Јеһованын Кәламы ҹанлыдыр
«Ромалылара мәктуб»дан диггәтәлајиг фикирләр
ЕРАМЫЗЫН тәхминән 56-ҹы илиндә, үчүнҹү миссионер сәјаһәти заманы һәвари Павел Коринф шәһәринә ҝәлир. О, Ромадакы јәһуди вә гејри-јәһуди мәсиһчиләр арасында фикир ајрылығы олдуғуну өјрәнир. Мәсиһ јолунда һәмфикир олмалары арзусу илә Павел онлара мәктуб јазыр.
Ромалылара мәктубунда Павел инсанларын неҹә салеһ сајылдығыны вә беләләринин неҹә јашамалы олдуғуну изаһ едир. Мәктуб Аллаһ вә Онун Кәламы һаггында билијимизи ҝенишләндирир, Аллаһын лүтфүнү вурғулајыр вә хиласымызда ојнадығы рола ҝөрә Мәсиһи иззәтләндирир (Ибр. 4:12).
БӘРАӘТ ВЕРИЛИР. НЕҸӘ?
«Һамы ҝүнаһ ишләтмиш вә Аллаһын иззәтиндән мәһрум галмышдыр», — дејә һәвари Павел јазыр. «Онлар Онун [Аллаһын] лүтфү илә, Иса Мәсиһин вердији ниҹатла бәраәти мүфтә алдылар». Павел һәм дә дејир: «Инсан Гануну иҹра етмәклә дејил, иманла бәраәт газаныр» (Ром. 3:23, 24, 28). Бир нәфәрин ‘салеһлијинә’ иман васитәсилә һәм мәсһ олунмушлара, һәм дә ‘башга гојунлардан’ ибарәт ‘бөјүк издиһама’ ‘бәраәт верилә’ биләр. Мәсһ олунмушлара Мәсиһин һәмварисләри кими ҝөјләр һәјаты үчүн, бөјүк издиһама исә «бөјүк мәшәггәтдән» сағ чыхмаг үмидилә Аллаһын достлары кими бәраәт верилә биләр (Ром. 5:18; Вәһј 7:9, 14; Јәһ. 10:16; Јаг. 2:21-24; Мат. 25:46).
Павел сорушур: «Ганунун һакимијјәти алтында дејил, Аллаһын лүтфү алтында олдуғумуз үчүн ҝүнаһ ишләдәкми?» «Әсла!» — дејә о ҹаваб верир. Сонра исә изаһ едир: ‘Сиз ја өлүмлә нәтиҹәләнән ҝүнаһын, јахуд салеһликлә нәтиҹәләнән итаәтин гулларысыныз’ (Ром. 6:15, 16). О дејир: «Әҝәр бәдәнин мәнфи әмәлләрини Руһ васитәсилә мәһв едәрсинизсә, јашајаҹагсыныз» (Ром. 8:13).
Мүгәддәс Китаб суалларына ҹаваблар:
1:24-32 — Бурада тәсвир олунан позғунлуғу јәһудиләр, јохса бүтпәрәстләр төрәдирди? Бахмајараг ки, буну һәр ики група аид етмәк мүмкүндүр, Павел бурада әсас етибарилә гәдимдә јашајан дөнүк исраиллиләр һаггында данышыр. Онлар Аллаһын әдаләтли һөкмүнү билдикләринә бахмајараг, ‘Аллаһы өз шүурларында сахламағы ујғун ҝөрмәдиләр’. Буна ҝөрә дә, онлар төһмәтә лајиг идиләр.
3:24, 25 — ‘Мәсиһин әфв етдирән гурбаны’ өдәнилмәмишдән габаг ‘ишләдилән ҝүнаһлары’ неҹә јуја биләрди? Јарадылыш 3:15 ајәсиндә јазылан Мәсиһлә бағлы илк пејғәмбәрлик Иса б. е. 33-ҹү илиндә ишҝәнҹә дирәјиндә едам олунанда јеринә јетди (Галат. 3:13, 16). Анҹаг пејғәмбәрлик дејилән заман фидијә Јеһованын ҝөзүндә артыг өдәнилмиш кими иди, чүнки Аллаһын нијјәтинин јеринә јетмәсинә һеч нә мане ола билмәзди. Беләликлә, Иса Мәсиһин ҝәләҹәк гурбанлығына әсасланараг Јеһова Адәмин бу вәдә иман ҝәтирән өвладларынын ҝүнаһындан кечә биләрди. Фидијәнин сајәсиндә мәсиһчиликдән габаг өләнләрин дә дирилмәси мүмкүндүр (Һәв. иш. 24:15).
6:3-5 — Мәсиһ Исаја вә онун өлүмүнә вәфтиз олунмаг нә демәкдир? Јеһова Мәсиһин давамчыларыны мүгәддәс руһла мәсһ едәндә онлар Иса илә бирләшир вә онун бәдәни олан јығынҹағын үзвләри олурлар, бу јығынҹағын Башы исә Мәсиһдир (1 Кор. 12:12, 13, 27; Колос. 1:18). Онларын Мәсиһ Исаја вәфтизи бу демәкдир. Мәсһ олунмушларын Мәсиһин ‘өлүмүнә вәфтиз олунмалары’ исә о демәкдир ки, онлар һәјатларыны гурбан вериб јер үзүндә әбәди јашамаг үмидиндән имтина едирләр. Буна ҝөрә дә онлар өләркән, Иса кими, өзләрини гурбан вермиш олурлар, бахмајараг ки, онларын өлүмү ҝүнаһлары јумур. Онлар өләндә вә ҝөјләр һәјатына дириләндә Мәсиһин өлүмүнә вәфтиз сона чатыр.
7:8-11 — ‘Ҝүнаһ әмр васитәси илә’ неҹә фүрсәт тапды? Ганун инсанлара ҝүнаһы тамлығы илә баша дүшмәјә көмәк едәрәк, онлары ҝүнаһлы олмағын нә демәк олдуғундан аҝаһ етди. Нәтиҹәдә онлар бир чох һәрәкәтләринин ҝүнаһ олдуғуну ҝөрдүләр вә даһа чох инсан өзүнүн ҝүнаһлы олдуғуну баша дүшдү. Буна ҝөрә дә демәк олар ки, ҝүнаһ Ганун васитәсилә фүрсәт тапды.
Бизим үчүн ибрәт дәрсләри:
1:14, 15. Хош хәбәри сәјлә тәблиғ етмәк үчүн чохлу сәбәбләримиз вар. Онлардан бири одур ки, биз Исанын ганы илә сатын алынан инсанлара борҹлујуг вә онлара руһани ҹәһәтдән көмәк етмәк мәсулијјәтини дашыјырыг.
1:18-20. Аллаһсыз вә һагсыз ишләр ҝөрән инсанлар «үзүрсүздүрләр», чүнки Аллаһын ҝөзлә ҝөрүлмәз хүсусијјәтләри јаратдыглары илә ачыгҹа ҝөрүнүр.
2:28; 3:1, 2; 7:6, 7. Павел јәһудиләрә кәнардан тәһгиредиҹи кими ҝөрүнә билән сөзләр дедикдән сонра, сөзләрини јумшалдыр. Бу, мүбаһисәли мәсәләләри нәзакәтлә вә баҹарыгла мүзакирә етмәкдә бизә ҝөзәл нүмунәдир.
3:4. Инсанын дедикләри Аллаһын Кәламы васитәсилә дедији сөзләрә зидд ҝедәндә биз Мүгәддәс Китабдакы хәбәрә етибар етмәклә вә Аллаһын ирадәсинә ујғун давранмагла Аллаһын «һаглы» олдуғуна инандығымызы ҝөстәририк. Падшаһлығын тәблиғи вә шаҝирд һазырламаг ишиндә сәјлә иштирак етмәклә биз башгаларына Аллаһын һаглы олдуғуну ҝөрмәјә көмәк едә биләрик.
4:9-12. Ибраһим 99 јашында сүннәт олунмаздан чох әввәл иманы онун һесабына салеһлик кими гејд едилмишди (Јар. 12:4; 15:6; 16:3; 17:1, 9, 10). Аллаһ белә мөһтәшәм үсулла ҝөстәрди ки, инсан Онун өнүндә нәјин сајәсиндә салеһ сајыла биләр.
4:18. Үмид иманын ваҹиб һиссәсидир. Бизим иманымыз үмидә әсасланыб (Ибр. 11:1).
5:18, 19. Исанын Адәмлә бәнзәрлијини мәнтиги шәкилдә ҝөстәрдикдән сонра, Павел јығҹам вә садә сөзләрлә бир нәфәрин ‘бир чохлары үчүн ҹаныны фидијә олараг вермәсинин’ неҹә мүмкүн олдуғуну изаһ едир (Мат. 20:28). Мәнтиги мүлаһизә јүрүтмәк вә јығҹам данышмаг тәглид етмәли олдуғумуз ҝөзәл тәлим методудур (1 Кор. 4:17).
7:23. Әл, ајаг вә дил кими бәдән үзвләри бизи ‘ҝүнаһ ганунуна әсир едә биләр’. Еһтијатлы олмалыјыг ки, онлардан суи-истифадә етмәјәк.
8:26, 27. Чаш-баш галыб, нә һагда дуа едәҹәјимизи билмәјәндә, ‘руһ өзү бизим үчүн вәсатәт едир’. Сонра «дуалары ешидән» Јеһова Кәламында јазылан мүнасиб дуалары бизим тәрәфимиздән едилән дуа кими гәбул едир (Мәз. 65:2).
8:38, 39. Бәдбәхтликләр, пис руһи гүввәләр, инсан һакимијјәтләри Јеһованын бизә олан севҝисини сојуда билмәз; бу кими шејләр бизим дә мәһәббәтимизи сојутмамалыдыр.
9:22-28; 11:1, 5, 17-26. Исраил халгынын бәрпа олунмасына даир бир чох пејғәмбәрликләр үзвләри ‘јалныз јәһудиләрдән дејил, диҝәр халглардан да дәвәт едилмиш’ мәсһ олунмушлар јығынҹағынын үзәриндә јеринә јетди.
10:10, 13, 14. Аллаһа вә јахынларымыза мәһәббәтлә јанашы, Јеһоваја вә Онун вәдләринә мөһкәм иман бизи мәсиһчи хидмәтиндә сәјлә иштирак етмәјә тәшвиг едә биләр.
11:16-24, 33. ‘Аллаһын хејирхаһлыг вә сәртлији’ неҹә дә ҝөзәл, таразлы шәкилдә ифадә олунур! Бәли, «О, ишләри камил Гајадыр, чүнки бүтүн јоллары һагдыр» (Ганун. т. 32:4).
САЛЕҺ САЈЫЛМАҒЫМЫЗА МҮВАФИГ ЈАШАМАГ
Павел дејир: «Беләликлә, еј гардашлар, Аллаһын мәрһәмәти наминә сизә јалварырам ки, бәдәнләринизи дири, мүгәддәс, Аллаһа мәгбул гурбан кими тәгдим един» (Ром. 12:1). «Беләликлә», башга сөзлә мәсиһчиләрин иманларына ҝөрә салеһ сајылдыгларыны нәзәрә алараг, Павелин дедији сонракы сөзләр онларын өзләринә, башгаларына вә инсан һакимијјәтләринә мүнасибәтинә тәсир етмәлидир.
Павел јазыр: «Сизин һәр биринизә дејирәм: өзүнүзә лүзумундан чох әһәмијјәт вермәјин». О мәсләһәт верир: «Гој мәһәббәт ријасыз олсун» (Ром. 12:3, 9). «Һәр адам, өз үзәриндә олан һакимләрә табе олсун» (Ром. 13:1). Виҹданла бағлы мәсәләләрдә о, мәсиһчиләри ‘бир-биринә һөкм етмәмәјә’ сәсләјир (Ром. 14:13).
Мүгәддәс Китаб суалларына ҹаваблар:
12:20 — Биз дүшмәнин башына ‘јанан көмүрү’ неҹә јығырыг? Мүгәддәс Китабын јазылдығы дөврләрдә филизи күрәјә атанда тәкҹә алтына дејил, үстүнә дә көмүр јығырдылар. Үстдән истилијин артмасы сајәсиндә метал әријиб гатышыглардан тәмизләнирди. Ејни тәрздә биз дә дүшмәнимизә јахшылыг етмәклә онун башына јанан көмүрләр јығырыг, беләликлә онун сәртлији әријәҹәк, јахшы хүсусијјәтләри үзә чыхаҹаг.
12:21 — «Пислијә јахшылыг илә» неҹә галиб ҝәлирик? Үсуллардан бири Јеһованын мүнасиб билдији вахта гәдәр Падшаһлыг һаггында хош хәбәри ҹәсарәтлә тәблиғ етмәкдир (Марк 13:10).
13:1 — Үзәримиздә олан һакимләр һансы мәнада «Аллаһ тәрәфиндән тәјин олунмушдур»? Һаким даирәләр о мәнада «Аллаһ тәрәфиндән тәјин олунмушдур» ки, онлар Аллаһын иҹазәси илә идарә едирләр, бәзи һалларда исә онларын идарә едәҹәјини Аллаһ габагҹадан билирди. Буну Мүгәддәс Китабда бир нечә падшаһ һаггында габагҹадан дејилмәсиндән ҝөрмәк олар.
Бизим үчүн ибрәт дәрсләри:
12:17, 19. Интигам алмаг јалныз Јеһованын ихтијары чатан бир иши өз үзәримизә ҝөтүрмәк демәкдир. ‘Пислик әвәзинә пислик етмәк’ өзүндән разы олмағын әламәти оларды.
14:14, 15. Биз гардашымыза тәклиф етдијимиз гида вә ја ички илә ону нә кәдәрләндирмәли, нә дә бүдрәтмәлијик.
14:17. Аллаһла јахшы мүнасибәтләр әсас етибарилә инсанын нәји јејиб-ичмәсиндән, нәдән исә имтина етмәсиндән асылы дејил. Әксинә, бу, салеһлик, сүлһ вә севинҹлә бағлыдыр.
15:7. Сәмими гәлбдән һәгигәти ахтаран вә јығынҹаға ҝәлән бүтүн инсанлары үзҝөрәнлик етмәдән јахшы гаршыламалы вә Падшаһлыг хәбәрини һәр кәсә тәблиғ етмәлијик.
[31-ҹи сәһифәдәки шәкилләр]
Фидијәнин онун өдәнилмәсиндән әввәлки ҝүнаһлара тәтбиг едилмәси мүмкүндүрмү?