Артыг өзүмүз үчүн јашамырыг
‘Мәсиһ һамы үчүн өлдү ки, јашајанлар артыг өзләри үчүн јашамасынлар’ (2 КОРИНФЛИЛӘРӘ 5:15).
1, 2. Мүгәддәс Китабын һансы әмри Исанын Ы әсрдәки давамчыларына худбин олмамаға көмәк етди?
ИСАНЫН јер үзүндәки сонунҹу ҝеҹәси иди. Ҹәми бир нечә саатдан сонра о, өз һәјатыны она иман ҝәтирәҹәк һәр бир кәс уғрунда гурбан вермәли иди. Һәмин ҝеҹә Иса өз садиг һәвариләринә чохлу ваҹиб шејләр сөјләди. О, һәмчинин, онун давамчыларыны фәргләндирәҹәк бир хүсусијјәт һаггында данышды. Иса деди: «Сизә бир-биринизи севәсиниз дејә јени бир әмр верирәм: сизи севдијим кими сиз дә бир-биринизи севин. Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһја 13:34, 35).
2 Һәгиги мәсиһчиләр бир-бирләрини фәдакарҹасына севмәли вә һәмиманлыларынын марагларыны өз марагларындан үстүн тутмалыдырлар. Онлар тәрәддүд етмәдән ‘достлары уғрунда ҹанларыны’ белә вермәлидирләр (Јәһја 15:13). Еркән мәсиһчиләр јени әмрә неҹә һај вердиләр? ЫЫ әсрин јазычысы Тертуллиан өзүнүн «Аполоҝија» адлы мәшһур әсәриндә башгаларынын мәсиһчиләр һаггында сөјләдији фикирләри ситат ҝәтирир: «Ҝөрүн бир-бирләрини неҹә севирләр, бир-бирләри уғрунда ҹанларындан белә кечмәјә һазырдырлар».
3, 4. а) Нәјә ҝөрә худбинликлә мүбаризә апармалыјыг? б) Бу мәгаләдә нәји нәзәрдән кечирәҹәјик?
3 Биз дә ‘бир-биримизин јүкләрини дашымалы вә Мәсиһин Ганунуну бу јолла иҹра етмәлијик’ (Галатијалылара 6:2). Лакин худбинлик бу гануна табе олмаға вә Аллаһымыз олан Јеһованы бүтүн үрәјимизлә, ҹанымызла вә дүшүнҹәмизлә севмәјә, еләҹә дә гоншумузу өзүмүз кими севмәјә ҝүҹлү манечилик төрәдир (Матта 22:37-39). Гејри-камил олдуғумуз үчүн өзүмүзү севмәјә мејллијик. Бура ҝүндәлик стрессләри, мәктәбдә вә ја ишдә һөкм сүрән рәгабәт руһуну вә доланмаг үчүн апардығымыз мүбаризәни дә әлавә етсәк, бизә хас олан худбинлијә мејл даһа да ҝүҹләнир, азалмыр. Һәвари Павел хәбәрдарлыг етмишдир ки, ‘ахыр ҝүнләрдә инсанлар худбин олаҹаг’ (2 Тимотејә 3:1, 2).
4 Јер үзүндәки хидмәтинин сонуна јахын Иса өз шаҝирдләринә худбинлијин өһдәсиндән ҝәлмәјә көмәк едәҹәк үч аддым һаггында данышды. Бу һансы аддымлардыр вә онлар бизә неҹә көмәк едә биләр?
Тә’сирли дава-дәрман
5. Галилејанын шималында хидмәт едән заман Иса шаҝирдләринә нәји ачыглады вә бу онлары нәјә ҝөрә сарсытды?
5 Иса Галилејанын шималында, Филип Гејсәријәси јахынлығында тәблиғ едирди. Сакит вә мәнзәрәли олан бу јер фәдакарлыгдан чох, истираһәт һаггында дүшүнмәк үчүн мүнасиб иди. Лакин Иса шаҝирдләринә «Јерусәлимә ҝетмәли, ағсаггаллар, баш каһинләр вә дин алимләринин әлиндән чох әзаб чәкмәли, өлдүрүлмәли вә үчүнҹү ҝүндә дирилмәли» олдуғуну ачыгламаға башлады (Матта 16:21). Исанын бу ачыгламасы, еһтимал ки, онун шаҝирдләрини чох сарсытды! Чүнки һәмин вахта гәдәр Исанын өз Падшаһлығыны јер үзүндә гураҹағыны ҝөзләјирдиләр (Лука 19:11; Һәвариләрин ишләри 1:6).
6. Нәјә ҝөрә Иса Петери сәрт шәкилдә мәзәммәт етди?
6 Петер дәрһал Исаны «кәнара чәкиб, е’тираз етмәјә башлады: “Ја Рәбб, Өзүнә јазығын ҝәлсин! Бу әсла Сәнин башына ҝәлмәјәҹәк!”». Иса Петерә неҹә ҹаваб верди? О әкс тәрәфә чеврилиб деди: «Рәдд ол Мәндән, шејтан! Сән Мәнә мане олурсан. Чүнки сәнин фикирләрин Аллаһын дејил, инсан фикирләридир» (Матта 16:22, 23). Онларын нөгтеји-нәзәрләри неҹә дә фәргләнирди! Иса Аллаһын она тә’јин етдији фәдакарлыг јолу илә ҝетмәјә һәвәслә разы олду; бу јол ону бир нечә ајдан сонра ишҝәнҹә дирәјиндә өлүмә ҝәтириб чыхармалы иди. Петер исә асан вә раһат бир јол тәклиф едирди. О Исаја «Өзүнә јазығын ҝәлсин!» деди. Петер буну, шүбһәсиз ки, јахшы нијјәтлә етмишди. Буна бахмајараг Иса Петери мәзәммәт етди, чүнки бу һалда Петер Шејтанын она тә’сир етмәсинә јол вермишди. Петер «Аллаһын дејил, инсан ишләрини» дүшүнүрдү (И–93).
7. Матта 16:24 ајәсинә әсасән Иса шаҝирдләринә һансы јолу ҝөстәрди?
7 Петерин Исаја дедикләринин әкс-сәдасыны бу ҝүн дә ешитмәк олар. Дүнја инсанлара тез-тез «кеф елә» вә ја «ән асан јолу сеч» дејир. Иса исә тамамилә башга ҹүр дүшүнмәји мәсләһәт ҝөрүрдү. О, өз шаҝирдләринә «ким ардымҹа ҝетмәк истәјирсә, өзүнү инкар етсин вә чармыхыны ҝөтүрүб Мәни изләсин [«ишҝәнҹә дирәјини ҝөтүрүб даима ардымҹа ҝәлсин», ЈД]» демишдир (Матта 16:24). Бир әсәрдә дејилир: «Бу сөзләр, Мәсиһин шаҝирди олмаг дә’вәти дејил. Әксинә, артыг онун чағырышына һај верән инсанлары шаҝирд олмағын нә демәк олдуғу үзәриндә дүшүнмәјә тәшвиг едир» («The New Interpreter’s Bible»). Беләликлә, иманлылар Исанын ҝөстәрдији үч аддымы атмалыдырлар. Ҝәлин бу аддымлары бир-бир мүзакирә едәк.
8. Өзүнү инкар етмәјин нә демәк олдуғуну изаһ един.
8 Биринҹиси, биз өзүмүзү инкар етмәлијик. «Өзүнү инкар етсин» кими тәрҹүмә олунан јунан сөзү худбин арзуларымыза вә шәхси раһатлығымыза «јох» демәк һазырлығыны ҝөстәрир. Өзүнү инкар етмәк, бизә зөвг верән бә’зи шејләрдән арабир имтина етмәк демәк дејил. Бу һәм дә заһид олмаг вә ја өзүмүзә зәрәр ҝәтирмәк мә’насыны дашымыр. Артыг ‘өзүмүзә мәхсус дејилик’ ифадәси о демәкдир ки, биз һәјатымызы вә она дахил олан һәр шеји Јеһоваја һәвәслә веририк (1 Коринфлиләрә 6:19, 20). Биз өзүмүзү дејил, Аллаһы разы салмаға чалышырыг. Өзүмүзү инкар етмәк, һәтта гејри-камил арзуларымыза зидд ҝетсә дә, Аллаһын ирадәсини јеринә јетирмәк гәтијјәтимизи нәзәрдә тутур. Һәјатымызы Јеһоваја һәср етмәклә вә вәфтиз олунмагла анҹаг Она мәхсус олдуғумузу ҝөстәририк. Сонра һәјатымыз боју өз һәср олунмамыза мүвафиг јашамаға чалышырыг.
9. а) Исанын дөврүндә ишҝәнҹә дирәји һансы тәсәввүрләри јарадырды? б) Ишҝәнҹә дирәјимизи ҝөтүрмәк бизим үчүн һансы мә’наны дашыјыр?
9 Икинҹиси, биз өз ишҝәнҹә дирәјимизи ҝөтүрмәлијик. I әсрдә ишҝәнҹә дирәји изтираблар, рүсвајчылыг вә өлүмлә әлагәдар тәсәввүр јарадырды. Адәтән ишҝәнҹә дирәји үзәриндә анҹаг ҹинајәткарлары е’дам едир, ја да ки, онларын ҹәсәдләрини асырдылар. Ишҝәнҹә дирәји һаггында данышаркән Иса ҝөстәрди ки, бу дүнјадан олмадығы үчүн, мәсиһчи тә’гибләрә, нифрәтә вә һәтта өлмәјә дә һазыр олмалыдыр (Јәһја 15:18-20). Мәсиһчи принсипләри бизи бу дүнјанын инсанларындан фәргләндирир, буна ҝөрә дә дүнја бизим һаггымызда тәһгиредиҹи шәкилдә даныша биләр (1 Петер 4:4). Бу ҹүр һаллар мәктәбдә, ишдә вә һәтта евдә баш верә биләр (Лука 9:23). Бунунла белә биз дүнјанын әдавәтли мүнасибәтинә таб ҝәтирмәјә һазырыг, чүнки биз артыг өзүмүз үчүн јашамырыг. Иса демишдир: «Мәнә ҝөрә инсанлар сизи јаманлајаҹаглары вә тә’гиб едәҹәкләри, сизә һәр ҹүр бөһтан атаҹаглары заман, сиз нә бәхтијарсыныз! Севинин вә шадланын; чүнки ҝөјләрдә мүкафатыныз бөјүкдүр» (Матта 5:11, 12). Һәгигәтән дә, Аллаһын илтифатыны газанмагдан ваҹиб нә ола биләр ки?
10. Даима Исанын ардынҹа ҝетмәк нә демәкдир?
10 Үчүнҹүсү, Иса Мәсиһ деди ки, биз даима онун ардынҹа ҝетмәлијик. У. Е. Вајнын «Әһди-Ҹәдидин сөзләринә даир изаһлы лүғәт»инә әсасән, «ардынҹа ҝетмәк» кими тәрҹүмә олунан сөз јол јолдашы, јә’ни «ејни јолу ҝедән шәхс» олмаг мә’насыны дашыјыр. 1 Јәһја 2:6 ајәсиндә дејилир: «Ким дејирсә ки, Онда [Аллаһда] јашајыр, О [Мәсиһ] неҹә һәрәкәт етдисә, өзү дә ејни ҹүр һәрәкәт етмәлидир». Иса неҹә давранырды? Онун сәмави Атасына вә шаҝирдләринә олан мәһәббәти худбинлијә јол вермирди. Павел јазмышды: «Мәсиһ дә Өз гајғысына галмамышды» (Ромалылара 15:3). Һәтта јорғун вә ја аҹ оланда белә, Иса башгаларынын марагларыны өзүнүнкүндән үстүн тутурду (Марк 6:31-34). Бундан әлавә Иса бүтүн гүввәсини Падшаһлыг һаггындакы тәблиғ ишинә вә инсанлары өјрәтмәјә һәср едирди. Биз, ‘бүтүн халглардан шаҝирдләр һазырламаг вә онлара Исанын әмр етдији һәр шејә риајәт етмәји өјрәтмәк’ тапшырығы алмышыг. Мәҝәр бу тапшырығы сә’јлә јеринә јетирмәкдә Исаны тәглид етмәли дејиликми? (Матта 28:19, 20). Мәсиһ бизим үчүн нүмунә гојмушдур, биз дә дәгигликлә ‘Онун изләри илә ҝетмәлијик’ (1 Петер 2:21).
11. Өзүнү инкар етмәк, ишҝәнҹә дирәјини ҝөтүрмәк вә даима Иса Мәсиһин ардынҹа ҝетмәк нәјә ҝөрә ваҹибдир?
11 Өзүнү инкар етмәк, ишҝәнҹә дирәјини ҝөтүрмәк вә даима Мәсиһин ардынҹа ҝетмәк бизим үчүн һәјати ваҹибдир. Бу аддымлар фәдакар мәһәббәт тәзаһүр етдирмәјә ҝүҹлү манеә төрәдән худбинлијә гаршы дава-дәрмандыр. Иса һәм дә демишдир: «Ким ҹаныны хилас етмәк истәрсә, ону итирәҹәк; амма ким ҹаныны Мәним уғрумда итирсә, ону газанаҹагдыр. Инсан бүтүн дүнјаја јијәләниб өз ҹаныны итирәрсә, она нә фајда олаҹагдыр? Јахуд инсан өз ҹаны әвәзинә нә верә биләр?» (Матта 16:25, 26).
Ики ағаја гуллуг едә билмәрик
12, 13. а) Мәсләһәт үчүн Исаја мүраҹиәт едән ҹаван рәиси нә нараһат едирди? б) Иса бу ҹаван оғлана һансы мәсләһәти верди вә нәјә ҝөрә?
12 Иса шаҝирдләринә өзләрини инкар етмәјин нә гәдәр ваҹиб олдуғуну вурғуладыгдан бир нечә ај сонра, ҹаван варлы бир рәис она јахынлашыб деди: «Мүәллим, һәјатым әбәди олсун дејә, нә јахшылыг етмәлијәм?» Иса ‘әмрләрә риајәт етмәји’ бујурду вә онлардан бә’зиләрини хатырлатды. Ҹаван оғлан деди: «Бүтүн бунлара ҝәнҹлијимдән риајәт едирәм». Еһтимал ки, ҹаван оғлан сәмими иди вә Ганунун әмрләринә һәгигәтән риајәт етмәјә чалышырды. Буна ҝөрә дә сорушду: «Даһа нәјим чатышмыр?» Онда Иса она гејри-ади тәклифлә мүраҹиәт етди: «Әҝәр камил олмаг [«һәр шејә риајәт етмәк», «Неw Америҹан Стандард Библе»] истәјирсәнсә, ҝет нәјин варса сат, јохсуллара пајла. Ҝөјләрдә хәзинән олаҹагдыр. Сонра ҝәл, Мәним ардымҹа ҝет» (Матта 19:16-22).
13 Иса ҝөрдү ки, Јеһоваја бүтүн үрәкдән гуллуг етмәси үчүн, ҹаван оғлана, һәјатда ону чох јајындыран вар-дөвләтдән азад олмаг ҝәрәкдир. Мәсиһин һәгиги шаҝирди ики ағаја — «Аллаһа вә маммона гуллуг едә билмәз» (Матта 6:24). Онун ‘ҝөзү сағлам’, јә’ни руһани дәјәрләрә ҹәмләшмиш олмалыдыр (Матта 6:22). Вар-дөвләтдән азад олмаг вә ону касыблара пајламаг, фәдакарлыг ҝөстәрмәк демәкдир. Бу мадди гурбанын әвәзиндә Иса ҹаван рәисә ҝөјләрдә хәзинә әлдә етмәк кими гијмәтли имкан тәклиф етди. Бу, ҹаван оғлан үчүн әбәди һәјаты алмаг вә ҝәләҹәкдә Мәсиһлә бирликдә ҝөјдә идарә етмәк мә’насыны дашыјырды. Ҹаван оғлан өзүнү инкар етмәјә һазыр олмадығы үчүн «кәдәрләниб ҝетди, чүнки чох мал-дөвләти вар иди» (Матта 19:22). Исанын диҝәр давамчылары исә башга ҹүр даврандылар.
14. Дөрд балыгчы, Исанын далынҹа ҝетмәк тәклифинә неҹә һај верди?
14 Һәмән һадисәдән тәхминән ики ил әввәл Иса бу ҹүр тәклифлә дөрд балыгчыја — Петерә, Андрејә, Јагуба вә Јәһјаја мүраҹиәт етди. Һәмин вахт онлардан икиси балыг тутур, икиси исә торларыны тә’мир едирдиләр. Иса онлара деди: «Ардымҹа ҝәлин, Мән сизи инсан тутан балыгчылар едәҹәјәм». Нәтиҹәдә онларын дөрдү дә өз мәшғулијјәтләрини атыб, өмүрләринин сонуна гәдәр Исанын ардынҹа ҝетдиләр (Матта 4:18-22).
15. Јеһованын Шаһиди олан бир гадын Исанын ардынҹа ҝетмәк үчүн һансы гурбанлары верди?
15 Бу ҝүн мәсиһчиләрин чоху ҹаван варлы оғланын дејил, дөрд балыгчынын нүмунәсини тәглид едирләр. Јеһоваја хидмәт етмәк үчүн онлар вар-дөвләтләрини вә јүксәк вәзифәләрини гурбан верирләр. Дебора адлы баҹы дејир: «22 јашым оланда ҹидди гәрар гәбул етмәли олдум. Алты ај иди ки, Мүгәддәс Китабы өјрәнирдим вә һәјатымы Јеһоваја һәср етмәк истәјирдим. Аилә үзвләрим исә буна гәти е’тираз едирдиләр. Онлар мултимилјонер идиләр вә дүшүнүрдүләр ки, мәним Шаһид олмағым онларын адына ләкә ҝәтирәр. Онлар мәнә 24 саат мөһләт вердиләр ки, ҹаһ-ҹалал ичиндә јашамагла һәгигәт арасында сечим едим. Шаһидләрлә әлагәми кәсмәсәм, мәни мирасдан мәһрум едәҹәкләрини билдирдиләр. Дүзҝүн сечим етмәк вә гәрарыма мүвафиг давранмаг үчүн Јеһова мәнә ҝүҹ верди. Артыг 42 илдир ки, таммүддәтли хидмәтдәјәм вә буна ҝөрә гәтијјән һејифсиләнмирәм. Худбин, зөвглә долу һәјат тәрзиндән имтина етмәклә доғмаларымын дујдуглары бошлуг вә мә’јуслуг һиссиндән гачына билдим. Әримлә бирликдә 100-дән артыг инсана һәгигәти өјрәнмәкдә көмәк етмишик. Бу руһани өвладлар мәним үчүн һәр ҹүр мадди вар-дөвләтдән даһа дәјәрлидир». Милјонларла Јеһованын Шаһидләри бу һиссләрә шәрикдир. Бәс сән?
16. Артыг өзүмүз үчүн јашамадығымызы неҹә ҝөстәрә биләрик?
16 Артыг өзү үчүн јашамамаг арзусу минләрлә Јеһованын Шаһидини пионер кими, јә’ни Падшаһлығын таммүддәтли хидмәтчиси кими хидмәт етмәјә тәшвиг етмишдир. Таммүддәтли хидмәтдә иштирак етмәк имканы олмајанлар исә, пионер руһу инкишаф етдирир вә Падшаһлыг һаггындакы тәблиғ ишини баҹардыглары гәдәр дәстәкләјирләр. Валидејнләр ушагларына руһани тәрбијә вермәк наминә өз марагларыны вә шәхси вахтларыны гурбан вермәклә бу ҹүр әһвал-руһијјә тәзаһүр етдирирләр. Һәр неҹә олса да, Падшаһлығын һәјатымызда биринҹи јери тутдуғуну һәр биримиз ҝөстәрә биләрик (Матта 6:33).
Бизи тәшвиг едән кимин мәһәббәтидир?
17. Бизи гурбанлар вермәјә тәшвиг едән нәдир?
17 Фәдакар мәһәббәт јолу илә јеримәк асан дејил. Лакин бизи буна тәшвиг едән гүввә үзәриндә дүшүнәк. Павел јазырды: «Мәсиһин мәһәббәти бизи мәҹбур [тәшвиг] едир вә биз гане олуруг ки, бир Нәфәр һамы үчүн өлдүсә, демәли һамы өлдү. Бәли, Мәсиһ һамы үчүн өлдү ки, јашајанлар артыг өзләри үчүн јох, онлар уғрунда Өлән вә Дирилән үчүн јашасынлар» (2 Коринфлиләрә 5:14, 15). Бизи артыг өзүмүз үчүн јашамамаға тәшвиг едән гүввә — Мәсиһин мәһәббәтидир. Неҹә дә бөјүк гүввәдир! Әҝәр Мәсиһ бизим уғрумузда өлдүсә, өзүмүзү онун үчүн јашамаға борҹлу һисс етмирикми? Мәһз Аллаһын вә Мәсиһин дәрин мәһәббәтинә олан миннәтдарлығымыз, һәјатымызы Аллаһа һәср етмәјә вә Мәсиһин шаҝирдләри олмаға тәшвиг етмишдир (Јәһја 3:16; 1 Јәһја 4:10, 11).
18. Артыг өзләри үчүн јашамајанлар неҹә мүкафатландырылырлар?
18 Артыг өзләри үчүн јашамајанлар мүкафат алаҹаглармы? Ҹаван рәис Мәсиһин тәклифини инкар едиб ҝетдикдән сонра, Петер Исадан сорушду: «Будур, биз һәр шеји атыб Сәнин ардынҹа ҝәлдик; елә исә, бизим нәјимиз олаҹаг?» (Матта 19:27). Петер вә диҝәр һәвариләр һәгигәтән дә өзләрини инкар етмишдиләр. Онларын мүкафаты нә олаҹаг? Әввәла, Иса шаҝирдләринин онунла бирликдә ҝөјләрдә идарә етмәк шәрәфинә лајиг ҝөрүләҹәкләрини сөјләди (Матта 19:28). Иса һәм дә онун һәр бир давамчысына бәхш едиләҹәк хејир-дуаларын адыны чәкди. О деди: «Елә бир адам јохдур ки, Мәним адым вә Мүждә наминә евини, гардашларыны, баҹыларыны, анасыны, атасыны, арвадыны, ушагларыны вә јахуд торпагларыны атмыш олсун, вә инди, бу заманда... јүз гат... ҝәләҹәк дөврдә дә әбәди һәјат алмасын» (Марк 10:29, 30). Алдығымыз хејир-дуалар вердијимиз гурбанлардан гат-гат үстүндүр. Мәҝәр руһани аталарымыз, аналарымыз, гардашларымыз, баҹыларымыз вә ушагларымыз Падшаһлыг наминә имтина етдикләримиздән дәјәрли дејилми? Һәјат кимә даһа чох мәмнунлуг ҝәтирди: Петерә јохса варлы ҹаван оғлана?
19. а) Һәгиги хошбәхтлик нәдән асылыдыр? б) Нөвбәти мәгаләдә нәји нәзәрдән кечирәҹәјик?
19 Иса сөзләри вә әмәлләри илә ҝөстәрди ки, хошбәхтлији худбинләр јох, вермәји вә башгаларына хидмәт етмәји севәнләр дујур (Матта 20:28; Һәвариләрин ишләри 20:35). Артыг өзүмүз үчүн јашамајанда вә даима Мәсиһин ардынҹа ҝедәндә, һазыркы һәјатымыздан бөјүк мәмнунлуг дујур вә әбәди һәјат үмидинә малик олуруг. Өзүмүзү инкар етмәклә һәјатымызы Јеһованын әлинә веририк. Беләликлә Аллаһын гуллары олуруг. Бу ҹүр көләлик нәјә ҝөрә хејир-дуалар ҝәтирир? Вә бизим һәјатда гәбул етдијимиз гәрарлара неҹә тә’сир ҝөстәрир? Бу суаллар нөвбәти мәгаләдә мүзакирә олунаҹаг.
Хатырлајырсынызмы?
• Худбин мејлләри нәјә ҝөрә дәф етмәлијик?
• Өзүнү инкар етмәк, ишҝәнҹә дирәјини ҝөтүрмәк вә даима Исанын ардынҹа ҝетмәк нә демәкдир?
• Бизи артыг өзүмүз үчүн јашамамаға тәшвиг едән нәдир?
• Фәдакарлыг неҹә мүкафатландырылыр?
[9-ҹу сәһифәдәки шәкил]
«Ја Рәбб, Өзүнә јазығын ҝәлсин!»
[10-ҹу сәһифәдәки шәкилләр]
Мәһәббәт Јеһованын Шаһидләрини Падшаһлыг һаггындакы хәбәри сә’јлә тәблиғ етмәјә тәшвиг едир.