәһја һәтта “суја батыран” адланыр. Август Неандер, “Христианлығын илк үч әср әрзиндәки тарихи”нә даир әсәриндә јазырды: “Әввәлләр вәфтиз суја батырылма јолу илә едилирди” (“History of the Christian Religion and Church, During the Three First Centuries”). Танынмыш бир франсыз әсәриндә дејилир: “Илк мәсиһчиләр, су олан һәр јердә суја батырылма јолу илә вәфтиз олунурдулар” (Larousse du XX^e Siècle, Paris, 1928-ҹи ил). “Јени католик енсиклопедијасы”нда исә јазылыр: “Еһтимал ки, илк килсәдә вәфтиз суја батырылма јолу илә едилирди” (“New Catholic Encyclopedia”, 1967-ҹи ил, II ҹилд, 56-ҹы сәһифә). Буна ҝөрә дә бу ҝүн Јеһованын Шаһидләри өз ирадәләри илә бүтүнлүклә суја батырылмаг јолу илә вәфтиз олунурлар.

Вәфтизин јени мә’насы

6, 7. а) Јәһјанын етдији вәфтиз һансы мә’наны дашыјырды? б) Исанын давамчыларынын етдикләри вәфтиздә олан јенилик нә иди?

⁶ Јәһјанын етдији вәфтиз, Исанын давамчыларынын етдији вәфтиздән мә’на е’тибары илә фәргләнирди (Јәһја 4:1, 2). Јәһја халгы, Гануна гаршы ҝүнаһларындан төвбә әламәти олараг вәфтиз едирдиa (Лука 3:3). Лакин Исанын давамчыларынын етдикләри вәфтиз, башга шеји нәзәрдә тутурду. Б. е. 33-ҹү илиндә, Пентикост бајрамы ҝүнү һәвари Петер ҹамааты тәшвиг едирди: “Ҝүнаһларынызын бағышланмасы үчүн төвбә един вә һәр бириниз Иса Мәсиһин ады илә вәфтиз олсун” (Һәвариләрин ишләри 2:37-41). Петер јәһудиләрә вә прозелитләрә мүраҹиәт етсә дә, вәфтиз һаггында Гануна гаршы ҝүнаһлардан төвбә әламәти кими данышмырды. О, һәмчинин Исанын исми наминә едилән вәфтизин ҝүнаһлардан азад едәҹәјини нәзәрдә тутмурду (Һәвариләрин ишләри 2:10).

⁷ О заман Петер “ҝөјләр Падшаһлығынын” биринҹи ачарындан истифадә етди. Нә үчүн? Динләјиҹиләринин ҝөјләр Падшаһлығына ҝирмәк имканлары һаггында билмәләри үчүн (Матта 16:19, И-93). Јәһудиләр Исаны Хиласкар санмадыгларына ҝөрә, Аллаһын лүтфүнү газанмаг үчүн төвбә етмәли вә Аллаһын Оғлуна иман ҝәтирмәли идиләр - бу јени вә ән ваҹиб тәләб иди. Оғула иман ҝәтирдикләрини, Иса Мәсиһин исми наминә вәфтиз олунмагла ҝөстәрирдиләр. Буну етмәклә, Аллаһа шәхси һәср олунмаларыны Мәсиһин васитәсилә символлашдырырдылар. Бу ҝүн Аллаһын лүтфүнү әлдә етмәк истәјәнләрин һамысы бу ҹүр иман тәзаһүр етдирмәли, өзләрини Јеһова Аллаһа һәср етмәли вә Һагг-Тәала Аллаһа бүтүнлүклә һәср олунмаларыны мәсиһчи вәфтизи илә символлашдырмалыдырлар.

Дәгиг билик зәруридир

8. Нәјә ҝөрә мәсиһчиләр уҹдантутма һамыны вәфтиз етмирләр?

⁸ Мәсиһчиләр уҹдантутма һамыны вәфтиз етмирләр. Иса давамчыларына тапшырды: “Ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин” (Матта 28:19, 20). Инсанлары вәфтиз етмәздән әввәл, Исанын өз давамчыларына әмр етдији “һәр шејә риајәт етмәји онлара” өјрәтмәк лазымдыр. Буна ҝөрә дә, Аллаһын Кәламынын дәгиг билијинә әсасланан имана малик олмајан кәсләри мәҹбурән вәфтиз етмәк фајдасыздыр вә Исанын һәгиги давамчыларына вердији тапшырыға зиддир (Ибраниләрә 11:6).

9. “Ата... наминә вәфтиз” олунмаг нә демәкдир?

⁹ “Ата... наминә вәфтиз” олунмаг нә демәкдир? Бу, сәмави Атамызын мөвгејини вә һөкмранлығыны гәбул етмәк демәкдир. Демәли, вәфтиз олунан кәс Јеһова Аллаһы өз Јараданы, “бүтүн дүнја үзәриндә” Һагг-Тәала вә Каинатын Һөкмдары һесаб едир (Мәзмур 83:18; Ишаја 40:28; Һәвариләрин ишләри 4:24).

10. “Оғул... наминә вәфтиз” олунмаг нә демәкдир?

¹⁰ “Оғул... наминә вәфтиз” олунмаг, Исанын мөвгејини вә Аллаһын јеҝанә Оғлу кими сәлаһијјәтини гәбул етмәк демәкдир (1 Јәһја 4:9). Вәфтиз олунанлар Исаны, Јеһова тәрәфиндән тәгдим олунан “чохлары үчүн... фидијә” һесаб едирләр (Матта 20:28; 1 Тимотејә 2:5, 6). Һәмин инсанлар ону да хатырламалыдырлар ки, “Аллаһ Ону чох уҹалт”мышдыр (Филипилиләрә 2:8-11; Вәһј 19:16).

11. “Мүгәддәс Руһ наминә вәфтиз” олунмаг нә демәкдир?

¹¹ Бәс “Мүгәддәс Руһ наминә вәфтиз” олунмаг нә демәкдир? Бу ону ҝөстәрир ки, вәфтиз олунанлар мүгәддәс руһу, Јеһованын өз ирадәси илә бағлы мүхтәлиф тәрздә истифадә етдији фәал гүввәси кими гәбул едирләр (Тәквин 1:2; 2 Самуел 23:1, 2; 2 Петер 1:21). Онлар дәрк едирләр ки, мүгәддәс руһ онлара “Аллаһын дәрин дүшүнҹәләрини” анламаға, Падшаһлыг һаггындакы тәблиғ ишини һәјата кечирмәјә вә руһун “мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг” кими сәмәрәсини тәзаһүр етдирмәјә көмәк едир (1 Коринфлиләрә 2:10; Галатијалылара 5:22, 23; Јоел 2:28, 29).

Төвбә етмәјин вә дөнмәјин ваҹиблији

12. Вәфтиз төвбә илә неҹә бағлыдыр?

¹² Ҝүнаһсыз инсан олан Исаны истисна етмәк шәртилә, вәфтиз, һәср едилмәнин Аллаһ тәрәфиндән бәјәнилән рәмзи кими төвбә етмәклә сых бағлыдыр. Төвбә заманы, етдијимиз вә ја етмәдијимиз бүтүн ишләр үчүн тәәссүфләнирик. Биринҹи әсрдә Аллаһы разы салмаг истәјән јәһудиләрә, Мәсиһә гаршы ҝүнаһларындан төвбә етмәк ваҹиб иди (Һәвариләрин ишләри 3:11-19). Коринфдә јашајан гејри-јәһудиләр арасындакы иманлыларын бә’зиләри әхлагсызлыгдан, бүтпәрәстликдән, оғурлуг вә башга ҹидди ҝүнаһлардан төвбә етдиләр. Бунун сајәсиндә онлар Мәсиһин ганы илә “тәмизләндиләр”, Аллаһа хидмәт үчүн “тәгдис” олундулар, јә’ни ајрылдылар, һәмчинин Мәсиһин ады наминә вә Аллаһын руһу илә “бәраәт” газандылар (1 Коринфлиләрә 6:9-11). Төвбә етмәк - Аллаһын бизә тәмиз виҹдан вермәси вә вахтилә ишләтдијимиз ҝүнаһлара ҝөрә кечирдијимиз тагсыркарлыг һиссини үзәримиздән ҝөтүрмәси үчүн атылан ваҹиб аддымдыр (1 Петер 3:21).

13. Вәфтиздән габаг олан дөнмә нәји нәзәрдә тутур?

¹³ Һәр бир кәс Јеһованын Шаһиди кими вәфтиз олунмаздан әввәл дөнмәлидир. Дөнмә - Иса Мәсиһин ардынҹа ҝетмәк гәрарыны үрәкдән гәбул едән кәсләр тәрәфиндән атылан көнүллү аддымдыр. Һәмин кәсләр әввәлки һәјат тәрзиндән әл чәкиб, Аллаһа мәгбул оланы етмәк гәрарына ҝәлирләр. Мүгәддәс Јазыларда дөнмә сөзүнә аид едилән ибрани вә јунан фе’лләри “чеврилмә” мә’насыны дашыјыр. Сөһбәт, Аллаһа тәрәф дөнмәкдән, јанлыш јолдан имтина етмәкдән ҝедир (1 Краллар 8:33, 34). Дөнмә, “төвбәјә лајиг” ишләрлә мүшајиәт едилмәлидир (Һәвариләрин ишләри 26:20). Бу исә тәләб едир ки, биз јалан дини тәрк едәк, Аллаһын әмрләрини тутаг вә Јеһоваја һәдсиз сәдагәт тәзаһүр етдирәк (Тәснијә 30:2, 8-10; 1 Самуел 7:3). Дөнмә инсанын нөгтеји-нәзәриндә, мәгсәдләриндә вә хасијјәтиндә дәјишикликләрә ҝәтириб чыхарыр (Һезекиел 18:31). Биз дөнәндә, хасијјәтимизин пис ҹизҝиләри јени шәхсијјәтин ҹизҝиләри илә әвәз олунур (Һәвариләрин ишләри 3:19; Ефеслиләрә 4:20-24; Колослулара 3:5-14).

Сәмими гәлбдән һәср олунманын мә’насы

14. Исанын давамчылары үчүн, өзүнү Аллаһа һәср етмәк һансы мә’наны дашыјыр?

¹⁴ Исанын давамчылары вәфтиз олунмаздан әввәл, өзләрини сәмими гәлбдән Аллаһа һәср етмәлидирләр. Һәср олунма, мүгәддәс мәгсәд үчүн ајрылмаг мә’насыны дашыјыр. Бу, чох ваҹиб аддымдыр: дуада Јеһоваја, Она әбәдијјән сонсуз сәдагәт ҝөстәрмәк гәрарымыз һаггында сөјләмәлијик (Тәснијә 5:9). Биз өзүмүзү һәр һансы ишә вә ја адама дејил, Аллаһа һәср едирик.

15. Һәср олунанлар, нәјә ҝөрә суја батырылараг вәфтиз олунурлар?

¹⁵ Мәсиһ васитәсилә Аллаһа һәср олунаркән, һәјатымызы, Онун Мүгәддәс Јазыларда ҝөстәрилән ирадәсини јеринә јетирмәк үчүн истифадә етмәк гәтијјәтимизи изһар едирик. Суја батырылма бу ҹүр һәср олунманын символудур. Иса Иордан чајында мәһз бу ҹүр вәфтиз олунараг, өзүнү Аллаһа тәгдим етдијини ҝөстәрди (Матта 3:13). Бу ваҹиб һадисә заманы Исанын дуа етмәси дә диггәтә лајигдир (Лука 3:21, 22).

16. Башгалары вәфтиз олунан заман өз севинҹимизи мүнасиб тәрздә неҹә ифадә едә биләрик?

¹⁶ Исанын вәфтиз олунмасы ҹидди, ејни заманда севинҹли һадисә иди. Бизим ҝүнләрдә мәсиһчиләрин вәфтиз олунмалары илә дә вәзијјәт ејнидир. Башгалары Аллаһа һәср олунмаларыны вәфтизлә символлашдырдыгда, севинҹимизи еһтиралмлы алгышларла вә сәмими тәбрикләрлә ифадә едә биләрик. Бу һадисәнин мүгәддәслијини нәзәрә алараг, ҝурултулу алгышлардан, фит чалмагдан вә буна бәнзәр һәрәкәтләрдән гачынмалыјыг. Севинҹимизи лајигли тәрздә ифадә етмәлијик.

17, 18. Инсанын вәфтиз олунмасына јол вериб-вермәмәји мүәјјән етмәкдә нә көмәк едә биләр?

¹⁷ Көрпәләри вәфтиз едән вә ја Мүгәддәс Китабла таныш олмајан халг күтләсини вәфтиз олмаға мәҹбур едәнләрдән фәргли олараг, Јеһованын Шаһидләри һеч кими һеч заман вәфтиз олунмағамәҹбур етмирләр. Бундан әлавә онлар, Мүгәддәс Китаб тәләбләринә мүвафиг олмајан кәсләри вәфтиз етмирләр. Ким исә вәфтиз олунмамыш тәблиғчи оланадәк, мәсиһчи јығынҹағынын ағсаггаллары әмин олурлар ки, һәмин кәс Мүгәддәс Китабын әсас тә’лимләрини анлајыр, бу тә’лимләрә мүвафиг һәјат сүрүр вә “һәгигәтәнми Јеһованын Шаһиди олмаг истәјирсән?” суалына гәтијјәтлә ҹаваб верир.

¹⁸ Падшаһлыг һаггындакы тәблиғ ишиндә артыг фәал иштирак едән кәс вәфтиз олунмаг арзусуну билдирәндә, чох вахт ағсаггаллар, онун имана малик олдуғуну, өзүнү Јеһоваја һәср етдијини вә вәфтиз олунмаг үчүн Аллаһын тәләбләринә мүвафиг олдуғуну өјрәнмәк мәгсәди илә, онунла сөһбәт едирләр (Һәвариләрин ишләри 4:4; 18:8). Инсанын, Мүгәддәс Китаб тә’лимләри әсасында верилән 100-дән артыг суала шәхси ҹаваблары, онун вәфтиз олунмаг үчүн һазыр олуб-олмадығыны мүәјјән етмәкдә ағсаггаллара көмәк едир. Бә’зиләринин бу тәләбләрә ҹаваб вермәдикләри үчүн, вәфтиз олунмаларына јол верилмир.

Сизә нә исә мане олурму?

19. Јәһја 6:44 ајәсини нәзәрә алсаг, Исанын һәмварисләри кимләр олаҹаг?

¹⁹ Күтләви вәфтизә мә’руз галанлардан чохларына, јәгин вә’д етмишләр ки, өләндән сонра онлар ҝөјә галхаҹаглар. Лакин Иса јахын давамчыларыны нәзәрдә тутараг, деди: “Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз” (Јәһја 6:44). Јеһова Исаја, сәмави Падшаһлыгда онунла һәмварисләр олаҹаг 144 000 адам ҹәлб етмишдир. Мәҹбури вәфтиз инсаны Аллаһын гурулушунда бу ҹүр шәрәфли јер тутмаг үчүн тәгдис едә билмәз (Ромалылара 8:14-17; 2 Салониклиләрә 2:13; Вәһј 14:1).

20. Һәлә вәфтиз олунмајан бә’зи кәсләрә нә көмәк едә биләр?

²⁰ Әсасән дә ХХ әсрин 30-ҹу илләриндән Мәсиһин “башга гојунларына”, “бөјүк мәшәггәтдән” сағ чыхмаға вә јер үзүндә әбәдијјән јашамаға үмид едән даһа чох инсанлар гошулмаға давам едир (Јәһја 10:16; Вәһј 7:9, 14). Онлар вәфтиз үчүн олан тәләбләрә мүвафигдирләр, чүнки һәјатларыны Аллаһын Кәламы илә ујғунлашдырмышлар вә Јеһованы бүтүн үрәкләри, ҹанлары, гүввәләри вә дүшүнҹәләри илә севирләр (Лука 10:25-28). Бә’зиләри Јеһованын Шаһидләринин “Атаја руһән вә һәгигәтән ибадәт” етдикләрини анласалар да, вәфтиз олунараг Јеһоваја дәрин мәһәббәтләрини вә һәдсиз сәдагәтләрини ачыг шәкилдә билдирмәкдә Исанын нүмунәсини тәглид етмәмишләр (Јәһја 4:23, 24; Тәснијә 4:24; Марк 1:9-11). Бу ваҹиб аддым үчүн едилән сәмими вә конкрет дуа, онлара һәјат тәрзләрини Аллаһын Кәламы илә ујғунлашдырмаға ҹәсарәт верәр вә өзләрини бүтүнлүклә Јеһоваја һәср етмәјә тәшвиг едәр.

21, 22. Бә’зиләри һансы сәбәбләрә ҝөрә һәср вә вәфтиз олунмурлар?

²¹ Бә’зиләринин бүтүнлүклә дүнјәви ишә вә вар-дөвләт јығмаға ҹәлб олундуглары үчүн руһани ишләрә аз вахтлары галыр вә буна ҝөрә дә һәср вә вәфтиз олунмағы јубандырырлар (Матта 13:22; 1 Јәһја 2:15-17). Онлар өз нөгтеји-нәзәрләрини вә мәгсәдләрини дәјишсәјдиләр нә гәдәр хошбәхт олардылар! Јеһоваја јахынлашараг руһән варланар, аз нараһат олар вә Аллаһын ирадәсини јеринә јетирмәкдән раһатлыг вә мәмнунлуг дујардылар (Мәзмур 16:11; 40:8; Сүлејманын мәсәлләри 10:22; Филипилиләрә 4:6, 7).

²² Башгалары Јеһованы севдикләрини сөјләјир, анҹаг өзләрини Она һәср етмир вә вәфтиз олунмурлар, бунунла да мәс’улијјәтдән гачаҹагларыны дүшүнүрләр. Лакин бизләрдән һәр биримиз Аллаһа һесабат вермәли олаҹағыг. Биз Јеһованын сөзүнү ешидәркән артыг Онун гаршысында ҹавабдеһ олуруг (Һезекиел 33:7-9; Ромалылара 14:12). Сечилмиш милләт олараг, гәдим исраиллиләр доғулдуглары ҝүндән Јеһоваја һәср олунмуш халга мәхсус идиләр, буна ҝөрә дә ганунлары әсасында Она сәдагәтлә хидмәт етмәјә борҹлу идиләр (Тәснијә 7:6, 11). Бу ҝүн һеч ким белә халга мәхсус дејил, лакин әҝәр биз Мүгәддәс Китабдан дәгиг билик әлдә етмишиксә, она мүвафиг олараг иманла һәрәкәт етмәлијик.

23, 24. Һансы горху һиссләри вәфтиз олунмағымыза мане олмалы дејил?

²³ Биликләринин аз олдуғундан еһтијат едәрәк вәфтиз олунмајанлар да вар. Ахы “инсан Аллаһын етдији иши башдан сона гәдәр тапыб чыхара” билмәдији үчүн, һамымызын даһа чох өјрәнмәјә еһтијаҹымыз вар (Ваиз 3:11). Һәбәшистанлы хәдимин нүмунәсинә бахаг. Прозелит олараг, Мүгәддәс Китабдан бә’зи биликләрә саһиб иди, амма Аллаһын нијјәтинә даир бүтүн суаллара ҹаваб верә билмирди. Аллаһын, Иса Мәсиһин васитәсилә тәгдим етдији хилас үсулу барәдә билән кими, хәдим суда вәфтиз олунду (Һәвариләрин ишләри 8:26-38).

²⁴ Башгалары Јеһоваја һәср олунмаға јубанырлар, чүнки Она садиг гала билмәјәҹәкләринә еһтијат едирләр. 17 јашлы Моник дејир: “Һәср олунмама мүвафиг јашаја билмәјәҹәјимә даир горху, вәфтиз олунмағыма мане олурду”. Амма Јеһоваја бүтүн үрәјимизлә ҝүвәнириксә, О, јолларымызы доғрулдар. О, бизә “һәгигәтдә” јеримәјә вә Она һәср олунмуш хидмәтчиләр олараг сәдагәтли галмаға көмәк едәр (Сүлејманын мәсәлләри 3:5, 6; 3 Јәһја 4, И-93).

25. Һансы суал нәзәрдән кечирилмәјә лајигдир?

²⁵ Јеһоваја бәсләдикләри там е’тибар вә дәрин мәһәббәт һисси илә тәшвиг олунараг, һәр ил минләрлә инсанлар өзләрини Аллаһа һәср едир вә вәфтиз олунурлар. Сөзсүз ки, Она һәср олунан хидмәтчиләрин һамысы садиг галмаға чалышырлар. Лакин биз чәтин анларда јашајыр вә иманын мүхтәлиф сынаглары илә гаршылашырыг (2 Тимотејә 3:1-5). Јеһоваја һәср олунмағымызла әлагәдар јашамаға бизә нә көмәк едә биләр? Буна нөвбәти мәгаләдә бахаҹағыг.

[Һашијә]

Хатырлајырсынызмы?

• Мәсиһчиләр неҹә вәфтиз олунурлар?

• Вәфтизә гәдәр һансы биликләри әлдә етмәк лазымдыр?

• Мәсиһчиләр вәфтиз олунмаздан әввәл һансы аддымлары атмалыдырлар?

• Бә’зиләринин вәфтиз олунмасына мане олан нәдир вә онлара неҹә көмәк етмәк олар?

[20-ҹи сәһифәдәки шәкилләр]

“Ата, Оғул вә Мүгәддәс Руһ наминә вәфтиз” олунмағын мә’насыны билирсинизми?