U tôñ bañ ndigi wemede kiki ngandak bôt i len ini
BAA u nyimbe le ngandak bôt i len ini i nhoñol le i kôli kôhna lipém ni minson mi tôbôtôbô iloo bôt bape? To ba nti bo lipém lelaa, ba nhoñol ndik le ba kôli kôhna iloo ha. I bôt ba yé hala ba ntôñ ndigi bomede, ba nyi bé to ti mayéga inyu mam ba gwé. I mam ma mon ma ñunda le di niñil i dilo di nsôk.—2 Timôtéô 3:2.
I yé maliga le ibôdôl i ngéda kôba, bôt ba ntôñ ndigi bomede. Kiki hihéga, Adam bo Éva ba bi yéñ bana kunde i pohol bomede kii i yé loñge ni kii i yé béba inyu yap; i len ini, bôt ba binam ba nok ndutu inyu makidik mabe ba bi yoñ. Ngandak nwii i mbus ngéda, Ôsiya, kiñe Yuda yada, a bi hoñol le a bééna kunde i ligis binjinjiñ, ndi hala a bé hihôha hikeñi. (2 Miñañ 26:18, 19) Nlélém, Lôk Farisai ni Lôk Sadukai i bi hoñol le i kôli kôhna konangoo i Yéhôva ndik inyule Abraham a bé sôgôlsôgôl wap.—Matéô 3:9.
Kiki i bôt ba ntôñ ndigi bomede ba nkéña bés, ba nla lôôs bés libak li. (Galatia 5:26) Di nla bôdôl hoñol le di kôli kôs ngim tel tole ba nlama ti bés lipém iloo bôt bape. Lelaa di nla keñgle i nya mahoñol i? Di nlama ndugi yi mahoñol ma Yéhôva mu i jam li. Matiñ ma Bibel ima ma ga hôla bés.
Yéhôva nyen a nkit kii di kôli kôs. Di tehe le ndék dihéga.
Ikété ndap libii, nlôm a nlama nôgda le nwaa a nti nye lipém, yak nwaa a nlama nôgda le nlôm a ngwés nye. (Éfésô 5:33) Hiki sobiina a nlama tonda ndigi sobiina wé. (1 Korintô 7:3) Bagwal ba kôli bem le bon bap ba nôgôl bo, yak bon ba kôli bem le bagwal bap ba yoñ ndun ni bo, ba unda ki bo le ba ngwés bo.—2 Korintô 12:14; Éfésô 6:2.
Ikété likoda, mimañ mi kôli ni lipém inyule mi nsal bôlô i ngui. (1 Tésalônika 5:12) Ndi, mimañ mi gwé bé kunde i bémbe lôk kéé yap i bôlôm ni i bôda i likoda.—1 Pétrô 5:2, 3.
Nyambe a bi ti bangomin kunde i bat bôt ba yé isi énél yap tas, ni i kôs lipém li kôli ni bo.—Rôma 13:1, 6, 7.
Yéhôva a nti bés iloo kiki di kôli kôs inyule a ngwés bés. Kiki di bi gwééne ikété béba, nyemb yotama yon di kôli kôs. (Rôma 6:23) Ndi to hala, Yéhôva a nkôp bés bisai inyule a nlôôha gwés bés. (Tjémbi 103:10, 11) Mam malam momasôna a mbôñôl bés ma nlôl ni konangoo yé i mbuma ñañ.—Rôma 12:6-8; Éfésô 2:8.
KII I NLA HÔLA BÉS LE DI TÔÑ NDIGI BAÑ BÉSBOMEDE
Yoñ yihe ni mahoñol ma nkoñ ’isi. Ndék ni ndék, di nla bôdôl hoñol le di kôli kôs ngim mam iloo bôt bape. Mu hihéga hi bôt ba bôlô ba ba bi kôs nsaa u dinariô yada, Yésu a bi unda le i nya mahoñol i i nla hoo gwéé i miñem nwés. Bôt bahogi ba bi pule bôdôl bôlô, ba sal ki kel yosôna isi hiañgaa; bape ba sal ndigi ngeñ yada. I bet ba bi bôk ba yoñ i bôlô ba bé hoñol le nsaa wap u ga loo u bet ba bi sôk yoñ i bôlô, inyule ba bi sal ngandak iloo bo. (Matéô 20:1-16) Ni hihéga hi, Yésu a bi niiga banigil bé le ba nlama kon maséé ni mam Yéhôva a nti bo.
I bôt ba bi sal ngim kel yosôna ba bé hoñol le ba kôli kôhna nsaa u nloo u bana bape
Ti mayéga, u lôôha bañ bat. (1 Tésalônika 5:18) Kôna ndémbél i ñôma Paul nu a bat bé lôk kéé i Korintô i mam ma bé béda nye tolakii a bééna kunde i boñ hala. (1 Korintô 9:11-14) Di nlama bana lem i ti mayéga inyu makébla bôt ba nti bés iloole di kahal bat bo mo wengoñle ba nlama ndik ti bés mo.
Ñôma Paul a bi bat bé lôk kéé mahôla
Ba suhulnyuu. I ngéda mut a nhoñol le a yé nseñ ngandak, a nkahal hoñol le a kôli kôs iloo i yom a gwé. Ibale di yé suhulnyuu, kekikel di ga bana bé i nya mahoñol mabe i.
Yéhôva a bé gwés Daniel ngandak inyule a bé suhulnyuu
Mpôdôl Daniel a bi yigle bés ndémbél ilam i suhulnyuu. A bé lôl i lihaa li bañga bôt, a bak nlam, a yik jam ngandak, a ban-ga ki ngap i boñ ngim mam, jon a bé le a hoñol le a kôli ni lipém ni bisai a bééna. (Daniel 1:3, 4, 19, 20) Ndi, Daniel a bé mut suhulnyuu, jon a bé lémél Yéhôva ngandak.—Daniel 2:30; 10:11, 12.
Jon, di tôñ bañ ndigi bésbomede kiki ngandak bôt i len ini. Ndi, di kee ni bisu i kon maséé ni bisai Yéhôva a nkôp bés inyu konangoo yé i mbuma ñañ.