Nyiña inyu Kaat yés i likoda li ñem sonde

6-12 SÔÑ NJÉBA

MASÔÔ MA NKUS MA BIBEL | MANYODI 6–7

“Hanano ni w’a tehe jam m’a boñ Faraô”

(Manyodi 6:1) Ni Yéhôva a kal Môsé le: “Hanano ni w’a tehe jam m’a boñ Faraô. Inyule ni woo u lipémba nyen a’ nwas bo le ba ke, yak ni woo u lipémba nyen a’ luhul bo hisi hié.”

(Manyodi 6:6, 7) “Jon kal bon ba Israél le: ‘Men me yé Yéhôva, ndi m’a nyodna bé, ni sodla mambegee ma bôt ba Egiptô, me pagal bé, ni sodla nson wap ngéba; m’a kobol ki bé ni nsamblak woo ni nôgôs keñi. ⁷ Ndi m’a yoñ bé i meeni le ni ba loñ yem, me témp ki Nyambe inyu nan; ndi n’a yi le men me yé Yéhôva Nyambe nan, nu a nyodna bé, ni sodla mambegee ma bôt ba Égiptô.’”

it-2 309 § 5

Môsi

Ba bé le ba tehe mahéñha yak bon bôlôm ba Israel. Ba bi bôk ba neebe le Môsi a bé nwet Yéhôva a bi om, ndi i ngéda Faraô a bi bôdôl nôgha bo njôghe ngandak, ba kahal ôm Môsi nsohi kayéle yak nye a bôdôl yemhe Yéhôva le a hôla nye. (Manyodi 4:29-31; 5:19-23) Ha ngéda i, Nyambe Nungigii a bi lédés nye, a yeelene ki nye le a bé bebee i yônôs i mbônga a bi bôn Abraham, Isak ni Yakôb; hala wee a bé lama tohol Israel inyu yeelene bo ngobol yosôna i joi li Yéhôva, ni le a yilha bo litén likeñi nyoo i hisi hi likak. (Manyodi 6:1-8) Ndi to hala, bon ba Israel ba bi emble bé Môsi. I mbus himala hi yônôs bôô, ba bi témb i pes Môsi kayéle i mbus himala hi yônôs jôm, Môsi a bi tjek litén kiki “mintôñ mi gwét” inyu pémés jo i Égiptô.​—Manyodi 13:18.

Manyodi 7:4, 5) “Ndi Faraô a’ emble bé bé, m’a finbe Égiptô, me nyodna mintôñ nwem mi gwét, loñ yem yaga, bon ba IsraéI, me nyodna bo loñ Égiptô ni nôgôs keñi. ⁵ Ndi bôt ba Égiptô b’a yi le men me yé Yéhôva inyu sambal me nsambal woo wem ngii Égiptô, me nyodna bon ba IsraéI ikété yap.”

it-2 309 § 3, 4

Môsi

I bisu bi Faraô. Môsi bo Arôn ba bi yoñ ngaba i gwét ipôla ‘banyambe.’ Ni njel bôt bé ba makañ, ba ba bé sébél le Yané bo Yambré (2 Timôtéô 3:8), Faraô a bi lôndôl mop ma Égiptô momasôna inyu kolba ngui i Yéhôva. Jam li hélha li bisu Arôn a bi boñ i bisu bi Faraô i bé éba le Yéhôva a nloo mop ma Égiptô ndi Faraô a bi nai ni ño nledga. (Manyodi 7:8-13) I mbus himala hi nyônôs aa, yak biprisi bi bé nyégsaga i neebe le: “Hinoo hi Nyambe ni hini!” Ba bé lôôha nok njôghe inyu himala hi mot kayéle ba bé la bé telep i bisu bi Faraô inyu kolba Môsi.​—Manyodi 8:16-19; 9:10-12.

Dimala di di nhôgbaha ñem ni di di nti nledek ñem. Yéhôva a bi gwélél Môsi bo Arôn inyu legel hiki himala. Hiki himala hi bi lo kiki Môsi a bi bôn inyu éba le Yéhôva a bi ep nye. Jôl li Yéhôva li bi yiba homa nyensôna i loñ Égiptô. Bon ba Israel ni bon ba Égiptô bahogi ba bi kôhna hogbe. Ndi Faraô ni bôt bé ba bi kônde bana ñem nledga. (Manyodi 9:16; 11:10; 12:29-39) Tolakii ba bé nkwoog nkaa le mop map ma bé unbene bé bo, bon ba Égiptô ba bé yi ntiik le Yéhôva a bé kéés mop map. I mbus himala hi nyônôs bôô, Yak Môsi a bi yila mut nkeñi kiyaga i loñ Égiptô, i mis ma minkol mi Faraô, ni i mis ma loñ yé.”​—Manyodi 11:3.

Tibil tém inyu léba tik ngok i mbuu

(Manyodi 6:3) Me pémél Abraham, ni Isak, ni Yakôb, me bak Nyambe nu ngui yosôna; ndi kingéda jôl jem le Yéhôva, me yina bé me ni bo.

it-2 1091 § 4-5

Nu ngui yosôna

Yéhôva a bi gwélél ini tel le “Nyambe Nu ngui yosôna” (ʼÉl Shaddayʹ) ngéda a bi bôn Abraham le Isak a ga gwé. Ndi i bé sômbla le Abraham a hémle le Nyambe a gwé ngui i yônôs mbônga u. I mbus ngéda, ba bi bôdôl gwélél tel i inyu pôdôl Djob li li bé lama sayap Isak ni Yakôb, bet ba bé lama kôdôl bisai bi bé lama lôl mu malômbla Yéhôva a bi boñ ni Abraham.​—Bibôdle 17:1; 28:3; 35:11; 48:3.

Inoñnaga ni yom di ntip kal, Yéhôva a bi kal Môsi le: “Me pémél Abraham, ni Isak, ni Yakôb, me bak Nyambe Nu ngui yosôna [beʼÉlʹ Shaddayʹ], ndi kingéda jôl jem le Yéhôva, me yina bé me ni bo.” (Manyodi 6:3) Hala a nsômbôl bé kal le basôgôlsôgôl ba, ba bé yi bé jôl li Yéhôva, inyule bo ni bôt bape ba bi meya ba ngwélél jo. (Bibôdle 4:1, 26; 14:22; 27:27; 28:16) Ikété kaat Bibôdle, i i mpôdôl niñ i basôgôlsôgôl, di nléba ndik bibuk bini le “Nu ngui yosôna” ngélé 6, ndi ikété Bitilna bi Lôk Héber, di nléba jôl lini le Yéhôva 172 ngélé. Basôgôlsôgôl ba bé yi le Djob a kôli le ba sébél nye le “Nu ngui yosôna,” ndi ba bé ngi tibil nok ngobol yosôna i jôl li Djob. Kaat yada i ndoñi bibuk le The Illustrated Bible Dictionary (Vol. 1, p. 572) i nkal le: “Mbônga u bisu Djob a bi boñ basôgôlsôgôl u bééna maada ni bilôl; ba bé nkwoog nkaa le Yahweh, a bé Nyambe (ʼel), nu a bééna ngap (bebek hala wee Shadday) i yônôs mimbônga nwé. I yom i bi tagbe ngéda Môsi a bi tehe lindômbôô li hié li lôlak ikété libui, i ñéba maada ma yé ipôla ngui ni jôl li Yahweh li li nyiba loñge.”​—Ntilga ni J. D. Douglas, 1980.

(Manyodi 7:1) Ni Yéhôva a kal Môsé le: “Tehe-ki, me mal téé we le u ba Nyambe inyu Faraô; ndi manyuñ Arôn a’ ba we mpôdôl.

it-2 308 § 6

Môsi

Djob a bi gwélél Môsi tolakii a bé hoñol le a kôli bé. Ndi Môsi a bi unda le a yé nsut ngéda a bi kal le a nyi bé hop. Môsi a bi héñha, a bé ha bé nwet a bé sômbôl tohol Lôk Israel 40 ma nwii i bisu bi ngéda. A bi ke ni bisu i pééna ni Yéhôva, sôk i nsôk, a bat nye le a pohol mut numpe. Tolakii Nyambe a bi unbene Môsi, a bi tjôô bé nye, ndi, a bi tep Arôn inyu ba nlegel nwin nu Môsi. Kiki Djob nyen a bé ep Môsi, di nla kal le Môsi a bé “Nyambe” inyu Arôn ni le Arôn a bé mpôdôl inyu Môsi. Ngéda Môsi bo Arôn ba bi bomna ni mimañ mi Lôk Israel yak ni Faraô, i nene le Yéhôva a bé kal Môsi i jam a nlama boñ, i mbus, yak Môsi a bé kal Arôn nlélém jam kayéle Arôn nyen a bé yoñ hop i bisu bi Faraô (i nwet a bi yiha i Faraô Môsi a bi so hala a bé 40 ma nwii). (Manyodi 2:23; 4:10-17) I mbus ngéda Yéhôva a bi kal le, Arôn a ga ba “mpôdôl” inyu Môsi, hala a bé kobla le Môsi a bé lama kal Arôn kii a boñ, nlélém kiki yak Yéhôva a bé kal Môsi kii a boñ. Yéhôva a bi kal Môsi le a ga yilha nye “Nyambe inyu Faraô,” hala wee, a ga kon bé Faraô woñi inyule a ga loo nye ngui.​—Manyodi 7:1, 2.

Lisoñgol li Bibel

(Manyodi 6:1-15)

13-19 SÔÑ NJÉBA

MASÔÔ MA NKUS MA BIBEL | MANYODI 8–9

“Ngôk u Faraô u bi boñ le Djob a yônôs sômbôl yé”

(Manyodi 8:15) Ndi Faraô a tehe bañ le hogbe i nkuha, a néyés ñem, a nôgôl bé bo, kikii Yéhôva a pot.

it-2 431 § 2

Ño nledga

Mu maada mé ni bôt ba binam, Yéhôva, ikété hônba yé, a bi nwas le ngim bôt tole ngim matén i kee ni bisu i niñ, ki le ba bé lama wo. (Bibôdle 15:16; 2 Pétrô 3:9) Tolakii bôt bahogi ba bi héñha, ba bôdôl nôgôl Yéhôva (Yôsua 2:8-14; 6:22, 23; 9:3-15), bape ba bi ke ni bisu i kolba Yéhôva ni i tét bagwélél bé. (Ndiimba mbén 2:30-33; Yôsua 11:19, 20) Tolakii Yéhôva a nsôñga bé bôt i bana ñem nledga, Bibel i mbéna gwélél Bibuk kiki bo ‘nwas le a bana nledek ñem’ tole ‘a lédés ki bo miñem nwap.’ Ngéda a nsôk a nôgôs bet ba gwé ñem nledga, a yé a éba ngui yé, a boñ ki le jôl jé li yiba ni nkoñ ’isi wonsôna.​—Hégha ni Manyodi 4:21; Yôhanes 12:40; Rôma 9:14-18.

(Manyodi 8:18, 19) Ni bôt ba makañ ba sinda ki mintongo nlélém hala, ba boñok binjénjé le ba pémés gwél, ndi ba la bé. Gwél bi adbe mut binam ni lém i nyuu. ¹⁹ Ha ni nyen bôt ba makañ ba kal Faraô le: “Hinoo hi Nyambe ni hini; ni ñem Faraô u nai, a nôgôl bé bo, kikii Yéhôva a pot.”

(Manyodi 9:15-17) Inyule bale bondi me sambal woo wem hanano, ndi me sinda we, yak ni loñ yoñ, himala hi kon, ki u mal tjiba’ hies hana ’isi. ¹⁶ Ndi hodo, inyu jam lini jon me bi nit we, le me la unda we lipémba jem, ni le jôl jem li añlana hisi hiosôna. ¹⁷ Baa u ngi bédhak wemede ikolba loñ yem, le u nwas bé bo le ba ke?

it-2 240 § 4-6

Béba

U héya hala, ngim mangéda Yéhôva a ngwélél bibéba bi bôt inyu yônôs sômbôl yé. Tolakii ba nkolba Djob, a nla boñ le ba lôôha bañ boñ béba kayéle bagwélél bé ba tééda ndéñbe yap. A nla ki boñ le maboñok ma bibéba bi bôt ma bambal telepsép yé. (Rôma 3:3-5, 23-26; 8:35-39; Tjémbi 76:10) Mahoñol ma mon di nléba i kaat Bingéngén 16:4: “Yéhôva a hek hi ki yom ni lisuk jé, ñ, yak béba mut ya inyu ngwa béba.”

Di nla yoñ hihéga hi Faraô nu Yéhôva a bi kal ni njel Môsi bo Arôn, le a nwas bon ba Israel ba ba bé minkôm. Djob a boñ bé le i kiñe i i yila béba, ndi a nwas nye le a kônde niñ, a éga ki mam kayéle Faraô nyemede a éba béba yé ñem i i bi kena nye letee ni nyemb. Kaat Manyodi 9:16 i ñéba i jam Yéhôva a bééna mahoñol ngéda i nkal le: “Ndi hodo, inyu jam lini jon me bi nit we, le me la unda we lipémba jem, ni le jôl jem li añlana hisi hiosôna.”

I jôm li dimala di bi kwél loñ Égiptô, ni i tjiba i bi kwél Faraô ni mintôñ nwé mi gwét i Tuye Nkôibaga i bi éba lipémba li Yéhôva. (Manyodi 7:14–12:30; Tjémbi 78:43-51; 136:15) Ngandak nwii i mbus ngéda biloñ bipe bi bi ke ni bisu i pôdôl jam li, yak jôl li Djob li yiba ni nkoñ ’isi woñsôna. (Yôsua 2:10, 11; 1 Samuel 4:8) Ibale Yéhôva a nol Faraô kunda yada, ki a bi la bé éba lipémba jé ngéda a bi kobol litén jé.

Tibil tém inyu léba tik ngok i mbuu

(Manyodi 8:21) I ba ni le u nwas bé loñ yem le i ke, wee nun-ki, me ñom mauñ ma bibole bi sulul we, yak ni minkol nwoñ, ni loñ yoñ; ma jôp ki mandap moñ mandap ma bôt ba Égiptô m’a yon ni mauñ ma bibole gw’a yamal ki mu biték gwap.

it-2 1039

Bibole

Di nyi bé imbe o-onda i i gwé bipapai hop i Lôk Héber i ngwélél ngéda i mpôdôl himala hi nyônôs ina, hi hi yé himala hi bisu hi hi bi tihba bé bon ba Israel i Gôsén (Manyodi 8:21, 22, 24, 29, 31; Tjémbi 78:45; 105:31) I buk ini le ʽArov ni hop Lôk Héber i nkoblana le “bibole,” (Ce; Jé; MN; Os), “bajemje” (PI), “masun” (Sg), “gwél” (TOB), “dikala” (Ch), “gwél bi ngwo” (LXX).

Ni hop Bassa, i buk ini le “bole” i mpôdôl mbôm njemje i i nyuñ matjél ma bôt kiki hikala i mapan. Miñin mi bibole mi nla tôp kôgôô i nuga tole i mut binam inyu nyuñ matjél. Bibole bi bi ntina makon. Himala hi bibole hi bi nol bon ba Égiptô bahogi, hi nol ki binuga gwap.

(Manyodi 8:25-27) Ni Faraô a sébél Môsé bo Arôn, a kal le: “Ken-gana, ni sémél Nyambe nan bisesema munu hisi hini.” ²⁶  Ni Môsi a kal le: “Hala a ta bé sép i boñ jam lini; inyule hala wee di nsémél Yéhôva Nyambe wés yom i nsuñgaha bôt ba Égiptô miñem. Ndi ibale d’a sem yom i nsuñgaha bôt ba Égiptô miñem, bomede ba tehge, baa b’a ôm bé bés ngok? ²⁷ D’a ke liké li dilo diaa ñoñ, di sémél Yéhôva Nyambe wés bisesema, kikii a’ kal bés.”

w04 15/3 25 § 9

Matode ma tôbôtôbô ma kaat Manyodi

8:26, 27​—Inyuki Môsi a bi kal le bisesema bi bon ba Israel i bé “nsuñgaha bôt ba Égiptô miñem”? Bôt ba Égiptô ba bé bégés ngandak binuga. Kiki bon ba Égiptô ba bééna bé nlélém litehge li bibégés ni bon ba Israel, hala a bi tinde Môsi i yigye nseñ i pam Égiptô inyu ke ti Yéhôva bisesema.

Lisoñgol li Bibel

(Manyodi 8:1-19)

20-26 SÔÑ NJÉBA

MASÔÔ MA NKUS MA BIBEL | MANYODI 10–11

“Môsi bo Arôn ba bi unda le ba gwé ñem ngui”

(Manyodi 10:3-6) Ni Môsi bo Arôn ba jôp yak Faraô, ba kal nye le: “Haana nyen Yéhôva, Nyambe nu Lôk Héber, a mpot le: ‘Letee ni ngéda mbe w’a tjél i suhus wemede bisu gwem? Nwas loñ yem le i kenek, i gwélél me. ⁴ Inyule i ba ni le li ntjél, u nwas bé loñ yem le i ke, wee yani me njôbna bitandi mu mbok yoñ. ⁵ Ndi gw’a hô hisi hiosôna, kayéle mut a’ la bé tehe biték. Gwon gw’a je mbuga u bi pei, u ni nyégla mbus nop matan-ga, ndi gw’a je ki hi ki e i ntoo bé mu wom. ⁶  Mandap moñ m’a yon, ni mandap ma minkol nwoñ, yak ni mandap ma bôt ba Égiptô bobasôna, nya bitandi bosoñ ba maa tehe bé, to basañ ba bosoñ, ibôdôl kel ba ba hana nkoñ biték letee ni len ini.’” Ni nye a hielba, a nyodi yak Faraô, a pam.

w09 15/7 20 § 6

Di kôna Yésu​—Di téé likalô ni makénd

⁶ Di nla hégda makénd Môsi a bi éba ngéda a bi pôdôl Faraô, nu ba bé yoñ ndik bé kiki nlegel nwiin nu banyambe, ndi kiki ngim nyambe, hala wee lok i djob li hiañgaa nu ba bé sébél le Ra. Kiki bini bi Faraô bipe, i nene le a bé bégés nyemede. Mut nye kiki nye a bé pééna bé lipôdôl jé. Lipémba jé, ngôk wé, ni ño wé nledga bi bé boñ le mut nye kiki nye a bé bé le a ti nye maéba. Ndi a bé yi bé le Môsi, nu a bé ntééda bémba, a bé le a telep nye bisu ngandak ngélé ibabé le nye Faraô a naña nye. Kii Môsi a bi legel nye? Dimala. Kii Môsi a bi bat Faraô? A bi bat nye kunde i pémés, tole i nwas le bon ba Israel ba ba bé minkol, ba pam Égiptô! Baa Môsi a bé a gwé ngôñ ni makénd? Ibabé nkaa!​—Ñanga bôt 12:3; Lôk Héber 11:27.

(Manyodi 10:24-26) Ni Faraô a sébél Môsé, a kal le: “Ken-gana, gwéélaga Yéhôva. Ndi ndigi le bibémba binan bi mintômba, ni mauñ manan ma nyaga, bi yégle. Yak bon banan batitigi ba kenek ntôñ nan.” ²⁵  Ni Môsé a kal le: “U nlama ti ki bés makébla ni bisesema bi ntul i hié hana moo, le di sémél Yéhôva Nyambe wés bisesema. ²⁶ Yak bilém gwés gw’a ke lôñni bés. Pal to yada y’a yégle bé, inyule mu nyen di nlama yôñôl bisesema inyu gwélél Yéhôva Nyambe wés, béhbomede di nla bé yi lelaa di nlama gwélél Yéhôva letee di pam nyoo.”

(Manyodi 10:28) Ni Faraô a kal nye le: “Nyodi hana i meeni! U yihge le u tiimba bañ tehe su wem, inyule i kel w’a tehe su wem, w’a wo.”

(Manyodi 11:4-8) Ni Môsé a kal le: “Haana nyen Yéhôva a mpot le: ‘Bebee ni ñem u m’a pam, me lôô ngembe Égiptô, ⁵ babôkgwéé bobasôna ba yé Égiptô b’a wo, ibôdôl mbôkgwéé nu Faraô, nu a yii i yééne yé ane, letee ni mbôkgwéé nu ngolibii, i i yii i ngok-kôgôl; yak ni babôkgwéé ba bilém bobasôna. ⁶ Nlondok nkeñi w’a nôga loñ Égiptô yosôna, nya i maa ba yaga bé, ni nya y’a tiimba ha bé ba. ⁷ Ndi ngwo y’a pémhene bé bon ba Israel hilémp, ibôdôl mut binam letee ni lém, le ndi ni yi lelaa Yéhôva a mbagal bôt ba Égiptô ni Lôk Israel.’ ⁸ Ndi minkol nwoñ mini nwominsôna nw’a sôs letee ni meeni, mi ôôp ki letee ni ’isi bisu gwem, mi kal le: ‘Nyodak, wemede ni Ioñ yosôna i noñ we.’ Ndi mbus hala nyen m’a nyodi.” Ni nye a nyodi yak Faraô, a pam, nlegdaga ni hiun.

it-2 309 § 6

Môsi

Makénd ni hémle bi bé sômbla inyu boma Faraô. Ndik ni njel ngui i mbuu mpubi Yéhôva a bi ti Môsi ni Arôn nyen ba bi la sal i bôlô a bi ti bo.Di nla hégda yééne ane i Faraô, nu a bé énél nkoñ ’isi ha ngéda i. Ikété lipémba jolisôna, Faraô a yôgi, a hoñlak le a yé ngim djob; batipék, batééda nye, baéga mintôñ nwé mi gwét, ni minkol nwé ba bé ba nkéña nye. U héya hala, di nléba yak baéga bibase ni bôt ba makañ ba ba nkolba Môsi. Kiki wet wap Faraô, yak bôt ba ba bééna ngui. I bôt ba bobasôna ba bé ha inyu nit Faraô, ni mop ma Égiptô. Môsi bo Arôn ba bi telep ndik bé ngélé yada i bisu bi Faraô, ndi ngandak ngélé; to hala, Faraô a bi ke ni bisu i hôlôs ñem nledga inyule a bé bé bebee i nwas bon ba Israel ba ba bé minkol. I ngéda Môsi bo Arôn ba bi legel himala hi nyônôs juem, Faraô a bi buñga bo. I mbus himala hi nyônôs bôô, ba bi kôhna oda le a lo ha bañ yak Faraô tiga le ba wo.​—Manyodi 10:11, 28.

Tibil tém inyu léba tik ngok i mbuu

(Manyodi 10:1, 2) Ni Yéhôva a kal Môsi le: “Jôp yak Faraô, inyule memede me mal néiha nye ñem, yak ni miñem mi minkol nwé, le ndi me unda biyimbne gwem bini ikété yap, ² ni le u añal i maôô ma man woñ nu munlôm, ni i maôô ma man man woñ, kikii me bi ndegle bôt ba Égiptô, ni inyu biyimbne gwem me bi boñ ikété yap, le ni yi le men me yé Yéhôva.”

w95 1/9 11 § 11

Mbôgi bôt ikolba kwéha djob

¹¹ Ngéda bon ba Israel ba bé ba ngi yii i Égiptô, Yéhôva a bi ep Môsi yak Faraô, a kal nye le: “Jôp yak Faraô, inyule memede me mal néiha nye ñem, yak ni miñem mi minkol nwé, le ndi me unda biyimbne gwem bini ikété yap, ni le u añal i maôô ma man woñ nu munlôm, ni i maôô ma man man woñ, kikii me bi ndegle bôt ba Égiptô, ni inyu biyimbne gwem me bi boñ ikété yap, le ni yi le men me yé Yéhôva.” (Manyodi 10:1, 2) Bon ba Israel ba bé lama añle bon bap i mam ma hélha Yéhôva a bi boñ. Yak bon bap ba bé lama añle balal bap i mam ma, nlélém tjai di tjai. Jon ba bé lama bigda mam ma hélha Yéhôva a bi boñ. Nlélém jam i len ini, bagwal ba nlama kal bon bap i mam Yéhôva a bi boñ.​—Ndiimba Mbén 6:4-7; Bingéngén 22:6.

(Manyodi 11:7) ‘Ndi ngwo y’a pémhene bé bon ba Israél hilémp, ibôdôl mut binam letee ni lém, le ndi ni yi lela Yéhôva a mbagal bôt ba Égiptô ni Lôk Israel.’

it-1 849 § 6

Manyodi

Ni njel hélha jam, Yéhôva a bi kobol Israel, a boñ ki le jôl jé li yiba ni nkoñ ’isi wonsôna. Kiki ba mpam uu ngwañ u Tuye Nkôibaga, Môsi a éga i hiémbi bon ba Israel ba bi tôp. Yak Miriam, manyañ Môsi nu a bé mpôdôl muda lôñni bôda bape, ba yoñ diñgoma, ba bôdôl sak mu kiki bôlôm ba bé tôp hiémbi. (Manyodi 15:1, 20, 21) Bon ba Israel ba bi bagla toi ni baoo bap. Ngéda ba bi nyodi Égiptô, mut to nuga ba bi boñ bé bo béba yo kiki yo; ngwo i bi bos bé, to pémhene bon ba Israel hilémb. (Manyodi 11:7) Tolakii kaat Manyodi i nkal bé le Faraô a bé ikété nsoñgi u bôt ba ba bi tjiba ikété Tuye Nkôibaga, kaat Tjémbi 136:15 i nkal le Yéhôva a bi “tjap Faraô ni ntôñ wé Tuye Nkôibaga.”

Lisoñgol li Bibel

(Manyodi 10:1-15)

27 SÔÑ NJÉBA–2 SÔÑ HIKAÑ

MASÔÔ MA NKUS MA BIBEL | MANYODI 12

“Kii ngand i Pasa i nkobla inyu bikristen”

(Manyodi 12:5-7) Man ntômba nan a’ ba ngi hies, nlôm nu bimañ bi ñwii wada; n’a yôñôl nye mu mintômba, to mu minyaa mi kembee. ⁶ Ndi n’a tééda nye letee ni hilo hi nyônôs jôm ni dina hi sôñ ini; ngim likoda li ntôñ Israél y’a nol nye manañle ma jop. ⁷ Ndi b’a yoñ mu matjél mé, ba hoo mo bitembee bi likôga gwobiba, yak ni konge, mu mandap i het b’a jél nye.

w07 1/1 20 § 4

“U ga ba ndik nyonok ni maséé”

⁴ Yésu a bi wo i hilo 14 i sôñ Nisan i nwii 33 N.Y. Hilo 14 i sôñ Nisan i bé hilo hi ngand Pasa i loñ Israel. Hilo hi, bijô bi lihaa bi bé yén ntôñ inyu je man ntômba nu a bééna bé lem. Hala a bé hôñlaha bo mahee matjél ma bi bana ngéda bon ba bisu ba Israel ba bi pei, ni ngéda bon ba bisu ba Égiptô ba bi nôla i hilo 14 i sôñ Nisan i nwii 1513 B.N.Y. (Manyodi 12:1-14) Man ntômba nu Pasa a bé yimbne i Yésu nu ñôma Paul a bi kal le: “Ba mal sem Kristô, man ntômba wés nu Pasa.” (1 Korintô 5:7) Matjel ma Yésu ma ntohol ngandak bôt nlélém kiki matjél ma man ntômba nu Pasa.​—Yôhanes 3:16, 36.

(Manyodi 12:12, 13) Inyule mu wo u nlélém u m’a lôô loñ Égiptô, ndi m’a nol babôkgwéé bobasôna i loñ Égiptô, ibôdôl mut binam letee ni lém; m’a pémhene ki banyambe ba Égiptô bobasôna mbagi. Men me yé Yéhôva. ¹³ Matjél m’a ba bé yimbne ngii mandap i het ni yiine. Ndi ngéda me ntehe matjél, wee m’a Iela bé, ntida nyemp w’a ba bé ngii nan i tjé bé, ngéda me nsindna loñ Égiptô.

it-2 485 § 7

Pasa

Yésu a bi yônôs matode mahogi ma ma mbéñge ngand Pasa. Litode jada li yé le ba bé hoo matjél ngii manwemel inyu boñ le añgel i nol bañ bon ba bisu. Ñôma Paul a nkal le minhook mi bikristen ikété likoda mi yé kiki bon ba bisu. (Lôk Héber 12:23), matjél ma Kristô mon ma ntohol bo. (1 Tésalônika 1:10; Éfésô 1:7) Ba bé bôk bé hés to yada i man ntômba i kel ngand Pasa. Mbañ i bi legel le ba bé lama bé bôk hés i Yésu to yada, i mbañ i i bi yon i kel nyemb yé. (Tjémbi 34:20; Yôhanes 19:36) Jon ngand i Pasa i Lôk Yuda i bi tégbaha nwii ndi nwii i bi yik yon ni njel Yésu Kristô, nu a yé “Man ntômba nu Nyambe.”​—Lôk Héber 10:1; Yôhanes 1:29.

(Manyodi 12:24-27) “Ndi n’a tééda jam lini, litéak inyu yoñ, ni inyu bon boñ, mba ni mba. ²⁵ Ndi ya léña le ngéda n’a jôp mu hisi Yéhôva a’ ti bé, kikii a pot, ha ni nyen n’a yônôs nson unu. ²⁶ Ndi y’a léña le ngéda bon banan b’a bat bé le: ‘Ni nsômbôl éba kii ikété nson unu?’ ²⁷ n’a kal le: ‘Wo ni won u yé sesema Pasa inyu Yéhôva, nu a lela mandap ma bon ba Israel Égiptô, ngéda a sibe bôt ba Égiptô ntida nyemb, ndi a sôñ mandap més.’” Ni loñ yosô i ôôp, i ôm mbom yap ’isi.

w13 15/12 20 § 13-14

‘N’a bigda i kel ini’

¹³ Hiki ngwal a bé lama niiga man wé i mam ma bi tagbe. Kiki hihéga, ba bé lama niiga bo le Yéhôva a gwé ngap i sôñ bagwélél bé. Bon ba bé lama nigil i yi le Yéhôva a yé Djob li li yé toi. A ntôñ litén jé, a bak ki bebee i boñ kii yosôna a nla inyu yap. A bi éba hala ngéda a bi sôñ bon bôlôm ba bisu ba Israel ngeñ “a bi bép bon ba Égiptô.” A bi péyés bon bôlôm ba bisu.

¹⁴ Ibale u yé ngwal; u ntoñle bon boñ ngobol i ngand Pasa hiki nwii. Ndi baa u nla toñle bon boñ le Djob a ntat litén jé? Baa ngéda ba ñemble we, ba nok le wemede u yé nkwoog nkaa le Yéhôva a ntat litén jé? (Tjémbi 27:11; Yésaya 12:2) Baa ni ñañ miñañ mi, ni tagbege? Tole ni ntelep ndék i ngéda ni ñañ, ni kwélél mu? Boñ biliya i kapna biniigana bi ni lihaa joñ inyu hôla bo i hol i pes i mbuu.

Tibil tém inyu léba tik ngok i mbuu

(Manyodi 12:12) Inyule mu wo u nlélém u m’a lôô loñ Égiptô, ndi m’a nol babôkgwéé bobasôna i loñ Égiptô, ibôdôl mut binam letee ni lém; m’a pémhene ki banyambe ba Égiptô bobasôna mbagi. Men me yé Yéhôva.

it-2 484 § 2

Pasa

I jôm li dimala di bi kwél loñ Égiptô, di bé yimbne i mbagi nôgôs ikolba mop ma Égiptô; téntén himala hi nyônôs jôm, nyemb i bon bôlôm ba bisu. (Manyodi 12:12) Ba bé ôt titii i nlôm ntômba inyu pôdôl djob ba bé sébél le Ra, hala a bé toi bisol inyu bon ba Égiptô ngéda ba bé hoo matjél ma man ntômba i Pasa ngii manwemel. Yak nyet i bé titii i ngim djob, jon ngéda ba bé tjé nyet i bisu, hala a bé bisol inyu djob ba bé sébél le Osiris. Ba bé yoñ Faraô kiki man nu djob ba bé sébél le Ra. Jon nyemb i man nu bisu i Faraô i bi éba le Faraô ni Ra ba bééna bé ngap.

(Manyodi 12:14-16) “‘Ndi kel ini y’a ba bé inyu mbigda, n’a Iôôs ki ngant yokel inyu Yéhôva, n’a lôôs ngant yokel ikété tjai dinan tjodisôna kingéda litéñ mba ni mba. ¹⁵ N’a je bikoga bi ngi-séñha dilo disaambok. Hilo hi bisu yaga nyen n’a héa séñha mandap manan, inyule to njee a nje yom i gwé séñha, ibôdôl hilo hi bisu letee ni hilo hi nyônôs disaambok, i mut nu a’ tjiba ikété Israel. ¹⁶ Ndi hilo hi bisu n’a bana boma pubhaga, yak hilo hi nyônôs disaambok, boma pubhaga. Nson wo ki wo w’a gwéla bé dilo di. Handuk inyu yom i nlama jéba ni hi mut, jam lini jotama jon n’a boñ.

it-1 207 § 1

Likoda likeñi

Bôlô to yada i bé séla bé ngéda “makoda mapubhaga” ma bé tagbe. Kiki hihéga, hilo hi bisu ni hi nyônôs isaambok i ngand i bikoga bi ngi-séñha di bé “makoda mapubhaga.” Inyu dilo di, Yéhôva a bi kal le: “Nson wo ki wo w’a gwéla bé dilo di. Handuk inyu yom i nlama jéba ni hi mut, jam lini jotama jon n’a boñ.” (Manyodi 12:15, 16) Ndi ngéda “makoda mapubhaga” ma ma bé tagbe, biprisi bi bé sémél Yéhôva bisesema (Lôk Lévi 23:37, 38), jon ba bé bôk bé mbén yo kiki yo i sal bibôlô bi hiki kel. Makoda makeñi ma, ma bé hôlôs bé yeñgi, ndi ma bé ti ngéda i yoñ ngaba i mam ma mbuu. I kel sabat, litén li bé kodba inyu kôhna biniigana, ni inyu bégés Yéhôva. I mandap ma bibégés, ba bé éñél bôt lipôdôl li Djob, ba toñlak ki bo jo. (Minson mi baôma 15:21) Jon tolakii litén li Israel li bé sal bé bôlô yo kiki yo i kel sabat ni i kel “makoda mapubhaga,” ba bé gwélél dilo di inyu masoohe, ni inyu soñda mam ma bé béñge Nhek wap ni bitééne gwé.​—Béñge LIKODA LIKEÑI.

Lisoñgol li Bibel

(Manyodi 12:1-20)