Ҝәнҹләр, Јеһоваја хидмәти сечин
«Бу ҝүн кимә гуллуг едәҹәјинизи өзүнүз сечин» (ЈЕШУА 24:15).
1, 2. Христиан дининдә һансы сәһв вәфтиз нөвләри ҝениш јајылыб?
«ГОЈУН ушаглар Мәсиһи дәрк етмәјә гадир оланда мәсиһчи олсунлар». Бу сөзләр ерамызын икинҹи әсринин сонунда јашамыш илаһијјатчы Тертуллиана мәхсусдур. Онун ҝүнләриндә дөнүк христианлыгда көрпәләрин вәфтиз едилмәси көк салмаға башлајырды. Тертуллиан буна гаршы е’тираз едирди. Килсә атасы Августин Тертуллианын сөзләринә вә Мүгәддәс Китаба зидд олан диҝәр фикри ирәли сүрүрдү. О иддиа едирди ки, вәфтиз илк ҝүнаһын ләкәсини јујур вә әҝәр көрпә вәфтиз едилмәмиш өләрсә, одлу ҹәһәннәмә мәһкум едилир. Бу, көрпәләрин мүмкүн гәдәр тез вәфтиз едилмәсинә ҝәтириб чыхартды.
2 Христиан дининин әсас ҹәрәјанларында бу адәтә индијәдәк риајәт едилир. Бундан әлавә, тарихдән мә’лумдур ки, өзләрини Мәсиһин давамчылары адландыран халгларын һөкмдарлары вә дини рәһбәрләри истила едилмиш «бүтпәрәст» халглары мәҹбури шәкилдә вәфтиз едирдиләр. Лакин нә көрпәләрин, нә дә бөјүкләрин мәҹбури вәфтизи Мүгәддәс Китаба әсасланмамышдыр.
Бу ҝүн һеч ким анаданҝәлмә Аллаһа һәср олунмур
3, 4. Мәсиһчи аиләләриндә бөјүјән ушаглара өзләрини Аллаһа көнүллү һәср етмәјә нә көмәк едә биләр?
3 Аллаһын Кәламы ҝөстәрир ки, әҝәр валидејнләрдән һеч олмаса бири садиг мәсиһчидирсә, Јеһова онларын ушагларыны ‘мүгәддәс’ һесаб едир (1 Коринфлиләрә 7:14). Демәк олармы ки, белә ушаглар Аллаһын һәср олунмуш хидмәтчиләридир? Јох. Амма мәсиһчи аиләләриндә бөјүмүш ушаглар, алдыглары тә’лим сајәсиндә өзләрини ҝәләҹәкдә Јеһоваја көнүллү сурәтдә һәср едә биләрләр. Мүдрик падшаһ Сүлејман јазмышды: «Оғлум, атанын әмрини јеринә јетир, ананын өјрәтдикләрини атма ... Ҝәзәндә онлар сәнә јол ҝөстәрәр, јатанда сәни һифз едәр, ојананда сәнә мәсләһәт верәр. Бу әмр чырагдыр, бу тә’лим нурдур, тәрбијә үчүн едилән мәзәммәт һәјат јолудур» (Сүлејманын мәсәлләри 6:20-23).
4 Әҝәр ушаглар мәсиһчи валидејнләрин рәһбәрлијинә риајәт етсәләр, бу онлары мүдафиә едә биләр. Сүлејман давам едир: «Һикмәтли оғул атасыны севиндирәр, ахмаг оғул анасына дәрд ҝәтирәр». «Оғлум, динлә, һикмәтли ол, гәлбини дүз јола бағла» (Сүлејманын мәсәлләри 10:1; 23:19). Бәли, валидејнләринизин тәрбијәси сизә фајда ҝәтирсин дејә, онларын мәсләһәт вә өјүд-нәсиһәтләринә үрәкдән риајәт етмәлисиниз. Сиз һикмәтли доғулмамысыныз, амма ‘һикмәтли ола’ вә ‘һәјат јолу’ илә көнүллү јеријә биләрсиниз.
‘Нәсиһәт’ нәдир?
5. Павел ушаглара вә аталара һансы мәсләһәти верди?
5 Һәвари Павел јазырды: «Еј ушаглар, Рәбб јолунда валидејнләринизә итаәт един, чүнки бу әдаләтлидир. “Атана вә анана һөрмәт ет ки, сәнә сәадәт јар олсун вә јер үзүндә узунөмүрлү оласан”. Бу, дахилиндә вә’д олан илк әмрдир. Еј аталар, сиз дә ушагларынызы гәзәбләндирмәјин, анҹаг онлары Рәббин тәрбијә вә нәсиһәти илә бөјүдүн» (Ефеслиләрә 6:1-4).
6, 7. Ушаглары ‘Рәббин нәсиһәти’ илә бөјүтмәк нә демәкдир вә нә үчүн буну «бејинин долдурулмасы» адландырмаг дүзҝүн дејил?
6 Демәк олармы ки, мәсиһчи валидејнләр өвладларыны ‘Рәббин тәрбијәси вә нәсиһәти илә бөјүдүрләрсә’, онлара пис тә’сир ҝөстәрирләр? Әсла, јох! Мәҝәр валидејнләри өз ушагларына дүз вә фајдалы сајдыглары шејләри өјрәтдикләринә ҝөрә тәнгид етмәк дүзҝүндүрмү? Атеистләр ушагларына Аллаһын мөвҹуд олмадығыны өјрәтдикләринә ҝөрә тәнгид едилмирләр. Католикләр әгидәләрини өвладларына ашыламағы өзләринә борҹ сајырлар вә буна ҝөрә онлары һеч ким тәнгид етмир. Јеһованын Шаһидләри әсас һәгигәтләр вә әхлаг принсипләринә даир Аллаһын нөгтеји-нәзәрини өвладларына ашылајанда, онлары ушагларынын бејинләрини долдурмагда иттиһам етмәк дүзҝүн дејил.
7 «Әһди-Ҹәдидин илаһијјат лүғәти»нә әсасән, Ефеслиләрә 6:4 ајәсиндә ‘нәсиһәт’ кими тәрҹүмә олунан јунан сөзү алтында «дүшүнҹә тәрзинин ислаһ едилмәсинә, сәһвин дүзәлмәсинә, руһани әһвал-руһијјәнин јахшылашдырылмасына» јөнәлдилән просес нәзәрдә тутулур. Јенијетмә һәмјашыдларын тәзјиги алтында һамы кими олмаг истәдији үчүн һәрдән валидејнләрин сөзүндән чыхырса, бу һалда ким пис тә’сир ҝөстәрмәкдә иттиһам едилмәлидир — валидејнләр, јохса јенијетмәнин һәмјашыдлары? Һәмјашыдлар ҝәнҹи наркотикләр гәбул етмәјә, сәрхош оланадәк ичмәјә вә ја әхлагсызлыға тәһрик едәндә, валидејнләр ушағына бу һәрәкәтләрин нәјә ҝәтириб чыхармасыны изаһ едиб дүшүнҹә тәрзини ислаһ етмәјә чалышанда, мәҝәр онлары тәнгид атәшинә тутмаг дүздүрмү?
8. Тимотеј алдығы тә’лимин һәгигәт олдуғуна неҹә ‘әмин’ олду?
8 Һәвари Павел ҝәнҹ Тимотејә јазмышды: «Өјрәндијин вә әмин олдуғун шејләрә әмәл етмәкдә давам ет, чүнки бунлары кимдән өјрәндијини билирсән. Мүгәддәс Јазылары да ушаглыгдан е’тибарән билирсән. Бу Јазылар, Мәсиһ Исаја иман васитәсилә сәнә хилас ҝәтирән һикмәти вермәјә гадирдир» (2 Тимотејә 3:14, 15). Тимотејин анасы вә нәнәси Мүгәддәс Јазылардан истифадә едәрәк она еркән јашындан Аллаһа мөһкәм иман ашылајырдылар (Һәвариләрин ишләри 16:1; 2 Тимотејә 1:5). Өзләри мәсиһчи оландан сонра да, Тимотеји мәсиһчилији гәбул етмәјә мәҹбур етмирдиләр, әксинә, Мүгәддәс Јазылардан әсаслы дәлилләр ҝәтирмәклә вә мүлаһизәләр јүрүтмәклә ону ‘әмин’ едирдиләр.
Јеһова сәнә сечим тәгдим едир
9. а) Шүурлу мәхлугларына Јеһова нә бәхш етмишдир вә нәјә ҝөрә? б) Аллаһын ваһид Оғлу ирадә азадлығындан неҹә истифадә етди?
9 Јеһова Өз ирадәсини јеринә јетирмәк үчүн инсанлары програмлашдырылмыш робот кими јарада биләрди. Амма О, бизи ирадә азадлығы илә јаратды. Аллаһымыз Она өз хошумузла хидмәт етмәјимизи истәјир. Јашындан асылы олмајараг инсанларын Она мәһәббәтдән ирәли ҝәләрәк хидмәт етмәләри Аллаһы чох севиндирир. Јеһова, Онун ирадәсинә көнүллү табе олмагда мүкәммәл нүмунә гојан ваһид Оғлу барәдә демишдир: «Бу Мәним севимли Оғлумдур, Ондан чох мәмнунам» (Матта 3:17). Илкин Оғул Атасына деди: «Еј Аллаһым, Сәнин истәјинә әмәл етмәк мәнә зөвг верир, ганунун гәлбимдәдир» (Мәзмур 40:8; Ибраниләрә 10:9, 10).
10. Јеһова Она мәгбул шәкилдә хидмәт етмәк истәјәнләрдән нә ҝөзләјир?
10 Јеһова, Оғлунун рәһбәрлији алтында Она хидмәт едәнләрдән ирадәсинә көнүллү табе олаҹагларыны ҝөзләјир. Мәзмурчу белә бир пејғәмбәрлик сөјләмишдир: «Дөјүш ҝүнү әсҝәрләрин көнүллү олараг дөјүшә ҝедәҹәк, ҝәнҹләрин сәһәр шеһи кими мүгәддәс либасыны ҝејиб јанына ҝәләҹәк» (Мәзмур 110:3). Јеһованын бүтүн тәшкилаты — һәм ҝөјдәки, һәм јердәки һиссәси — Онун ирадәсинә көнүллү табе олараг фәалијјәт ҝөстәрир.
11. Мәсиһчи аиләләрдә бөјүјән ҝәнҹләрин гаршысында һансы сечим дурур?
11 Беләликлә, ҝәнҹләр, билин ки, нә валидејнләриниз, нә дә јығынҹаг ағсаггаллары сизи вәфтиз олмаға мәҹбур етмәјәҹәкләр. Јеһоваја хидмәт етмәк арзусу сизин үрәјиниздән ҝәлмәлидир. Гәдим заманларда јашајан Јешуа исраиллиләрә демишди: «Сәмимијјәтлә вә сәдагәтлә Она [Јеһоваја] гуллуг един... Бу ҝүн кимә гуллуг едәҹәјинизи өзүнүз сечин» (Јешуа 24:14-22). Бу сизә дә аиддир, Јеһоваја һәср олунмаг вә Онун ирадәсини јеринә јетирмәк гәрары сизин шәхси гәрарыныз олмалыдыр.
Үзәринә мәс’улијјәт ҝөтүрмәк
12. а) Валидејнләр ушагларыны тәрбијә етмәләринә бахмајараг, онларын јеринә һансы гәрары верә билмәзләр? б) Ҝәнҹләр гәбул етдикләри гәрарларына ҝөрә Аллаһ гаршысында нә вахт мәс’улијјәт дашымаға башлајырлар?
12 Вахт ҝәләҹәк ки, валидејнләринизин садиглији сизин үчүн даһа мүдафиә олмајаҹагдыр (1 Коринфлиләрә 7:14). Шаҝирд Јагуб јазмышды: «Јахшылыг етмәји билән, амма етмәјән ҝүнаһ ишләдир» (Јагуб 4:17). Валидејнләр өвладларынын, өвладлар исә валидејнләринин јеринә Аллаһа хидмәт едә билмәзләр (Језекел 18:20). Сәнин Јеһова вә Онун нијјәтләри һаггында билијин вармы? Өјрәндикләрини баша дүшмәк вә Аллаһла шәхси мүнасибәтләр јаратмаг үчүн кифајәт гәдәр бөјүмүсәнми? Демәли, Јеһова сәни Она хидмәт етмәк үчүн кифајәт гәдәр јеткин һесаб едир.
13. Вәфтиз олунмамыш ҝәнҹләр өзләринә һансы суалы вермәлидирләр?
13 Сән мәсиһчи аиләсиндә тәрбијә алан, јығынҹаг ҝөрүшләринә ҝәлән вә һәтта Падшаһлыг һаггында хош хәбәрин тәблиғиндә иштирак едән вәфтиз олунмамыш јенијетмәсәнми? Белә исә, бу суала виҹданла ҹаваб вер: «Мән бунлары нә үчүн едирәм — валидејнләримин тәләби олдуғу үчүн, јохса Јеһованы севдијим үчүн?» ‘Аллаһын јахшы, мәгбул вә камил ирадәсинин нә олдуғуна’ өзүн әмин олмусанмы? (Ромалылара 12:2).
Вәфтиз олунмағыны нә үчүн тә’хирә салырсан?
14. Мүгәддәс Китабдакы һансы нүмунәләр ҝөстәрир ки, тутарлы сәбәб олмадан вәфтизи тә’хирә салмаг лазым дејил?
14 «Вәфтиз олунмағыма нә әнҝәл вар?» Һәбәшистанлы, Исанын Мәсиһ олдуғуну өјрәндикдән сонра бу суалла мүждәчи Филипә мүраҹиәт етди. О, Мүгәддәс Јазылары кифајәт гәдәр јахшы билирди вә баша дүшүрдү ки, мәсиһчи јығынҹағынын бир үзвү кими Јеһоваја хидмәт етмәк гәрарыны гәбул етдијини һамынын гаршысында бәјан етмәји тә’хирә салмамалыдыр. Атдығы аддым она чох севинҹ ҝәтирди (Һәвариләрин ишләри 8:26-39). Лидија адлы бир гадын да ‘Павелин сөјләдикләринә диггәт јетирдикдән’ дәрһал сонра аиләсилә бирҝә ‘вәфтиз олунду’ (Һәвариләрин ишләри 16:14, 15). Филипи шәһәриндәки зиндан ҝөзәтчиси ‘она Рәббин кәламыны тәблиғ едән’ Павел вә Силаја гулаг асдыгдан сонра «бүтүн евиндәкиләрлә бәрабәр дәрһал вәфтиз олунду» (Һәвариләрин ишләри 16:25-34). Әҝәр Јеһова вә Онун нијјәти һаггында әсас билијин варса, Онун ирадәсини јеринә јетирмәк истәјир, јығынҹагда јахшы адла таныныр, мәсиһчи ҝөрүшләринә мүнтәзәм ҝәлир вә тәблиғ ишиндә фәал иштирак едирсәнсә, онда вәфтиз олунмағына әнҝәл олан нәдир? (Матта 28:19, 20).
15, 16. а) Һансы јанлыш фикир бир чох ҝәнҹләри вәфтиз олунмагдан чәкиндирә биләр? б) Һәср вә вәфтиз олунма ҝәнҹләри неҹә мүдафиә едә биләр?
15 Бәлкә сән ҝәләҹәкдә һансыса јанлыш һәрәкәтә јол верәҹәјини фикирләширсән вә Аллаһ гаршысында мәс’улијјәтдән горхдуғундан бу аддымы атмаға тәрәддүд едирсән? Ҝәл фикирләшәк: мәҝәр нә вахтса јол гәзасына дүшмәкдән горхдуғун үчүн сүрүҹүлүк вәсигәси алмагдан имтина едәрдинми? Әлбәттә ки, јох! Демәли, вәфтиз үчүн тәләбләрә мүвафигсәнсә, бу аддымы атмаға тәрәддүд етмәмәлисән. Һәјатыны Јеһоваја һәср етмәк гәрарын, сәни јанлыш һәрәкәтләрә јол вермәмәк үчүн әлиндән ҝәләни етмәјә тәшвиг едәҹәкдир (Филипилиләрә 4:13). Јенијетмәләр, елә дүшүнмәјин ки, вәфтиз олунмағынызы тә’хирә салмагла, мәс’улијјәтдән бојун гачыраҹагсыныз. Гәрарларыныза ҝөрә мәс’улијјәт дашыјаҹағыныз јаша чатанда, вәфтиз олуб-олмадығыныздан асылы олмајараг, һәрәкәтләринизә ҝөрә Јеһова гаршысында ҹаваб верәҹәксиниз (Ромалылара 14:11, 12).
16 Дүнјанын мүхтәлиф өлкәләриндә јашајан бир чох мәсиһчиләр, ҝәнҹ јашларында вәфтиз олдугларынын онлара чох көмәк етдијини дејир. Гәрби Авропа өлкәләринин бириндә јашајан 23 јашлы ҝәнҹин нүмунәсинә диггәт јетирәк. 13 јашында вәфтиз олунмасы она ‘ҝәнҹлик еһтирасларына’ ујмамаға көмәк етди (2 Тимотејә 2:22). Јенијетмә јашларында о, гаршысына таммүддәтли хидмәтчи олмаг мәгсәдини гојду. Бу ҝүн о, Јеһованын Шаһидләринин филиалларын бириндә бөјүк севинҹлә хидмәт едир. Сән дә дахил олмагла, Јеһоваја хидмәт етмәји сечән бүтүн ҝәнҹләри бол-бол хејир-дуалар ҝөзләјир.
17. Һансы саһәләрдә ‘Рәббин ирадәсинин нә олдуғуну гаврамалыјыг’?
17 Һәср вә вәфтиз олунма јени һәјатын башланғыҹыдыр, бундан сонра биз һәјатымызын һәр саһәсиндә Јеһованын ирадәсини нәзәрә алырыг. Һәср олунмағымыза мүвафиг јашамаг ‘һәр фүрсәтдән истифадә етмәји’ нәзәрдә тутур. Биз буну неҹә едирик? Вахтымызы бош мәшғулијјәтләрә сәрф етмәк әвәзинә, бундан сонра Мүгәддәс Китабы дәриндән тәдгиг етмәјә, мәсиһчи ҝөрүшләринә вә Аллаһын Падшаһлығы һаггында хош хәбәрин фәал сурәтдә тәблиғинә сәрф етмәклә (Ефеслиләрә 5:15, 16; Матта 24:14). Јеһоваја һәср олунаркән вердијимиз вә’д вә Онун ирадәсини јеринә јетирмәк арзусу һәјатымызын бүтүн саһәләринә мүсбәт тә’сир ҝөстәрир. Мәсәлән, бураја неҹә истираһәт етмәјимиз, гидаланмағымыз, һәмчинин һансы мусиги нөвүнә мејл салмағымыз аиддир. Нәјә ҝөрә әбәдијјәт боју зөвг алаҹағын әјләнҹәләри сечмәјәсән? Минләрлә хошбәхт мәсиһчи тәсдиг едә биләр ки, ‘Рәббин ирадәсинә’ зидд олмајан бир чох фајдалы әјләнҹәләр вар (Ефеслиләрә 5:17-19).
«Гој сизинлә ҝедәк»
18. Ҝәнҹләр өзләринә һансы суалы вермәлидирләр?
18 Б. е. ә. 1513-ҹү илдән ерамызын 33-ҹү илинин Пентикост ҝүнүнәдәк Јеһованын јер үзүндә Она ибадәт едән вә Онун һаггында шәһадәт едән тәшкил олунмуш халгы вар иди (Јешаја 43:12). Ҝәнҹ исраиллиләр анаданҝәлмә Аллаһа һәср олунмуш халгын үзвү олурдулар. Пентикост ҝүнүндән е’тибарән исә јер үзүндә Јеһованын «ады наминә» тәшкил олунмуш јени ‘халг’, руһани Исраил мөвҹуддур (1 Петер 2:9, 10; Һәвариләрин ишләри 15:14; Галатијалылара 6:16). Һәвари Павел јазмышдыр ки, Мәсиһ «Өзүнә хүсуси вә јахшы ишләрә сә’јли бир халг» тәмизләјиб (Титуса 2:14). Сиз, ҝәнҹләр, бу халгы өзүнүз тапмалысыныз. Бир дүшүнүн, Мүгәддәс Китаб принсипләринә мүвафиг јашајан, Јеһоваја Онун садиг Шаһидләри кими хидмәт едән вә Аллаһын Падшаһлығынын бәшәријјәтин јеҝанә үмиди олдуғуну тәблиғ едән «салеһ милләт» һансыдыр? (Јешаја 26:2-4). Христиан вә диҝәр динләрин нүмајәндәләринә нәзәр јетирин вә онларын давранышыны Мүгәддәс Китабда Аллаһын һәгиги хидмәтчиләри үчүн гојулан тәләбләрлә мүгајисә един.
19. Бүтүн дүнјада јашајан милјонларла инсан нәјә әмин олду?
19 Бир чох ҝәнҹ дахил олмагла, бүтүн дүнјада милјонларла инсан әмин олмушдур ки, Јеһованын Шаһидләринин мәсһ едилмиш галығы мәһз һәмин ‘салеһ милләтдир’. Онлар бу руһани исраиллиләрә дејирләр: «Гој сизинлә ҝедәк, чүнки Аллаһын сизинлә олдуғуну ешитмишик» (Зәкәријјә 8:23). Биз үмид вә арзу едирик ки, сиз, ҝәнҹләр, Јеһованын халгынын үзвү олмағы гәрара алаҹаг вә Онун јени дүнјасында јашамаг үчүн ‘һәјаты сечәҹәксиниз’ (Ганунун тәкрары 30:15-20; 2 Петер 3:11-13).
Тәкрар үчүн суаллар?
• ‘Нәсиһәт’ нәдир?
• Јеһова һансы хидмәти гәбул едир?
• Мәсиһчи аиләсиндә бөјүјән бүтүн ҝәнҹләрин гаршысында һансы сечим дурур?
• Тутарлы сәбәб олмадан вәфтизи тә’хирә салмаг нәјә ҝөрә лазым дејил?
[27-ҹи сәһифәдәки шәкилләр]
Сән кимә гулаг асаҹагсан?
[28-ҹи сәһифәдәки шәкил]
Һәср вә вәфтиз олунма сәни һансы мә’нада мүдафиә едә биләр?
[31-ҹи сәһифәдәки шәкил]
Сәни вәфтиздән нә чәкиндирир?