Аллаһын Кәламыны өјрәнмәјә ајырдығын вахты мараглы вә сәмәрәли кечир
Мүгәддәс Китабы арашдырмағын даһа мараглы, фајдалы вә сәмәрәли олмасы үчүн нә едә биләрик? Ҝәлин гысаҹа олараг үч ваҹиб аддыма нәзәр салаг.
1 ДУА. Биринҹи аддым дуадыр (Мәз. 42:8). Нәјә ҝөрә? Аллаһын Кәламыны охумаға ибадәтимизин бир һиссәси кими бахмалыјыг. Буна ҝөрә дә Јеһовадан бизә дүзҝүн әһвал-руһијјә вә мүгәддәс руһ вермәсини хаһиш етмәлијик (Лука 11:13). Узун мүддәт миссионер кими хидмәт едән Барбара дејир: «Мүгәддәс Китабы охумаздан вә ја арашдырмаздан габаг һәмишә дуа едирәм. Јалныз бундан сонра Јеһованын мәнимлә олдуғуну вә ишимдән разы галдығыны һисс едирәм». Мүгәддәс Китабы арашдырмаға башламаздан өнҹә етдијимиз дуа үрәјимизи вә зеһнимизи гаршымыздакы зәнҝин руһани гиданы гәбул етмәјә һазырлајыр.
2 ДӘРИНДӘН ДҮШҮНМӘК. Бәзиләри вахт азлығы уҹбатындан Аллаһын Кәламыны сәтһи охумагла кифајәтләнирләр. Лакин бунунла онлар өзләрини Мүгәддәс Китабы арашдырмағын ҝәтирдији фајдадан мәһрум едирләр. 50 илдән чохдур ки, Јеһоваја хидмәт едән Карлос гардаш өјрәнмәнин даһа сәмәрәли олмасы үчүн дүшүнмәјә вахт ајырмағын ваҹиб олдуғуну баша дүшүр. О дејир: «Инди мән һәр ҝүн Мүгәддәс Китабдан тәхминән ики сәһифә охујурам. Бунун сајәсиндә охудугларымын үзәриндә дүшүнмәјә даһа чох вахт ајыра билирәм вә өзүм үчүн ибрәт дәрси ҝөтүрүрәм» (Мәз. 77:12). Дүшүнмәјә вахт ајыранда билијимиз артыр вә Аллаһын ирадәсини даһа јахшы дәрк едирик (Колос. 1:9—11).
3 ТӘТБИГ ЕТМӘК. Һансыса мәшғулијјәтин практики дәјәрини ҝөрәндә ондан даһа чох фајда әлдә едирик. Буну Мүгәддәс Китабы арашдырмаға да аид етмәк олар. Мүгәддәс Китабы мүнтәзәм өјрәнән Габриел адында бир ҝәнҹ гардаш дејир: «Аллаһын Кәламыны арашдырмаг мәнә ҝүндәлик проблемләрин өһдәсиндән ҝәлмәјә көмәк едир вә башгаларына әл тутмаға тәшвиг едир». О әлавә едәрәк дејир: «Чалышырам ки, өјрәндијим һәр шеји һәјатымда тәтбиг едим» (Ганун. т. 11:18; Јешуа 1:8). Бәли, Аллаһ бизә зәнҝин биликләрини ачыглајыр вә биз онлары мәнимсәјиб тәтбиг етмәлијик (Сүл. мәс. 2:1—5).
ХҮЛАСӘ. Һикмәт Мәнбәји олан Јеһованын ачыгладығы биликләрин дәринликләринә вармаг неҹә дә бөјүк шәрәфдир! (Ром. 11:33). Беләликлә, нөвбәти дәфә Мүгәддәс Китабы арашдыранда илк өнҹә Јеһоваја дуа ет ки, сәнә дүзҝүн әһвал-руһијјә вә мүгәддәс руһ версин. Вахташыры дајаныб охудугларынын үзәриндә дәриндән дүшүн. Сонра исә өјрәндикләринин һамысыны ҝүндәлик һәјатында тәтбиг ет. Әҝәр бу ваҹиб аддымлары атсан, арашдырма үчүн ајырдығын вахт даһа мараглы вә сәмәрәли кечәҹәк.