Lelaa u nla ba bañga liwanda

BAA u ma boma ndutu, ndi u nôgdaga le u gwé bé mut to wada inyu hôla we? Di niñil ‘i mangéda mabe, ma ma yé ki nledek kiyaga,’ ma ma nla tômbôs bés, ma tinde ki bés i nôgda le di yé bésbotama. (2 Timôtéô 3:1) Ndi, di nlama bé hônba mandutu més bésbotama. Bibel i ñunda nseñ i bana bañga mawanda i “mangéda ma ndutu.”​—Bingéngén 17:17.

LELAA BAÑGA MAWANDA I NLA HÔLA

Ñôma Paul a bi kôhna mahôla ma mawanda mé ma ma bé éga nye mu maké mé. (Kôlôsé 4:​7-11) I ngéda Paul a bé i mok i Rôma, mawanda mé ma bi hôla nye i boñ mam a bé bé le a boñ nyemede. Kiki hihéga, Épafrôditô a bi lona Paul i gwom lôk kéé i bôlôm ni i bôda i Filipi i bi ômle nye. (Filipi 4:18) Tikikô a bi ti makoda bikaat Paul a bi tilna mo. (Kôlôsé 4:7; béñge note d’étude i Bibel ni hop u Pulasi.) Ni mahôla ma mawanda mé, Paul a bi kena nson wé ni bisu, to i ngéda ba bi sôña nye i pam i ndap yé, tole i mok. I len ini, kii u nla ni boñ inyu ba bañga liwanda?

I len ini, ndémbél i lôk kéé ihogi i ñunda bés lelaa mawanda ma nla hôlna. Di pôdôl le sita yada i i bi unda le i yé liwanda li Élisabet, nu a yé nsañal i loñ Panya. I ngéda ba bi léba nyañ béba kon u pos, i sita i i bi lédés Élisabet ni minlôñ mi Bibel a bé ômle nye i téléfôn. Élisabet a nkal le: “I ngéda me bé añ mam a bé tilna me, me bé maséé ngandak i yi le ngim mut i ntôñ me, hala a bi ti me ngui.”​—Bingéngén 18:24.

Di nla lédés maada més ni lôk kéé yés i ngéda di nhôla bo i ke i likalô, ni i makoda. Kiki hihéga, baa u yé le u éga ñunuk mankéé ni matôa i likalô tole i makoda? Ibale u mboñ hala, u ga ti bo makénd, yak bo ba ga ti we makénd. (Rôma 1:12) Ndi bilôk bikéé bihogi bi gwé ha bé to ngui i pam. Lelaa di nla bane bo bañga liwanda?

BA BAÑGA LIWANDA INYU I BET BA NLA BÉ PAM

Ngim lôk kéé i nkon tole i gwé mandutu mape ma ma nkéñ bo i ke i makoda. I jam li jon li bi pémél David nu a bééna kon u pos. Iloo sôñ isamal nu David a bé yoñ matibla inyu kon wé pos, nye ni nwaa Lidia ba bé tégbaha makoda i Zoom.

Lelaa lôk kéé i bi hôla bo? I mamélél ma hiki likoda, lôk kéé ihogi i i bé i ndap Ane i bé boñ biliya i kwel ni David bo Lidia ni njel Zoom. I ngéda David bo Lidia ba bé ba timbhe i makoda, lôk kéé i bé i tilna bo i téléfôn inyu kal bo le mandimbhe map ma nlémél bo ngandak. Kii David bo Lidia ba bé nôgda? Ba bé nôgda ha bé binyuu.

Baa di nla yéñ manjel i añal ñañ nlam ni lôk kéé i i nla bé pam i mandap map? Di nla boñ ndék mahéñha mu ntjega wés inyu sal ni bo, hala nyen di ga unda bo le di nhôya bé bo. (Bingéngén 3:27) Bebek u nla tjek ngim ngéda i añal ñañ nlam lôñni bo ni njel bikaat tole téléfôn. Mimañ mi nla yoñ bitelbene i tégbaha biboma inyu likalô i Zoom. David bo Lidia ba bé maséé ngandak le likoda jap li bi yoñ i bitelbene bi. David a ntoñol le, “i tégbaha ndék manut ndigi i juu jés li likalô ni i soohe ni lôk kéé yés i bé ti bés makénd ngandak.” Ngim mangéda u nla bat mankéé nu a nla bé pam ibale u nla lona nnigil Bibel wada i mbai yé, inyu boñ le ni tégbaha yigil yé ntôñ.

I ngéda di nsal lôñ yada ni lôk kéé i i nla bé pam, di ntehe bilem gwap bilam, hala a mboñ le di kôôge bo bebee. Kiki hihéga, i ngéda di ñañal ñañ nlam ni i lôk kéé ini, di tehge bo ba ntibil gwélél Bitilna inyu tihba miñem mi bôt, di nkônde gwés bo, di nti ki bo lipém. I ngéda di nit lôk kéé i likalô ni i makoda, di ga bana mawanda mape.​—2 Korintô 6:13.

I ngéda Paul a bé tégbaha mangéda mabe, liwanda jé Titô a bi yuuga nye, a lédés ki nye. (2 Korintô 7:​5-7) I ñañ unu u ñunda le di nla hôgbaha lôk kéé yés, he ndik bé i ngéda di nkônôl bo ngoo, ndi yak i ngéda di yé bo ipañ, di boñok kii yosôna di nla inyu lôl bo i mahôla.​—1 Yôhanes 3:18.

BA BAÑGA LIWANDA IKÉTÉ NDÉÉÑGA

Lôk kéé i bôlôm ni i bôda i loñ Ruslan i ñunda bés loñge ndémbél i hôlna bés ni bés. Di béñge le i jam li bi pémél Sergey bo nwaa Tatyana. Bisônda bi bi hun ndap yap, i mbus, bi kena bo inyu bat bo mambadga. Ba bi bôk ba pémés Tatyana, a témb i ndap. Sergey a ntoñol le: “Kiki Tatyana a bi bol ndik i ndap, ni ñem ngui sita yada i lo i leege nye. Mawanda més ma bi lo i hôla bés i bôñgôl ndap yés mu kiki ba bi sagal yo.”

Sergey a nkônde le: “Me nlôôha gwés kaat Bingéngén 17:​17, i i nkal le: ‘Bañga liwanda i ngwés ngéda yosôna, i yé linyañ li li bi gwéé inyu mangéda ma ndutu.’ Me bi kônde ba nkwoog nkaa le bibañga bini bi yé maliga i ngéda me bi kôs ndééñga i me bé bé le me hônba metama. Yéhôva a bi ti me mawanda ma ma bi kon bé woñi i ba ni me i ngéda ndutu.”a

I ngeñ di ntégbaha mangéda mabe, di gwé ngôñ ni mawanda ma ma nla hôla bés. I nya mawanda i i ga bane bés lôôha nseñ i njiiha ikeñi. Jon, di boñ kii yosôna di nla inyu ba bañga liwanda nano!​—1 Pétrô 4:​7, 8.