Tjél base i bitembee; bôñôl base i maliga

1. Ikolba ni libéghene, ki bôt ba nlama pohol i len ini?

YÉSU a kal le: “Nu a ta bé ni me a nkolba me.” (Matéô 12:30) Di yé i pes Yéhôva tole i pes Satan. Libim li bôt li nhoñol le ba nsélél Djob nya a ngwés. Ndi Bibel i nkal le Satan a “nyumus nkoñ isi wonsôna.” (Masoola 12:9) Didun di bôt di nhémle le ba mbégés Djob, ndi i maliga Satan Nsohop nyen ba mbôñôl! I len ini bôt ba nlama pohol: Tole ba nsélél Yéhôva, “Djob li maliga,” tole Satan, “isañ bitembee.”​—Tjémbi 31:5; Yôhanes 8:44.

Kobol wemede isi kwéha base

2. Imbe njel yada Satan a nheñ i sôña bôt le ba bégés Yéhôva?

² Liyoñ bikidil i sélél Yéhôva li yé lipohlak li pék, lipohlak li li mboñ le Yéhôva a kônôl we maséé. Ndi Satan a ta bé maséé ni mut nye ki nye a nsélél Djob; a nti bet ba mboñ hala mandutu. Njel yada a ngwélél i yé le a ntinde bôt bape, to mawanda, to bôt ba ndap lihaa, le ba yahal we to tééñga we. Yésu a béhe le: “Ni maliga, baoo ba mut b’a ba bôt bé ba ndap.”​—Matéô 10:36.

3. Ibale lihaa joñ to mawanda moñ ba nkolba we le u bégés bañ Djob, kii w’a boñ?

³ Ibale hala a mpémél we, lelaa w’a boñ? Ngandak bôt i nyi le libéghak ba mbégés Djob li yé bitembee. Ndi ba ntiida i bagla ni jo. Ba nhoñol le i tiga nene le ba nkénés mahaa map. Baa hala a yé mahoñol ma pék? Ibale u nyi le bôt boñ ba bikoo bi nyuu ba ñôt bañga, ba w’a béhe bé bo le bañga y’a boñ bo béba? W’a ke bé ni bo i ôt bañga, hala ga?

4. Kinje jam Yôsua a kal bon ba Israél inyu libéghene i dilo tjé?

⁴ Yôsua a ti bon ba Israél makénd le ba nwas maboñok ma base bitembee ni bilem bi biloñ bi basôgol bap. A kal le: “Hanano kona Yéhôva woñi, ni gwélél nye ibabé kwo ni maliga, ni lep banyambe basôgôl banan ba bé sélél ii pes ngwañ Lom ni i Egiptô, ni sélél Yéhôva.” (Yôsua 24:14) Yôsua a béne Djob manôgla, jon Yéhôva a bi sayap nye. Ibale di nsélél Yéhôva ni manôgla, a’ sayap yak bés.​—2 Samuel 22:26.

Leba gwom bi ngwéélana ikété libéghene li bitembee

5. Inyuki di nlama lep gwom bi makañ?

⁵ I kobla isi kwéha base i nsômbôl ki kal le di nlama tjé hiki yom makañ di yé le di bana, kii bo bibobe, bibénél, dilonde ni minkôm mi makañ, ni mam ma mpôôna mo. Hala a yé jam li yé nseñ inyu unda le di nti Yéhôva bot yés ñem yosôna.

6. Kii bikristen bi bisu bi bi boñ ni bikaat gwap bi makañ?

⁶ Béñge ki yom bikristen bi bisu bi bi boñ ngéda ba bi yoñ bikidil le ba mbôñôl bañga base. Bibel i nkal le: “Jôga ikété baboñ makañ ba bi lona bikaat gwap, ba ligis gwo i bisu bi bôt bobasôna.”​—Minson mi baôma 19:19.

7. Kii di nla boñ ibale mimbuu mimbe mi ntéénga bés?

⁷ Ngim bôt i bi bôdôl sélél Yéhôva, ndi kii ba bé yoñ ngaba ni liemb, ni ngwe’, tole makañ mape, bebek mimbuu mimbe mi ngii tééñgaga bo. Ibale hala a mpémél we, sébél Yéhôva makeñi ikété masoohe, u simga jôl jé. A’ hôla we.​—Bingéngén 18:10; Yakôbô 4:7.

8. Lelaa bikristen bi ntehe bisat, bi ôñgba, ni bititii bi kwéha base?

⁸ Bet ba nsômbôl sélél Djob ba nlama bé tééda, to gwélél sat, to ôñgba, to titii i kwéha libéghene. Bikristen bi maliga bi “nkil ni hémle, ha ni mis bé.” (2 Korintô 5:7) Ba nôgôl mbén Djob i i nsôña le mut a bégés bañ ôñgba yo kii yo.​—Manyodi 20:4, 5.

Adba ni litén li Yéhôva

9. Mambe maéba Bibel i nti inyu yila mut pék?

⁹ Bibel i nkal le: “Mut a nke lôñ ni bôt ba pék a’ yila mut pék.” (Bingéngén 13:20) Ibale di ngwés ba bôt ba pék, di nlama ke lôñ, tole di nlama adba, ni Mbôgi Yéhôva. Ba yé bôt ba nkil i njel i nkena niñ.​—Matéô 7:14.

10. Lelaa Mbôgi Yéhôva i nla hôla we i sélél Djob?

¹⁰ Mbôgi Yéhôva i nyoñ toi ndun ni bôt. Nson wap u yé le ba hôla bôt ba miñem mi téé sép i nok maliga ma Bibel, ma ma nkena i niñ boga. Ba nla hôla we i nigil Bibel yañga. B’a timbhe mabadga moñ ni unda we lelaa u gwélél yi i Bibel i niñ yoñ.​—Yôhanes 17:3.

11. Lelaa makoda ma bikristen m’a hôla we?

¹¹ I makoda map, ma ba gwé lem i lôôhene ikété Ndap Ane, w’a nigil iloo ha i yi manjel ma Yéhôva. B’a lédés ngôñ yoñ i gwélél base i maliga. W’a kôs ki mahôla i niiga bape le yak bo ba yi maliga ma Bibel.​—Lôk Héber 10:24, 25.

12. Lelaa masoohe ma nla hôla we i sélél Djob?

¹² Kiki w’a ba u nkônde nigil sômbôl, ni bitééne bi Djob, hala nyen manjel mé ma gwéha m’a kônde lémél we. Yak ngôñ yoñ i boñ mam ma nkônha nye maséé ni tjél mam ma nhindha nye ñem y’a hol. Hoñol le u nla tiige bebee ni Yéhôva ni njel masoohe i bat nye le a hôla we i boñ yom i téé sép ni tjél yom i yé be.​—1 Korintô 6:9, 10; Filipi 4:6.

13. Lelaa u nla kônha ñem Yéhôva masé?

¹³ Ni ngéda, kii w’a ba u nhol i mbuu, w’a tehe i ba bé pééna le u nlama ti nye wemede nkikip, u sôblana kiki Mbôgi Yéhôva. Ngéda w’a adba ni litén li Yéhôva, w’a kôhna ñem Yéhôva maséé. (Bingéngén 27:11) W’a ba wada ikété litén li masé li Yéhôva, li a nkélél le: “M’a yén i boni, me hiômôk ikété yap, ndi m’a ba Nyambe wap, yak bo ki b’a ba [litén jem].”​—2 Korintô 6:16.