ФӘСИЛ 9

Ширникдириҹи тәклифләрә неҹә гаршы дура биләрәм?

Кәмаләнин әјләнҹә ҝеҹәсинә ҝәлдији һеч он дәгигә дејилди ки, ики оғлан әлиндә бир нечә бөјүк пакет ичәри ҝирир. Пакетләрин ичиндә нә олдуғуну билмәк үчүн баш сындырмаға еһтијаҹ јох иди. Чүнки һәмин оғланлар бурада чохлу ички олаҹағыны дејәндә Кәмалә өтәри ешитмишди.

Бирдән Кәмалә архадан таныш бир сәс ешидир: «Бурада нијә дурмусан, јаса ҝәлмисән, нәдир?» Кәмалә чеврилиб рәфигәси Ҹәмиләни әлиндә ағзы ачыг ики пивә бутулкасы илә ҝөрүр. О, бутулканын бирини Кәмаләјә узадыб дејир: «Бирҹә демә ки, јашын чатмыр!»

Кәмалә имтина етмәк истәјир, амма буну етмәк онун дүшүндүјүндән дә чәтиндир. Ахы Ҹәмилә онун рәфигәсидир вә о, рәфигәсинин хәтринә дәјмәк истәмир. Үстәлик, Ҹәмилә јахшы гыздыр. Әҝәр о ички ичирсә, демәли, бунда пис бир шеј јохдур. «Бу, садәҹә пивәдир. Наркотик вә ја секс дејил ки», — дејә Кәмалә өзүнә тәсәлли верир.

ҜӘНҸ оланда ҹүрбәҹүр сынагларла үзләширсән. Чох вахт бу, әкс ҹинслә бағлы олур. 17 јашлы Рамон дејир: «Мәктәбдәки гызлар адама гырсаггыз кими јапышырлар. Онлар сәнә тохунур вә нә дәрәҹәдә һәдди ашмаларына јол верәҹәјини јохламаг истәјирләр. “Әл чәк” сөзү онлара кар еләмир!» 17 јашы олан Диана да ејни шеји јашамышдыр. О дејир: «Бир оғлан јахынлашыб мәни гуҹаглады. Мән онун әлинә бәрк вуруб: “Чашмысан?! Мән һеч сәни танымырам!” — дедим».

Сән дә бу кими сынагларла үзләшә биләрсән вә сәнә елә ҝәлә биләр ки, онлардан ҹан гуртармаг мүмкүн дејил. Арды-арасы кәсилмәјән бу ҹүр сынаглары үзәриндә «Нараһат етмәјин» јазысы олан гапынын дурмадан дөјүлмәси илә мүгајисә етмәк олар. Сән бу сәси ҝөзләдијиндән дә чох ешидирсән? Мәсәлән, ашағыда садаланан ширникдириҹи тәсирләрдән һансы илә гаршылашырсан?

□ Сигарет

□ Порнографија

□ Спиртли ички

□ Секс

□ Наркотик

□ Диҝәр ․․․․․

Бунлардан һансыныса ✔ ишарәси илә гејд етмәјин о демәк дејил ки, сәндән мәсиһчи чыхмаз. Сән ҝүнаһлы арзулары боғмағы вә ширникдириҹи тәсирләрә гаршы дурмағы өјрәнә биләрсән. Неҹә? Сәнә ширникдириҹи тәсирләрин архасында нәјин дурдуғуну өјрәнмәјин көмәји дәјә биләр. Ҝәл үч сәбәби нәзәрдән кечирәк.

1. Гејри-камиллик. Пис ишләрә мејил ҝөстәрмәк бүтүн гејри-камил инсанлара хасдыр. Һәтта Аллаһын садиг хидмәтчиси олан һәвари Павел сәмими олараг етираф етмишди: «Дүзҝүн иш ҝөрмәк истәјәндә пислик башымын үстүнү кәсдирир» (Ромалылара 7:21). Ҝөрүндүјү кими, һәтта салеһлијә ҹан атан инсан да бәзән бәдәнин вә ҝөзләрин истәјинә гапыла биләр (1 Јәһја 2:16). Анҹаг даима ҝүнаһлы фикирләрә далмағын ахыры пис гуртара биләр. Чүнки Мүгәддәс Китабда дејилир: «Нәфс бојлу галыб ҝүнаһ доғур» (Јагуб 1:15).

2. Кәнар тәсирләр. Һара бахырсан, һәр јан ширникдириҹи тәсирләрлә долудур. Туран адлы ҝәнҹ гадын дејир: «Истәр мәктәбдә, истәрсә дә иш јериндә анҹаг сексдән данышырлар». О әлавә едир: «Телевизија програмларында вә киноларда буну ҹәлбедиҹи вә арзуолунан бир шеј кими тәгдим едирләр. Онун пис нәтиҹәләрини исә, демәк олар ки, һеч ҝөстәрмирләр». Туран бу кими тәсирләрин нә дәрәҹәдә ҝүҹлү ола биләҹәјини өз тәҹрүбәсиндән билир. «16 јашым оланда бир оғлана вурулмушдум. Анам мәни габағына гојуб баша салды ки, белә ҝетсә, ахыры һамиләликлә гуртараҹаг. Анамын ағлына белә бир шеј ҝәтирдијини биләндә дәһшәтә ҝәлдим! Ики ајдан сонра мән һамилә галдым».

3. «Ҝәнҹлијә хас истәкләр» (2 Тимотејә 2:22). Бу ифадәјә ҝәнҹлик илләриндә баш галдыран арзулары, һәмјашыдларынын рәғбәтини газанмаг вә бөјүдүјүнү сүбут етмәк кими истәкләри аид етмәк олар. Бу кими шејләри арзуламаг өз-өзлүјүндә гәбаһәт дејил, амма һиссләрини ҹиловламасан, ширникдириҹи тәсирләрә гаршы дурмаг даһа да чәтинләшәҹәк. Мәсәлән, сәрбәст олмаг арзусу сәни валидејнләринин вердији өјүд-нәсиһәтләрә гаршы чыхмаға вадар едә биләр. 17 јашы оланда бу һал Стивлә дә баш вермишди. О дејир: «Валидејнләримә гаршы үсјан галдырараг онларын аҹығына дедикләри һәр шеји тамамилә әксинә едирдим. Үстәлик, бүтүн бунлар вәфтизимдән дәрһал сонра баш верди».

Неҹә гаршы дурмалы?

Етираф етмәк лазымдыр ки, јухарыда гејд олунан амилләр чох ҝүҹлү тәсирә маликдир. Анҹаг сән бу ширникдириҹи тәсирләрә гаршы дура биләрсән. Неҹә?

● Илк нөвбәдә, сәнин үчүн нәјин ән ҝүҹлү ширникдириҹи тәсир олдуғуну мүәјјән ет. (Ола билсин, буну 65-ҹи сәһифәдә артыг гејд етмисән.)

● Сонра өзүндән соруш: «Бу ширникдириҹи тәсирләрә ән чох нә заман мәруз гала биләрәм?» Ашағыдакылардан биринә ✔ ишарәси гој.

□ Мәктәбдә

□ Тәк оланда

□ Ишдә

□ Диҝәр ․․․․․

Ширникдириҹи тәсирләрин нә заман јаранаҹағыны биләндә онлардан гачмаг сәнә асан олаҹаг. Мәсәлән, фәслин әввәлиндә тәсвир олунан вәзијјәти ҝөтүрәк. Кәмалә ҝетдији јердә проблемләрин олаҹағыны неҹә сезә биләрди?

․․․․․

О, ширникдириҹи тәсирдән тамамилә неҹә гачына биләрди?

․․․․․

● Инди сән ширникдириҹи тәсирин нәдән ибарәт олдуғуну вә онун нә заман јарана биләҹәјини тәјин етдикдән сонра һәрәкәтә кечмәјә һазырсан. Биринҹи ишин тәһлүкәни минимума ендирмәк вә ја ондан тамамилә гачмагдыр. Ашағыда буну неҹә едә биләҹәјини јаз.

․․․․․

(Нүмунәләр. Әҝәр мәктәбдән ҝәләндә һәмишә сәнә сигарет тәклиф едән мәктәб јолдашларынла гаршылашырсанса, бәлкә, башга јолла ҝедиб-ҝәләсән. Интернетдә оларкән истәмәдән екрана порнографик шәкилләр чыхырса, бу кими сајтларын вә мәнбәләрин гаршысыны алан програмлар јүклә. Һәмчинин Интернетдә нә исә ахтаранда сөз сечиминдә еһтијатлы ол.)

Әлбәттә, бүтүн ширникдириҹи тәсирләрдән гачынмаг мүмкүн дејил. Ҝеҹ-тез сән чох чәтин сынагла үзләшәҹәксән, бу, һәтта сәнин ҝөзләмәдијин бир вахтда ола биләр. Бәс белә вәзијјәтдә сән нә едә биләрсән?

Һазыр ол

Шејтан Иса Мәсиһи имтаһана чәкәндә о, дәрһал Шејтанын тәклифини рәдд етди (Марк 1:13). Нәјә ҝөрә? Чүнки Шејтан бу суаллары галдырмамышдан әввәл, Иса артыг өз мөвгејини тутмушду вә һәр заман Аллаһа итаәт едәҹәјинә гәти гәрар вермишди (Јәһја 8:28, 29). О, «мән өзүмүн јох, мәни ҝөндәрәнин ирадәсини јеринә јетирмәк үчүн ҝөјдән ҝәлмишәм» сөзләрини дејәркән мәһз буну нәзәрдә тутурду (Јәһја 6:38).

Нөвбәти сәһифәдә ән чох гаршылашдығын ширникдириҹи тәсирләрә нәјә ҝөрә гаршы дурмалы олдуғунун ики сәбәбини, еләҹә дә бунлардан гачмағын ики јолуну јаз.

Нәјә ҝөрә гаршы дурмалысан?

1 ․․․․․

2 ․․․․․

Нә көмәк едәҹәк?

1 ․․․․․

2 ․․․․․

Унутма ки, ширникдириҹи тәсирләрә тәслим оланда сән өз арзуларынын гулу олурсан (Титус 3:3). Ахы нәјә ҝөрә арзуларынын сәни идарә етмәсинә јол верәсән? Чалыш, кифајәт гәдәр јеткин ол вә арзуларыны нәзарәт алтында сахламағы баҹар (Колослулара 3:5). Буна наил олмаг үчүн Аллаһа дуа ет (Матта 6:13)a.

ӘЛАВӘ МӘЛУМАТЫ 2-ҸИ ҸИЛДИН 15-ҸИ ФӘСЛИНДӘН ОХУ

[Һашијә]

АЧАР АЈӘ

“Аллаһ вәфалы Аллаһдыр, О гојмаз ки, сиз ҝүҹүнүз чатмајан сынаглара мәруз галасыныз вә сынаг вахты дөзә биләсиниз дејә, сизә чыхыш јолу да ҝөстәрәҹәк” 1 Коринфлиләрә 10:13

МӘСЛӘҺӘТ

Кимсә сәни ҝүнаһа тәһрик едәндә нә дејәҹәјини габагҹадан дүшүн. Бу китабын 2-ҹи ҹилдинин 132, 133-ҹү сәһифәләриндәки «Һәмјашыдларын тәзјиги илә үзләшәндә» адлы схемдән истифадә ет.

БИЛИРСӘН... ?

Аллаһ габагҹадан билдирмишди ки, Иса садиг галаҹаг. Амма бу о демәк дејил ки, о, итаәтли олмаг үчүн робот кими програмлашдырылмышды. Әксинә, Исаја ирадә азадлығы верилмишди. О, һеч бир сечими олмадығы үчүн јох, өзү истәдији үчүн садиг галды. Мәһз елә буна ҝөрә дә ағыр сынагларла үзләшәркән вар ҝүҹү илә Аллаһа дуа едирди (Ибраниләрә 5:7).

ҺӘРӘКӘТ ПЛАНЫ!

Ширникдириҹи тәсирләрә гаршы дурмагда гәтијјәтли олмаг үчүн мән... ․․․․․

Гачмалы олдуғум инсанлар, јерләр вә вәзијјәтләр: ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Камил варлыглар имтаһана мәруз гала биләрми? (Јарадылыш 6:1—3; Јәһја 8:44).

● Ширникдириҹи тәсирләрә гаршы дуран заман сәнин садиглијин башгаларына неҹә тәсир едир? (Сүлејманын мәсәлләри 27:11; 1 Тимотејә 4:12).

[68–ҹи сәһифәдәки јазы]

“Каинатда ән ҝүҹлү Варлығын — Гадир Аллаһын мәним тәрәфимдә олдуғуну вә һәр ан Ону көмәјә чағыра биләҹәјими билмәк мәни үрәкләндирир!” Камран

[67–ҹи сәһифәдәки чәрчивә/шәкил]

Сынагдан кечир!

Бир компас ҝөтүр вә елә гур ки, әгрәби шималы ҝөстәрсин. Инди онун јанына магнит гој. Нә баш верди? Әгрәб артыг шималы ҝөстәрмир, магнитә тәрәф әјилиб.

Сәнин виҹданыны да компасла мүгајисә етмәк олар. Әҝәр о, дүзҝүн тәрбијә олунубса, «шималы» ҝөстәрәҹәк вә сәнә мүдрик гәрарлар вермәкдә көмәк едәҹәк. Анҹаг пис үнсијјәт магнит кими сәни әхлаг нормаларындан кәнара чыхмаға тәһрик едә биләр. Бундан нә өјрәнмәк олар? Чалыш, әхлаг дәјәрләрини позан инсанлардан вә вәзијјәтләрдән гач! (Сүлејманын мәсәлләри 13:20).

[69–ҹу сәһифәдәки шәкил]

Ширникдириҹи тәсирләрә бојун әјәндә сән өз арзуларынын гулу олурсан