Руһа ҝөрә һәрәкәт едәҹәксинизми?
«Руһа ҝөрә һәрәкәт един вә сиз ҹисмани тәбиәтин арзусуну әсла иҹра етмәзсиниз» (ГАЛАТИЈАЛЫЛАРА 5:16).
1. Мүгәддәс руһа гаршы ҝүнаһ ишләтдијимиз горхусуну неҹә арадан галдырмаг олар?
ЈЕҺОВАНЫН мүгәддәс руһуна гаршы ҝүнаһ ишләтдијимиз горхусуну арадан галдырмаг мүмкүндүр. Һәвари Павел демишди: «Руһа ҝөрә һәрәкәт един вә сиз ҹисмани тәбиәтин арзусуну әсла иҹра етмәзсиниз» (Галатијалылара 5:16). Әҝәр биз Аллаһын руһунун аддымларымызы јөнәлтмәсинә јол веририксә, ҹисмани арзулара тәслим олмајаҹағыг (Ромалылара 8:2-10).
2, 3. Руһа ҝөрә һәрәкәт етмәк бизә неҹә тә’сир едәҹәк?
2 Нә гәдәр ки, ‘руһа ҝөрә һәрәкәт едирик’ мүгәддәс руһ бизи Јеһоваја табе олмаға тәшвиг едәҹәк. Биз хидмәтдә, јығынҹагда, евдә вә башга јердә Аллаһын кејфијјәтләрини әкс етдирәҹәјик. Һәјат јолдашымыз, ушагларымыз, һәмиманлыларымызла вә башгалары илә рәфтарымызда руһун сәмәрәси өзүнү ајдын бүрузә верәҹәк.
3 ‘Аллаһын ирадәсинә ҝөрә руһән јашајараг’ өзүмүзү ҝүнаһ етмәкдән сахлаја биләрик (1 Петер 4:1-6). Әҝәр биз руһун тә’сири алтындајыгса, бағышланмаз ҝүнаһа әсла јол вермәјәҹәјик. Бәс руһа ҝөрә һәрәкәт етмәк даһа һансы фајданы ҝәтирир?
Аллаһа вә Мәсиһә бағлы галын
4, 5. Руһа ҝөрә һәрәкәт етмәк Исаја бахышымыза неҹә тә’сир едир?
4 Мүгәддәс руһа ҝөрә һәрәкәт етдијимиз үчүн биз Аллаһла вә Онун Оғлу илә јахын мүнасибәтләри горујуб сахлајырыг. Руһани ән’амлар һаггында јазаркән Павел Коринфдәки һәмиманлыларына демишди: «Буна ҝөрә сизә [кечмиш бүтпәрәстләрә] билдирирәм ки, Аллаһын Руһу васитәсилә данышан һеч ким Исаја лә’нәт охумаз вә һеч ким Мүгәддәс Руһ илә олмадан Исаны Рәбб адландыра билмәз» (1 Коринфлиләрә 12:1-3). Инсанлары Мәсиһә лә’нәт охумаға тәшвиг едән фикирләр Шејтан Иблисдәндир. Руһла һәрәкәт едән биз мәсиһчиләр әминик ки, Јеһова Исаны өлүләрдән дирилдиб, бүтүн варлыглардан үстүн етди (Филипилиләрә 2:5-11). Биз Мәсиһин фидијә гурбанлығына иман едир вә Исанын Аллаһ тәрәфиндән үзәримизә Рәбб тә’јин едилдијини гәбул едирик.
5 Биринҹи әсрдә өзүнү мәсиһчи адландыранлардан бә’зиләри Мәсиһин «бәдәндә ҝәлдијини» инкар едирдиләр (2 Јәһја 7-11). Бу сәһв нөгтеји-нәзәр бә’зиләринин Иса Мәсиһ һаггында һәгигәти инкар етмәләринә ҝәтириб чыхарды (Марк 1:9-11; Јәһја 1:1, 14). Мүгәддәс руһа ҝөрә һәрәкәт етмәк бизи белә дөнүклүкдән горујаҹаг. Јалныз руһән сајыг галсаг, Јеһованын лүтфүнү итирмәјәҹәк вә ‘һәгигәтә ҝөрә һәрәкәт едәҹәјик’ (3 Јәһја 3, 4). Буна ҝөрә ҝәлин дөнүкләрин бүтүн тә’лимләрини гәтијјәтлә рәдд едәк ки, сәмави Атамызла мөһкәм мүнасибәтләри горујуб сахлајаг.
6. Руһа ҝөрә һәрәкәт едәнләрдә Аллаһын руһу һансы кејфијјәтләри јарадыр?
6 Павел бүтпәрәстлијә дөнмәји вә тәфригәләри «ҹисмани тәбиәтин» зина вә сәфаһәт кими әмәлләри илә бир сырада тутур. О, ејни заманда изаһ едир: «Мәсиһ Исаја мәхсус оланлар исә өз еһтирас вә арзулары илә бәрабәр, ҹисмани тәбиәти чармыха чәкдиләр. Мадам ки, биз Руһа ҝөрә јашајырыг, Руһа ҝөрә дә рәфтар едәк» (Галатијалылара 5:19-21, 24, 25). Руһа ҝөрә јашајан вә һәрәкәт едән инсанда Аллаһын фәал гүввәси һансы кејфијјәтләри јарадыр? Павел јазырды ки, руһун сәмәрәсинә мәһәббәт, севинҹ, сүлһ, сәбир, лүтфкарлыг вә ја хејирхаһлыг, јахшылыг, «иман» (ЈД), һәлимлик вә өзүнә һаким олмаг дахилдир (Галатијалылара 5:22, 23). Ҝәлин онлары бир-бир арашдыраг.
‘Бир-биримизи севәк’
7. Мәһәббәт нәдир вә онун бә’зи јөнләри һансылардыр?
7 Руһун сәмәрәсинә дахил олан мәһәббәт кимәсә мөһкәм бағлылыг, тәмәннасыз гајғы вә онунла сых мүнасибәтләрдә олмаг демәкдир. Мүгәддәс Јазыларда ‘Аллаһын мәһәббәт’ олдуғу дејилир, чүнки О бу хүсусијјәтин тәҹәссүмүдүр. Иса Мәсиһин фидијә гурбаны Аллаһын вә Онун Оғлунун бәшәријјәтә бөјүк мәһәббәтинин нүмунәсидир (1 Јәһја 4:8; Јәһја 3:16; 15:13; Ромалылара 5:8). Исанын давамчылары олан бизләр бир-биримизә мәһәббәтимиздән танынырыг (Јәһја 13:34, 35). Бизә ‘бир-биримизи севмәк’ әмр олунуб (1 Јәһја 3:23). Павел исә дејир ки, мәһәббәт сәбирли вә хејирхаһдыр. О пахыллыг етмир, ловғаланмыр, кобуд давранмыр, өз мәнфәәтини ахтармыр, һирсләнмир, писликләрин һесабыны тутмур, һагсызлыға севинмир, һәгигәтә исә шадланыр. Мәһәббәт һәр шејә гатлашыр, инаныр, үмид бәсләјир, таб ҝәтирир. Ән әсасы исә о, әсла түкәнмир (1 Коринфлиләрә 13:4-8).
8. Һәмиманлыларымызы нә үчүн севмәлијик?
8 Аллаһын руһунун биздә мәһәббәт тәрбијә етмәсинә јол версәк, бу кејфијјәт һәм Аллаһла, һәм дә гоншу илә мүнасибәтимиздә өзүнү бүрузә верәҹәк (Матта 22:37-39). «Севмәјән исә өлүмдә галыр. Гардашына нифрәт едән һәр кәс гатилдир вә сиз билирсиниз ки, һеч бир гатил өзүндә галан әбәди һәјата малик дејилдир», — дејә һәвари Јәһја јазырды (1 Јәһја 3:14, 15). Гатил јалныз өлдүрдүјү адама нифрәт етмәдији тәгдирдә Исраилдәки сығынаҹаг шәһәрләрдән биринә гачыб гуртула биләрди (Ганунун тәкрары 19:4, 11-13). Әҝәр мүгәддәс руһа ҝөрә һәрәкәт едириксә, Аллаһы, һәмиманлыларымызы вә башга инсанлары севәҹәјик.
«Рәббин вердији севинҹ сизин гүввәтиниздир»
9, 10. Севинҹ нәдир вә бизә севинҹ ҝәтирән шејләрин бә’зиләри һансылардыр?
9 Севинҹ әсл хошбәхтликдән доған һиссдир. Јеһова ‘хошбәхт Аллаһдыр’ (1 Тимотејә 1:11, ЈД; Мәзмур 104:31). Оғул Атасынын ирадәсини јеринә јетирмәкдән севинҹ дујур (Мәзмур 40:8; Ибраниләрә 10:7-9). ‘Рәббин вердији севинҹ бизим дә гүввәтимиздир’ (Неһемја 8:10).
10 Һәтта чәтинлијин, гәм-гүссәнин вә ја тә’гибләрин мүгабилиндә белә, Аллаһын ирадәсини јеринә јетирәндә Онун вердији севинҹдән дәрин мәмнунлуг дујуруг. Аллаһын вердији «билик» бизә неҹә бөјүк хошбәхтлик ҝәтирир! (Сүлејманын мәсәлләри 2:1-6). Аллаһла мүнасибәтләримизин әсасыны Онун һаггында дәгиг билик вә Исанын фидијә гурбанлығына иман тәшкил едир (1 Јәһја 2:1, 2). Јеҝанә бејнәлхалг гардашлығын үзвү олмаг да бизә севинҹ ҝәтирир (Сефанја 3:9; Һаггај 2:7). Аллаһын Падшаһлығынын тезликлә бүтүн јер үзүнү идарә едәҹәјини билмәк вә хош хәбәрин тәблиғиндә иштирак етмәк дә чох севиндириҹидир (Матта 6:9, 10; 24:14). Әбәди һәјат үмиди дә севинҹимизә севинҹ гатыр (Јәһја 17:3). Белә ҝөзәл үмидә малик олдуғумуз үчүн биз ‘там севинҹ ичиндә јашамалыјыг’ (Ганунун тәкрары 16:15).
Сүлһсевәр вә сәбирли олун
11, 12. а) Сүлһ нәдир? б) Аллаһын сүлһү бизә неҹә тә’сир ҝөстәрир?
11 Руһун сәмәрәсинин бир ҹәһәти дә сүлһдүр. Сүлһ нараһатлыглардан азадлыг вә динҹликдир. Сәмави Атамыз сүлһ Аллаһыдыр вә бизи әмин едир ки, ‘бүтүн өвладларыны өјрәдәҹәк, онлар там сүлһ ичиндә олаҹаг’ (Јешаја 54:13; 1 Коринфлиләрә 14:33). Иса шаҝирдләринә демишди: «Аранызда сүлһ гојуб ҝедирәм; сизә Өз сүлһүмү верирәм» (Јәһја 14:27). Бу онун давамчыларына неҹә көмәк едәҹәкди?
12 Исанын шаҝирдләринә вердији сүлһ онларын үрәјини вә дүшүнҹәләрини сакитләшдириб, горхуларыны азалтмышды. Хүсусилә, вә’д олунмуш мүгәддәс руһу аланда онларын арасында сүлһ һөкм сүрүрдү (Јәһја 14:26). Бу ҝүн руһун тә’сири илә, о ҹүмләдән дуаларымыза ҹаваб олараг биз Аллаһдан үрәјимизи вә дүшүнҹәләримизи сакитләшдирән, тајы-бәрабәри олмајан сүлһү алырыг (Филипилиләрә 4:6, 7). Үстәлик, Јеһованын руһу бизә һәмиманлыларымызла вә башга инсанларла сүлһдә олмаға көмәк едир (Ромалылара 12:18; 1 Салоникилиләрә 5:13).
13, 14. Сәбир нәдир вә биз нә үчүн сәбирли олмалыјыг?
13 Сәбир сүлһсевәрликлә бағлыдыр, чүнки сәбир етмәк вәзијјәтин јахшылашаҹағына үмид едәрәк һагсызлыға вә инҹиклијә таб ҝәтирмәк демәкдир. Аллаһ чох сәбирлидир (Ромалылара 9:22-24). Иса да бу кејфијјәти тәзаһүр етдирир. Исанын сәбирли олмасынын бизә дә фајдасы вар, чүнки Павел јазырды: «Лакин мән мәһз она ҝөрә мәрһәмәтә наил олдум ки, Мәсиһ Иса Өз камил тәһәммүлүнү илк олараг мәним үзәримдә зүһур етдирсин вә әбәди һәјат үчүн Она иман етмәли оланларын нүмунәси олум» (1 Тимотејә 1:16).
14 Башгалары дүшүнүлмәмиш, аҹы сөзләр дејәндә вә ја һәрәкәтләр едәндә сәбир бизә таб ҝәтирмәјә көмәк едир. Павел һәмиманлыларыны тәшвиг едирди: «Һамыја гаршы сәбирли олун» (1 Салоникилиләрә 5:14). Һамымыз гејри-камилик, буна ҝөрә сәһвләрә јол верәндә, сөзсүз ки, башгаларынын бизә сәбир етмәсини истәјирик. Буна ҝөрә, ҝәлин биз дә ‘севинҹлә сәбир ҝөстәрәк’ (Колослулара 1:9-12).
Хејирхаһлыг вә јахшылыг
15. Хејирхаһлыг нәдир вә буна даир һансы нүмунәни ҝәтирә биләрсиниз?
15 Инсанларла меһрибан вә јахшы рәфтар етмәклә хејирхаһлыг ҝөстәрмиш олуруг. Һәм Јеһова, һәм дә Оғлу Иса Мәсиһ хејирхаһдыр (Ромалылара 2:4; Лука 9:11). Буна ҝөрә дә Аллаһын вә Мәсиһин хидмәтчиләри хејирхаһ олмалыдырлар (Колослулара 3:12). Һәтта Аллаһа јахын олмајан инсанлар белә ‘гејри-ади инсанпәрвәрлик’ ҝөстәрмишләр (Һәвариләрин ишләри 27:3; 28:2). Демәли, ‘руһа ҝөрә һәрәкәт едириксә’, шүбһә јохдур ки, биз дә хејирхаһлыг ҝөстәрә биләрик.
16. Һансы һалларда хејирхаһлыг ҝөстәрмәлијик?
16 Киминсә аҹы сөзләринә вә ја нәзакәтсиз һәрәкәтинә ҝөрә һаглы олараг гәзәбләнәндә белә, хејирхаһлыг ҝөстәрә биләрик. Павел јазмышды: «Гәзәбләнәндә ҝүнаһ ишләмәјин; гој сиз гәзәбләниркән ҝүнәш батмасын вә иблисә јер вермәјин... Амма бир-биринизә гаршы лүтфкар, шәфгәтли олун вә Аллаһ Мәсиһдә сизи бағышладығы кими, сиз дә бир-биринизи бағышлајын» (Ефеслиләрә 4:26, 27, 32). Хүсусилә дә, дара дүшәнләрә гаршы хејирхаһ олмалыјыг. Әлбәттә, ағсаггал ‘јахшылыг, салеһлик вә һәгигәт’ јолуну тәрк етмәк тәһлүкәсиндә олан адамын садәҹә хәтринә дәјмәмәк үчүн Мүгәддәс Китабдан мәсләһәт вермәзсә, бу һеч дә хејирхаһлыг әламәти олмаз (Ефеслиләрә 5:9).
17, 18. Јахшылыг нәдир вә һәјатымызда һансы јери тутмалыдыр?
17 Јахшылыг ләјагәтли, мә’нәви ҹәһәтдән камил вә ја јахшы олмаг демәкдир. Аллаһ там мә’нада јахшыдыр (Мәзмур 25:8, КМ; Зәкәријјә 9:17, КМ). Иса да һәм јахшы, һәм дә мә’нәви ҹәһәтдән камил шәхсијјәтдир. Лакин она «Јахшы Мүәллим» дејә мүраҹиәт едилдикдә, о бу ады гәбул етмәди (Марк 10:17, 18). Чүнки о дәрк едирди ки, јахшылығын тәҹәссүмү јалныз Аллаһдыр.
18 Мирас алдығымыз ҝүнаһ јахшылыг етмәјимизә мане олур (Ромалылара 5:12). Анҹаг Аллаһын јахшылыг етмәји бизә өјрәтмәси барәдә дуа едириксә, бу хүсусијјәти тәзаһүр етдирә биләрик. Павел Ромадакы һәмиманлыларына демишди: «Еј гардашларым, мән өзүм дә һаггынызда әминәм ки, сиз дә јахшылыгла долу, һәр билик илә долғун вә бир-биринизә нәсиһәт вермәк гүдрәтиндәсиниз» (Ромалылара 15:14). Мәсиһчи ағсаггалы ‘јахшылығы севмәлидир’ (Титуса 1:7, 8). Әҝәр Аллаһын руһуна ҝөрә һәрәкәт едириксә, јахшылығымызла танынаҹағыг вә Јеһова бизи ‘јахшылыгла хатырлајаҹаг’ (Неһемја 5:19; 13:31).
‘Ријасыз иман’
19. Ибраниләрә 11:1 ајәсинә әсасән, иман нәдир?
19 Руһун сәмәрәсинин бир һиссәси олан «иман үмид едилән шејләрә әсаслы е’тимад, ҝөрүнмәз олса белә, мөвҹуд олан шејләрин ајдын тәзаһүрүдүр» (Ибраниләрә 11:1, ЈД). Әҝәр иманымыз варса, демәли биз Јеһованын вә’д етдији һәр шејин мүтләг јеринә јетәҹәјинә әминик. Ҝөрүнмәз һәгигәтләрә иман о гәдәр ҝүҹлүдүр ки, ајәјә әсасән, иманын өзү онларын ајдын тәзаһүрү вә ја сүбуту һесаб едилир. Мәсәлән, јарадылан шејләрин мөвҹудлуғу бизи Јараданын олдуғуна инандырыр. Руһа ҝөрә һәрәкәт едәндә мәһз белә имана саһиб олдуғумузу ҝөстәририк.
20. ‘Бизи асанлыгла чашдыран ҝүнаһ’ нәдир, ондан вә ҹисмани тәбиәтин ишләриндән өзүмүзү неҹә горуја биләрик?
20 Имансызлыг ‘бизи асанлыгла чашдыран ҝүнаһдыр’ (Ибраниләрә 12:1). Иманымызы мәһв едән ҹисмани тәбиәтин ишләриндән вә вар-дөвләт һәрислијиндән гачмаг, о ҹүмләдән јалан тә’лимләрин тәләсинә дүшмәмәк үчүн Аллаһын руһуна ҝүвәнмәк лазымдыр (Колослулара 2:8; 1 Тимотејә 6:9, 10; 2 Тимотејә 4:3-5). Јеһованын руһу Онун мүасир хидмәтчиләриндә гәдимдәки хидмәтчиләринин иманына бәнзәр иман јарадыр (Ибраниләрә 11:2-40). Һәм дә бизим ‘ријасыз иманымыз’ башгаларынын иманыны мөһкәмләндирә биләр (1 Тимотејә 1:5; Ибраниләрә 13:7).
Һәлим вә өзүнүзә һаким олун
21, 22. Һәлимлик нәдир вә биз нәјә ҝөрә ону тәзаһүр етдирмәлијик?
21 Һәлимлик хасијјәтин јумшаглығы вә мүлајим рәфтардыр. Аллаһын сәҹијјәви хүсусијјәтләриндән бири Онун һәлимлијидир. Бу ондан бәллидир ки, Јеһованын шәхсијјәтини мүкәммәл сурәтдә әкс етдирән Иса да һәлим иди (Матта 11:28-30; Јәһја 1:18; 5:19). Белә исә, Аллаһын хидмәтчиләри олан бизләрдән нә тәләб олунур?
22 Биздән бир мәсиһчи кими ‘бүтүн инсанлара там һәлимлик ҝөстәрмәк’ ҝөзләнилир (Титуса 3:2). Һәлимлији хидмәтдә тәзаһүр етдиририк. Руһән јеткинләрә мәсләһәт ҝөрүлүр ки, сәһвә јол верән мәсиһчини «һәлимлик руһу илә» ислаһ етсинләр (Галатијалылара 6:1). Һәр биримиз ‘тәвазөкарлыг вә һәлимлик’ ҝөстәрәрәк мәсиһчи бирлијини вә сүлһү горуја биләрик (Ефеслиләрә 4:1-3). Даима руһа ҝөрә һәрәкәт едиб, өзүмүзә һаким олсаг, һәлимлик тәзаһүр етдирмәк чәтин олмајаҹаг.
23, 24. Өзүнә һаким олмаг нәдир вә бу бизә неҹә көмәк едир?
23 Өзүнә һаким олмаг фикирләримизә, данышығымыза вә һәрәкәтләримизә нәзарәт етмәјә көмәк едир. Јеһова Јерусәлими дағыдан бабиллиләрлә рәфтарында бу хүсусијјәти тәзаһүр етдирирди (Јешаја 42:14). Онун Оғлу изтирабларында өзүнә һаким олараг ‘бизә нүмунә гојду’. Һәвари Петер дә мәсиһчиләрә ‘билијә мәһәббәти әлавә етмәји’ мәсләһәт ҝөрмүшдү (1 Петер 2:21-23; 2 Петер 1:5-8).
24 Мәсиһчи ағсаггаллары да өзләринә һаким олмалыдырлар (Титуса 1:7, 8). Әслиндә, мүгәддәс руһа ҝөрә һәрәкәт едәнләрин һамысы өзүнә һаким ола биләр вә бунунла да әхлагсызлыгдан, налајиг данышыгдан вә ја Јеһованын хошуна ҝәлмәјән диҝәр һәрәкәтләрдән гача биләр. Аллаһын руһунун биздә өзүнә һаким олмаг хүсусијјәтини јаратмасына јол вермәјимиз данышығымыздан вә давранышымыздан бәлли олаҹаг.
Руһа ҝөрә һәрәкәт един
25, 26. Руһа ҝөрә һәрәкәт етмәк һәјатымыза инди вә ҝәләҹәкдә неҹә тә’сир ҝөстәрәҹәк?
25 Әҝәр руһа ҝөрә һәрәкәт едириксә, Падшаһлығын сә’јли тәблиғчиләри олаҹағыг (Һәвариләрин ишләри 18:24-26). Бизимлә үнсијјәт етмәк һамыја, хүсусилә дә Аллаһын садиг хидмәтчиләринә хош ҝәләҹәк. Мүгәддәс руһ аддымларымызы јөнәлтдији үчүн һәмиманлыларымыз биздән руһланаҹаг (Филипилиләрә 2:1-4). Елә мәсиһчиләрин дә арзусу бу дејилми?
26 Шејтанын рәһбәрлији алтында олан бу дүнјада руһа ҝөрә һәрәкәт етмәк һеч дә асан дејил (1 Јәһја 5:19). Амма милјонларла инсанлар мәһз бу ҹүр давраныр. Әҝәр Јеһоваја үрәкдән е’тибар едириксә, һәјат бизә елә индидән севинҹ ҝәтирәҹәк вә бизә мәһәббәтлә мүгәддәс руһ верәнин салеһ јолларында әбәдијјән јеријәҹәјик (Мәзмур 128:1; Сүлејманын мәсәлләри 3:5, 6).
Неҹә ҹаваб верәрдиниз?
• ‘Руһа ҝөрә һәрәкәт етмәк’ Аллаһла вә Онун Оғлу илә мүнасибәтләримизә неҹә тә’сир ҝөстәрир?
• Мүгәддәс руһун сәмәрәсинә һансы кејфијјәтләр дахилдир?
• Аллаһын руһунун сәмәрәсини неҹә тәзаһүр етдирә биләрик?
• Руһа ҝөрә һәрәкәт етмәк һәјатымыза инди вә ҝәләҹәкдә неҹә тә’сир едәҹәк?
[12-ҹи сәһифәдәки шәкил]
Хош сөзләрлә вә һәрәкәтләрлә хејирхаһлыг ҝөстәр.