Әбәди һәјата наил олмаг үчүн нәләрдән кечмәјә һазырсан?
«Инсан өз ҹаны әвәзинә нә верә биләр?» (МАТ. 16:26).
1. Нәјә ҝөрә Иса Петерин сөзләринә кәскин реаксија верди?
ҺӘВАРИ Петер ешитдикләринә инана билмәди. Онун севимли Мүәллими Иса Мәсиһ ‘ачыг сөјләди’ ки, тезликлә әзаб чәкәҹәк вә өләҹәк. Шүбһәсиз ки, Петер јахшы нијјәтдән ирәли ҝәләрәк деди: «Ја Рәбб, Өзүнә јазығын ҝәлсин! Бу әсла Сәнин башына ҝәлмәјәҹәк!» Иса дөнүб диҝәр шаҝирдләринә бахды. Ола билсин, онлар да бу сәһв фикрә шәрик идиләр. Сонра Иса Петерә деди: «Рәдд ол Мәндән, шејтан! Чүнки сәнин фикирләрин Аллаһын дејил, инсанын фикирләридир» (Марк 8:32, 33; Мат. 16:21-23).
2. Иса әсл шаҝирдләрдән нә ҝөзләнилдијини неҹә ҝөстәрди?
2 Еһтимал ки, Исанын сонракы сөзләри онун нәјә ҝөрә белә кәскин реаксија вермәсини Петерә анламаға көмәк етди. Иса «ҹамааты вә Өз шаҝирдләрини јанына чағырыб» деди: «Ким ардымҹа ҝетмәк истәјирсә, өзүнү инкар етсин вә чармыхыны ҝөтүрүб, ардымҹа Мәни изләсин. Чүнки ким ҹаныны хилас етмәк истәсә, ону итирәҹәк; амма ким ҹаныны Мәним намимә вә Мүждә уғрунда итирсә, ону гуртараҹагдыр» (Марк 8:34, 35). Ајдындыр ки, о өз һәјатыны гурбан вермәклә јанашы, онун ардынҹа ҝедәнләрдән дә Аллаһа хидмәт уғрунда һәјатларыны гурбан вермәјә һазыр олмаларыны ҝөзләјирди. Онлар белә едәрдиләрсә, бол мүкафат алардылар. (Матта 16:27 ајәсини оху.)
3. а) Иса динләјиҹиләринә һансы суаллары верди? б) Исанын икинҹи суалы динләјиҹиләринә нәји хатырлада биләрди?
3 Һәмин вахт Иса ики чох мараглы суал галдырды: «Инсан бүтүн дүнјаја јијәләниб өз ҹаныны итирәрсә, она нә фајда олар?» вә «Инсан өз ҹаны әвәзинә нә верә биләр?» (Марк 8:36, 37). Инсан нөгтеји-нәзәрилә биринҹи суалын ҹавабы ајдындыр. Әҝәр инсан өз һәјатыны итирәрсә, бүтүн дүнјаја јијәләнмәсинин һеч бир фајдасы олмаз. Инсанын әмлакынын јалныз онун сағлығында фајдасы олур. Исанын: «Инсан өз ҹаны әвәзинә нә верә биләр?» — дедији икинҹи суалы онун динләјиҹиләринә, ола билсин, Әјјубун ҝүнләриндә Шејтанын ирәли сүрдүјү иддианы хатырладырды: «Инсан ҹанына ҝөрә һәр шејини верәр» (Әјј. 2:4). Јеһоваја ибадәт етмәјән бәзи инсанлар Шејтанын сөзләринин дүз олдуғуну фикирләшә биләр. Бир чохлары өз һәјатларыны итирмәмәк үчүн һәр шејдән кечмәјә, истәнилән принсипләри тапдаламаға һазырдырлар. Мәсиһчиләр исә тамамилә башга ҹүр фикирләширләр.
4. Нәјә ҝөрә Исанын суаллары мәсиһчиләр үчүн дәрин мәна дашыјыр?
4 Биз билирик ки, Исанын јер үзүнә ҝәлмәсинин сәбәби бизә бу системдә сағламлыг, вар-дөвләт вә узун өмүр вермәк дејилди. Онун ҝәлишинин мәгсәди бизә јени дүнјада әбәди јашамаға јол ачмаг иди вә биз мәһз бу үмиди јүксәк гијмәтләндиририк (Јәһ. 3:16). Мәсиһчиләр үчүн Исанын биринҹи суалынын мәнасы ајдындыр: «Инсан бүтүн дүнјаја јијәләниб өз ҹаныны итирәрсә, она нә фајда олар?» Ҹаваб: һеч бир фајда (1 Јәһ. 2:15-17). Онун икинҹи суалына ҹаваб тапмаг үчүн јахшы оларды ки, өзүмүздән сорушаг: јени дүнјада әбәди һәјата наил олмаг үчүн нә гәдәр гурбан вермәјә һазырам? Тутдуғумуз һәјат јолунун ҝөстәрдији кими, бу суала ҹавабымыз, бу үмидин үрәјимиздә нә гәдәр мөһкәм олдуғуну ашкара чыхарыр. (Јәһја 12:25 ајәси илә мүгајисә ет.)
5. Әбәди һәјат әнамыны неҹә ала биләрик?
5 Тәбии ки, Иса әбәди һәјаты газанмағын мүмкүн олдуғуну демирди. Һәјат, һәтта бу системдәки гыса һәјатымыз белә әнамдыр. Биз һәјаты нә пул илә ала, нә дә она лајиг ола биләрик. Әбәди һәјат әнамыны ала билмәјимизин јеҝанә јолу «Мәсиһ Исаја» вә ‘Ону ахтаранлара мүкафат верән’ Јеһоваја ‘иман етмәкдир’ (Галат. 2:16; Ибр. 11:6). Амма иманымызы әмәлләрдә ҝөстәрмәлијик, чүнки «иман... әмәлләр олмадыгда өлүдүр» (Јаг. 2:26). Беләликлә, Исанын суалы үзәриндә дүшүнәндә јахшы оларды ки, индики системдә нәләри гурбан вермәјә вә иманымызын һәгигәтән дә ҹанлы олдуғуну ҝөстәрмәк үчүн Јеһоваја хидмәтдә нәләр етмәјә һазыр олдуғумузу да нәзәрдән кечирәк.
«Мәсиһ... Өз гајғысына галмамышды»
6. Иса нәји үстүн тутурду?
6 Иса јер үзүндә јашајаркән диггәтини дүнјанын тәклиф етдијинә јох, ваҹиб олан шејләрә ҹәмләди вә мадди шејләри әлдә етмәк кими ширникдириҹи тәклифләрдән имтина етди. О, фәдакар һәјат сүрүр вә Аллаһа итаәткар иди. Өз гајғысына галмаг әвәзинә, Аллаһын ‘хошуна ҝәлән ишләри ҝөрүрдү’ (Јәһ. 8:29). Аллаһы разы салмаг үчүн Иса даһа нәләр етмәјә һазыр иди?
7, 8. а) Иса һансы гурбанлары верди вә неҹә мүкафатландырылды? б) Биз өзүмүздән нә сорушмалыјыг?
7 Бир дәфә Иса өз шаҝирдләринә деди: «Инсан Оғлу Она хидмәт едилмәк үчүн дејил, хидмәт етмәјә вә бир чохлары үчүн ҹаныны фидијә олараг вермәјә ҝәлмишдир» (Мат. 20:28). Бундан әввәл Иса шаҝирдләрини хәбәрдар едәндә ки, тезликлә ‘ҹаныны вермәли’ олаҹаг, Петер она: «Өзүнә јазығын ҝәлсин» — демишди. Амма Иса тәрәддүд етмәди. О, ҹаныны, камил инсан һәјатыны көнүллү олараг бәшәријјәт үчүн верди. Онун фәдакарлығы тәһлүкәсиз ҝәләҹәјинә зәманәт верирди. О дирилдилди вә ‘Аллаһын сағ әли илә јүксәлдилди’ (Һәв. иш. 2:32, 33). Буна ҝөрә дә Иса бизим үчүн ҝөзәл нүмунә олду.
8 Һәвари Павел Ромадакы мәсиһчиләрә өзләринин ‘гајғысына галмамағы’ мәсләһәт ҝөрдү вә хатырлатды ки, «Мәсиһ дә Өз гајғысына галмамышды» (Ром. 15:1-3). Бәс биз һәваринин бу мәсләһәтини нә дәрәҹәдә тәтбиг едәҹәјик вә Мәсиһи тәглид етмәк үчүн нәләрдән кечмәјә һазырыг?
Јеһова биздән малик олдуғумуз ән јахшы шејләри ҝөзләјир
9. Мәсиһчинин өзүнү Аллаһа һәср етмәси әслиндә нә демәкдир?
9 Гәдим Исраилдә Мусанын Ганунуна әсасән, јәһуди гуллары хидмәтләринин једдинҹи вә ја Азадлыг илиндә азадлыға бурахылмалы идиләр. Лакин бу гулларын башга сечими дә варды. Әҝәр гул өз саһибини севирдисә, галан өмрүнү ағасынын јанында галмағы сечә биләрди. (Ганунун тәкрары 15:12, 16, 17 ајәләрини оху.) Өзүмүзү Аллаһа һәср едәндә буна бәнзәр сечими едирик. Биз көнүллү олараг өз истәдикләримизи јох, Аллаһын ирадәсини јеринә јетирмәјә разылыг веририк. Белә етмәклә биз Јеһоваја олан дәрин мәһәббәтимизи вә Она әбәдијјән хидмәт етмәк арзумузу ҝөстәририк.
10. Биз һансы мәнада Аллаһа мәхсусуг вә бу бизим дүшүнҹә вә давранышымыза неҹә тәсир етмәлидир?
10 Әҝәр сән Јеһованын Шаһидләри илә Мүгәддәс Китабы өјрәнирсәнсә, хош хәбәри тәблиғдә бөлүшүрсәнсә вә мәсиһчи ҝөрүшләринә ҝәлирсәнсә, бу чох тәгдирә лајигдир. Үмид едирик ки, тезликлә һәјатыны Јеһоваја һәср етмәк гәрарына ҝәләҹәксән вә һәбәшистанлынын Филипә вердији: «Вәфтиз олунмағыма нә әнҝәл вар?» суалыны өзүнә верәҹәксән (Һәв. иш. 8:35, 36). Онда Аллаһла мүнасибәтләрин Павелин мүраҹиәт етдији мәсиһчиләрин мүнасибәти кими олаҹаг: «Сиз өзүнүзә мәхсус дејилсиниз? Чүнки сиз чох баһа гијмәтә алынмысыныз» (1 Кор. 6:19, 20). Малик олдуғумуз үмиддән асылы олмајараг, Јеһоваја һәср олунмушугса, О бизим Саһибимиздир. Буна ҝөрә дә, худбин арзуларымызы боғмаг вә ‘инсанлара гул олмамаг’ неҹә дә ваҹибдир! (1 Кор. 7:23). Јеһованын садиг хидмәтчиси олмаг вә Онун истәдији кими биздән истифадә етмәсинә јол вермәк бөјүк шәрәфдир!
11. Мәсиһчиләр һансы гурбанлары вермәјә тәшвиг олунурлар вә Мусанын Ганунуна әсасән ҝәтирилән гурбанлардан ҝөрүндүјү кими, бу әслиндә нә демәкдир?
11 Павел һәмиманлыларыны тәшвиг едирди: «Бәдәнләринизи дири, мүгәддәс, Аллаһа мәгбул гурбан кими тәгдим един; мәнәви ибадәтиниз будур» (Ром. 12:1). Ола билсин, бу сөзләр ибраниләрдән олан мәсиһчиләрә Исанын давамчылары олмаздан әввәл ибадәтләринин бир һиссәси олан гурбанлары хатырладырды. Онлар билмәли идиләр ки, Мусанын Ганунунун тәләбләринә әсасән, Јеһованын гурбанҝаһында ән јахшы һејванлар тәгдим олунмалы иди. Гүсурлу һејванлар мәгбул дејилди (Мал. 1:8, 13). Ејни шеји бәдәнләримизи ‘дири гурбан кими’ тәгдим едәндә дә демәк олар. Биз Јеһоваја садәҹә олараг өз арзуларымызы тәмин етдикдән сонра артыг галанымызы јох, малик олдуғумуз ән јахшы шејләри веририк. Өзүмүзү Аллаһа һәср едәндә өз ‘ҹанымызы’, јәни һәјатымызы, о ҹүмләдән гүввәмизи, мадди әмлакымызы вә баҹарығымызы гејд-шәртсиз Она веририк (Колос. 3:23). Буну неҹә едә биләрик?
Вахтымыздан мүдрикликлә истифадә едәк
12, 13. Јеһоваја ән јахшы шејләримизи вермәјин үсулларындан бири һансыдыр?
12 Јеһоваја ән јахшы шејләримизи вермәјин үсулларындан бири вахтымыздан мүдрикликлә истифадә етмәкдир. (Ефеслиләрә 5:15, 16 ајәләрини оху.) Бунун үчүн өзүмүзә һаким олмағы баҹармалыјыг. Дүнјанын тәсири вә мирас алдығымыз гејри-камиллик бизи вахтымызы јалныз өз кефимизә вә шәхси мәнафејимизә сәрф етмәјә мејлләндирир. Тәбии ки, истәр истираһәт, истәрсә дә мәсиһчи мәсулијјәтләримизи јеринә јетирмәк үчүн ишләмәјимиз олсун, «һәр шејин өз вахты вар» (Ваиз 3:1). Лакин һәср олунмуш мәсиһчи таразлы олмалы вә вахтындан мүдрикликлә истифадә етмәлидир.
13 Һәвари Павел Афинаја ҝәләндә фикир верди ки, «бүтүн афиналылар вә орада јашајан әҹнәбиләр вахтларыны јалныз јени бир шеј сөјләмәк јахуд динләмәклә кечирирдиләр» (Һәв. иш. 17:21). Бу ҝүн дә бир чохлары вахтларыны бош јерә сәрф едирләр. Мүасир зәманәдә диггәтимизи јајындыран шејләрә телевизора бахмаг, видеоојунлар ојнамаг вә Интернетдә «отурмаг» дахилдир. Вахтымызы апаран шејләр ҝет-ҝедә чохалыр. Әҝәр бунлара ујсаг, руһани тәләбатларымызын гејдинә галмајаҹағыг. Һәтта дүшүнә биләрик ки, чох мәшғулуг вә ‘ән үстүн дәјәрләрә — Јеһоваја хидмәтлә бағлы олан ишләрә вахтымыз јохдур (Филип. 1:9, 10).
14. Һансы суаллары ҹидди нәзәрдән кечирмәлијик?
14 Буна ҝөрә дә, Јеһованын һәср олунмуш хидмәтчиси кими өзүндән соруш: ҝүндәлик графикимә Мүгәддәс Китабы охумаг, үзәриндә дүшүнмәк вә дуа етмәк дахилдирми? (Мәз. 77:12; 119:97; 1 Салон. 5:17). Мәсиһчи ҝөрүшләринә һазырлашмаг үчүн вахт ајырыраммы? Ҝөрүшләрдә шәрһләр вермәклә башгаларыны руһландырыраммы? (Мәз. 122:1; Ибр. 2:12). Аллаһын Кәламында дејилир ки, Павел вә онун әмәкдашлары «узун мүддәт галыб, Рәббә архаланараг, ҹәсарәтлә данышырдылар» (Һәв. иш. 14:3). Өз шәраитиндә дәјишиклик едиб тәблиғә даһа чох вахт, һәтта «узун мүддәт» сәрф едәрәк пионер кими хидмәт едә биләрсәнми? (Ибраниләрә 13:15 ајәсини оху.)
15. Ағсаггаллар вахтларындан мүдрикҹәсинә неҹә истифадә едирләр?
15 Һәвари Павел вә диҝәр садиг кишиләр Антакјадакы јығынҹаға баш чәкәндә «шаҝирдләрлә бирликдә узун заман орада галдылар» ки, онлары руһландырсынлар (Һәв. иш. 14:28). Бу ҝүн гајғыкеш ағсаггаллар башгаларыны мөһкәмләндирмәк үчүн вахтларынын чох һиссәсини сәрф едирләр. Онлар тәблиғ хидмәтиндән әлавә, сүрүнү отарырлар, азмыш гојунлары ахтарырлар, хәстәләрә көмәк едирләр вә јығынҹагда бир чох башга ишләр ҝөрүрләр. Вәфтиз олунмуш гардашсанса, шәраитин белә әлавә мәсулијјәтләрә ҹан атмағына јол верирми?
16. Биз иманлылар аиләсинә неҹә јахшылыг едә биләрик?
16 Бир чохлары инсанларын фәалијјәти нәтиҹәсиндә баш верән бәдбәхтликләрдән вә ја тәбии фәлакәтләрдән әзаб чәкән инсанлара көмәк етмәкдән севинҹ дујурлар. Мәсәлән, тәхминән 60 јашы олан вә Бет-Елдә хидмәт едән бир баҹы башгаларына јардым етмәк үчүн көнүллү олараг бир нечә дәфә узаг јерләрә ҝетмишдир. Нәјә ҝөрә о, мәзунијјәтини белә ишләрә сәрф едирди? О дејир: «Хүсуси бир баҹарығым олмаса да, еһтијаҹ дујулан иши ҝөрмәји өзүмә шәрәф билирәм. Әмлакларыны итирән баҹы-гардашларын мөһкәм иманыны ҝөрмәк мәни чох руһландырырды». Минләрлә баҹы-гардашлар исә бүтүн дүнјада Падшаһлыг Заллары вә Конгрес Залларынын тикинтисиндә өз көмәкләрини әсирҝәмирләр. Биз бу ишләрдә иштирак етмәклә фәдакарҹасына ‘иманлылар аиләсинә јахшылыг едирик’ (Галат. 6:10).
«Мән... һәр ҝүн сизинләјәм»
17. Әбәди һәјата наил олмаг үчүн шәхсән сән нә верәҹәксән?
17 Аллаһдан узаглашмыш бәшәријјәтин сону јахынлашыр. Бунун нә вахт баш верәҹәјини дәгиг билмирик. Лакин бизә мәлумдур ки, «вахт азалмышдыр» вә «бу дүнјанын индики сурәти кечиб ҝедир». (1 Коринфлиләрә 7:29-31 ајәләрини оху.) Бу исә Исанын: «Инсан өз ҹаны әвәзинә нә верә биләр?» суалыны даһа әһәмијјәтли едир. Шүбһәсиз ки, «әбәди һәјата» наил олмаг үчүн Јеһованын биздән ҝөзләдији һәр бир гурбаны верәҹәјик (1 Тим. 6:19). Исанын даима ону ‘изләмәк’ вә ‘әввәлҹә Аллаһын Сәлтәнәтини ахтармаг’ ҝөстәришинә гулаг асмаг олдугҹа ваҹибдир (Мат. 6:31-33; 24:13).
18. Биз нәјә әминик вә нә үчүн?
18 Етираф етмәк лазымдыр ки, Исанын ардынҹа ҝетмәк һәмишә асан олмур вә бу, Исанын габагҹадан хәбәрдарлыг етдији кими, индики системдә бәзиләринә һәјатлары баһасына баша ҝәлиб. Амма Иса кими, биз дә ‘өзүмүзү јазыгламаг’ тәләсиндән гачынмалыјыг. Биз онун биринҹи әсрдә мәсһ олунмуш давамчыларына вердији вәдә иман ҝәтиририк: «Мән, дөврүн сонуна гәдәр һәр ҝүн сизинләјәм» (Мат. 28:20). Буна ҝөрә дә, ҝәлин имканымыз јол вердији гәдәр вахтымызы вә баҹарығымызы мүгәддәс хидмәтә сәрф едәк. Белә етмәклә Јеһованын бөјүк мәшәггәтдә бизи горујаҹағына вә ја јени дүнјада һәјата гајтараҹағына әминлијимизи тәзаһүр етдиририк (Ибр. 6:10). Бунунла да һәјат әнамыны нә гәдәр јүксәк дәјәрләндирдијимизи ҝөстәрәҹәјик.
Неҹә ҹаваб верәрдиниз?
• Иса Аллаһа вә инсанлара хидмәт етмәкдә тәгдирәлајиг фәдакарлығы неҹә ҝөстәрди?
• Нәјә ҝөрә инсан өзүнү инкар етмәлидир вә буну неҹә етмәк олар?
• Гәдим Исраилдә Јеһова јалныз һансы гурбанлары гәбул едирди вә бу бизим үчүн нә демәкдир?
• Өз вахтымыздан мүдрикҹәсинә неҹә истифадә едә биләрик?
[26-ҹы сәһифәдәки шәкил]
Иса һәмишә Аллаһын хошуна ҝәлән ишләри едирди
[28-ҹи сәһифәдәки шәкил]
Јахшылыг билән исраиллиләр һәгиги ибадәти дәстәкләмәк үчүн ән јахшы шејләрини верирдиләр
[29-ҹу сәһифәдәки шәкилләр]
Вахтымыздан мүдрикҹәсинә истифадә етмәклә Аллаһы разы салырыг