Yéhôva a nwéhél iloo bôt bobasôna

1. Kiki kaat i Ñañal 7:20 i ñéba, kii Kiñe Salômô a bi kal?

KIÑE Salômô a kal le: “Mut a téé sép hana ’isi a ta bé, to wada yaga, nu a mboñ loñge, ndi a boñ bé béba yo ki yo.” (Ñañal 7:20) Maliga ma! Bésbobasôna di yé baboñbéba. (1 Yôhanes 1:8) Jon di gwé ngôñ le Djob a nwéhél bés, di gwé ki ngôñ le bôt bape ba nwéhél bés.

2. I ngéda liwanda joñ li nwéhél we kii u yé u nôgda?

² Ibabé pééna, u mbigda lisañ jada u bi unbaha liwanda joñ. U bé sômbôl le ni témb ni kahal nôgla, jon u bi bat nye nwéhél. I ngéda a bi nwéhél we, kii u bi nôgda? Baa u bi nôgda hogbe? Ñ, u bi kon yak maséé!

3. Kii di ga tehe munu i yigil ini?

³ Di nsômbôl le Yéhôva a ba bañga yés Liwanda, ndi ngim mangéda, di yé le di boñ tole di pot mam ma ma ñunbaha nye. Kii i nyis bés le Yéhôva a yé bebee i nwéhél bibéba gwés? Inyuki di yé le di kal le bés bôt ba binam, di ta bé le di nwéhél kiki Yéhôva a nwéhél? Bonjee Yéhôva a nwéhél?

YÉHÔVA A YÉ BEBEE I NWÉHÉL

4. Kii i nyis bés le Yéhôva a yé bebee i nwéhél?

⁴ Bibel i ñéba le Yéhôva a yé bebee i nwéhél bibéba gwés. I ngéda Yéhôva a bi yeelene Môsi njee a yé i Hikôa hi Sinai, a bi ep añgel i kal nye le: “Yéhôva, Yéhôva, Nyambe nu konangoo, ni nu karis, nu a mpala bé unup, ndi a nyaaba ni loñgeñem ni maliga; a ntéédana dikôô ni dikôô di bôt loñgeñem, a nwéhlak liboñok libe, ni litjañg, ni béba.” (Manyodi 34:6, 7) Yéhôva a gwé loñgeñem, a yé ki konangoo, a yé bebee i nwéhél baboñbéba ba ba ntam bibéba gwap.​—Néhémia 9:17; Tjémbi 86:15.

5. Inonñaga ni kaat Tjémbi 103:13, 14, kiki Yéhôva a nyi bôt ba binam loñge loñge, hala a ntinde nye i boñ kii?

⁵ Kiki Yéhôva nyen a bi hek bés, a nyi bés loñge loñge. Hoñol ki! A nyi bôt ba binam bobasôna ba yé hana ’isi loñge loñge. (Tjémbi 139:15-17) Jon a ntehe bibéba gwobisôna bagwal bés ba bi lôôs bés. A nyi yak i mam momasôna di bi boma mu i niñ yés. Kiki Yéhôva a nyi bôt ba binam loñge loñge, hala a ntinde nye i boñ kii? Hala a ntinde nye i unda bés konangoo.​—Tjémbi 78:39; añ Tjémbi 103:13, 14.

6. Lelaa Yéhôva a bi éba le a yé bebee i nwéhél bés?

⁶ Yéhôva a bi unda le a yé bebee i nwéhél bibéba gwés. A nyi le béba i Adam i bi boñ le yak bés di boñ béba, di wo ki. (Rôma 5:12) Di bé bé le di pam mu i mok mi bésbomede, di bé bé to le di pémés mut numpe. (Tjémbi 49:8-10) Ndi, kiki Yéhôva a ngwés bés, a bi unda bés konangoo, a boñ le di tohlana. Kii a bi boñ? Kaat Yôhanes 3:16 i ñéba le, Yéhôva a bi om mpom wé Man le a wo inyu yés. (Matéô 20:28; Rôma 5:19) Yésu a bi begee mbegee yés, a nok ndutu, a wo ki inyu tohol ba bobasôna ba nhémle nye. (Lôk Héber 2:9) Yéhôva a bi nok ndutu ngandak i ngéda a bi tehe Man wé a nwo béba nyemb! Ibale bondi Yéhôva a bé gwés bé nwéhél bés, ki a bi yénak bé a nwas le Man wé a wo inyu yés.

7. Bonjee Yéhôva a bi nwéhél?

⁷ Bibel i mpôdôl ngandak bôt i Yéhôva a bi nwéhél. (Éfésô 4:32) Mut bisu we u nhoñol a yé njee? Bebek u nhoñol Kiñe Manasé. I béba mut i, i bi boñ mam ma ma bi lôôha unbaha Yéhôva. A bé bégés bisat, a boñok le yak bôt bape ba bégés gwo. A bi nol bon bé, a sémél bo bikwéha bi mop. Ndi a bi telbene bé ha, a bi bii yak sat ikété témpel i pubhaga i Yéhôva. Bibel i nkal le: “A boñ mam mabe ngandak i mis ma Yéhôva, i suu nye le a unup.” (2 Miñañ 33:2-7) Ndi i ngéda Manasé a bi tam béba yé, Yéhôva a bi nwéhél nye. A bi témb a timbis nye i yééne yé i kiñe. (2 Miñañ 33:12, 13) Bebek u nhoñol yak Kiñe David nu a bi lôôha unbaha Yéhôva. A bi ke i ndéñg, a nol yak mut. Ndi i ngéda David a bi neebe le a mboñ béba, a tam béba yé, Yéhôva a bi nwélél nye. (2 Samuel 12:9, 10, 13, 14) Ñ, di pééna bañ le Yéhôva a yé bebee i nwéhél bibéba gwés. Ni ki le, kiki di nke i tehe hanano, bôt ba binam ba ta bé le ba nwéhél kiki Yéhôva.

YÉHÔVA A NWÉHÉL ILOO BÔT BA BINAM

8. Kiki Yéhôva a yé Nkéés nu tôbôtôbô, hala a ntinde nye i boñ kii?

⁸ Yéhôva a yé “Nkéés nu hisi hiosôna.” (Bibôdle 18:25) Bañga nkéés a nlama tibil yi mbén. Hala nyen Yéhôva a yé. Inyule a ta ndik bé Nkéés wés ndi a yé yak Ntéé mambén. (Yésaya 33:22) Yéhôva nyen a nyi kii i yé loñge ni kii i yé béba iloo bôt bobasôna. Kii ipe bañga nkéés i nlama boñ? A nlama yi i mam momasôna ma ntagbe ilole a mpémés mbagi. Yéhôva a yé bañga Nkéés, inyule a nyi mam momasôna ma ntagbe.

9. Kii Yéhôva a mbéñge ilole a nwéhél mut?

⁹ Yéhôva a ta bé kiki bôt ba binam, ilole a nkéés mut, a nyi mam momasôna ma ntagbe. (Bibôdle 18:20, 21; Tjémbi 90:8) I mam bôt ba binam ba ntehe ni ma ba nok mo bé mon a mbéñge. A nyi le bilem di gwé, di bi yôñôl gwo yak bagwal bés, homa di bi néñél tole hala nyen ba bi niiga bés. A nyi too di gwé nduña tole di kônôl ño. Yéhôva a ntehe kii i yé bés ñem, a nyi kii i ntinde bés i boñ ngim mam. Jam jo ki jo li nsolop bé Yéhôva. (Lôk Héber 4:13) Jon ilole Yéhôva a nwéhél mut, a nyi i mam momasôna ma ntagbe.

10. Kii i ñéba le Yéhôva a nkéés i nya i téé sép? (Ndiimba Mbén 32:4)

¹⁰ Yéhôva a nkéés i nya i téé sép, a ntodol bé bôt. A nwéhél bé mut inyule a yé ilam, a yé ngwañ, a nyiba ngandak tole a gwé ngim makeñge. (1 Samuel 16:7; Yakôbô 2:1-4) Mut bé nyen a nkal Yéhôva i yom a nlama boñ, di ta bé le di saa nye inyu boñ le a kil bés pes. (2 Miñañ 19:7) A nyoñ bé makidik inyule a yé ñunbak tole inyule a nkônôl mut ngoo. (Manyodi 34:7) Kiki Yéhôva a nyi bés loñge loñge, a yi ki i mam momasôna ma ntagbe, inyu hala nyen a yé bañga Nkéés.​—Añ Ndiimba Mbén 32:4.

11. Kii i ñéba le Yéhôva a nwéhél iloo bôt ba binam?

¹¹ I bet ba bi tila bikaat bi Lôk Héber, ba ñéba le nwéhél i Yéhôva i ta bé kiki nwéhél i bôt ba binam. Ngim mangéda ba bé gwélél buk i Lôk Héber yada. I buk i, kaat yada i nkal le: “I ngwéélana ndigi inyu pôdôl i ngéda Djob a nwéhél bôt ba binam. Kekikel i ngwéélana bé inyu pôdôl nwéhél i bôt ba binam bo ni bo.” Ndigi Yéhôva nyetama nyen a nla sas bibéba gwés. I ngéda Yéhôva a nwéhél bés kii hala a nlona bés.

12-13. (a) Kii di nôgda i ngéda Yéhôva a nwéhél bés? (b) Lelaa Yéhôva a nwéhél?

¹² I ngéda di neebe le Yéhôva a nwéhél bés, di nok hogbe ni nsañ, di ban-ga loñge kiññem. Bôt ba binam ba ta bé le ba ti bés i hogbe i, “Yéhôva nyemede” nyen a nla ti bés yo. (Minson mi baôma 3:19) I ngéda Yéhôva a nwéhél bés, di ntémb di yila mawanda mé wengoñle di mah boñ bé béba.

¹³ I ngeñ Yéhôva a nwéhél bés, a ntehe ha bé le di gwé nsohi. A kogse ha bé ki to bés inyu i béba i. (Yésaya 43:25; Yérémia 31:34) Kiki “likôl li yé nonok ni hiôñg,”b hala nyen Yéhôva a nkis bibéba gwés haa ni bés. (Tjémbi 103:12) I ngéda di nhoñol lelaa Yéhôva a nwéhél bés, hala a nkônha bés maséé, hala a mboñ ki le di kon nye woñi. (Tjémbi 130:4) Ndi bonjee Yéhôva a nwéhél?

BONJEE YÉHÔVA A NWÉHÉL?

14. Kii di ma tehe inyu nwéhél i Yéhôva?

¹⁴ Kiki di mbôk di tehe, Yéhôva a nwéhél bé bés inyule béba yés i nlôôha ikeñi ngandak tole i nlôôha isii. Di ntehe ki le Yéhôva a nwéhél bés inyule a nyi bés loñge loñge. A yé Nhek wés, Ntéé mambén ni Nkéés. Kii Yéhôva a mbéñge i ngéda a nsômbôl nwéhél mut?

15. Inoñnaga ni kaat Lukas 12:47, 48, i ngéda Yéhôva a nsômbôl nwéhél mut, kii a mbéñge?

¹⁵ Jam jada Yéhôva a mbéñge i ngéda a nsômbôl nwéhél mut li yé le: Baa i mut nu a yik le i yom a mboñ i yé béba? Yésu a bi unda i jam li i kaat Lukas 12:47, 48. (Añ.) I ngéda mut a nkôôba boñ béba, a yik le i yom a yé i boñ i nlémél bé Yéhôva, wee a mboñ béba ikeñi. Yéhôva a yé le a tjél nwéhél i nya mut i. (Markô 3:29; Yôhanes 9:41) Ndi ngim mangéda di nyi nga le i yom di mboñ i yé béba. Baa Yéhôva a yé le a nwéhél bés ha ntén ngéda u? Ñ! Inyuki? Inyule Yéhôva a mbéñge ki jam lipe nwaa le a nwéhél bés.

16. I tam béba yés wee kii, inyuki i yé nseñ le di tam béba yés inyu boñ le Yéhôva a nwéhél bés?

¹⁶ Yom ipe Yéhôva a mbéñge i yé le, baa i mut a mboñ béba a tam béba yé? I tam béba yés wee kii? Hala a nkobla le, di “nhéñha mahoñol més ni maboñok més.” Hala wee béba di mboñ i ntééñga bés tole di ta bé maséé inyule di nla bé boñ jam lilam. I mut a ntam toi béba yé, hala a ntééñga nye le a bi boñ béba, ni le a bi nwas le maada mé ni Yéhôva ma tomb, a kwo i béba. Di bigda le, Kiñe Manasé ni Kiñe David ba bi boñ bibéba bikeñi; ndi Yéhôva a bi nwéhél bo inyule ba bi tam toi bibéba gwap. (1 Bikiñe 14:8) Hala a ñéba le ilole Yéhôva a nwéhél mut, a nlama ndugi tehe le i mut nu a ntam toi béba yé. Ndi, ibale hala a ntééñga bés le di mboñ béba, hala a kôli bé, di nlama boñ jam lipe.c I jam li jon di ntehe hanano.

17. Kii i yé i hielñem, inyuki i hielñem i yé i nseñ? (Yésaya 55:7)

¹⁷ Yom ipe Yéhôva a mbéñge i ngéda a nsômbôl nwéhél bés i yé i hielñem. I hielñem, hala a nkobla le mut a nhéñha, a nwas mam mabe a boñok, a kahal boñ sômbôl i Yéhôva. (Añ Yésaya 55:7.) I mut nu a nlama héñha mahoñol mé, a nwas le Yéhôva nyen a éga nye. (Rôma 12:2; Éfésô 4:23) A nlama nwas mahoñol mé ni maboñok mé ma behee. (Kôlôsé 3:7-10) I yé maliga le, hémle di gwé inyu sesema i Kristô yon i mboñ le Yéhôva a nwéhél bés, a sas ki bibéba gwés. Ibale Yéhôva a nyimbe le di yé jo sañ i ngui inyu héñha, ha nyen a ga boñ le di nwéhlana ni njel sesema i Yésu.​—1 Yôhanes 1:7.

U PÉÉNA BAÑ LE YÉHÔVA A NWÉHÉL WE

18. Di ntehe le, lelaa Yéhôva a nwéhél?

¹⁸ Di pôdôl le mam mahogi ma yé nseñ di ntehe munu yigil ini. Di ntehe le Yéhôva a nwéhél iloo bôt bobasôna. Kii i ñunda hala? Jam li bisu li yé le a yé bebee i nwéhél bés hiki ngéda. Iba, a nyi bés loñge loñge. A nyi lelaa a bi hek bés. Jon nyen a nla toi yi ibale di ntam béba yés. Aa, i ngéda Yéhôva a nwéhél bés, a nwéhél bés nwéhél yosôna, kayéle a yé ndigi wee di mah boñ bé béba. Ha ngéda i, kiññem yés i yé nwee, di nkon ki maséé.

19. Tolakii di yé baboñbéba, inyuki di yé le di kon maséé?

¹⁹ I yé maliga le kiki di yé bikwéha bi bôt, di mboñ béba hiki ngéda. Ndi i yom i yé hana i Étude Perspicace des Écritures’ volume 2 page 765 i nla hôla bés. I kaat ini i nkal le: “Kiki Yéhôva a nkônôl bés ngoo, lakii di yé baboñbéba, jon, i ngéda di nhôs, di nlama bé lôôha nok ndutu inyule di nhoñol le a nwéhél bé bés. (Tjémbi 103:8-14; 130:3) Ibale di nyi le di mboñ sômbôl i Djob, di nla ba maséé. (Filipi 4:4-6; 1 Yôhanes 3:19-22).” Bibuk bi bi nlédhana ngandak.

20. Kii d’a tehe mu yigil i noñ ha?

²⁰ Di yé maséé inyule di nyi le i ngéda di ntam toi bibéba gwés, Yéhôva a yé bebee i nwéhél bés. Ndi, lelaa di yé le di nigle Yéhôva? Lelaa di nla nwéhél kiki Yéhôva? Ndi kii i ñéba le di nla bé pam i nwéhél kiki nye? Inyuki i yé i nseñ le di tibil nok i jam lini? Di ga timbhe mambadga mana mu yigil i noñ ha.