Биринҹи әсрдә вә бу ҝүн Аллаһын руһунун фәалијјәти
«Бүтүн бу ишләри һәјата кечирән ејни мүгәддәс руһдур» (1 КОР. 12:11).
1. Бу мәгаләдә нәји арашдыраҹағыг?
ӘЛЛИНҸИ ҜҮН БАЈРАМЫ. Мәҝәр бу бајрамын ады ҝәләндә һәмин ҝүн баш верән һәјәҹанландырыҹы һадисәләр јадымыза дүшмүр? (Һәв. иш. 2:1—4). Биринҹи әсрдә Исанын шаҝирдләринин үзәринә мүгәддәс руһун төкүлмәси Аллаһын Өз хидмәтчиләри илә мүнасибәтдә мүһүм дәјишиклик етдијиндән хәбәр верди. Өтән мәгаләдә биз Аллаһын руһунун гәдимдә јашамыш садиг хидмәтчиләринә чәтинликләрин өһдәсиндән ҝәлмәјә вә тапшырыглары јеринә јетирмәјә неҹә көмәк етдијини арашдырдыг. Бәс Аллаһын руһунун мәсиһчиликдән өнҹәки фәалијјәти илә биринҹи әсрдәки фәалијјәти арасында һансы фәрг вар? Вә бу ҝүн мәсиһчиләр Аллаһын руһунун фәалијјәтиндән неҹә јарарланырлар? Ҝәлин бахаг.
«Мән Јеһованын кәнизијәм!»
2. Мәрјәм мүгәддәс руһун һансы мөһтәшәм тәсирини ҝөрмүшдү?
2 Јерусәлимдәки үст отагда топлашан вә мүгәддәс руһ алан шаҝирдләр арасында Мәрјәм дә вар иди (Һәв. иш. 1:13, 14). Бу һадисәдән тәхминән отуз ил әввәл о, Јеһованын руһунун мөһтәшәм фәалијјәтинин шаһиди олмушду. Јеһова Оғлунун һәјатыны ҝөјдән бакирә олан Мәрјәмин бәтнинә көчүрдү. О, буну «мүгәддәс руһ васитәсилә» етди (Мат. 1:20).
3, 4. Мәрјәм биләндә ки, Аллаһ Өз Оғлунун һәјатыны онун бәтнинә көчүрмәк истәјир, буна неҹә јанашды вә биз онун нүмунәсиндән нә өјрәнирик?
3 Нәјә ҝөрә бу гејри-ади шәрәфә мәһз Мәрјәм лајиг ҝөрүлмүшдү? Мәләк Јеһованын Мәрјәм үчүн олан нијјәтини ачыглајанда о, уҹадан деди: «Мән Јеһованын кәнизијәм! Гој сән дејән кими олсун» (Лука 1:38). Мәрјәмин бу сөзләри Јеһованын онда әввәлҹәдән ҝөрдүјү хүсусијјәти үзә чыхартды. Онун мәләјә дәрһал ҹаваб вермәси ҝөстәрди ки, о, Јеһованын онун үчүн олан ирадәсини гәбул етмәјә һазырдыр. Бу гыз Аллаһдан ҹамаатын нә дејәҹәјини вә нишанлысы илә мүнасибәтләринә бунун неҹә тәсир едәҹәјини һеч сорушмады. Өзүнү Аллаһын ән кичик гулу адландырмагла Мәрјәм Ағасы Јеһоваја там етибар етдијини ҝөстәрди.
4 Һәрдән сәнә елә ҝәлирми ки, Јеһоваја хидмәтдә алдығын мәсулијјәтләр һәддән артыг чохдур вә ја ағырдыр? Һәр биримиз өзүмүздән сорушмалыјыг: «Мән Јеһованын бүтүн ишләрә Өз ирадәсинә ујғун шәкилдә нәзарәт етдијинә там инанырам? Аллаһын ишини ҹанла-башла ҝөрүрәм?» Әмин ол ки, Јеһова Она бүтүн үрәкдән етибар едән вә Али Һөкмдар кими табе олан инсанлардан Өз руһуну әсирҝәмир (Һәв. иш. 5:32).
Мүгәддәс руһ Петерә көмәк етмишди
5. Ерамызын 33-ҹү илин Әллинҹи ҝүн бајрамындан әввәл Петер мүгәддәс руһун һансы фәалијјәтинин шаһиди олмушду?
5 Мәрјәм кими, Петер дә ерамызын 33-ҹү илин Әллинҹи ҝүн бајрамындан әввәл мүгәддәс руһун мөһтәшәм фәалијјәтини өз үзәриндә һисс етмишди. Иса она вә диҝәр һәвариләринә ҹинләри говмаг сәлаһијјәти вермишди (Марк 3:14—16). Мүгәддәс Јазыларда бу һагда әтрафлы мәлумат верилмәсә дә, ҝөрүнүр, Петер бу сәлаһијјәтдән истифадә едирди. Исанын чағырышы илә Петер Галилеја дәнизинин үзәриндә она тәрәф јеријәндә дә Аллаһын гүввәси өзүнү бүрузә верди. (Матта 14:25—29 ајәләрини оху.) Бу һадисәдән ајдын ҝөрүрүк ки, Петер мүгәддәс руһун рәһбәрлијинә етибар етдији үчүн белә мөһтәшәм ишләр ҝөрә билирди. Лакин тезликлә бу руһ Петердә вә диҝәр шаҝирдләрдә өзүнү тамамилә јени тәрздә бүрузә верәҹәкди.
6. Ерамызын 33-ҹү илин Әллинҹи ҝүн бајрамы әрәфәсиндә вә ондан сонра Петер мүгәддәс руһун көмәјилә нә етмишди?
6 Ерамызын 33-ҹү илин Әллинҹи ҝүн бајрамында Петер вә диҝәр шаҝирдләрә Јерусәлимә ҝәлән әҹнәбиләрлә мөҹүзәви шәкилдә онларын дилиндә данышмаг баҹарығы верилди. Бундан сонра Петер онларын гаршысында нитглә чыхыш етди (Һәв. иш. 2:14—36). Һөвсәләсиз, чылғын вә бәзән горхуја дүшән Петер мүгәддәс руһ алдыгдан сонра, һәдә-горхулара вә тәгибләрә бахмајараг, хош хәбәри ҹәсарәтлә бәјан едирди (Һәв. иш. 4:18—20, 31). Аллаһ Өз руһу илә Петерә хүсуси билик вермишди (Һәв. иш. 5:8, 9). Һәтта бир дәфә о, бу руһун көмәјилә адам дирилтмишди (Һәв. иш. 9:40).
7. Исанын өјрәтдији һансы тәлимләр Петерә мәсһ едилдикдән сонра ајдын олду?
7 Һәтта Әллинҹи ҝүн бајрамындан әввәл дә Петер Исанын бир чох тәлимләрини анлајырды (Мат. 16:16, 17; Јәһ. 6:68). Анҹаг Исанын тәлимләринин елә јөнләри вар иди ки, Петер онлары јалныз Әллинҹи ҝүн бајрамындан сонра баша дүшдү. Мәсәлән, Петер Мәсиһин үч ҝүндән сонра руһани шәхсијјәт кими дириләҹәјини вә Аллаһын Падшаһлығынын јердә јох, ҝөјдә гурулаҹағыны баша дүшмәмишди (Јәһ. 20:6—10; Һәв. иш. 1:6). Инсанларын руһани бәдән алараг сәмави Падшаһлыгда Мәсиһлә бирҝә һөкмранлыг едәҹәкләри фикри дә онун үчүн јад иди. Јалныз мүгәддәс руһла вәфтиз олдугдан вә ҝөјләр һәјаты үчүн сечилдикдән сонра о, Исанын бунунла әлагәдар сөјләдикләрини анлады.
8. Һәм мәсһ олунмушлара, һәм дә башга гојунлара һансы биликләр ачылыб?
8 Исанын шаҝирдләринин үзәринә мүгәддәс руһ төкүләндән сонра әввәлләр онлар үчүн гаранлыг олан шејләри анладылар. Јунанҹа Мүгәддәс Јазылары гәләмә аланлар Аллаһдан илһам алараг Онун нијјәтинин һејрәтамиз јөнләрини бизим хејримиз үчүн там ачыгладылар (Ефес. 3:8—11, 18). Бу ҝүн һәм мәсһ олунмушлар, һәм дә башга гојунлар мәһз һәмин һәгигәтләри арашдырыр вә онлары баша дүшүрләр (Јәһ. 10:16). Мүгәддәс руһун көмәјилә Аллаһын Кәламындан ачылан биликләри вә онлары баша дүшмәјини гијмәтләндирирсәнми?
Павел «мүгәддәс руһла долду»
9. Павел мүгәддәс руһун көмәјилә һансы ишләри ҝөрүрдү?
9 Ерамызын 33-ҹү илин Әллинҹи ҝүн бајрамындан тәхминән бир ил сонра даһа бир нәфәр Аллаһын әнамыны — мүгәддәс руһ алмышды. Сөһбәт сонрадан һәвари Павел кими танынан Шаулдан ҝедир. Аллаһын руһунун она вердији баҹарыг бу ҝүн бизә дә фајда ҝәтирир. О, Аллаһдан илһам алараг Мүгәддәс Јазылара дахил олан 14 мәктуб јазмышды. Мүгәддәс руһ Петерә көмәк етдији кими, Павелә дә өлмәзлик вә чүрүмәзлик үмидинин нә олдуғуну анламаға вә ону ајдын шәкилдә Мүгәддәс Китабда гәләмә алмаға көмәк етмишди. Һәмчинин бу руһун вердији ҝүҹ сајәсиндә Павел инсанлара шәфа верирди, ҹинләри говурду вә һәтта бир дәфә адам дирилтмишди! Лакин бу ҝүҹ она даһа ваҹиб мәгсәд үчүн верилмишди. Мөҹүзәви шәкилдә олмаса да, биз дә һәмин ҝүҹдән алараг ејни иши ҝөрүрүк.
10. Мүгәддәс руһ Павелин данышыг габилијјәтинә неҹә тәсир етмишди?
10 «Мүгәддәс руһла [долан]» Павел ҹадуҝәр Елима илә данышаркән чох ҹәсарәтли иди. Онлар арасындакы сөһбәтә башдан ајаға гулаг асан Кипр адасынын валисинә бу, бөјүк тәсир бағышламышды. «Јеһова һаггында өјрәндикләри ону валеһ етмишди» вә о, һәгигәти гәбул етди (Һәв. иш. 13:8—12). Бәли, Павел һәгигәт барәдә данышаркән мүгәддәс руһун ролунун нә гәдәр ваҹиб олдуғуну чох јахшы билирди (Мат. 10:20). Сонрадан о, Ефес јығынҹағындан хаһиш етмишди ки, онда «данышмаг габилијјәти» олсун дејә дуа етсинләр (Ефес. 6:18—20).
11. Аллаһын руһу Павелә неҹә рәһбәрлик едирди?
11 Мүгәддәс руһ Павелә данышыг габилијјәти вермәклә јанашы, бәзән она мүәјјән јерләрдә данышмағы гадаған едирди. Павел һәр дәфә миссионер хидмәтинә башлајанда она Аллаһын руһу истигамәт верирди (Һәв. иш. 13:2; Һәвариләрин ишләри 16:6—10 ајәләрини оху). Јеһова бу ҝүн дә тәблиғ ишинә мүгәддәс руһу илә рәһбәрлик едир. Павел кими, Аллаһын бүтүн итаәткар хидмәтчиләри һәгигәти сәјлә вә ҹәсарәтлә бәјан етмәјә чалышырлар. Аллаһын руһунун рәһбәрлији Павелин ҝүнләриндәки кими ачыг-ашкар ҝөрүнмәсә дә, биз әмин ола биләрик ки, Јеһова лајигли инсанларын һәгигәти ешитмәләри үчүн бу ҝүн дә Өз руһундан истифадә едир (Јәһ. 6:44).
«Фәалијјәтләр дә мүхтәлифдир»
12-14. Аллаһын руһу Онун бүтүн хидмәтчиләриндә ејни ҹүр фәалијјәт ҝөстәрир? Изаһ ет.
12 Јеһованын биринҹи әсрдәки мәсһ олунмушлардан ибарәт јығынҹаглара неҹә хејир-дуа вермәси барәдә охумаг, шүбһәсиз ки, бизи чох руһландырыр. Павелин Коринф јығынҹағындакы мәсиһчиләрә мүгәддәс руһун мөҹүзәли әнамлары барәдә јаздығы сөзләри јадымыза салаг: «Әнамлар мүхтәлифдир, анҹаг мүгәддәс руһ һәмин мүгәддәс руһдур. Хидмәт нөвләри дә мүхтәлифдир, амма Ағамыз бирдир. Фәалијјәтләр дә мүхтәлифдир, лакин бүтүн инсанларда бу фәалијјәтләри ҝөстәрән Аллаһ бирдир» (1 Кор. 12:4—6, 11). Бәли, мүгәддәс руһ Јеһованын мүхтәлиф хидмәтчиләриндә мүхтәлиф ҹүр фәалијјәт ҝөстәрәрәк конкрет мәгсәдләр үчүн хидмәт едир. Аллаһын руһу һәм Мәсиһин «кичик сүрү»сүнә, һәм дә онун «башга [гојунлары]» үчүн әлчатандыр (Лука 12:32; Јәһ. 10:16). Бунунла белә, бу руһ һеч дә һәмишә јығынҹағын бүтүн үзвләриндә ејни шәкилдә фәалијјәт ҝөстәрмир.
13 Мәсәлән, ағсаггаллар мүгәддәс руһла тәјин олунурлар (Һәв. иш. 20:28). Лакин бу руһла мәсһ едилән мәсиһчиләрин һамысы јығынҹагда нәзарәтчи дејилләр. Биз бундан һансы нәтиҹәјә ҝәлирик? Мүгәддәс руһ јығынҹағын үзвләриндә мүхтәлиф ҹүр фәалијјәт ҝөстәрир.
14 Мәсһ олунмуш мәсиһчиләрдә онларын Аллаһ тәрәфиндән «оғуллуға» ҝөтүрүлдүкләринә даир әминлији һасил едән мүгәддәс руһдур. Бу, о руһдур ки, Јеһова ондан истифадә едәрәк јеҝанә Оғлуну ҝөјләр һәјаты үчүн дирилдиб өлмәзлик бәхш едиб. (Ромалылара 8:11, 15 ајәләрини оху.) Бу, о руһдур ки, онун васитәсилә Аллаһ бүтүн каинаты јарадыб (Јар. 1:1—3). Елә һәмин руһ Бесалелә мүгәддәс мәскәни тикмәк кими хүсуси иши иҹра етмәк, Шимшона фөвгәладә ҝүҹ тәләб едән тапшырығы јеринә јетирмәк вә Петерә сујун үзәриндә ҝәзмәк баҹарығы вермишди. Буна ҝөрә дә ҝәлин Аллаһын руһуна малик олмағы садәҹә бу руһун хүсуси фәалијјәти илә, јәни мәсһ едилмәклә сәһв салмајаг. Аллаһ кими руһла мәсһ едәҹәјинә Өзү гәрар верир.
15. Мүгәддәс руһла вәфтиз олунма әбәдијјәт боју давам едәҹәк? Изаһ ет.
15 Аллаһын мүгәддәс фәал гүввәси Онун садиг хидмәтчиләриндә тарих боју, һәтта О, инсанлары бу руһла мәсһ етмәјә башламаздан мин илләр өнҹә мүхтәлиф ҹүр фәалијјәт ҝөстәрирди. Мүгәддәс руһла мәсһ олунма ерамызын 33-ҹү илин Әллинҹи ҝүн бајрамында башлајыб вә бу, әбәдијјән давам етмәјәҹәк. Руһла вәфтиз олунма ҝәләҹәкдә дајандырылса да, бу руһ Аллаһын нијјәтини јеринә јетирә билмәләри үчүн әбәдијјәт боју Онун хидмәтчиләриндә фәалијјәт ҝөстәрәҹәк.
16. Аллаһын хидмәтчиләри Онун руһунун көмәјилә һансы иши ҝөрүрләр?
16 Бәс бу ҝүн Аллаһын руһу јер үзүндә неҹә фәалијјәт ҝөстәрир? Вәһј 22:17 ајәси бу суала ҹаваб верир: «Мүгәддәс руһ вә ҝәлин дејирләр: “Ҝәл!” Буну ешидән һәр кәс гој: “Ҝәл!” — десин. Гој сусајан һәр кәс ҝәлсин. Истәјән гој һәјат сујуну һавајы ҝөтүрсүн». Јеһованын руһу мәсиһчиләри һәјат суларыны гәбул етмәк «истәјән» һәр кәсә Онун бу дәвәтини чатдырмаға тәшвиг едир. Бу ишин башында мәсһ олунмуш мәсиһчиләр дурурлар. Диҝәр гојунлар исә онларла әмәкдашлыг едирләр. Һәр ики синиф бу ишин јеринә јетирилмәси үчүн мүгәддәс руһун рәһбәрлијинә табе олур. Үстәлик, онларын һамысы өзләрини Јеһоваја һәср едәрәк «Ата, Оғул вә мүгәддәс руһ наминә» вәфтиз олунублар (Мат. 28:19). Онларын һамысы мүгәддәс руһун һәјатларына тәсир етмәсинә вә дахилләриндә руһун бәһрәсини јетишдирмәсинә јол верирләр (Галат. 5:22, 23). Мәсһ олунмушлар кими, башга гојунлар да Аллаһын руһунун онлара көмәк етмәсинә јол верирләр. Бу руһун көмәјилә онлар Аллаһын мүгәддәслик тәләбләринә мүвафиг олмаг үчүн әлләриндән ҝәләни әсирҝәмирләр (2 Кор. 7:1; Вәһј 7:9, 14).
Дурмадан мүгәддәс руһ дилә
17. Сәндә Аллаһын руһунун олдуғуну неҹә ҝөстәрә биләрсән?
17 Ҝөјләр вә ја јерүзү үмидинә малик олмағындан асылы олмајараг, Јеһова сәнә «инсан ҝүҹүндән үстүн олан» гүдрәт верәҹәк ки, нөгсансызлығыны ахырадәк горујуб мүкафатыны аласан (2 Кор. 4:7). Тәблиғ етдијинә ҝөрә инсанлар сәни лаға гоја биләрләр. Бу заман Мүгәддәс Китабдакы сөзләри јадына сал: «Әҝәр сизи Мәсиһин адына ҝөрә тәһгир едирләрсә, сиз хошбәхтсиниз, чүнки шөһрәт руһу, јәни Аллаһын руһу үзәриниздәдир» (1 Пет. 4:14).
18, 19. Јеһова мүгәддәс руһу илә сәнә неҹә көмәк едәҹәк вә сән нә етмәјә гәти гәрарлысан?
18 Аллаһ Ондан мүгәддәс руһу сәмимијјәтлә диләјәнләрә тәмәннасыз шәкилдә бу руһдан верир. Бу руһ јалныз сәнин баҹарығыны јох, һәм дә Она ән јахшы тәрздә хидмәт етмәк истәјини артыраҹаг. «Аллаһ Өзү сизин арзу вә һәрәкәтләринизи истәдији сәмтә јөнәлдәрәк сиздә фәалијјәт ҝөстәрир», — дејә Мүгәддәс Китабда гејд едилир. Гијмәтли әнам олан мүгәддәс руһун көмәји «һәјат сөзүндән икиәлли [јапышмаг]» үчүн ҝөстәрдијимиз сәјлә бәрабәр, бизә вар ҝүҹүмүзлә «хиласа јетишмәјә» көмәк едәҹәк (Филип. 2:12, 13, 16).
19 Беләликлә, Аллаһын руһуна там ҝүвәнәрәк алдығын һәр тапшырығы үрәкдән, ҹанла-башла јеринә јетир, даима пүхтәләш вә көмәк үчүн Јеһоваја үз тут (Јаг. 1:5). О, сәнә Кәламыны баша дүшмәк, проблемләрин өһдәсиндән ҝәлмәк вә хош хәбәри бәјан етмәк үчүн лазыми көмәклији ҝөстәрәҹәк. «Дурмадан диләјин, сизә вериләҹәк; дурмадан ахтарын, тапаҹагсыныз; дурмадан гапыны дөјүн вә сизә ачаҹаглар» (Лука 11:9, 13). Бу сөзләри мүгәддәс руһу диләмәјә дә аид етмәк олар. Јеһоваја дурмадан јалвар ки, сәнә руһун рәһбәрлијинә табе олан һәм кечмишдә, һәм дә мүасир дөврдә јашајан садиг хидмәтчиләри кими олмаға көмәк етсин.
Изаһ едә биләрсинизми?
• Биз Мәрјәмин һансы хүсусијјәтини тәглид едә биләрик вә бу, бизә һансы хејир-дуалары ҝәтирәҹәк?
• Мүгәддәс руһ Павелә неҹә рәһбәрлик едирди?
• Аллаһын руһу Онун хидмәтчиләринә бу ҝүн неҹә рәһбәрлик едир?
[24–ҹү сәһифәдәки шәкил]
Аллаһын руһу сајәсиндә Павел пис руһани варлыгларын тәсиринин өһдәсиндән ҝәлди
[26–ҹы сәһифәдәки шәкил]
Бу ҝүн мүгәддәс руһ, һансы үмидә малик олмаларындан асылы олмајараг, бүтүн мәсиһчиләр үчүн әлчатандыр