«Yehova Allahın müasir xalqı»
1. «Yehova Allahın müasir xalqı» broşürasını nə vaxtdan araşdıracağıq və bu, bizə necə fayda gətirəcək?
1 Oktyabr ayının 28-dən başlayaraq yığıncağın Müqəddəs Kitab öyrənməsində «Yehova Allahın müasir xalqı» broşürasını araşdıracağıq. «Ürəyini qoru!» adlı vilayət konqresində çıxan bu yeni broşüranın məqsədi Müqəddəs Kitabı öyrənən kəsləri təşkilata yönəltməkdir. Bu nəşri araşdırmaq təkcə Yehovanın təşkilatının bir üzvü olduğumuza görə minnətdarlığımızı artırmayacaq, həm də xidmət üçün dəyərli olan bu broşüradan daha effektiv surətdə istifadə etməyimizə kömək edəcək (Məz. 48:13).
2. Bu broşüra yığıncaqda necə araşdırılacaq?
2 Necə araşdırılacaq? Görüşü aparan vaxtı elə bölüşdürəcək ki, hər bir fəslə bərabər vaxt düşsün. O, 28 fəslin hər birini araşdırmağa başlayanda fəslin adını səsləndirəcək. Sonra o, oxumaq üçün təyin olunan qardaşdan lazım olan abzasları oxumağı xahiş edəcək. Bundan sonra görüşü aparan qardaş giriş abzas üçün hazırladığı sualı verəcək. Daha sonra qalın şriftlə başlayan abzasların hər biri ayrı-ayrılıqda oxunmalı və araşdırılmalıdır. Abzas oxunduqdan sonra görüşü aparan dinləyiciləri abzasın fəslin adı ilə necə əlaqəli olduğuna dair şərh verməyə dəvət edəcək. Broşüradakı bir çox şəkillərə də şərh vermək olar. Vaxt yol verirsə, əsas ayələr oxunmalıdır. Növbəti fəslə keçməzdən öncə, görüşü aparan səhifənin aşağısındakı suallarla fəsli təkrarlayacaq. Əgər fəsildə «Tövsiyə» çərçivəsi varsa, o oxunmalıdır. Dinləyicilər oradakı məsləhəti tətbiq etməyin Müqəddəs Kitabı öyrənən insana gətirəcəyi fayda barədə şərh verə bilərlər. Əgər vaxt imkan verirsə, görüşü aparan öyrənmənin sonunda keçilən fəsillərin başlıqlarını təkrar sual kimi istifadə edə bilər. Yadda saxlayın ki, evdə Müqəddəs Kitab öyrənməsi keçirərkən bu göstərişlərə riayət etmək şərt deyil.
3. Broşüranın araşdırılmasından tam şəkildə necə fayda əldə edə bilərik?
3 Tam fayda əldə etmək üçün görüşə yaxşıca hazırlaşmaq lazımdır. Şərh verməyə çalış. Müzakirə zamanı bu materialın Müqəddəs Kitabı öyrənən kəslərə nə üçün faydalı olduğu üzərində düşün. Gəlin bu yeni broşüranın vasitəsilə insanlara Allahın iradəsini yerinə yetirməyə kömək edək. Beləcə, onlar da əbədi həyat mükafatını əldə etsinlər (1 Yəh. 2:17).