Baa u ‘nkon maséé ni i gwom u gwé?’

1. I kon maséé ni i gwom di gwé wee kii, ndi i nkobla bé le kii?

BAA U nkon maséé ni i gwom u gwé? I mut a nkon maséé ni i gwom a gwé, a gwé ñem nwee inyule a mbéñge bisai gwobisôna a gwé nano. To ibale ngim mam i nhéñél nye, a nhéléé bé i njelel. Ndi i kon maséé ni i gwom di gwé i nkobla bé le di kééha moo, di boñ bé to yom. Kiki hihéga, kristen i nlama boñ kii yosôna i nla inyu kônde sélél Yéhôva. (Rôma 12:1; 1 Timôtéô 3:1) To ibale ba mpala bé ti nye ngim minson a gwé ngôñ i gwel, a nlama bé modop.

2. Mambe mandutu di nla bana ibale di nkon ha bé maséé ni i gwom di gwé?

² Ibale di nkon bé maséé ni i gwom di gwé, di yé le di kahal yoñ makidik mabe. Ibale mut a nkon bé maséé ni i gwom a gwé, a nla kahal sal ngandak inyu bana gwom bi ta bé nseñ. Ngoo le ngim lôk kéé i bi bôdôl nip moni ni gwom bipe inyule i bé tam gwo. Bebek ba bi kal mu ñem wap le: ‘Me kôli bana i yom ini, me bôdôl bañ bem,’ tole ‘Me nyoñ ndugi i moni mini, me ga timbis nwo mbus.’ Ndi wip wee wip. I ngéda mut a nip, a nsuñgaha Yéhôva ñem, a nhindis yak jôl jé. (Bingéngén 30:9) Lôk kéé ihogi i bi unup inyule ba bi ti bé bo minson ba bé bem, ba waa yak gwélél Yéhôva. (Galatia 6:9) Kii i nla boñ le ngwélél Yéhôva a pam ha likala li? Bebek njom i yé le a nkon ha bé maséé ni i gwom a gwé.

3. Kaat Filipi 4:​11, 12 i niiga kii bés?

³ Bésbobasôna di nla boñ biliya i kon maséé ni i gwom di gwé. Ñôma Paul a bi kal le: “To kinje jam li ntagbe i niñ yem, me bi nigil i kon maséé ni gwom me gwé.” (Añ Filipi 4:​11, 12.) A bé i mok i ngéda a bi tila bibañga bini. Ndi to hala, a bi ke ni bisu i gwélél Yéhôva ni maséé. A bi nigil i ‘kon maséé ni i gwom a bééna.’ Ibale hala a nlédél bés i kon maséé ni i gwom di gwé, niñ i Paul ni bibuk a bi pot bi nla hôla bés. I kon maséé ni i gwom di gwé i ta bé jam li ntomb, i yé jam di nlama nigil i boñ. Lelaa? Di tehe bilem bihogi bi bi ga hôla bés i kon maséé ni i gwom di gwé.

DI NIGIL I TI MAYÉGA

4. Inyuki i yé loñge i ti Yéhôva mayéga inyu gwom di gwé? (1 Tésalônika 5:18)

⁴ Ibale di nyi ti mayéga, d’a kon maséé ni i gwom di gwé. (Añ 1 Tésalônika 5:18.) I ngéda di nti Yéhôva mayéga inyu gwom di gwé, d’a lôôha bé tôñ inyu gwom di gwé ngôñ i bana ndi di gwé bé. Ibale di nkon maséé ni minson di gwé nano, d’a gwel nwo ni ñem wés wonsôna iloole di kahal tjelel inyu minson di gwé ngôñ i bana. Inyu hala nyen Bitilna bi nkal bés le i ngéda di nsoohe Yéhôva, di nlama yak ti nye mayéga! I ngéda di nyi ti mayéga, hala a mboñ le di bana “nsañ u Nyambe, u u nloo mam momasôna mut binam a nla nok.”​—Filipi 4:​6, 7.

5. Inyuki bon ba Israel ba bé lama ti Yéhôva mayéga? (Béñge yak titii.)

⁵ Di béñge le i jam li bi pémél bon ba Israel. Ngandak ngélé, ba bi tjeelene Yéhôva inyule ba bééna ngôñ i je bijek ba bi yék i Égiptô. (Ñañga bôt 11:​4-6) I yé maliga le niñ i bé let i ñoñ. Ndi kii i bé le i hôla bo i kon maséé ni i gwom ba bééna? Ba bé le ba hoñol i mam Yéhôva a bi bôk a bôñôl bo i ngéda ba bé minkol i Égiptô, ba tédék bo nyoo. Yéhôva a bi lona dimala i Égiptô, ba bi “yoñ gwom gwobisôna bi bon ba Égiptô,” hala wee gwom bi silba, gwom bi gôl, ni mambot. (Manyodi 12:​35, 36) I ngéda bon ba Israel ba bi pam i tuye Nkôibaga, bon ba Égiptô ba noñok bo, Yéhôva a bi boñ hélha jam, a bagal tuye ngélé iba. Mu ngéda yosôna ba bé i ñoñ, Yéhôva a bi jés bo mana. Ndi kii i bé i gwé bo? Njom i bé le, iloole ba kon maséé ni bijek ba bééna, bon ba Israel ba bi kahal tjelel inyu bijek ba bééna ngôñ i bana. Ba bi ti bé Yéhôva mayéga inyu gwom a bi ti bo.

6. Kii di nla boñ inyu ba bôt ba nyi ti mayéga?

⁶ Kii i nla ni hôla bés i ba bôt ba nyi ti mayéga? Pog, hiki kel, di nlama yoñ ngéda i hoñol mam malam momasôna Yéhôva a nti bés. Di nla tila mam ima tole mam maa ma ma nkônha bés maséé. (Minlénd mi Yérémia 3:​22, 23) Iba, di nlama ti mayéga. Di ti bôt mayéga inyu mam ba mbôñôl bés. Ndi Yéhôva nyen di nlama lôôha ti mayéga hiki ngéda. (Tjémbi 75:1) Aa, mawanda més ma nlama ba bôt ba nyi ti mayéga. Ibale di nhiôm ni bôt ba nyi ti mayéga, yak bés di ga yi ti mayéga; ndi ibale di nhiôm ni bôt ba nyi bé ti mayéga, to bés di ga yi bé ti mayéga. (Ndiimba Mbén 1:​26-28; 2 Timôtéô 3:​1, 2, 5) Ibale di meya di nti mayéga, d’a héléé bé i njelel i ngéda di gwé bé i mam di gwé ngôñ i bana.

7. Kii i bi hôla Aci i yi ti mayéga, bimbe bisai a bi kôhna?

⁷ Di béñge i jam li bi pémél sita yada le Aci, nu a yé i Indônésia. A nkal le: “I ngéda himala hi COVID-19 hi bé, me bé tehe le lôk kéé ihogi i bé sal ngandak, ndi me me bé boñ bé bañga jam. Jon me bé ha bé maséé.” (Galatia 6:4) Kii i bi hôla nye? Aci a nkal le: “Me bi bôdôl hoñol bisai me gwé hiki kel ni mam malam me gwé i ntôñ u Yéhôva. Ha nyen me bi ti Yéhôva mayéga. Hala a bi boñ le me ba toi maséé.” Ibale yak we u mboma nlélém ndutu, u yé le u boñ nlélém jam inyu boñ le u témb u kahal kon maséé.

DI BANA SUHULNYUU

8. Kii i bi pémél Baruk lisañ jada?

⁸ Lisañ jada, mut matila nu Yérémia le Baruk, a bé kon ha bé maséé ni i gwom a bééna. Bôlô yé i bé ndutu ngandak, a bé lama hôla Yérémia nu a bé kal bon ba Israel, ba ba bi ndogbene Yéhôva, le Yéhôva a ga kogse bo. Ngim ngéda i bi pam le Baruk a bé kon ha bé maséé ni i nson u. I nene le a bi bôdôl ndik tôñ nyemede, a tôñôk inyu mam ma bé kon nye ngôñ iloole a ti ngéda yé yosôna i nson u Yéhôva. Yéhôva a bi gwélél Yérémia inyu kal Baruk le: “U yé i yéñ gwom bikeñi inyu yoñ. U yéñ ha bañ ki i gwom bi.” (Yérémia 45:​3-5) A yé ndik wengoñle Yéhôva a bé kal Baruk le: “Kon maséé ni i gwom u gwé hanano.” Baruk a bi noñ i maéba ma, Yéhôva a kônôl nye maséé.

9. Inoñnaga ni 1 Korintô 4:​6, 7, suhulnyuu i nlama tinde bés i bigda kii? (Béñge yak bititii.)

⁹ Ngim mangéda, mankéé wada a nla hoñol le a kôli kôs ngim minson ikété likoda inyule a nyi jam ngandak, a nyi bôlô, tole a ma nom ngandak i ntôñ. Ndi to hala, i nla pam le ba ti lôk kéé ipe minson mi. Kii i nla ni hôla nye ha ngéda i? A nla yoñ ngéda i ôt mahoñol munu bibuk Paul a bi tila i kaat 1 Korintô 4:​6, 7. (Añ.) Minson nwés nwominsôna ni pék yés bi nlôl yak Yéhôva. Yéhôva a nti bé bés i mam ma inyule di nyi jam ngandak iloo bôt bape. Ndi konangoo yé i mbuma ñañ yon i ntinde nye i ti bés mo.​—Rôma 12:​3, 6; Éfésô 2:​8, 9. 

10. Kii i nla hôla bés i bana suhulnyuu?

¹⁰ Ibale di nyoñ ngéda i ôt pék mu ndémbél i Yésu, di ga bana suhulnyuu. Di bigda i jam li bi tagbe i kel Yésu a bi jôwa makôô ma banigil bé. Ñôma Yôhanes a bi tila le: “Kiki Yésu a bé yi le [1] Isañ a bi bii mam momasôna i moo mé, [2] a bi lôl yak Nyambe, [3] a kenek ki yak Nyambe, . . . a bôdôl jôwa makôô ma banigil.” (Yôhanes 13:​3-5) Yésu a bé le a kal le banigil bé bon ba jôwa nye makôô. Ndi ntel ngéda wonsôna a bi yén hana ’isi, a bi hoñol bé kekikel le kiki a yé Man Nyambe, a nlama bana loñge ndap, ngandak moni, tole a niñ loñge iloo bôt bape. (Lukas 9:58) Yésu a bé mut suhulnyuu, nu a bé kon maséé ni i gwom a bééna. A bi yigle toi bés ndémbél ilam.​—Yôhanes 13:15.

11. Lelaa suhulnyuu i bi hôla Dennis?

¹¹ Dennis, nu a yé i loñ Ôland, a noode noñ ndémbél i suhulnyuu i Yésu, ndi bun a ta bé. A nkal le: “Ngim mangéda, me yé me yimbe le me gwé mahoñol ma ngôk ni le me nkon ha bé maséé ni i gwom me gwé, téntén i ngéda mankéé numpe a nkôs minson ikété likoda. Ha ngéda i, me yé me nigil bikaat bi bi mpôdôl suhulnyuu me bi tééda i JW Library.^® Me bi yoñ yak minkwel minhogi mi mi mpôdôl suhulnyuu, me mbéna emble nwo.a Me bi nok le i bôlô yosôna di nsal i yé inyu ti Yéhôva lipém, ndi he bé inyu binene. Yéhôva a yé maséé i gwélél hiki wada wés munu ntôñ wé, nye ki nyen a nsayap nson u hiki mut.” Ibale u nyimbe le u nkon ha bé maséé ni i gwom u gwé, boñ biliya i kônde bana suhulnyuu. Hala a ga boñ le u kônde tiige bebee ni Yéhôva, u kon ki maséé ni i gwom u gwé.​—Yakôbô 4:​6, 8.

DI HOÑOL I MAM YÉHÔVA A MBÔN BÉS

12. Mimbe mimbônga mi Yéhôva mi nkônha bés maséé? (Yésaya 65:​21-25)

¹² I ngéda di nhoñol i mam momasôna Yéhôva a mbôn bés, di ntôñ ha bé ngandak. Bibañga bi yé i kaat Yésaya bi ñéba bés le Yéhôva nyemede a nyi le niñ i nlet ngandak, bi ñunda ki le ndék ngéda, Yéhôva a ga mélés mandutu més momasôna. (Añ Yésaya 65:​21-25.) Di ga bana mandap malam, di niñik loñge ibabé i kon woñi. Di ga bana bôlô i i nlémél bés, di jek bijek bilam. Jam jo ki jo li ga tééñga ha bé bés, to bon bés. (Yésaya 32:​17, 18; Ézékiel 34:25) Niñ yés i ga ba ilam ngandak i dilo di nlo.

13. Imbe ngéda di nlama hoñol i mam Yéhôva a mbôn bés?

¹³ Nano nyen di nlama toi hoñol i mam momasôna Yéhôva a mbôn bés. Inyuki? Inyule di yé “i dilo di nsôk,” yak mangéda ma yé “nledek kiyaga” inyu bésbobasôna. (2 Timôtéô 3:1) Ndi hiki kel, Yéhôva a nhôla bés i hônba, a ñéga bés, a nlédés ki bés. (Tjémbi 145:14) Yak botñem yés i nhôla bés i ngéda di gwé mandutu. Ibale hala a yé we ndutu i tééda lihaa joñ, baa hala a nkobla le w’a yep niñ yoñ yosôna? To jam. Yéhôva a’ ti we mam momasôna ma ga béda we i ngéda u mba i mbok yondo. (Tjémbi 9:18; 72:​12-14) Bebek u gwé kon u u nom ngandak, tole kon u mahoñol, tole béba kon ipe. Baa kon woñ u ga mal bé kekikel? To jam. I mbok yondo, to makon, to nyemb bi ga ba ha bé. (Masoola 21:​3, 4) I ngéda di nhoñol i mimbônga mi, di nhéléé bé i njelel, di ntôñ bé to inyu jam jo ki jo hanano. To ibale di mboma ngitelepsép, di nkon, tole mut wés di gwéhék a nwo, to imbe ndutu di mboma, di nla ba maséé. Inyuki? Inyule to imbe njiiha di mboma munu nkoñ ’isi unu, di nyi le “i nom ndik ndék ngéda,” ni le i mbok yondo, d’a bana ha bé ndutu yo ki yo.​—2 Korintô 4:​17, 18.

14. Kii i nla hôla bés i bana botñem i ngui?

¹⁴ Di nok le i ngéda di nhoñol i mam Yéhôva a mbôn bés, hala a mboñ le di ba maséé, kii i nla ni hôla bés i ba nkwoog nkaa le mimbônga mi Yéhôva mi ga yon? Ngim bôt i nhaba biléman inyu tehna loñge. Yak bés di nlama boñ ngim mam le ndi di bana botñem i ngui le i mam Yéhôva a bi bôn bés, a ga boñ mo. Ibale liyep li nai, di bigda i ngéda di mba i mbok yondo, moni mi ga ba ha bé nseñ, d’a bana ha bé mapil, mut nye ki nye a ga yep ha bé. Ibale di ntôñ inyule di nkôhôk bé ngim minson di gwé ngôñ i bana, di hoñol lelaa di ga tôñ ha bé inyu nya mam i i mbok yondo i ngéda di ga ba peles, inyule d’a bana niñ ilam, di gwéélak Yéhôva i boga ni boga. (1 Timôtéô 6:19) I nla bane bés ndutu i hoñol mam Yéhôva a mbôn bés ibale di nhéléé i hoñol mandutu més. Ndi ibale di nyoñ ngéda i hoñol mam Yéhôva a mbôn bés, d’a tehe le di nkahal hôya mandutu més.

15. Bibañga bi Christa bi niiga kii bés?

¹⁵ Di béñge lelaa botñem i bi hôla Christa, nwaa Dennis nu di mbôk di pôdôl. A nkal le: “Me gwé kon u u mboñ le me nyén i yééne i bibôk bi bôt, u boñok ki le me nañal ngandak inyule u nwéés me. Me nok njôghe hiki kel. To kekii, dokta a bi kal me le botñem i ta bé le me mbôôp. Ha nyen me bi hoñol le, ‘I mut nunu a nyi bé mimbônga mi Yéhôva.’ Me me nhoñol mimbônga mi Yéhôva, inyu hala nyen me ntôñ bé. Munu nkoñ ’isi unu, niñ i nlédél me. Ndi i dilo di nlo, m’a bana bañga niñ i mbok yondo!”

“I BÔT BOBASÔNA BA NKON YÉHÔVA WOÑI, BA NHAÑ BÉ TO YOM”

16. Inyuki Kiñe David a bi tila le i bôt bobasôna ba nkon Yéhôva woñi “ba nhañ bé to yom”?

¹⁶ To ibale di nkon maséé ni i gwom di gwé, d’a boma mandutu. I ndék yosôna, bon ba Kiñe David baa ba bi wo. Ba bi ôm nye nsohi yañga, ba liibana nye, yak Kiñe Saulô a noñ nye nwii ndi nwii inyule a bé yéñ nol nye. Mu mandutu ma momasôna, David a bi kal le: “I bôt bobasôna ba nkon Yéhôva woñi ba nhañ bé to yom.” (Tjémbi 34:​9, 10) Inyuki a bi kal hala? Inyule ngwélél Yéhôva a nyi le a’ boma ndik mandutu. Ndi kekikel, a nhañ bé i mam ma mbéda toi nye. (Tjémbi 145:16) To di mboma imbe ndutu, di nyi le Yéhôva a ga hôla bés, ni le di nla toi ba maséé.

17. Inyuki u nlama nigil i kon maséé ni i gwom u gwé?

¹⁷ Yéhôva a gwé ngôñ le u kon maséé ni i gwom u gwé. (Tjémbi 131:​1, 2) Inyu hala nyen u nlama boñ kii yosô u nla inyu kon maséé ni i gwom u gwé. Ibale u mbéna ti mayéga, u bak mut suhulnyuu, u ban-ga ki botñem i ngui, ha nyen w’a kal le: “Ñ, me yé maséé.”​—Tjémbi 16:​5, 6.