‘Јадларын сәсиндән’ горунун
“Јад адамын ардынҹа... ҝетмәзләр, лакин ондан гачарлар; чүнки јадларын сәсини танымазлар” (ЈӘҺЈА 10:5).
1, 2. а) Исанын Мәрјәми ады илә чағырмасы она неҹә тә’сир етди вә бу һадисә илә Исанын һансы сөзләри тәсдиг олунур? б) Биз нәјин сајәсиндә Исаја јахын гала биләрик?
ДИРИЛМИШ Иса бош мәзарын јанында дајанмыш гадына бахыр. О, гадыны јахшы таныјыр. Бу, Мәҹдәлли Мәрјәмдир. Ики ил габаг Иса ондан ҹинләри чыхарараг, она шәфа вермишдир. Һәмин вахтдан е’тибарән гадын Исаны вә онун һәвариләрини мүшајиәт едәрәк онларын ҝүндәлик еһтијаҹларынын гејдинә галырды (Лука 8:1-3). Инди, кәдәр ичиндә олан Мәрјәм ағлајыр, чүнки Иса онун ҝөзләри гаршысында өлмүшдү, һал-һазырда исә онун һәтта ҹәсәди белә јох олмушду! Иса ондан сорушур: “Гадын, нә үчүн ағлајырсан? [“Кими ахтарырсан?”, КМ]”. Ону бағбан саныб Мәрјәм ҹаваб верир: “Ҹәнаб, әҝәр Ону сән апардынса, һараја гојдуғуну мәнә сөјлә, мән дә Ону ҝөтүрүм”. О заман Иса дејир: “Мәрјәм!” О дәрһал таныш мүраҹиәти таныјыр. “Мүәллим!” — дејәрәк Мәрјәм севинҹлә уҹадан гышгырыр вә ону гуҹаглајыр (Јәһја 20:11-18).
2 Тә’сир бағышлајыҹы бу һадисә, Исанын бир гәдәр әввәл һаггында бәһс етдији шеји тәсдиг едир. О, өзүнү чобанла, давамчыларыны исә гојунларла мүгајисә едәрәк демишдир ки, чобан өз гојунларыны адлары илә чағырыр вә онлар да онун сәсини таныјырлар (Јәһја 10:3, 4, 14, 27, 28). Бәли, гојунлар өз чобанларынын сәсини таныјыр, елә Мәрјәм дә өз Чобанынын, Мәсиһин сәсини таныды. Бу фикир Исанын мүасир давамчылары һаггында да доғрудур (Јәһја 10:16). Ити ешитмә габилијјәти гојунлара чобанын јахынлығында галмаға имкан вердији кими, бизим руһани анлајышымыз да ејнилә бизә Јахшы Чобанымызын, Иса Мәсиһин изләри илә јеримәјә имкан верир (Јәһја 13:15; 1 Јәһја 2:6; 5:20).
3. Исанын гојун ағылы һаггындакы һекајәси илә әлагәдар һансы суаллар јараныр?
3 Гејд етмәк лазымдыр ки, Исанын сөзләринә әсасән, гојунларын инсан сәсини ајырд етмәк габилијјәтләри онлара јалныз досту дејил, дүшмәни дә танымаға имкан верир. Һијләҝәр дүшмәнләримиз олдуғу үчүн, бу, чох ваҹибдир. Онлар кимләрдир? Неҹә фәалијјәт ҝөстәрирләр? Биз өзүмүзү онлардан неҹә горуја биләрик? Буну билмәк үчүн, ҝәлин Исанын гојун ағылындакы гојунлар барәсиндә даһа нәләр сөјләдијини нәзәрдән кечирәк.
Гапыдан ҝирмәјән
4. Исанын сөзләринә әсасән, гојунлар кимин ардынҹа ҝедир, кимин ардынҹа исә ҝетмирләр?
4 Иса дејир: “Гапыдан ҝирән исә гојунларын чобаныдыр. Кешикчи гапыны она ачар вә гојунлар онун сәсинә гулаг асарлар; о да өз гојунларыны адлары илә чағырар вә онлары чыхарар. Бүтүн гојунларыны чөлә чыхардыгда, онларын габағында ҝедәр; вә гојунлар онун ардынҹа ҝедәрләр; она ҝөрә ки, сәсини таныјырлар. Јад адамын ардынҹа исә ҝетмәзләр, лакин ондан гачарлар; чүнки јадларын сәсини танымазлар” (Јәһја 10:2-5). Иса “сәс” сөзүнү үч дәфә ишләдир. О, ики дәфә чобанын сәсиндән данышыр, үчүнҹү дәфә исә, “јадларын сәсини” хатырладыр. “Јадлар” дејәркән Иса кимләри нәзәрдә тутурду?
5. Биз нәјә ҝөрә “Јәһја” китабынын 10-ҹу фәслиндә хатырланан “јада” гонагпәрвәрлик ҝөстәрмирик?
5 “Јадлар” сөзү алтында Иса гонагпәрвәрлик ҝөстәрилмәјә лајиг олан гәрибләри нәзәрдә тутмурду, ахы Мүгәддәс Китабын орижинал дилиндә гонагпәрвәрлик сөзү һәрфи мә’нада “гәрибләрә мәһәббәт ҝөстәрмәк” демәкдир (Ибраниләрә 13:2). Исанын данышдығы һекајәдәки “јад” дә’вәтсиз ҝәлир. О, ‘гојун ағылына гапыдан ҝирмир, башга јердән ашыр’. О, “оғру вә гулдур”дур (Јәһја 10:1). Аллаһын Кәламында илк дәфә хатырланан оғру вә гулдур кимдир? Шејтан Иблис. Бунун тәсдигини “Тәквин” китабында тапырыг.
‘Јадын сәси’ илк дәфә нә заман ешидилмишдир?
6, 7. Шејтаны нәјә ҝөрә әдаләтли олараг “јад” вә “оғру” адландырмаг олар?
6 Тәквин 3:1-5 ајәләриндә ‘јадын сәсинин’ илк дәфә јер үзүндә ешидилмәси тәсвир едилир. Орада биз, Шејтанын илан васитәсилә илк гадын олан Һәвва илә данышмасы вә ону алдатмасы барәдә охујуруг. Доғрудур, Мүгәддәс Китабын бу јериндә Шејтан “јад” адланмыр. Буна бахмајараг, онун давранышлары, “Јәһја” китабынын 10-ҹу фәслиндә тәсвир олунан “јадын” давранышлары илә чох охшардыр. Онлардан бә’зиләрини нәзәрдән кечирәк.
7 Иса деди ки, “јад”, гојун ағылында олан гурбанларына дүз јох, долајы јолла јахынлашыр. Буна бәнзәр тәрздә Шејтан да гурбанына ачыг дејил, иланын васитәсилә јахынлашды. Бундан ҝөрүнүр ки, Шејтан һијләҝәр вә кәләкбаздыр. Бундан әлавә, “јад” гојун ағылына јахынлашыр ки, гојунлары гануни саһибиндән оғурласын. О, һәтта оғрудан да бетәрдир, чүнки онун мәгсәди “өлдүрмәк вә тәләф етмәк”дир (Јәһја 10:10). Шејтаны да оғру адландырмаг олар. Һәвваны алдадараг, Шејтан онун Јеһоваја мәхсус олан садиглијини мәнимсәди. Һәмчинин Шејтан инсанлары өлүмә дүчар етди. Буна ҝөрә дә о, гатилдир.
8. Шејтан Јеһованын сөзләрини вә нијјәтләрини неҹә тәһриф етди?
8 Шејтанын виҹдансызлығы, Јеһованын сөзләрини вә нијјәтләрини тәһриф етмәсиндән дә ҝөрүнүр. О, Һәввадан сорушду: “Доғруданмы, Аллаһ сизә “бағда олан һеч бир ағаҹын бәһрәләриндән јемәјин” дејиб?” Шејтан өзүнү нараһат олурмуш кими гәләмә верәрәк санки дејирди: “Аллаһ бу ҹүр дүшүнҹәсиз тәләби неҹә верә биләрди?” О давам етди: “Аллаһ билир ки, о мејвәләрдән једијиниз ҝүн ҝөзләриниз ачылаҹаг”. Онун “Аллаһ билир” сөзләринә диггәт јетирәк. Шејтан санки дејирди: “Мән, Аллаһын билдијини билирәм. Мән Онун нијјәтләринин пис олдуғуну билирәм” (Јарадылыш 2:16, 17; 3:1, 5, МКШ). Кәдәрли олса да, Һәвва илә Адәм “јадын сәсинә” гулаг асдылар. Буну етмәклә онлар һәм өзләринин, һәм дә нәсилләринин үзәринә фәлакәт ҝәтирдиләр (Ромалылара 5:12, 14).
9. “Јадларын сәси”нин бу ҝүн дә ҝәлмәси бизи нәјә ҝөрә тәәҹҹүбләндирмәли дејил?
9 Аллаһын халгыны алдатмаг үчүн Шејтан бу ҝүн дә ејни үсуллардан истифадә едир (Вәһј 12:9). О, “јаланчыдыр вә јаланын атасыдыр”, ону тәглид едәрәк Аллаһын хидмәтчиләрини алдатмаға чалышанлар исә онун өвладларыдыр (Јәһја 8:44). Ҝәлин ҝөрәк бизим ҝүнләрдә “јадларын сәси” һансы мәнбәләрдән ҝәлир.
“Јадларын сәси” бу ҝүн һарадан ҝәлир?
10. “Јадларын сәси” һансы мәнбәдән ҝәлир?
10 Алдадыҹы мүлаһизәләр. Һәвари Павел өјүд верирди: “Фәргли вә јад тә’лимләрә гапылмајын [“фәргли вә јад тә’лимләрин сизә саһиб олмасына јол вермәјин”, ЈД]” (Ибраниләрә 13:9). Бурада һансы тә’лимләрдән данышылыр? Әҝәр онлар бизә “саһиб олмаға” гадирдирләрсә, демәли, бу, бизим руһани таразлығымыза пис тә’сир едән тә’лимләрдир. Бу јад тә’лимләр кимдән ҝәлир? Бир дәфә мәсиһчи ағсаггаллара мүраҹиәт едәрәк Павел хәбәрдар етмишдир: “Шаҝирдләри ардларынҹа чәкмәк үчүн јанлыш сөзләр данышан адамлар өз араныздан чыхаҹаглар” (Һәвариләрин ишләри 20:30). Павелин ҝүнләриндә олдуғу кими, бу ҝүн дә елә инсанлар вар ки, бир заманлар мәсиһчи јығынҹағынын үзвләри идиләр, лакин инди онлар “јанлыш сөзләр” данышараг — јарыһәгигәт вә јарыјаландан истифадә едәрәк шаҝирдләри алдатмаға чалышырлар. Һәвари Петерин дедији кими, онлар “ујдурма сөзләр”дән, һәгиги кими ҝөрүнән, әслиндә исә тамамилә бош олан сөзләрдән истифадә едирләр (2 Петер 2:3).
11. 2 Петер 2:1, 3 ајәләриндән ҝөрүндүјү кими, дөнүкләрин һансы үсуллары вә мәгсәдләри вар?
11 Петер дөнүкләрин “ҝизлинҹә јыхыҹы бид’әтләр” салдыгларыны дејәрәк, онларын истифадә етдији үсуллары ифша едир (2 Петер 2:1, 3). Исанын һекајәсиндәки оғру ‘гојун ағылына гапыдан дејил, башга јердән ҝирдији’ кими, дөнүкләр дә бизә хәлвәти үсулларла тә’сир ҝөстәрмәјә чалышырлар (Галатијалылара 2:4; Јәһуда 4). Онларын мәгсәди нәдир? Петер әлавә едир: “Сизи... истисмар едәҹәкләр”. Бәли, өзләринә бәраәт газандырмаг үчүн дөнүкләр һәр нә десәләр дә, онларын әсл мәгсәди, “оғурламаг, өлдүрмәк вә тәләф етмәк”дир (Јәһја 10:10). Бу ҹүр јадлардан горун!
12. а) ‘Јадларын сәсини’ үнсијјәт етдијимиз адамлардан неҹә ешидә биләрик? б) “Јадларын” һәрәкәтләри илә Шејтанын үсуллары арасында бу ҝүн охшарлыг нәдәдир?
12 Зәрәрли достлуглар. “Јадларын сәси” үнсијјәт етдијимиз кәсләрдән неҹә ҝәлә биләр? Пис достлугларын тә’сиринә хүсусилә дә ҝәнҹләр мә’руз галырлар (1 Коринфлиләрә 15:33). Хатырлајаг ки, Шејтан илк ики инсандан ән ҹаваныны вә тәҹрүбәсизини — Һәвваны өзүнә һәдәф сечди. Шејтан ону инандырды ки, Јеһова онун азадлығына һәддиндән артыг мәһдудијјәт гојуб, һалбуки әслиндә һәр шеј әксинә иди. Јеһова јаратдығы инсанлары севир вә онларын фираванлығы үчүн гајғы ҝөстәрирди (Ишаја 48:17). Бу ҝүн дә “јадлар” сизи — ҝәнҹләри инандырмаға чалышырлар ки, мәсиһчи валидејнләриниз сизин азадлығынызы һәддиндән артыг мәһдудлашдырырлар. Бу ҹүр “јадлар” сизә неҹә тә’сир ҝөстәрә биләрләр? Бир мәсиһчи гыз е’тираф едир: “Синиф јолдашларымын тәзјиги уҹбатындан мән һәтта мүәјјән мүддәтә иманда зәифләдим. Онлар һәмишә дејирдиләр ки, мәним динимдә мә’насыз гадағалар чохдур”. Әслиндә исә валидејнләрин сәни севирләр. Буна ҝөрә дә мәктәбдәки ушаглар сәнин валидејнләринә олан е’тибарыны сындырмаға чалышанда, Һәвванын етдији кими јалана ујма.
13. Давуд һансы мүдрик мөвгеји тутурду вә биз ону неҹә тәглид едә биләрик?
13 Зәрәрли достлуглар һаггында мәзмурчу Давуд јазырды: “Јаланчы адамларла отурмадым; вә икиүзлүләрлә бәрабәр ҝетмәрәм” (Мәзмур 26:4). “Јадларын” даһа бир хүсусијјәтинә диггәт јетирдинми? Онлар ачыг-ашкар дејил, иланын васитәсилә һәрәкәт едән Шејтана бәнзәр тәрздә јаланчы вә икиүзлүдүрләр. Бу ҝүн бә’зи әхлагсыз инсанлар Интернет васитәсилә өзләринин әсл симасыны вә нијјәтләрини ҝизләдирләр. Бу әхлагсызлар сәни тәләјә салмаг үчүн “сөһбәт отагларында” һәтта өзләрини јенијетмәләр кими гәләмә верә биләрләр. Ҝәнҹләр, сиздән хаһиш едирик, олдугҹа еһтијатлы олун ки, сизә руһани ҹәһәтдән зәрәр вурмасынлар (Мәзмур 119:101; Сүлејманын мәсәлләри 22:3).
14. Күтләви информасија васитәләриндән “јадларын сәси” бә’зән неҹә ешидилир?
14 Јалан иттиһамлар. Јеһованын Шаһидләри һаггында чыхан бә’зи хәбәрләрдә доғру мә’луматлар верилсә дә, һәрдән елә олур ки, “јадлар” өз мәнфи сәсләрини вермәк мәгсәдилә радио вә мәтбуатдан истифадә едирләр. Мәсәлән, бир өлкәдә хәбәрләр верилишиндә белә бир јалан сөјләнмишдир ки, ҝуја Шаһидләр Икинҹи Дүнја мүһарибәси заманы Һитлер режимини дәстәкләјирдиләр. Башга бир өлкәдә килсәләрә мүнасибәтдә вандализм акты төрәтдикләринә даир Шаһидләрин үнванына иттиһам сәсләнмишдир. Бир сыра өлкәләрдә күтләви информасија васитәләри Шаһидләри өз ушагларыны мүалиҹә етмәкдән имтина етмәкдә вә һәмиманлыларынын төрәтдикләри ҹидди ҝүнаһлара ҝөз јуммагда ҝүнаһландырмышлар (Матта 10:22). Лакин бүтүн бунлара бахмајараг, бизимлә шәхсән таныш олан сәмими инсанлар баша дүшүрләр ки, бу ҹүр иттиһамлар јаландыр.
15. Күтләви информасија васитәләриндә верилән бүтүн мә’луматлара инанмаг нәјә ҝөрә мүдриклик олмазды?
15 “Јадларын сәси” илә сөјләнән иттиһамларла гаршылашдыгда нә етмәлијик? Сүлејманын мәсәлләри 14:15 (МКШ) ајәсиндәки нәсиһәтә гулаг вермәк јахшы олар: “Ҹаһил һәр сөзә инанар, узагҝөрән һәр аддымына нәзәр салар”. Телевизија вә радио васитәсилә сөјләнән вә ја мәтбуатда јазылан һәр бир шејә инанмаг мүдриклик олмазды. Әлбәт ки, дүнјәви мәнбәләрдә верилән бүтүн мә’луматлара шүбһә илә јанашмајаҹағыг, лакин јадда сахламаг лазымдыр ки, “бүтүн дүнја... шәририн һакимијјәти алтындадыр” (1 Јәһја 5:19).
Сөјләнмиш сөзләрин Аллаһдан олуб-олмадығыны јохлајын
16. а) Гојунларын һәрәкәти Исанын Јәһја 10:4 ајәсиндәки сөзләрини неҹә тәсдиг едир? б) Мүгәддәс Китаб бизи нәјә тәшвиг едир?
16 Бәс достун вә ја дүшмәнин һарада олдуғуну неҹә мүәјјән едә биләрик? Јада салаг ки, Исанын дедији кими, гојунлар чобанын ардынҹа онун сәсини таныдыглары үчүн ҝедирләр (Јәһја 10:4). Һәлледиҹи ролу чобанын хариҹи ҝөрүнүшү јох, онун сәси ојнајыр. Мүгәддәс Китабда тәсвир олунан әразиләр һаггындакы бир китабда белә бир һадисә данышылыр ки, бир нәфәр гојунларын чобаны сәсиндән дејил, палтарындан таныдыгларны иддиа етмишдир. Чобан исә ҹавабында демишдир ки, гојунлар ону мәһз сәсиндән таныјырлар. Буну сүбут етмәк үчүн чобан палтарыны һәмин адамла дәјишмишдир. Чобанын палтарыны ҝејән адам гојунлары чағырмаға башлады, лакин онлар онун јанына ҝетмәдиләр. Гојунлар онун сәсини танымырдылар. Лакин чобан өз палтарында олмаса да, гојунлары һајлајанда онлар дәрһал онун јанына ҝәлдиләр. Ким исә чобан кими ҝөрүнә биләр, лакин бу, гојунларын ону чобан санмалары үчүн әсас дејил. Гојунлар, чағыранын сәсини чобанын сәси илә мүгајисә едәрәк, демәк олар ки, ону јохлајырлар. Аллаһын Кәламы бизә дә бу ҹүр давранмағы, сөјләнмиш сөзләрин “Аллаһдан олуб-олмадығыны” сынагдан кечирмәји тапшырыр (1 Јәһја 4:1; 2 Тимотејә 1:13). Буну етмәкдә бизә нә көмәк едәр?
17. а) Биз Јеһованын сәси илә неҹә таныш олуруг? б) Јеһованын сәсини танымағын сајәсиндә нә едә биләрик?
17 Ајдындыр ки, Јеһованын сәсини нә гәдәр јахшы танысаг, “јадларын сәсини” бир о гәдәр јахшы ајырд едә биләҹәјик. Мүгәддәс Китаб буну етмәјин үсулуну изаһ едир. Орада дејилир: “Гулагларын: Јол будур, бу јолда јеријин, дејә архандан бир сәс ешидәҹәк” (Ишаја 30:21). Архамыздан ешидилән “сәс” Аллаһын Кәламындан ҝәлир. Һәр дәфә Аллаһын Кәламыны охујанда, биз санки Даһи Чобанымыз Јеһованын сәсини ешидирик (Мәзмур 23:1). Беләликлә, Мүгәддәс Китабы нә гәдәр чох өјрәнсәк, Аллаһын сәси илә бир о гәдәр јахшы таныш олаҹағыг. Бу ҹүр әсаслы биликләр исә бизә “јадларын сәсини” дәрһал танымаға имкан јарадаҹаг (Галатијалылара 1:8).
18. а) Јеһованын сәсини таныдыгдан сонра даһа нәји етмәк ваҹибдир? б) Матта 17:5 ајәсинә әсасән, Исанын сәсинә итаәт етмәк нәјә ҝөрә ваҹибдир?
18 Јеһованын сәсини танымаг өзүнә даһа нәји дахил едир? Бура, сәси ешитмәклә јанашы, она гулаг асмаг да дахилдир. Ишаја 30:21 ајәсинә гајыдаг. Аллаһын Кәламы бәјан едир: “Јол будур”. Һәгигәтән дә Мүгәддәс Китабы өјрәнмәклә биз Јеһованын рәһбәрлијини динләмиш олуруг. Аллаһ даһа сонра дејир: “Бу јолда јеријин”. Јеһова истәјир ки, биз ешитдикләримизә мүвафиг давранаг. Беләликлә, биликләри һәјатымызда тәтбиг етмәклә, Јеһованы анҹаг ешитдијимизи дејил, Она һәм дә гулаг асдығымызы ҝөстәририк (Тәснијә 28:1). Јеһованын сәсинә итаәт етмәк, Исанын сәсинә итаәт етмәк мә’насыны да дашыјыр, чүнки буну бизә Јеһова Өзү бујурмушдур (Матта 17:5). Бәс Јахшы Чобан олан Исанын өзү бизә нә дејир? О бизә шаҝирдләр һазырламағы, о ҹүмләдән “садиг вә ағыллы гула” е’тибар етмәји өјрәдир (Матта 24:45; 28:18-20). Онун сәсинә итаәт етмәк әбәди һәјат демәкдир (Һәвариләрин ишләри 3:23).
Онлар ‘ондан гачаҹаглар’
19. “Јадларын сәсини” ешидәндә биз нә етмәлијик?
19 Биз “јадларын сәсинә” неҹә мүнасибәт ҝөстәрмәлијик? Гојунларын етдији кими. Иса дејир: “Јад адамын ардынҹа исә ҝетмәзләр, лакин ондан гачарлар” (Јәһја 10:5). Бурада ики фикри гејд етмәк олар. Биринҹиси, биз һеч вахт јадларын ‘ардынҹа ҝетмәјәҹәјик’. Башга сөзләрлә, биз јадлара гулаг асмағы гәтијјәтлә рәдд едәҹәјик. Мараглыдыр ки, бу ајәдә, Мүгәддәс Китабын бу һиссәсинин јазылдығы јунан дилиндә ишләдилән ән ҝүҹлү инкар формасы истифадә едилмишдир (Матта 24:35; Ибраниләрә 13:5). Икинҹиси, биз ‘јаддан гачаҹаг’ вә ондан узаг ҝәзәҹәјик. Тә’лимләри Јахшы Чобанын сәсинә зидд ҝедән кәсләрлә јалныз вә јалныз бу ҹүр давранмаг лазымдыр.
20. а) Јаланчы дөнүкләрлә, б) зәрәрли достлугларла, ҹ) күтләви информасија васитәләриндә габагҹадан әмәлә ҝәлмиш мәнфи мә’луматларла гаршылашаркән биз неҹә давранаҹағыг?
20 Сәсиндә дөнүкләрә мәхсус фикирләр ешитдијимиз кәсләрлә гаршылашаркән, биз Аллаһын Кәламынын вердији нәсиһәтә әсасән давранаҹағыг: “Өјрәндијиниз тә’лимә зидд олараг ајрылыглары вә јолдан чыхмағы тәшвиг едәнләрдән өзүнүзү горујун вә онлардан еһтијат един” (Ромалылара 16:17; Титуса 3:10). Буна бәнзәр тәрздә, зәрәрли достлугларла тәмасда олан ҝәнҹләр дә Павелин Тимотејә вердији нәсиһәтә риајәт едәҹәкләр: “Ҝәнҹлик еһтирасларындан... гач”. Күтләви информасија васитәләриндә јалан иттиһамлары ешидәндә исә биз Павелин Тимотејә дедији башга сөзләри хатырлајаҹағыг. “Јадларын сәсинә” гулаг асанларын “гулагларыны һәгигәтдән узаглашдырыб, әфсанәләрә мејл ҝөстәрәҹәкләрини” сөјләјәрәк, һәвари тәшвиг едирди: “Амма сән һәр вәзијјәтдә ајыг дур” (2 Тимотејә 2:22; 4:3-5). “Јадларын сәси” нә гәдәр јумшаг сәсләнсә дә, биз иманымызы зәифләдә билән һәр шејдән гачынырыг (Мәзмур 26:5; Сүлејманын мәсәлләри 7:5, 21; Вәһј 18:2, 4).
21. “Јадларын сәсини” динләмәкдән имтина едәнләри һансы мүкафат ҝөзләјир?
21 “Јадларын сәсини” динләмәкдән имтина едәрәк руһла мәсһ едилмиш мәсиһчиләр Јахшы Чобанын Лука 12:32 ајәсиндә јазылмыш сөзләринә һај верирләр. Иса орада дејир: “Горхма, еј кичик сүрү! Чүнки Атаныз сизә Сәлтәнәти [Падшаһлығы] вермәји илтифат етди”. “Башга гојунлар” да Исанын нөвбәти сөзләрини ешитмәк арзусу илә алышырлар: “Еј сизләр, Атамын мүбарәкләри, ҝәлин, дүнја јаранандан бәри сизин үчүн һазырланмыш олан Сәлтәнәти [Падшаһлығы] мирас алын” (Јәһја 10:16; Матта 25:34). “Јадларын сәсини” динләмәкдән имтина едириксә, бизи неҹә дә ҝөзәл мүкафат ҝөзләјир!
Хатырлајырсынызмы?
• Нәјә ҝөрә Шејтан Мәсиһин гојун ағылы барәсиндәки һекајәсиндән олан “јадын” тәсвиринә ујғун ҝәлир?
• “Јадларын сәси” бу ҝүн һарадан ҝәлир?
• “Јадларын сәсини” неҹә мүәјјән едә биләрик?
• “Јадларын сәсинә” неҹә реаксија ҝөстәрмәлијик?
[31-ҹи сәһифәдәки шәкил]
Мәрјәм Мәсиһи таныды.
[32-ҹи сәһифәдәки шәкил]
Биз “јадларын сәсинә” неҹә реаксија ҝөстәририк?