Biniigana bi bisu bi Bibel bi nla niiga bés ngandak mam

1. Lelaa biniigana bi bisu bi Bibel bi bi hôla we?

BINIIGANA bi bisu bi Bibel bi bi héñha niñ yés. Kiki hihéga, i ngéda di bi nigil le jôl li Djob li yé le Yéhôva, di bi yila mawanda mé. (Yésaya 42:8) I ngéda di bi nigil le bawoga ba nyi bé to jam, hala a bi hôla bés i nok le bôt bés ba ba bi wo ba nok ha bé ndutu. (Ñañal 9:10) I ngéda di bi nok le Paradis y’a ba hana ’isi, hala a bi boñ le di tôñ ha bañ inyu dilo di nlo. Di bi nok ki le niñ yés y’a nom ndik bé 70 tole 80 ma nwii, ndi i boga ni boga.​—Tjémbi 37:29; 90:10.

2. Lelaa kaat 2 Pétrô 1:​12, 13 i nhôla bés i yi le biniigana bi bisu bi Bibel bi nla hôla yak minhôôlak mi bikristen?

² Di yanak bañ biniigana bi bisu bi Bibel. I kaat yé i nyônôs iba, ñôma Pétrô a bi tilna bikristen bi bi bé bi “téé yaga siñ siñ ikété maliga.” (Añ 2 Pétrô 1:​12, 13.) Ndi ba bi boma mandutu mu likoda. Kiki hihéga, bôt ba bé lona biniigana bi bitembee; yak ngim mangéda, bibéba bi bôt mu likoda bi bé pôh lôk kéé le ba tjôô maliga. (2 Pétrô 2:​1-3) Ngôñ Pétrô i bé le a lédés lôk kéé i bôlôm ni i bôda inyu boñ le ba kolba i baoo ba. Inyu hala nyen a bi témb a kal bo i mam ba bé yi inyu boñ le ma hôla bo i téñbe ipam lisuk.

3. Ti hihéga hi hi ñunda inyuki bikristen gwobisôna bi nlama ke ni bisu i ôt pék mu biniigana bi bisu bi Bibel.

³ To ibale di nhôlôl i ntôñ u Yéhôva, biniigana bi bisu bi Bibel bi nla hôla bés. Di yoñ le hihéga: Mut nu a nyi lamb ibôdôl behee ni mut nu a ntip bôdôl lamb, ba nla gwélél minlélém mi bikule, ndi i mut a nlamb ibôdôl behee a meya a ngwélél bikule bi. A nyi ki lelaa a nla gwélél gwo inyu lamb bijek bilam bipe. Hala nyen yak mut nu a ngwélél Yéhôva ibôdôl behee ni mut nu a ntip bôdôl gwélél Yéhôva ba ntehe bé biniigana bi Bibel nlélém. Ibôdôl nu di bi sôblana, ngandak mam i nhéñha i niñ yés, di ngwel ki ngandak minson. I mam di bi nigil behee ma ngi hôlga bés i len ini i ngéda di mboma mandutu. Di béñge i jam minhôôlak mi bikristen mi nla nigil mu biniigana bi bisu bi Bibel bini.

YÉHÔVA NYEN A BI HEK BÉS

4. Kiki di nyi le Yéhôva nyen a bi hek mam momasôna, lelaa hala a nhôla bés?

⁴ “Nyambe nyen a bi hek mam momasôna.” (Lôk Héber 3:4) Di nyi le Yéhôva nu a gwé ngui iloo bôt bobasôna, a ban-ga pék iloo bôt bobasôna nyen a bi hek nkoñ ’isi, a hek yak i gwom gwobisôna bi yé mu. Nyen a bi hek bés, a nyi bés loñge loñge, a ntôñ yak bés. A nyi kii i yé loñge inyu yés. Kiki di nyi le Yéhôva nyen a bi hek mam momasôna, hala a ntihba bés ngandak, hala a mboñ ki le di bana niñ ilam.

5. Kii i nla hôla bés i bana suhulnyuu? (Yésaya 45:​9-12)

⁵ Kiki di nyi le Yéhôva nyen a bi hek mam momasôna, hala a nhôla bés i bana suhulnyuu. Hiôb a bé béñge ndik nyemede, a béñgege i mam bôt bape ba bé boñ, inyu hala nyen Yéhôva a bi hôla nye i bigda le ngo nyen a bi hek mam momasôna. (Hiôb 38:​1-4) Hala a bi hôla Hiôb i nok le pék i Yéhôva i nloo pék i bôt ba binam huum. Yak mpôdôl Yésaya a bi pôdôl i jam li i mbus ngéda, a bi kal le: “Baa ték lima i nla kal Mma dibee le: ‘Kii u yé i boñ ha?’”​—Añ Yésaya 45:​9-12.

6. Imbe ngéda i yé loñge i bigda le Nhek wés nyen a gwé ngui ni pék iloo bôt bobasôna? (Béñge yak bititii.)

⁶ I ngéda mut a nhôlôl i ntôñ u Yéhôva, a nla bôdôl hoñol le a nyi jam ngandak kayéle a hôya le Yéhôva nyen a nlama bôdôl ñem, yak ni Bañga yé iloo mahoñol mé nyemede. (Hiôb 37:​23, 24) Ndi i ga ba lelaa ibale i mut nu a nyoñ ngéda i hoñol le Yéhôva a gwé ngui iloo bôt bobasôna, a ban-ga pék iloo bôt bobasôna? (Yésaya 40:22; 55:​8, 9) Hala a ga hôla nye i nok le a nyi bé jam ngandak, ndi le Yéhôva nyen a nyi mam momasôna.

7. Kii i bi hôla Rahela i neebe bitelbene bi mondo bi ntôñ?

⁷ Rahela, nu a yé i loñ Slovénia, a nkal le i ngéda a bi yoñ ngéda i bigda le Yéhôva nyen a bi hek mam momasôna, hala a bi hôla nye i nôgôl ntôñ i ngéda ba bi héñha ngim biniigana. A ntoñol le: “Ngim mangéda hala a ntômbôl bé me i nôgôl lôk kéé i i ñéga bés. Kiki hihéga, to hala kii me bi béñge Minlegla mi Juu li bakena ntôñ #8 2023, ngélé bisu le me tehe mankéé a nti nkwel, a ban-ga mayéé, hala a bi tééñga me ngandak. Jon me bi soohe Yéhôva le a hôla me i neebe i jam li.” Rahela a bi nok le Yéhôva nyen a yé Nhek ngii ni ’isi, jon hiki ngéda, a ñéga ndik ntôñ wé loñge. Ibale ntôñ u nti ngim biniigana tole u nyoñ ngim bitelbene ndi bi lédél we i nôgôl, yoñ ngéda i bigda le Yéhôva a gwé pék iloo bôt bobasôna, a ban-ga ngui iloo bôt bobasôna.​—Rôma 11:​33-36.

INYUKI NYAMBE A NWAS LE DI NOK NDUTU?

8. I ngéda di nok inyuki Nyambe a nwas mandutu, bimbe bisai di gwé?

⁸ Inyuki Nyambe a nwas le di nok ndutu? I ngéda mut a nyi bé lelaa a nla timbhe i mbadga ini, a nla kahal unbene Nyambe tole a kal le Nyambe a ta bé! (Bingéngén 19:3) Ndi bés di nyi le di nok ndutu inyule Adam bo Éva ba bi boñ béba, Yéhôva bé nyen a mboñ le di nok ndutu. Di nyi ki le kiki Yéhôva a nhônba, hala a nti didun di bôt pôla i yi nye. I bôt ba nigil Bibel ba nyi lelaa Yéhôva a ga mélés mandutu. (2 Pétrô 3:​9, 15) I yi hala i nlédés bés, i mboñ ki le di kônde kôôge bebee ni Yéhôva.

9. Imbe ngéda di nla yoñ ngéda i bigda inyuki Yéhôva a nwas le di nok ndutu?

⁹ Inyu boñ le di hônba di bemek le Yéhôva a mélés mandutu, i mbéda bés wongut. I ngéda bésbomede tole i bôt di ngwés ba nok ndutu, tole bôt bape bon ba mboñ bo béba, tole i ngéda mut wés di gwéhék a nwo, di nla kahal badba inyuki Yéhôva a mpala bé mélés i mandutu ma. (Habakuk 1:​2, 3) Ha ngéda i nyen di nlama bigda inyuki Yéhôva a nwas le biloñge bi bôt bi nok ndutu.a (Tjémbi 34:19) Di nlama yak hoñol le Yéhôva a ga mélés mandutu momasôna ngélé yada inyu ngélé yosôna.

10. Kii i bi hôgbaha Anne i ngéda nyañ a bi wo?

¹⁰ I ngéda di nyi inyuki Yéhôva a nwas mandutu, hala a nhôla bés i hônba mo ni wongut. Anne, nu a niñ i ôn i Mayotte, nyoo i Océan Indien, a nkal le: “Hala a yé ndék nwii le mama yem a bi wo, nyemb yé i bi tééñga me le! Ndi me mbigda le Yéhôva bé nyen a mboñ le di nok ndutu. A nyamnda ni ngôñ i mélés mandutu, ni i tugul bôt bés ba ba bi wo. I ngéda me nhoñol hala, ñem u yé u mom me nwee, hala a hélés yak me.”

11. Kiki di nyi inyuki Yéhôva a nwas mandutu, lelaa hala a yé le a ti bés makénd i ke ni bisu i añal ñañ nlam?

¹¹ I ngéda di nyi inyuki Djob a nwas mandutu, hala a nti bés makénd i kônde añal ñañ nlam. Pétrô a bi bôk a kal le kiki Yéhôva a nhônba, hala a nhôla bôt i hiel ñem inyu kôhna tohi, a bi kônde le: “Hega pék inyu yi mimbe mintén mi bôt ni nlama ba ikété bihiumul bipubhaga ni maboñok ma ndéñbe i gwés Nyambe.” (2 Pétrô 3:11) Likalô li yé mukété ‘minson mi ndéñbe i gwés Nyambe.’ Kiki Tata wés Yéhôva, di ngwés bôt. Di nsômbôl le yak bo ba niñ i mbok yondo. Yéhôva a nyible bôt ba libôga joñ njel i lo i bégés nye. Jon, u gwé nsima nkeñi i sal lôñ yada ni Nyambe ni i hôla ngandak bôt i yi nye ilole lisuk li nkola.​—1 Korintô 3:9.

DI YÉNE I “DILO DI NSÔK”

12. Kiki di nyi le di niñ i “dilo di nsôk,” hala a nti bés makénd i boñ kii?

¹² Bibel i bi tibil yaga toñol lelaa bôt ba ga ba munu “dilo di nsôk.” (2 Timôtéô 3:​1-5) I ngéda di mbéñge nkoñ ’isi len, bésbomede di ntehe le i mbañ ini i yé i yon. I ngéda di ntehe lelaa bôt ba nkônde sôôbe ikété maboñok mabe, hala a nkônde unda le di nlama bôdôl Bañga i Yéhôva ñem.​—2 Timôtéô 3:​13-15.

13. I ngéda di mbéñge hihéga Yésu a bi ti i Lukas 12:​15-21, mambe mambadga di yé le di badba?

¹³ I ngéda di nyi le di niñ i dilo di nsôk, hala a ntinde bés i boñ mam ma yé toi nseñ. Inyu tibil nok i jam li, di béñge hihéga Yésu a bi yoñ i kaat Lukas 12:​15-21. (Añ.) Inyuki ba bi sébél i ngwañ mut unu le “jôñ mut”? Ba bi kal bé hala inyule i mut nu a bé ngwañ, ndi inyule i mut nu a bi kida a mboñ i mam ma bé bé nseñ. A bi ‘tééda nkus inyu yé nyemede, ndi a bé bé ngwañ i bisu bi Nyambe.’ Inyuki maboñok ma mut nu ma bé bé malam? Nyambe a bi kal nye le: “I u unu, u ga nimis niñ yoñ.” Kiki di nyi le lisuk li nkoñ ’isi unu li yé bebee, di nla badba le: ‘Baa makidik mem ma ñunda le me nyi le lisuk li nkoñ ’isi unu li yé bebee? Mambe makidik me nhôla bon bem i yoñ? Baa ngui yem, ngéda yem, ni moni nwem bi yé ndik inyu tééda nkus inyu memede tole inyu ba ngwañ i bisu bi Nyambe?’

14. Kiki ndémbél i Miki i ñunda, inyuki i yé loñge i bigda le di niñ i dilo di nsôk?

¹⁴ I ngéda di mbigda le di niñ i dilo di nsôk, hala a nla héñha niñ yés. I jam li jon sita yada le Miki a bi nok. A nkal le: “I ngéda me bi kôhna Bacc, ngôñ yem i bé le me ti ngéda yem inyu nigil lelaa binuga bi niñ. Me bé sômbôl ki yoñ nson nsañal inyu ke i hôla i het ngôñ i yé. Minhôôlak mi bilôk bikéé mi bi ti me maéba le me yoñ ngéda i tibil ôt pék inyu tehe too me nla sal i bôlô i, me bak sum sum i nson u Yéhôva. Ba bi bigdaha me le ngo lisuk li nkôôge bebee ni ki le i ngéda m’a ba i mbok yondo, m’a bana ngéda yem yosôna inyu nigil lelaa binuga bi niñ. Jon me bi yoñ makidik le me nigil bôlô ipe i i nla ti me koga kel, me gwelek nson wem nsañal. I mbus, me bi ke i hôla i Ikwatôria, i het ngôñ i batéé likalô i bé.” I len ini, Miki bo nlôm ba yé i nson u makiiña nyoo loñ i.

15. Lelaa i mam di ñañle bôt nano ma yé le ma hôla bo i dilo di nlo? Ti hihéga. (Béñge yak bititii.)

¹⁵ I ngéda bôt ba ntjél emble bés i likalô, di tomb bañ. Bôt ba nla héñha. Di pôdôl le ndémbél i Yakôbô, manyañ Yésu. A bi tehe Yésu a nañ, a yik le nyen a yé Mésia, a tehe ki nye a niiga loñge iloo bôt bobasôna. Ndi nwii mi bi tagbe ngandak ibabé le Yakôbô a yila nnigil Yésu. Ndik i mbus bitugne bi Yésu nyen a bi yila nnigil, a bana ki makénd iloo ’héga!b (Yôhanes 7:5; Galatia 2:9) Di waa bañ hôla bôt bés ba lihaa ba ba yé ngi yila bagwélél ba Yéhôva, di waa bañ to yuuga i bôt ba bi bôk ba tjél ñañ nlam u Ane. Di bigda le di niñ i dilo di nsôk, ni le bôlô yés i yé nseñ ngandak munu ngéda ini. I mam di nkal bo nano ma ga bane bo nseñ i mbus ngéda, bebek yak i mbus njiiha ikeñi.c

DI TI YÉHÔVA MAYÉGA INYU MAM A NHÔLA BÉS I BIGDA

16. Lelaa i mam Yéhôva a nhôla we i bigda ma yéne we nseñ? (Béñge yak minkéñék mi matila mini le “Gwélél mam u nigil inyu hôla bôt bape.”)

¹⁶ Mam mahogi ba niiga bés i makoda ma yé inyu ba ba nyi bé biniigana bi bisu bi Bibel. Kiki hihéga, minkwel mi mbamba, ngim minkwel ni bividéô bi jw.org, Nkum Ntat nu mbamba ni Tôde ’ilo! bi yé inyu bôt ba ta bé Mbôgi Yéhôva ndi to hala, yak bés di ñôt nseñ mu. Bi nhôla bés i kônde gwés Yéhôva, bi nlédés hémle yés, bi nhôla ki bés i tibil niiga bôt Bibel.​—Tjémbi 19:7.

17. Imbe ngéda biniigana bi bisu bi Bibel bi yé le bi hôla bés?

¹⁷ Bés Mbôgi Yéhôva, di yé di ba maséé i ngéda ba nkônde toñle bés ngim minlôñ mi Bibel. Ndi di nti ki Yéhôva mayéga inyu biniigana bi bisu bi Bibel inyule gwon bi bi hôla bés i yila mawanda mé. Ibale di nhoñol le di nyi jam ngandak, di nkahal yan bitelbene bi ntôñ. Ndi ni suhulnyuu yosôna, di bigda le Yéhôva, Nhek wés, nu a gwé ngui iloo bôt bobasôna, a ban-ga pék iloo bôt bobasôna nyen a nkena ntôñ. Ibale bésbomede tole mut di ngwés a nok ndutu, di nlama hônba, di bigdaga inyuki Yéhôva a nwas mandutu. I ngéda di nsômbôl yoñ makidik inyu yi i jam d’a boñ i niñ yés, lelaa di ga gwélél moni nwés, di hôiga bañ le di niñ i dilo di nsôk. I mam Yéhôva a nhôla bés i bigda ma kônde lédés bés, ma hôla ki bés i bana pék, ni i téñbe i gwélél nye!