Сән неҹә руһ тәзаһүр етдирирсән?
«Гој Ағамыз Иса Мәсиһ өз лүтфү илә овгатыныза [руһунуза] хејир-дуа версин» (ФИЛИМ. 25).
ҸАВАБ ВЕРӘ БИЛӘРСӘНМИ?
Нәјә ҝөрә ҝөстәрдијимиз руһа диггәт јетирмәлијик?
Биз һансы әһвал-руһијјәдән өзүмүзү ҝөзләмәлијик вә буну неҹә етмәк олар?
Јығынҹагда јахшы руһу неҹә тәзаһүр етдирә биләрик?
1. Јығынҹаглара јаздығы мәктубларында Павел дәфәләрлә нәји гејд етмишди?
ҺӘВАРИ ПАВЕЛ јығынҹаглара јаздығы мәктубларда Аллаһын вә Мәсиһин бу јығынҹагларын тәзаһүр етдирдији руһдан разы галдығына үмид етдијини дәфәләрлә гејд етмишди. Мәсәлән, «Галатијалылара мәктуб»унда о јазмышды: «Гој Ағамыз Иса Мәсиһ өз лүтфү илә овгатыныза [руһунуза] хејир-дуа версин. Амин» (Галат. 6:18). Бурада истифадә олунан овгат, јәни руһ сөзүнүн мәнасы нәдир?
2, 3. а) Павел мәктубларында тез-тез ишләтдији «овгат», јәни «руһ» сөзү алтында нәји нәзәрдә тутурду? б) Тәзаһүр етдирдијимиз руһла әлагәдар өзүмүзә һансы суаллары верә биләрик?
2 Павел бу контекстдә истифадә етдији «овгат», јәни «руһ» сөзү алтында бизи мүәјјән тәрздә данышмаға вә ја һәрәкәт етмәјә тәшвиг едән гүввәни нәзәрдә тутурду. Мәсәлән, инсан нәзакәтли, диггәтли, мүлајим, сәхавәтли вә ја бағышлајан ола биләр. Мүгәддәс Китабда сакит вә һәлим руһ барәдә мүсбәт тәрздә данышылыр (1 Пет. 3:4, һашијә; Сүл. мәс. 17:27). Елә инсанлар да вар ки, онлар кинајәли, пулпәрәст, күсәјәндирләр вә һәтта мүстәгиллик руһу тәзаһүр етдирирләр. Инсанын натәмизлик, итаәтсизлик, әләлхүсус да үсјанкарлыг руһуна гапылмасы даһа тәһлүкәлидир.
3 Беләликлә, Павел «гој Ағамыз сәнин овгатына [руһуна] хејир-дуа версин» кими ифадәләр ишләтмәклә гардашлары Аллаһын ирадәсинә ујғун вә Мәсиһин шәхсијјәтинә бәнзәр руһ тәзаһүр етдирмәјә тәшвиг едирди (2 Тим. 4:22; Колослулара 3:9—12 ајәләрини оху). Јахшы оларды ки, биз өзүмүздән сорушаг: «Мән нә ҹүр руһ тәзаһүр етдирирәм? Аллаһа мәгбул олан руһу даһа долғун шәкилдә неҹә тәзаһүр етдирә биләрәм? Јығынҹағын мүсбәт әһвал-руһијјәсинә вердијим төһфәни јахшылашдыра биләрәмми?» Бир нүмунәјә бахаг: ҝүнәбахан тарласында битән һәр бир ҝүнәбаханын шөлә сачан сәбәти тарланын үмуми ҝөзәллијинә рәнҝ гатыр. Бизи јығынҹағын үмуми ҝөзәллијинә рәнҝ гатан белә бир чичәјә бәнзәтмәк олармы? Әлбәттә ки, һәр биримиз буна ҹан атмалыјыг. Ҝәлин ҝөрәк Аллаһа мәгбул олан руһ тәзаһүр етдирмәк үчүн нә едә биләрик.
ДҮНЈАНЫН РУҺУНДАН ӨЗҮНҮ ҜӨЗЛӘ
4. «Дүнјанын руһу» нәдир?
4 Мүгәддәс Јазыларда дејилир: «Биз дүнјанын руһуну јох, Аллаһдан ҝәлән руһу алдыг» (1 Кор. 2:12). «Дүнјанын руһу» нәдир? Бу, Ефеслиләрә 2:2 ајәсиндә хатырланан елә һәмин руһдур. Орада јазылыб: «Бир заманлар тәгсир вә ҝүнаһларыныз ичиндә бу дөврә ујғунлашыб јашајырдыныз, һавадакы һакимијјәтин һөкмдарына, һал-һазырда итаәтсиз адамларда фәалијјәт ҝөстәрән руһа ујмушдунуз». «Һава» дүнјанын руһу, јәни дүнјанын көкләндији әһвал-руһијјәдир. Бу руһ һава кими бизи әһатә едир. Чох вахт дүнјанын руһу «һеч кәсин мәнә нә етмәли олдуғуму демәјә ихтијары јохдур» вә ја «өз һүгугларын уғрунда мүбаризә апар» кими дүшүнән бир чох инсанларда өзүнү бүрузә верир. Шејтан дүнјасында јашајан белә адамлары Мүгәддәс Китаб итаәтсиз адландырыр.
5. Исраил иҹмасында бәзиләри неҹә руһ тәзаһүр етдирирдиләр?
5 Белә әһвал-руһијјә бу ҝүн мејдана чыхмајыб. Һәлә Мусанын ҝүнләриндә Гораһ Исраил иҹмасынын сәлаһијјәтли шәхсләринә гаршы үсјан галдырмышды. Онун әсас һәдәфи каһин кими хидмәт едән Һарун вә онун оғуллары иди. Ҝүман ки, Гораһ онларын гүсурларыны ҝөрүрдү. Јахуд да, ола билсин, о дүшүнүрдү ки, Муса бу имтијазлы вәзифәни онлара гоһумлары олдуғу үчүн вериб. Сәбәб нә олурса-олсун, тамамилә ајдындыр ки, Гораһын јүрүтдүјү мүһакимәләр инсан дүшүнҹәләри иди вә о, Јеһованын тәјин етдији шәхсләрә гаршы чыхмышды. Гораһ кобудҹасына онлара деди: «Артыг бәсдир!.. Нә үчүн сиз өзүнүзү Рәббин ҹамаатындан үстүн тутурсунуз?» (Сај. 16:3). Тәрәфдарлары Датан вә Авирам да Мусадан ҝилеј-ҝүзар едирдиләр вә онун үзүнә дејирдиләр ки, ҝуја о, онларын үзәриндә ағалыг етмәк фикринә дүшүб. Муса үсјанкарлары чағыртдыранда онлар сајмазјана: «Ҝәлмәјәҹәјик!» — дејә ҹаваб вердиләр (Сај. 16:12—14). Ајдындыр ки, Јеһова онларын тәзаһүр етдирдикләри руһдан наразы иди. О, үсјанкарларын һамысыны мәһв етди (Сај. 16:28—35).
6. Биринҹи әсрдә бәзиләринин пис руһа јолухдуглары нәдән бәлли иди вә бунун сәбәби, еһтимал ки, нә иди?
6 Биринҹи әсрдә дә бәзиләри јығынҹагда мәсулијјәт һәвалә олунан гардашлара тәнгиди јанашырдылар, башга сөзлә, «һакимијјәти сајмыр»дылар (Јәһуда 8). Чох ҝүман ки, һәмин адамлар јығынҹагдакы вәзифәләриндән наразы идиләр. Үстәлик, онлар башгаларыны да Аллаһын һәвалә етдији сәлаһијјәтләрини виҹданла иҹра едән тәјин олунмуш гардашлара гаршы үсјана тәһрик едирдиләр. (3 Јәһја 9, 10 ајәләрини оху.)
7. Јығынҹагда өзүмүзү һансы әһвал-руһијјәдән ҝөзләмәлијик?
7 Ајдындыр ки, бу ҹүр руһа мәсиһчи јығынҹағында јер јохдур. Буна ҝөрә дә белә әһвал-руһијјәјә јолухмагдан өзүмүзү ҝөзләмәлијик. Мусанын вә һәвари Јәһјанын ҝүнләриндә олдуғу кими, буҝүнкү ағсаггаллар да камил дејилләр. Ағсаггаллар шәхсән бизә тәсир едән сәһвләр бураха биләрләр. Әҝәр белә һаллар баш верирсә, јығынҹағын истәнилән үзвүнүн дүнјанын руһуна ујғун шәкилдә давранмасы, јәни шиддәтлә «әдаләтин» бәргәрар олунмасыны вә ја «гардаш барәдә өлчү ҝөтүрмәји» тәләб етмәси неҹә дә бөјүк сәһв оларды! Ола билсин, Јеһова хырда сәһвләрә ҝөз јуммаға үстүнлүк версин. Биз дә Онун кими даврана биләрикми? Јығынҹагда ҹидди ҝүнаһ төрәдән бәзи шәхсләр ағсаггалларда гүсур кими гијмәтләндирдикләри шејләрә ҝөрә онлара көмәк етмәјә тәјин олунан комитә гаршысына ҝәлмәкдән имтина етмишләр. Буну садәҹә һәкимдән хошу ҝәлмәдији үчүн мүалиҹәдән имтина едән хәстәнин вәзијјәтинә бәнзәтмәк олар.
8. Һансы ајәләр јығынҹагда нәзарәтчи тәјин едилән гардашлара дүзҝүн ҝөзлә бахмаға көмәк едәҹәк?
8 Бу ҹүр руһа јолухмамаг үчүн нә етмәлијик? Биз јадда сахламалыјыг ки, Мүгәддәс Китаба әсасән, Иса «сағ әлиндә једди улдуз» сахлајыр. «Улдуз»лар мәсһ олунмуш нәзарәтчиләри, ҝениш мәнада исә јығынҹагдакы бүтүн нәзарәтчиләри тәмсил едир. Иса әлиндәки «улдуз»лары мүнасиб билдији сәмтә јөнәлтмәк игтидарындадыр (Вәһј 1:16, 20). Демәли, мәсиһчи јығынҹағынын Башы кими, Иса бүтүн ағсаггаллар шураларына там нәзарәт едир. Әҝәр онлардан киминсә дүзәлишә, һәгигәтән дә, еһтијаҹы варса, «ҝөзләри алов [сачан]» Иса бунун өз вахтында вә мүнасиб билдији тәрздә јолуна гојулмасынын гајғысына галаҹаг (Вәһј 1:14). Биздән исә мүгәддәс руһла тәјин едиләнләрә еһтирам бәсләмәк тәләб олунур, чүнки Павел јазмышды: «Сизә рәһбәрлик едәнләрә итаәт един вә табе олун, ахы онлар һесабат верәҹәк адамлар кими ҝеҹә-ҝүндүз сизин рифаһынызы дүшүнүрләр. Гојун онлар буну аһ-зарла јох, севинҹлә етсинләр ки, сизә зәрәр дәјмәсин» (Ибр. 13:17).
9. а) Мәсиһчијә дүзәлиш вә ја мәсләһәт вериләркән нә үзә чыха биләр? б) Мәзәммәтә гаршы ҝөстәрилән ән јахшы реаксија һансыдыр?
9 Мәсиһчинин һансы руһа саһиб олдуғу она дүзәлиш верилдији вә ја мәсулијјәтләри әлиндән алындығы заман да бәлли олур. Ағсаггаллар зоракы видеоојунлар ојнајан бир ҝәнҹ гардаша нәзакәтлә мәсләһәт вермишдиләр. Әфсуслар олсун ки, о, мәсләһәти гулагардына вурду вә артыг Мүгәддәс Китабдакы тәләбләрә ујғун ҝәлмәдији үчүн хидмәти көмәкчи кими фәалијјәти дајандырылды (Мәз. 11:5; 1 Тим. 3:8—10). Бундан сонра гардаш һамыја гәрардан наразы олдуғуну демәјә башлады; филиала ағсаггаллар барәдә тәнгиди мәктублар јазырды вә һәтта јығынҹағынын диҝәр үзвләрини дә буна тәһрик едирди. Һәгигәтән дә, әмәлләримизә бәраәт газандырмаг мәгсәдилә јығынҹагда сүлһү позмаг бизим өзүмүз үчүн әкс нәтиҹәләр ҝәтирир. Мәҝәр мәзәммәтә нәзәрдән гачырдығымыз сәһвә ҝөзүмүзү ачан бир шеј кими бахмалы дејиликми? Сонра да сакитҹә верилән мәсләһәтләри тәтбиг етмәк даһа јахшы олмаздымы? (Мәрсијәләр 3:28, 29 ајәләрини оху.)
10. а) Јагуб 3:16—18 ајәләриндән јығынҹагда јахшы вә пис руһ барәдә нә өјрәнирик? Изаһ ет. б) «Јухарыдан назил олан һикмәт»ә әсасән давранмаг һансы бәһрәләри ҝәтирир?
10 Јагуб 3:16—18 ајәләриндән јығынҹагда дүзҝүн вә дүзҝүн олмајан әһвал-руһијјә барәдә өјрәнирик. Биз охујуруг: «Пахыллыг вә һөҹәт олан јердә гармагарышыглыг вә һәр ҹүр пислик һөкм сүрүр. Лакин јухарыдан назил олан һикмәт илк нөвбәдә сафдыр, сонра сүлһпәрвәр, агил, итаәткардыр, мәрһәмәтли вә фајдалы бәһрәләрлә долудур. О, ајры-сечкилик етмәз, онда ријакарлыг јохдур. Салеһлик бәһрәсинин тохуму исә сүлһпәрвәрләр үчүн әмин-аманлыг шәраитиндә әкилир». Әҝәр биз «јухарыдан назил олан һикмәт»ә ујғун даврансаг, Аллаһын хүсусијјәтләрини тәзаһүр етдирәҹәјик. Бу исә бизи јығынҹағын јахшы әһвал-руһијјәсинә төһфә вермәјә тәшвиг едәҹәк.
ЈЫҒЫНҸАГДА ҺӨРМӘТҸИЛ ДАВРАН
11. а) Дүзҝүн руһа саһиб олмаг бизә нәдән гачмаға көмәк едәҹәк? б) Давудун нүмунәсиндән нә өјрәнирик?
11 Биз јаддан чыхартмамалыјыг ки, Јеһова ағсаггаллары «сүрүјә нәзарәт етмәк үчүн тәјин едиб» (Һәв. иш. 20:28; 1 Пет. 5:2). Буна ҝөрә биз дәрк едирик ки, ағсаггал олуб-олмамағымыздан асылы олмајараг, Аллаһын гурулушуна һөрмәтлә јанашмаг мүдрик һәрәкәтдир. Әҝәр дүзҝүн руһа малик олсаг, һакимијјәт вә ја мәсулијјәт саһиби олуб-олмамағымыз бизим үчүн бир о гәдәр дә әһәмијјәтли олмајаҹаг. Исраилин падшаһы Шаул Давудун онун һакимијјәти үчүн тәһлүкә јаратдығыны һисс едәндә она «чәп-чәп бахмаға башлады» (1 Шам. 18:9). Падшаһда пис руһ јаранды вә о һәтта Давуду өлдүрмәк фикринә дүшдү. Вәзифәсини итирәҹәјиндән нараһат олан Шаул кими олмаг әвәзинә, Давуд кими олмаг даһа јахшыдыр. Үзләшдији һагсызлыға ҝөрә әзијјәт чәкмәсинә бахмајараг, бу ҝәнҹ Аллаһдан сәлаһијјәт алан инсанлара һәмишә һөрмәтлә јанашырды. (1 Шамуел 26:23 ајәсини оху.)
12. Јығынҹагда бирлијин горунмасына өз төһфәмизи неҹә верә биләрик?
12 Фикирләрин мүхтәлифлији бәзән јығынҹагда, һәтта ағсаггаллар арасында әсәбләрин ҝәрилмәсинә сәбәб олур. Белә вахт Мүгәддәс Китабдакы нөвбәти мәсләһәтләр дадымыза чата биләр: «Бир-биринизә һөрмәтдә һәмишә тәшәббүс ҝөстәрин... Өз ҝөзүнүздә ағыллы олмајын» (Ром. 12:10, 16). Јалныз бизим фикримизин дүз олдуғуна исрар етмәк әвәзинә, биз дәрк етмәлијик ки, адәтән, бир нечә дүзҝүн нөгтеји-нәзәр олур. Башгаларынын бахышларыны анламаға чалышанда јығынҹағын бирлијинә төһфә вермиш олуруг (Филип. 4:5).
13. Шәхси фикримизә неҹә јанашмалыјыг вә буну һансы Мүгәддәс Китаб нүмунәсиндән ҝөрмәк олар?
13 Бу о демәкдирми ки, јығынҹагда нәји исә дәјишмәјә еһтијаҹ олдуғуну ҝөрәндә фикримизи сөјләмәк дүзҝүн дејил? Хејр. Биринҹи әсрдә чох мүбаһисәли бир мәсәлә галхмышды. «Буна ҝөрә дә белә гәрара алынды ки, Павел, Барнаба вә бир нечә... башга гардаш бу мәсәлә илә әлагәдар Јерусәлимә, һәвариләрин вә ағсаггалларын јанына ҝетсинләр» (Һәв. иш. 15:2). Шүбһә јохдур ки, һәр гардашын бу мәсәләјә вә ону неҹә һәлл етмәјә даир шәхси фикри варды. Лакин һәр бири өз фикрини сөјләдикдән вә руһун рәһбәрлијинә ујғун гәрар гәбул едилдикдән сонра артыг онлар фикирләрини јеритмәјә чалышмырдылар. Гәрар барәдә мәктуб јығынҹаглара чатанда гардашлар «руһландырыҹы сөзләрә севиндиләр» вә онларын иманы мөһкәмләнди (Һәв. иш. 15:31; 16:4, 5). Биз дә һансыса мәсәләни мәсул гардашларын диггәтинә чатдырдыгдан сонра ону онларын өһдәсинә бурахмалыјыг.
БАШГАЛАРЫ ИЛӘ МҮНАСИБӘТДӘ ЈАХШЫ РУҺ ТӘЗАҺҮР ЕТДИР
14. Башгалары илә мүнасибәтдә јахшы руһ неҹә тәзаһүр етдирә биләрик?
14 Башгалары илә мүнасибәтдә јахшы руһ тәзаһүр етдирмәјимиз үчүн чохлу имканлар вар. Хәтримизә дәјән инсанлары бағышлајанда чох ҝөзәл давранмыш олуруг. Аллаһын Кәламы бизә дејир: «Бир-биринизә гаршы һәмишә сәбирли олун, биринизин диҝәриндән шикајәти оларса, бир-биринизи үрәкдән бағышлајын. Јеһова сизи үрәкдән бағышладығы кими, сиз дә бир-биринизи үрәкдән бағышлајын» (Колос. 3:13). «Биринизин диҝәриндән шикајәти оларса» ифадәси ҝөстәрир ки, башгаларына әсәбиләшмәк үчүн бизим тутарлы сәбәбләримиз ола биләр. Лакин онларын гүсурларына ҝөрә һәддән артыг нараһатчылыг кечирмәк вә јығынҹагда сүлһү позмаг әвәзинә, биз хидмәтимизи бирҝә давам етдирмәјимиз үчүн Јеһованы тәглид едәрәк үрәкдән бағышламаға чалышырыг.
15. а) Бағышламагла әлагәдар биз Әјјубдан нә өјрәнә биләрик? б) Дуа бизә хош руһ тәзаһүр етдирмәјә неҹә көмәк едир?
15 Әјјуб бағышламагла әлагәдар бизә ҝөзәл нүмунә гојуб. «Тәсәлли вермәк» үчүн она баш чәкән үч достунун аҹы сөзләри ону јараламышды. Буна бахмајараг, Әјјуб онлары бағышлады. Неҹә? О, «достлары үчүн дуа [етди]» (Әјј. 16:2; 42:10). Башгалары үчүн дуа етмәк бизим онлара гаршы мүнасибәтимизи дәјишә биләр. Бүтүн һәмиманлыларымыз үчүн дуа етмәк бизә Мәсиһә хас олан руһ инкишаф етдирмәјә көмәк едәҹәк (Јәһ. 13:34, 35). Баҹы-гардашларымыз үчүн дуа етмәкдән савајы, биз Аллаһдан мүгәддәс руһ да диләмәлијик (Лука 11:13). Аллаһын руһу бизә башгалары илә мүнасибәтдә әсил мәсиһчи хүсусијјәтләрини тәзаһүр етдирмәјә көмәк едәҹәк. (Галатијалылара 5:22, 23 ајәләрини оху.)
АЛЛАҺЫН ТӘШКИЛАТЫНДА САҒЛАМ РУҺУ ГОРУ
16, 17. Тәзаһүр етдирдијимиз руһла әлагәдар шәхсән сән нә етмәјә гәрарлысан?
16 Һәр бир мәсиһчи јығынҹагда сағлам руһун горунмасы үчүн өз төһфәсини верәндә бу неҹә дә ҝөзәл бәһрәләр ҝәтирир! Јәгин ки, бу мәгалә сәнә сағлам руһ тәзаһүр етдирмәјин үчүн һансы саһәләрдә пүхтәләшмәли олдуғуну ҝөрмәјә көмәк етди. Әҝәр беләдирсә, гој Аллаһын Кәламы сәнә һансы дәјишикликләри етмәли олдуғуну ҝөстәрсин (Ибр. 4:12). Јығынҹагда һәрәкәтләринә фикир верән Павел демишди: «Виҹданым һәр ҹәһәтдән раһатдыр. Амма бу мәни салеһ етмир. Јеһова мәни мүһакимә едир» (1 Кор. 4:4).
17 Јухарыдан назил олан һикмәтә ујғун даврансаг, өзүмүз барәдә һәддән артыг јүксәк фикирдә олмасаг вә сәлаһијјәт мәсәләсинә дүзҝүн јанашсаг, јығынҹагда сағлам руһун горунмасына өз төһфәмизи вермиш олаҹағыг. Әҝәр башгаларыны бағышласаг вә диҝәрләри һагда јахшы фикирләшсәк, һәмиманлыларымызла сүлһдә олаҹағыг (Филип. 4:8). Белә даврансаг, әмин ола биләрик ки, Јеһова вә Иса тәзаһүр етдирдијимиз руһдан разы галаҹаглар (Филим. 25).
[14–ҹү сәһифәдәки шәкил]
Исанын ролу үзәриндә дүшүнмәк верилән мәсләһәтләрә даир мүнасибәтинә неҹә тәсир едир?